Read idege 1 ALA ỊKỌRỊNTỊ 5 Bible Online

1 ALA ỊKỌRỊNTỊ 5 - idege bible

1 ALA ỊKỌRỊNTỊ 5

¹Ohi oruru nya ụya ọhọhọ ọlẹpwarịrị nyanụ pwụ ụrụ nyam lẹ! Ụma nya ụya ọhọhọ onyobyi ọlẹ kọ juwa ẹ-ẹpwarịrị nyanụ lẹ, angịlẹ kị dọmwụ ri angịnyị nya Ohe Oluhye riri ka lẹ, ị́ ka byẹjẹ họ ụma nya ang onyobyi ọlịnyị myị́ kaka. Chajị, m wo oja yẹkẹẹ, ọngọhẹ nyanụ, nyị kpa ahụ nya adamwụ ẹ-ẹpwa nyamwụ juwa họ ụya tọọ ịnyịnyịịnyị.

²Ẹ-ẹpwụ nya ẹla ọtịpyọ ọlịịwẹ, ọọwa, anụ myịmyị jẹ́ juwa kịlahị-ịlahị la ọbọọchẹ ohihi nyanụ myị́ lẹ? Abwẹla ọhọhọ onyobyi ọlịịwẹ á kpụ kanụ ka juwa bwọ ayiiji u-uhye nyamwụ ka? Anụ́-ụ ku ọlẹng ọlẹ kọ họ ẹlẹwẹ kpehe hi ẹpwụ nya ogu nyanụ anụ ala ịchọọchị mẹ.

³Am lẹ, ọ ri nya ịlẹhị, ḿ juwa tanụ ẹ-ẹpwụ nya ugbinyịrọ koo. Ma, m tị juwa tanụ ẹ-ẹpwụ nya olegu nyam. Lẹ, m dọmwụ ya eje wu ọlẹng ọọwa ene-ene,

⁴u-uhye nya ang onyobyi ọlẹ ká ọlẹng ọọwa họ lẹ. Ọngịrị nya Ọngọlahị iJisọsị, m kpa chị eje ọọwa lala am nyaa juwa ẹ-ẹpwarịrị nyanụ ọlam-ọlam lẹ! Ụka kaanụ ala ịchọọchị nyanụ wuu á ka la ọjịra-jịra lawụlẹ, olegu nyam tịtị ka juwa tanụ ịnyịnyị! Anụ́ họ lẹ, anụ́-ụ kpa ọngịrị nya Ọngọlahị iJisọsị tụụbwọ hi,

⁵ọlẹng ọọwa ju Ohe Onyobyi ụ-ụbwọ chajị ká imyi nya ugbinyịrọ ọlẹpwụ nya ọlẹng ọọwa ka jẹ́-ẹ ta ayịreji, ká ugbodu okpukpuru nyamwụ ka jẹ́-ẹ chịda la ẹnụtụrụ nya eje nya Ọngọlahị iJisọsị mẹ.

⁶Ọlẹ ká ẹla ọtịpyọ ọlịnyị ji ẹpwarịrị nyanụ, kanụ myịmyị wẹẹ hi ọbọọchẹ myị́ lẹ, ọ́ há ka! Lee, ánụ tị́ jẹ́ yẹkẹẹ, ịjọnwa ochiche-ochiche nyaa kaa họ ká ẹbẹ nya ịkaa ọlẹpwụ-lẹpwụ nyị kaa mịrị hum myị́ lẹ ka?

⁷Chajị nya ọọwa lẹ, anụ tụ ibyi nya ịjọnwa onyogo nya ọhọbịrị ọhọhọ kpehe hi ịlọnụ, chajị kanụ ka jẹ́-ẹ ri ẹbẹ nya ịkaa onyeewe ọlẹ kị ya ịjọnwa ju kaka mẹ. Chajị, ẹbẹ nya ịkaa ọmịrịị mịrị-ka, anụ angịnyị nya Ohe Oluhye a dọmwụ ri ẹ-ẹpwụ nya ịKịrayịsị ene-ene lẹ. Chajị ịKịrayịsị ọlẹ kọ ri Ọnyị ọkpịlọ nya Ang Oriri Ọchịpwụrụ nyahị lẹ, ị hwoo kpa kaka kịla iya wọnụ nyahị ju wuu lẹ!

⁸Lẹ, Ohe Oluhye nwụla ang oriri ọọwa nọ hahị kpá lẹlẹ, anụ kẹwẹ kahị kele kaka ri ang oriri ọọwa mẹ. Ụ-ụma nya ịkaa ọlẹ kị kpa ịjọnwa onyogo nya ọhọbịrị ọhọhọ, lala imajẹ ọlala bala ang onyobyi ọhọhọ a wẹ kahị ka ri ụ-ụwa kaka! Ma, ịkaa ọmịrịị mịrị-ka, nya owuru ọlala abwẹla ọhọhọ ị-ịlahị nya Ohe Oluhye bala ẹla nya ịlẹhị ọhọhọ kem, a wẹ kahị ka ri ụ-ụwa lẹlẹ.

⁹Ẹ-ẹpwụ nya ụpwụ ọlẹ kam ka du wanụ ene lẹ, m byinu ụ-ụwa yẹkẹẹ, anụ juwa ju ogu ta angị họ ụya kpong-kpong ka.

¹⁰Ọlẹ kam ya wẹ lẹ, aangịlẹ kị ri angịnyị nya Ohe Oluhye ka, ịlẹ kị juwa họ ụya bala o-juwa la imajẹ ẹ-ẹga nya ang nya angịnyị aanaa, juwa nu aa ang nyaa ịịwa lagbụrụ lee angị kpụ́ ijiga ilodehe ọlẹ wuu, m rụ́ ka. Chajị, ó-ri kanụ ka juwa cheji ba ụma nya angịnyị ịlịnyị wuu lẹ aalẹ, anụ tị tị ka mwụ rụ hi odehe ọlẹ ka ẹgẹhẹ ene kọ ka chịkpẹẹ!

¹¹Ma, m da ụpwụ nyam ọọwa kaka ya ẹla rụ́ ọ-yẹ ju lawụlẹ nyanụ bala ọngọngọhẹ ọlẹ wuu kọ juwa wụrụ ịlọmwụ ọnyadanụ ẹ-ẹpwụ nya ịKịrayịsị lẹ, ká ọngọọwa á tụtụm myịmyị juwa la ọhịhị nya ụya ọhọhọ lee ọhịhị nya imajẹ ọlala lee o-ri ọngọ juwa kpụ́ ojiga lee o-ri ọngọ juwa kaa do angịkịla ido lee ọngọ kaa nwa ere juwa ya lee ọngọ kaa nu ang nya angịnyị lagbụrụ lẹ, anụ dọmwụ juwa baba ju epwedii nya ang oriri ta ọngọọwa kpong-kpong kaka.

¹²Alọhọbịrị ịlẹ kị ri angịnyị nya Ohe Oluhye ka, wẹ lẹ, ẹẹla-ịyẹ, am ọngịnyị nya Ohe Oluhye a tị́ ka jẹ́-ẹ ye ya u-uhye nyaa ịwa? Ma, angịnyị nya Ohe Oluhye ịlẹpwarịrị nyanụ ịlẹ kị tị wẹẹ họ ang onyobyi lẹ, ánụ jẹ́ kịịwa, anụ ka juwa chị eje u-uhye nya ang onyobyi ọhọhọ nyaa ịwa ka?

¹³Ohe Oluhye ayịdang la ịlọmwụ a ri Ọngọ ka chị eje u-uhye nya ọhọbịrị ọhọhọ nya angịlẹ kị ri ala ịchọọchị-ka wuu lẹlẹ. Chajị nya ọọwa lẹ, anụ ku ọngọhọbịrị ọwẹ kpehe hi ẹpwụ nya ogu nyanụ anụ ala ịchọọchị pyii, jaabwọ ká Ụpwụ Ịgọgọ ya mẹ!