Read idege 1 ALA ỊKỌRỊNTỊ 6 Bible Online

1 ALA ỊKỌRỊNTỊ 6 - idege bible

1 ALA ỊKỌRỊNTỊ 6

¹Ịịyẹ a tị́ du ká ụka ọlẹ kaanụ anụ anyadịda ẹ-ẹpwụ nya ịKịrayịsị á họ ẹla wụ awụlẹ ẹjẹ lẹ, kanụ mwọọgịlẹ jẹ́ juwa byị ẹjẹ-ẹ kpa eje nya ẹla ọọwa kele ka ịkọtụ ka ijata nya angị jẹ́ Ohe Oluhye-ka dachichi hi ọ-ka wụrụ eje nya ẹla ọọwa ka ijata nya angị ịgọgọ nya Ohe Oluhye mẹ?

²Lee, ánụ tị́ jẹ́ yẹkẹẹ, angị ịgọgọ nya Ohe Oluhye nyị juwa ka la alodehe ọlẹ wuu eje ị-ịlahị wẹẹ ka? Ee lẹ, ó-ri ká alodehe ọlẹ á ka chịnụ ọha la ọ-la eje kaka lẹ, anyanyị, eje ọchịchị u-uhye nya ihwiri nya ala ịlẹpwarịrị nyanụ a tị́ ka jẹ́-ẹ chịnụ ọha myị́ mẹ?

³Lee, ánụ tị́ jẹ́ yẹkẹẹ, ahị angị ịgọgọ nya Ohe Oluhye nyị juwa ka la alegu-ẹrụ nya Ohe Oluhye eje ị-ịlahị wẹẹ ka? Ee lẹ, ó-ri ịnyị lẹ, anyanyị, ẹla ọlam-ọlam chajị nya ọhịhị olodehe ọlẹ, a tị́, tị tị ka jẹ́-ẹ ri ang olujwo hanụ la oyaya myị́ mẹ?

⁴Ee lẹ, ọ tị́, tị tị lanyị kọ ri ká eje nya ẹla chajị nya ọhịhị ọlẹ á kpeji ẹ-ẹpwarịrị nyanụ lẹ, kanụ mwọọgịlẹ kaa juwa wụrụ eje ọlịnyị ka ata nya angị jẹ́ ịngịngịhyẹ chajị nya ịchọọchị ka dachichi tịtị mẹ?

⁵Ẹlẹwẹ lam oyoyi hanụ lụmẹ kaka kpoye. Anụ ya ká ọngọngọhẹ ọlẹ kọ ri ọngọ jẹ́ ẹla kpụ ọ-ka jẹ́-ẹ chị eje nya ẹla ọlịnyị ẹ-ẹpwarịrị nyanụ anụ anyadịda ẹ-ẹpwụ nya ịKịrayịsị, á juwa kpong-kpong kaka wẹẹ ịnyịlẹhị lẹ?

⁶Ma, ọkọkọ nya ọọwa lẹ, anụ anyadịda ẹ-ẹpwụ nya ịKịrayịsị a wẹẹ da ụpwụ wu awụlẹ kele ka ịkọtụ ka ata nya angị jẹ́ Ohe Oluhye kaka, kịịwa a dachichi ka ri angị kpa ọnụ nyaa chị eje nya ẹla hanụ wẹẹ ịnyịlẹhị lẹ ka, lee?

⁷Ọlẹ ká ẹla ọ-họ wụ awụlẹ ẹjẹ bala oyi o-juwa yi awụlẹ yi ọlịnyị jẹ́ juwa ẹ-ẹpwarịrị nyanụ jiji wẹ lẹlẹ, ang onyobyi ọọwa kpanụ keji lụmẹ lẹ! Ịnọ, ọ́ kpụ ká alodehe ịlẹ kị ri angị jẹ́ Ohe Oluhye-ka ụbwaa a chịla kị ri angị họ ẹla ọtịpyọ ọlịnyị wụụnụ ẹjẹ kem ka? Ịnọ, ọ́ kpụ kịịwa ụbwaa, a chịla kị ka ri angị juwa go ang nyanụ yi oyi ịnyịnyị kem ka?

⁸Ma, ọkọkọ nya ọọwa lẹ, anụ anụ anyadịda ẹ-ẹpwụ nya ịKịrayịsị, anụ mwọọgịlẹ ri angị juwa họ ẹla ọtịpyọ ọlịnyị wụ awụlẹ ẹjẹ bala o-juwa yi awụlẹ oyi dachichi lẹlẹ.

⁹Lee, ánụ tị́ jẹ́ yẹkẹẹ, angị họ abwẹla onyobyi wuu nyaa ri angịlẹ kịị nyị́ ka jẹ́-ẹ ji ẹpwụ nya ogu nya angị ka ri ugu nya ịpyị Adịrahụ nya Ohe Oluhye kpong-kpong ka lẹ ka? Anụ myị kị pịrịịnụ ju koo! Angịlẹ kị ri angị juwa họ ụya wuu lee angị juwa kpụ́ ijiga wuu lee angị juwa da ẹla-ahụ wuu lee alẹng ịlẹ kị kaa juwa họ ụya ta alẹng aanaa wuu,

¹⁰lee, angị ri aleyi wuu lee angị ri alimajẹ wuu lee angị ri angị nwa ere juwa ya wuu lee angị ri angị juwa do angịnyị ido wuu lee angị ri alagbụrụ wuu lẹ aalẹ, ị́ ka jẹ́-ẹ ri ugu nya ịpyị Adịrahụ nya Ohe Oluhye myị́ kpong-kpong kaka!

¹¹Ịnọ, eje nya ịhọbịrị ịhọhọ ịlịịwẹ wu angịhyẹ nyanụ lụka ọlẹ kanụ jẹ́ Ohe Oluhye ene lẹka. Ma, lẹẹlẹẹ tị lẹ, anụ ri angịlẹ ká Ohe Oluhye yịlẹ ibyi nya ịhọbịrị ịhọhọ nyanụ wuu hiinu, rụ́ụnụ cheri-cheri bala ọ-ya eje owuwu nyamwụ rụnụ ị-ịlahị nya ịlọmwụ bwula ẹnyị nya Ọngọlahị iJisọsị ịKịrayịsị bala ọngịrị nya Olegu Ịgọgọ nya Ohe Oluhye nyahị lẹ!

¹²Ọ ri nya ịlẹhị, lala ọngịnyị nya Ohe Oluhye, m ka la ọngịrị yẹkẹẹ, “Am lẹ, m la ịlọm nyọka họ ang myị́ ang ọlẹ kọ bam myị́ lẹ, chajị ḿ ji ekpeleji nya ehile nya ọngịnyị ehe kaka.” Ee, ọngịnyị ka la ọngịrị họ ịnyị myị́ ịnyịlẹhị! Ma, ang myị́ ang wuu á tị ka ri ang o-ju apyobwuna hahị la ọhọhọ wuu ka. Ọ ri nya ịlẹhị, am ayịdang lẹ, m ka la ọngịrị họ ang myị́ ang ọlẹ kọ bam myị́ ịnyịnyị! Ma, ḿ tị tịtọ kam ka ri ọnyọhị nya ịngịngịhyẹ ọlẹ wuu kam ka juwa họ odehe ọlẹ kpong-kpong kaka.

¹³Ọ ri nya ịlẹhị, ị họ ang oriri chajị nya ugbẹpwụ, ị tị họ ugbẹpwụ chajị nya ang oriri jaabwọ ká angịhyẹ kaa ya. Ee, ọọwa ri ịnyịlẹhị. Ma, Ohe Oluhye tị la ọngịrị ka ta ugbẹpwụ ọọwa ayịreji bala ang oriri ọlẹpwụ nyamwụ myị́. Chajị nya ọọwa lẹ, ugbinyịrọ nyahị angịnyị ehe ọlẹ ká Ohe Oluhye ya hahị lẹ, ó ri ịnyọka juwa kpa họ ụya jaabwọ kọ háahị kaka ba kpong-kpong ka. Ma, ugbinyịrọ nyahị ri ang ọlẹ kahị ka juwa kpa ju ihi nya Ọngọlahị kem, ká Ọngọlahị ayịdang tịtị ka ri olegbeju ọ-ya ọhịhị ha ugbinyịrọ nyahị ịnyịnyị ịnyị!

¹⁴Jaabwọ ká Ohe Oluhye wule Ọngọlahị eji bwula igu lẹ, Ohe Oluhye tịtị ka kpa ọngịrị nyamwụ ọọwa wuleehi eji bwula igu ịnyịnyị.

¹⁵Ánụ́ jẹ́ yẹkẹẹ, ugbinyịrọ nyahị ahị angị myị la Ohe Oluhye wuu nyị ri ẹga nya ịnyịrọ nya ịKịrayịsị ayịdang ka? Ọọwa lẹ, m ka mwọọgịlẹ juwa kpa ẹga nya ugbinyịrọ nya ịKịrayịsị ọọwa kaka yẹ la ang-abwọ nya ụkụrwọ nya akpara ọhọhọ ta alakpara lẹlẹ? Ohe Oluhye a pwa ang onyobyi ọlịnyị!

¹⁶Ánụ́ jẹ́ yẹkẹẹ, ọngọlẹ kịị nyị juwa họ ụya ta ọlakpara lẹ aalẹ, ọlẹng ọlịnyị bala ọlakpara ọọwa nyị ri ugbinyịrọ ookpokpo lẹ ka? Chajị, ị da ụ-Ụpwụ Ịgọgọ yẹkẹẹ, “Ọnyang bala ọlẹng ookpokpo a ka tụchawụlẹ ri ugbinyịrọ ookpokpo lẹlẹ.”

¹⁷Ma, ọng myị́ ọng ọlẹ kọọwa bala Ọngọlahị la á la ọtụchawụlẹ bwula ọmyịmyị ọlala nyamwụ lẹ aalẹ, ọ tịtị ri ọngịnyị ọngọ ookpokpo ẹ-ẹpwụ nya olegu bala Ọngọlahị la lẹ.

¹⁸Anụ́-ụ chị ịgọ nya ụya ọhọhọ ọgwọgụ mẹ. Chajị, ụma nya ọhọbịrị myị́ ọhọbịrị ịkịla ịlẹ wuu ká ọngịnyị ehe kaa họ lẹ, ọ́ kaa kpa ugbinyịrọ nya ịlọmwụ wuu họ ịhọbịrị ịịwa ka! Ma, ọhọbịrị nya ụya ọhọhọ tị lẹ, ọ datị. Chajị, ọng myị́ ọng ọlẹ kọ họ ang onyobyi nya ụya ọhọhọ lẹ aalẹ, ugbinyịrọ nya ịlọmwụ kpangga a wẹ ká ọngọọwa họ ang onyobyi ọọwa ba lẹlẹ.

¹⁹Ọọhọ! Ọ ri ánụ jẹ́ yẹkẹẹ, ugbinyịrọ nyanụ ọwẹ kpangga a ri ube ọ-kụ ẹpwa nya Olegu Ịgọgọ ọlẹpwụ nyanụ ọlẹ ká Ohe Oluhye hu hanụ ka? Aanụ ayịdang a la ịlọnụ kaka!

²⁰Chajị, Ohe Oluhye kpa ịwọ ọlịnya lụmẹ nya ịKịrayịsị ranụ ha ịlọmwụ bwula ọlẹ ká ịKịrayịsị gbu igu wọnụ nyanụ ju lẹ! Lẹ, anụ́-ụ juwa kpa ugbinyịrọ [bala olegu nyanụ wuu] họ ang ọlẹ kọ ka ya ogbo ha Ohe Oluhye kem mẹ!