Read idege 1 ALA ỊKỌRỊNTỊ 7 Bible Online

1 ALA ỊKỌRỊNTỊ 7 - idege bible

1 ALA ỊKỌRỊNTỊ 7

¹Lẹẹlẹẹ lẹ, m tịtọ kam ka wẹẹnụ ala ịlẹ kanụ da ju ụ-ụpwụ du wam ugbẹnyị lẹ! Anụ wo mẹ! Ịnọ, ọ́ dọmwụ chịla ká ọlẹng ka juwa kpa ụbwọ kaka ju ẹla nya ọnyang ọhẹ-lọhẹ kpong-kpong ka!

²Ma, chajị nya ọmayẹ ọlẹga nya ụya ọhọhọ tị lẹ, ọ chịla ká ọlẹng ọnyị myị ọnyị ka ye ahụ nya ịlọmwụ bala ọnyang ọnyị myị ọnyị ọ-ka rwọ ọrụ nya ịlọmwụ ịnyịnyị.

³Ọ chịla ká ọrụ-ahụ ọnyị myị ọnyị ka họ ebwo nya ụkụrwọ oloye nyamwụ jịra hiigu-hiigu ẹ-ẹga nya ahụ nyamwụ. Ọ tị chịla ká ahụ ọnyị myị ọnyị tịtị ka họ ebwo nya ụkụrwọ oloye nyamwụ ọwa jịra hiigu-hiigu ẹ-ẹga nya ọrụmwụ ịnyịnyị. Chajị ká ọngọngọhẹ lẹpwụ nyaa á ka ri ọngọ juwa họ ọngọkịla nyamwụ ri kpong-kpong kaka.

⁴Aahụ ọnyang ọ-rwọ ọrụ ayịdang a la ugbinyịrọ nya ịlọng kaka. Ma, ọrụ nyang a la ugbinyịrọ nyang lẹlẹ. Aahụ ọrụ ayịdang a tị tịtị la ugbinyịrọ nya ịlọng kaka ịnyịnyị! Ma, ahụ nyang a la ugbinyịrọ nyang lẹlẹ.

⁵Anụ juwa wu awụlẹ nọ limyi nya ube ọnọnọ koo! Kẹnẹ-kẹnẹ, ó ri ịnya ọnụ ọmyịmyị nyanụ anụ angị imimiiye kanụ ka mwụ ịnyọ lụka ọhẹ, chajị kanụ ka jẹ́-ẹ nọ limyi ha Ohe Oluhye bala ọraabwọ lẹ, mẹ ịnyị! Ma, anụ́ tị-ị tịrẹkpẹ ka ẹga nya awụlẹ myịmyị mẹ. Ó-ri ịnyị kaka lẹ aalẹ, Ohe Onyobyi a ka kpa ọmayẹ wanụ u-uhye nya ịlọnụ o-wu kpa myị́ kaka lẹlẹ.

⁶M jam ya ẹla ọlẹ tanụ bwula irya nya ịlọm kem. E-ehile a lẹẹ kam wẹẹ danụ ka.

⁷Chajị, ịnọ, ọ hám ká ọng myị́ ọng lẹpwarịrị nyanụ jẹ́-ẹ kụ okiro lala am-am ayịdang. Ma, ọhaha ọlẹ ká Ohe Oluhye tị hu ha ọngọngọọng nyahị lẹ, ọ datị hi awụlẹ. Angịhyẹ ka la ọhaha nya ọ-kụ okiro myị́. Angị ịkịla tị ka la ụma nya ọhaha ọkịla myị́ ịnyịnyị.

⁸M jam ya ẹla ọlẹ ta angịlẹ kị ri ikiro lee ịhụ-egu yẹkẹẹ, “Ọ ka hiigu hanụ, ó-ri kanụ ka myị-ị kụ okiro lala am-am ayịdang.”

⁹Ma, ọ́ tị ri kanụ ka jẹ́-ẹ jụ ịlọnụ wu kpa myị́ kaka lẹ aalẹ, anụ rwọ ọrụ lee o-ye ahụ nya ịlọnụ mẹ. Chajị, awụlẹ oyeye ọlịnyị hiigu gụ ọ-ka juwa ẹ-ẹpwụ nya amila nya imyi nya ụya ọhọhọ pyịyọọ.

¹⁰Ehile ọlẹ juwa hanụ anụ angị ye awụlẹ kpa ẹ-ẹpwa. Ma, e-ehile nya ịlọm tị ka. Ịnya Ọngọlahị ayịdang ịnyị! Ọ́ chịla ká ahụ ọhẹ-lọhẹ ka pwa ọrụ nyamwụ kpong-kpong ka.

¹¹Ọnyang ahụ ọnyị kọ tị pwa ọrụ nyamwụ ene lẹ aalẹ, ọnyang ọọwa a rụ kaka rwọ ọrụ ọkịla kaka. Ọ hụhụ e-eji chịng pyii mẹ. Ó-ri ịnyị kaka lẹ aalẹ, ọ tịrẹkpẹ kaka họ okpunyi bala ọrụ onyogo nyamwụ kị rụrwọ awụlẹ myịmyị mẹ. Ọrụ-ahụ ọhẹ-lọhẹ a tị pwa ahụ nyamwụ kaka ịnyịnyị.

¹²M jam ya ẹla ọlẹ tanụ anụ angị hihi ịkịla. Ma, ọ́ tị bwu ẹga nya Ọngọlahị ayịdang ka. Ẹla ọọwa ri yẹkẹẹ, ọng myị́ ọng ọlẹ kọ ri ọngịnyị nya Ohe Oluhye kọ ri ká ahụ nyamwụ ọlẹ kọ kpa ẹ-ẹpwa á myị la Ohe Oluhye ịnyịnyị ka, kọ tị ri ká ahụ ọọwa á myị ọnụ nyọka hụ ẹ-ẹpwa nyamwụ pyịyọọ aalẹ, ahụ ọlẹng ọọwa a pwọọ koo.

¹³Ọ́ tị ri ọnyang kọ ri ọngịnyị nya Ohe Oluhye kọ rwọ ọrụ, ká ọrụmwụ ọọwa á myị la Ohe Oluhye ka, kọ ri ká ọrụmwụ ọọwa á myị ọnụ nyọka kpọọ ẹ-ẹpwa aalẹ, ahụ ọnyang ọlịnyị, a pwa ọrụ ọọwa kokoo.

¹⁴Chajị, ịgọgọ ọlala nya ahụ ọlẹ kọ ri ọngịnyị nya Ohe Oluhye a kaa họ ká ọrụ ọ-jẹ́ Ohe Oluhye-ka ọlịnyị, kaa jẹ́-ẹ la ịgọgọ myị́ ị-ịlahị nya Ohe Oluhye lẹlẹ. Ịgọgọ ọlala nya ọrụ-ahụ o-ri ọngịnyị nya Ohe Oluhye a tị tịtị kaa họ ká ahụ ọ-myị la Ohe Oluhye-ka ọlịnyị kaa jẹ́-ẹ la ịgọgọ myị́ ị-ịlahị nya Ohe Oluhye ịnyịnyị lẹlẹ. Ó-ri ọlịnyị kaka lẹ aalẹ, anyị nya angị ịlịnyị á tịtị ka jẹ́-ẹ la ịgọgọ myị́ ị-ịlahị nya Ohe Oluhye kaka. Ma, jaabwọ kọ tị la lẹẹlẹẹ ri yẹkẹẹ, anyị nyanụ anụ angị ju ihi nya ẹlẹwẹ wuu lẹ, ị ri anyị ịlịgọgọ ị-ịlahị nya Ohe Oluhye lẹ!

¹⁵Ma, ọ́ tị ri ká ọrụ lee ahụ ọ-myị la Ohe Oluhye-ka á tị jene pwa ọngọ myị la Ohe Oluhye lẹ aalẹ, ọlẹng lee ọnyang ọ-myị la Ohe Oluhye ọlịnyị a myị jwoo mẹ. Chajị, ọngọọwa á kpoye nya ehile lụka ọọwa kaka. Ma, ẹkọ nya okpunyi a tị lẹẹ ká Ohe Oluhye be wụrụụhị ahị angịnyị nyamwụ wuu lẹ!

¹⁶O-ri ahụ ọnyang ahụ ọ-myị la Ohe Oluhye, ká wẹẹ ka kpa ọchịda nya Ohe Oluhye kịla ọrụ nyang ọlẹ kọ jẹ́ Ohe Oluhye-ka wẹẹ, a jẹ́ datị kpong-kpong? Lee, ó-ri kọ ri ahụ ọrụ-ahụ ọ-myị la Ohe Oluhye, ká wẹẹ ka kpa ọchịda nya Ohe Oluhye kịla ahụ nyang ọ-myị la Ohe Oluhye-ka ọwẹ, a tị jẹ́ datị ịnyịnyị?

¹⁷Ọng myị́ ọng nyanụ anụ angịnyị nya Ohe Oluhye a juwa la ọhịhị ba ọhaha ọlẹ ká Ohe Oluhye ya họọ jẹ mẹ. Bala o-juwa jẹdịyẹ ba ẹkọ obebe nya Ohe Oluhye ọọwa jẹ ịnyịnyị mẹ. Ọwẹ a ri ehile ọlẹ kam kaa da ala ịchọọchị ọnyị myị ọnyị wuu kam ka ẹga nyaa lẹlẹ.

¹⁸Ahụ ọngọlẹ ká da ụwụwụ kpá wuu ene ká ri ọngịnyị nya Ohe Oluhye lẹ aalẹ, iwe-ahụrụ nya ụwụwụ ọdada nyang ọọwa, a tụtụm myịmyị tọng olujwo kaka. Ahụ ọngọlẹ ká tị da ụwụwụ ene ká ri ọngịnyị nya Ohe Oluhye ka aalẹ, a tịtọ nya iwe-ahụrụ nya ụwụwụ ọdada ugbẹnyị kokoo!

¹⁹Chajị, iwe-ahụrụ nya ụwụwụ ọdada lee iwe-ahụrụ nya ụwụwụ ọdada-ka ojiji á ri ịngịngịhyẹ ẹ-ẹga nyahị ahị angịnyị nya Ohe Oluhye kaka! Kẹnẹ-kẹnẹ, ehile nya Ohe Oluhye ọkpakpa ụbwọọmwụ mẹ ịnyị!

²⁰Chajị nya ọọwa lẹ, iwe-ahụrụ ọnyị myị ọnyị ọlẹ ká ọngịnyị ehe á ji ene kọ myị la Ohe Oluhye lẹ aalẹ, ọngọọwa a bahyoo kọ la ịnyị pyịyọọ mẹ.

²¹Ó-ri ká ri ọnyọhị riri ene ká-a kaka ri ọngịnyị nya Ohe Oluhye aalẹ, a wụ ẹjẹ jwọọwa ka. Ma, ọ́ tị ri ká iwe á ji hang nyọka la ịlọng bwu ẹpwụ nya iwe-ahụrụ nya ọnyọhị oriri ọọwa myị́, ká ka la ịlọng aalẹ, ọ́ tị tịpyọ ka, ịnyịnyị.

²²Chajị, ọng myị́ ọng ọlẹ kọ ri ọnyọhị riri ene ká Ọngọlahị-ị be ẹkọ wụrwọọ kaka ri ọngịnyị nya Ohe Oluhye lẹ aalẹ, ọngọọwa ri ọngọ la ịlọmwụ la ị-ịlahị nya Ọngọlahị lẹ. Ma, ọngọlẹ kọ tị ri ọnyọhị riri ene ká Ọngọlahị-ị be ẹkọ wụrwọọ kaka ri ọngịnyị nya Ohe Oluhye ka aalẹ, iwe-ahụrụ nya ẹrụ ọmyịmyị nyamwụ ị-ịlahị nya Ọngọlahị ayịdang lala ịnya ọnyọhị ịnyịnyị lẹ.

²³Chajị, Ohe Oluhye kpa ịwọ ọlịnya nya ịKịrayịsị rahị ahị angị myị lọọ bwula igu ọlẹ ká ịKịrayịsị gbu chajị nyahị lẹlẹ, ánụ ri anyịhị nya ọngịnyị ehe ọhẹ-lọhẹ kaka!

²⁴Lẹ, anụ anyadam ẹ-ẹpwụ nya ịKịrayịsị, iwe-ahụrụ ọnyị myị ọnyị ọlẹ ká ọng myị́ ọng nyanụ á ji ene ká Ohe Oluhye á be ẹkọ wụrwọọ kaka ri ọngịnyị nyamwụ lẹ aalẹ, anụ́-ụ juwa kpa iwe-ahụrụ ọọwa ụ-ụwa pyịyọọ ẹ-ẹpwụ nya ọngịnyị nya Ohe Oluhye oriri nyamwụ mẹ!

²⁵Ẹla chajị nya angị kụ okiro ọlẹ kanụ ya lẹ, ḿ ye ehile ọhẹ-lọhẹ bwu ẹga nya Ọngọlahị u-uhye nya ọọwa ka. Ma, m jam ya irya nya ịlọm dodehe lala ọngọ chịla o-hu ọkịlẹtụ ha bwula ọhaha ọnahị nya Ọngọlahị ịnyị!

²⁶Am lẹ, ụka kam kụ ẹhị yẹ jaabwọ ká ị-tụ pyịpyị nya ọhịhị ọlụka ọlẹẹlẹẹ jam yẹ rịrị ọngịnyị wuu lẹ, m me irya yẹkẹẹ, ọngịnyị ọ-kụ okiro a tọchị hiigu gụ lẹlẹ.

²⁷Ahụ ọngọ ye ahụ kpa ẹ-ẹpwa ene lẹ, ọọwa tị ri yẹkẹẹ, a ka pwọ ori nya ahụ oyeye hi ịlọng lẹ, tị koo! Ahụ ọngọ kụ okiro ene lẹ aalẹ, a tụtụm kọ lọ ọ-bẹẹdọ nya ahụ oyeye kaka.

²⁸Ma, ọ́ tị ri kaahụ ọngọ kụ okiro ọọwa á kele kaka ye ahụ aalẹ, ó ri ọhọbịrị ọhọhọ tị koo. Ahụ ọnyang obebe eji á tị rwọ ọrụ aalẹ, ó ri ọhọbịrị ọhọhọ ka ịnyịnyị! Ma, angịlẹ kị ye awụlẹ kpa ẹ-ẹpwa tị ka la akama nya odehe ọlẹ bọọ ẹ-ẹgọ. Ma, ḿ tị juwa ku ọngọngọhẹ iwe nya awụlẹ oyeye tị koo.

²⁹Ma, anụ wo mẹ! Anụ anyadam ẹ-ẹpwụ nya ịKịrayịsị, ụka hi kpii lụmẹ lẹlẹ, anụ angịlẹ kanụ ye ịhụ bala ọ-rwọ ọrụ wuu, a juwa kpa ịlọnụ lala angị kụ okiro bwula o-juwa jahị da ụkụrwọ nya ẹla nya Ohe Oluhye ọhọhọ nya ịlẹhị-ịlẹhị mẹ.

³⁰Angịlẹ kị juwa i-iwe ahụrụ nya ida ojeje lẹpwụ nyanụ, a me irya ju ayiiji ọbwọbwọ ọọwa kaka. Angịlẹ kị tị ji iwe-ahụrụ nya ọkẹkẹnị ọchịchị jiji aalẹ, ị hu iwe-ahụrụ nya ẹhụ ọhụlọ-hụlọ ọọwa nya ịngịngịhyẹ kaka. Angịlẹ kị la okpoko ọ-kpa ra ang rara juwa aalẹ, ị hu iwe-ahụrụ nya ang ọlala nyaa ọọwa, nya ịngịngịhyẹ kaka.

³¹Angịlẹ kị tị la ang-abwọ nya odehe ọlẹ lụmẹ juwa, a hu iwe-ahụrụ nya ụdụ ọkpụkpụ nya odehe ọlẹ nya ịngịngịhyẹ kaka ịnyịnyị! Chajị, odehe ọlẹ kanụ wẹẹ yẹ lẹ, ó juwa ka jam ịịwẹ pyịyọọ kpong-kpong ka!

³²M tịtọ kanụ ka la ịlọnụ bwu ẹpwụ nya olo nya imahị omeme wuu. Chajị, ọngọlẹ kọ kụ okiro lẹ, imahị omeme nyamwụ wuu kaa juwa u-uhye nya ụkụrwọ chajị nya Ọngọlahị ọhọhọ kem bala ọjaabwọ kọ ka bwu họ ẹla ọlẹ kọ ka kpụ Ọngọlahị ịpyọ kem.

³³Ma, ọngọlẹ kọ tị ye ahụ kpa ẹ-ẹpwa lẹ, imahị omeme nyamwụ kaa juwa u-uhye nya ang-abwọ nya odehe ọlẹ bala ọjaabwọ kọ ka bwu họ ẹla ọlẹ kọ ka juwa kpụ ahụ nyamwụ ịpyọ kem.

³⁴Chajị, ọngọlẹ kọ kpa ahụ ẹ-ẹpwa kaa chị ọkịlẹtụ agiye. Irya nya ọnyang ọ-rwọ ọrụ lẹka wuu bala imahị omeme nyamwụ kaa juwa ẹ-ẹga nya ụkụrwọ nya Ọngọlahị bala ọjaabwọ kọ ka bwu kpa ugbinyịrọ nyamwụ la ịgọgọ bala olegu nyamwụ ịnyịnyị. Ma, ọnyang ọlẹ kọ rwọ ọrụ lẹ, irya omeme nyamwụ wuu kaa juwa ẹ-ẹga nya ang nya odehe ọlẹ bala ọjaabwọ kọ ka bwu họ ẹla ọlẹ kọ ka kpụ ọrụmwụ ịpyọ kem.

³⁵Ala ịwẹ kam wẹẹ ya wuu lẹ, m ya, chajị kọ ka hiigu hanụ ịnyị! Ị-ịnya, ọ ka chịnụ ẹkpa bwula ehile ọ-danụ da ka! Ma, chajị kanụ ka jẹ́-ẹ họ ang ọnyịịla ọchịla-chịla bala ọ-ka jẹ́-ẹ juwa kpa irya nyanụ wuu myị ẹrụ ha Ọngọlahị ẹ-ẹpwụ nya ọkịlẹtụ ọ-chị agiye kpong-kpong kaka ịnyị!

³⁶Ó-ri ká adịda ọ-ma ọnyị ọhẹ á juwa, kọ họ ẹla chajị nya ọrụ ọrwọrwọ nya ọnyị ọnyang nyamwụ la ọgụ ọlẹ kọ la ihi ka, kọ ri ká ọnyang ọọwa á tị nwa ọnyang lẹ aalẹ, ọ ka rwọ ọrụ myị́, kọ ri ká ọọwa á ri irya nyamwụ ene lẹ. Ọọwa á ri ọhọbịrị ọhọhọ ka.

³⁷Ma, adịda ọ-ma ọnyị ọnyang ọnyị, ká ẹla nya ọrụ ọrwọrwọ-ka nya ọnyị ọnyang nyamwụ ọwa á ri ịnya ogbile awụlẹ gbile ka, kọ ri ịnya obyi omeme bala ịnya ọkịlẹtụ o-wu kpa yẹẹyẹẹ bala ịnya eje nya ịlẹhị ọchịchị ọnyọọngịrị ẹ-ẹpwụ nya ọkịlẹtụ nyamwụ yẹkẹẹ, ọwa nyị juwa ka kpa ọnyị ọnyang nya ọọwa ọọwa ẹ-ẹpwụ nya iwe-ahụrụ ọọwa myị́ lẹ aalẹ, ang ọnyịịla a wẹ ká adịda ọọwa họ ịnyịnyị lẹlẹ.

³⁸Lẹ, adịda ọ-ma ọnyị ọlẹ, kọ hu ọnyị ọnyang nyamwụ da ọrụ aalẹ, ọ́ họ tịpyọ ka. Ma, ọngọlẹ kọ tị ya ọnyị ọnyang nyamwụ da ọrụ ka bwula obyi omeme, a tị họ hiigu gụ lẹ.

³⁹Ehile nya awụlẹ oyeye nya angịnyị nya Ohe Oluhye chị ọnyang ahụ ọnyị myị ọnyị ori ba ọrụ nyamwụ pyịyọọ pwụ jaabwọ ká ọrụmwụ ọọwa ka ri ehe kaka ba odehe ọlẹ. Ma, ó-ri ká ọrụmwụ ọọwa á tị gbu hyoo lẹ aalẹ, ọnyang ọọwa la ịlọmwụ nyọka rwọ ọrụ ọkịla ọnyị myị ọnyị ọlẹ kọ họ́ọ lẹ. Ma, ẹ-ẹpwụ nya ala ịchọọchị kẹnẹ-kẹnẹ, ọ tị ka rwọ ọrụ ọkịla ọọwa myịmyị lẹ.

⁴⁰Ma, irya nyam am ayịdang u-uhye nya ọọwa ri yẹkẹẹ, ọnyang ọlịnyị ọlẹ kọ hụhụ e-eji pyịyọọ lala ahụ-ogu a ka la ọkẹkẹnị gụ ọngọlẹ kọ ka rwọ ọrụ ọkịla lẹ. M tị me irya kam la ụbwọ ọdada nya Olegu nya Ohe Oluhye ọlẹpwụ nyam ịnyịnyị ẹ-ẹpwụ nya ẹla oyaya nyam ọwẹ.