Read idege 1 ALA ỊKỌRỊNTỊ 8 Bible Online

1 ALA ỊKỌRỊNTỊ 8 - idege bible

1 ALA ỊKỌRỊNTỊ 8

¹Ẹla u-uhye nya ang nya ihye ijiga ịkpụ́kpụ oriri ọlẹ kanụ ya lẹ, ọ ri nya ịlẹhị, am ayịdang jẹ́ ịnyịnyị yẹkẹẹ, ahị wuu jẹ́ ká ọng myị́ ọng lẹpwụ nyahị la ẹla ọjẹ́jẹ u-uhye nya ang ịlịịwẹ wuu juwa ẹ-ẹpwụ nyamwụ. Ma, anụ tị wo mẹ. Ang ọjẹ́jẹ ayịdang kpangga lẹ, ọ kaa kpa ọngịnyị ehe kaka mịrị ịlọmwụ dii lala ịtẹnggẹ. Ma, ọháha ọlala a tị kaa họ ká angịnyị ehe kaa kpa awụlẹ wule kịlahị-ịlahị ẹ-ẹpwụ nya ang myị́ ang ọhọhọ wuu myị́ lẹ.

²Ọng myị́ ọng ọlẹ kọ juwa me irya yẹkẹẹ, ọwa nyị la ang ọjẹ́jẹ juwa hiigu-hiigu lẹ aalẹ, ọngọọwa ayịdang á jẹ́ ụgbẹyị ọlẹ kọ ka bwula ang ọjẹ́jẹ ọlẹ kọ chịla-chịla kpong-kpong tị tị lẹka.

³Ma, ọng myị́ ọng ọlẹ kọ tị la ọháha ẹ-ẹga nya Ohe Oluhye lẹ aalẹ, Ohe Oluhye tịtị ka jẹ́ ọngọọwa lala ọngịnyị nya ịlọmwụ ịnyịnyị lẹ.

⁴Chajị nya ọọwa lẹ, ẹ-ẹga nya ang nya ijiga ịkpụ́kpụ oriri ọlẹ kanụ ya lẹ, ahị jẹ́ yẹkẹẹ, ijiga ilodehe ịlẹ á ri ihye nya ịlẹhị ịlam-ịlam kpong-kpong ka. Ahị tị jẹ́ ịnyịnyị yẹkẹẹ, Ohe Oluhye ụbwọọmwụ kpangga a ri Ohe Oluhye ookpokpo ọlẹ kọ juwa wuu lẹlẹ.

⁵Chajị, ọ ri nya ịlẹhị, iru nya ang lụmẹ-lụmẹ ịhyẹ juwa u-uhye-ọgba nya epwoohe lee odehe ọlẹ, ká angịnyị ehe juwa kaa hwaa lala ihye ijiga nyaa. Chajị, ihye ijiga ịlịnyị bene kpanggbaa lụmẹ lẹ. Ihye ayịbaba ị-gbịgba ha ịlịnyị nya angịnyị ehe tị lụmẹ ịnyịnyị odehe ọlẹ lẹ.

⁶Ma, ahị angịnyị nya Ohe Oluhye tị lẹ, ahị jẹ́ ká Ohe Oluhye ayịdang kpangga a ri Ohe Oluhye ookpokpo ọlẹ kọ ri Adịda Ọngọ họ ang myị́ ang wuu ilodehe ọlẹ. Ohe Oluhye ọọwa, ahị jam hịhị ha odehe ọlẹ kem lẹ. Ayịbaba ookpokpo kem, ahị tị la odehe ọlẹ lẹ. Ọngọọwa a ri Ọngọlahị iJisọsị ịKịrayịsị, ọngọlẹ ká Ohe Oluhye bwu lọọ họ ang myị́ ang wuu ilodehe ọlẹ bala ọngọ ri ẹmwụ-enyi nya ọhịhị onyeewe nyahị ahị angịnyị nya Ohe Oluhye lẹ.

⁷Ma, jaabwọ kọ tị la ri yẹkẹẹ, aangịnyị nya Ohe Oluhye wuu a la ọ-jẹ́ myịmyị ọlịịwẹ lẹka. Ịnyị à du jaabwọ ká ẹla nya ojiga ọkpụ́kpụ ba angị ịlịnyị ahị ene kịị yẹ irya da kaka ri angịnyị nya Ohe Oluhye lẹ, ká angịịwa wẹẹ hu ang nya ijiga oriri lala o-ri yẹkẹẹ, ijiga ịịwa ayịdang nyaa ri ịngịhyẹ ẹ-ẹga nyaa ịnyịlẹhị lẹlẹ. Ọọwa lẹ, bwula ọdẹwụ-dẹwụ ọlala nyaa ọọwa lẹ, irya ọ-la ọngịnyị eje ọlẹpwụ nyaa a wẹẹ ya eje nya ịrị ọchịchị ị-ịlahị nya Ohe Oluhye waa pwụrẹrẹ lẹlẹ.

⁸Ma, ịnọ, ang oriri ọlam-ọlam ọlẹ kahị kaa ri ka ẹpwụ, á ka jẹ́-ẹ kpa eje ọtịpyọ lee eje ọnyịịla nyahị kele kịlahị nya Ohe Oluhye myị́ ka! Lẹ, iwe-ahụrụ nyahị ẹ-ẹga nya Ohe Oluhye á da kụ ang oriri nyahị lee ang oriri-ka lẹ ka, ọhẹ-lọhẹ ka!

⁹Ọkẹnẹ-kẹnẹ ri yẹkẹẹ, anụ kpahị ju ịlọnụ ọgwọgụ ẹ-ẹpwụ nya ịlọnụ ọlala ẹ-ẹga nya ang oriri ọwẹ yẹẹyẹẹ mẹ. Chajị kọ ka jẹ́-ẹ mwọọgịlẹ yẹ kaka ri okoji ọkịlata ha angị la ọmyịmyị ọdẹwụ-dẹwụ ịlẹpwụ nyanụ kaka mẹ!

¹⁰Anụ ya kọ ri ká ọngọ la ọmyịmyị ọdẹwụ-dẹwụ ẹ-ẹga nya ijiga ịkpụ́kpụ ọlịnyị, á chẹhị kaka yẹng ahụ ọngọlẹ ka wẹẹ yẹkẹẹ, “M jẹ́ ang lụmẹ lẹ,” ká juwa ri ang oriri u-ube nya ohe ojiga ká ọọwa á ka hu ọhụ ojuju onyobyi ha irya ọ-la ọngịnyị eje ọlẹpwụ nya ọngọ dẹwụ-dẹwụ ọọwa, kpụ ọ-ka byẹjẹ hu ang nya ojiga ri myị́ ka?

¹¹Ó-ri kọ la ịnyị lẹ aalẹ, ọnyadang ẹ-ẹpwụ nya ẹla nya Ohe Oluhye ọlẹ, ịnọ, ká ịKịrayịsị tị gbu igu wọnụ nyamwụ ju wuu lẹ, a ka mwọọgịlẹ ta ayịreji gu ang ọjẹ́jẹ lụmẹ nyang ahụ wẹ lẹka lee?

¹²Ọọwa lẹ, ụka ká họ ang onyobyi ba anyadang ẹ-ẹpwụ nya ịKịrayịsị ịịwa bwula ọ-chị irya ọ-la ọngịnyị eje ọlẹpwụ nyaa ẹbẹ, chajị nya ọdẹwụ-dẹwụ ọlala nyaa lẹ aalẹ, ọhọbịrị a wẹ ká họ ba ịKịrayịsị ayịdang ịnyịnyị lẹlẹ!

¹³Chajị nya ọọwa lẹ, ó ri ang oriri nyam am kọ wẹẹ ka du, ká ọnyadam ẹ-ẹpwụ nya ịKịrayịsị, á ka bwula ọọwa mileji lẹ aalẹ, am ka gọ ang oriri ọọwa tị tị lẹ. Chajị, kam ka yẹ ri ọngọ ju ọmwụ nya eje owuwu nyamwụ kaka.