Read idege 1 ALA ỊKỌRỊNTỊ 9 Bible Online

1 ALA ỊKỌRỊNTỊ 9 - idege bible

1 ALA ỊKỌRỊNTỊ 9

¹Am ịPọlụ lẹ, ḿ ri ọngọ la ịlọm la ka? Ḿ ri ọlẹrụ ọnyịịla nya ịKịrayịsị ọlẹ ka? Ḿ kpa ugbẹhị nya ịlọm yẹ iJisọsị Ọngọlahị la ka? Ánụ́ jẹ́ ká ọngịnyị nya Ohe Oluhye oriri nyanụ ọwẹ a ri o-ya dodehe nya ụkụrwọ ọhọhọ ha Ọngọlahị la nyam ka?

²Ó-riri ká angịkịla á jẹ́m am ịPọlụ ọlẹ jéjé lala ọlẹrụ ọnyịịla nya ịKịrayịsị ọlẹ wẹwẹ ka, wẹẹ aalẹ, ọ kpụ kaanụ ayịdang ka jẹ́m lala ọlẹrụ ọnyịịla ọlẹ pyii. Chajị ọngịnyị nya Ohe Oluhye oriri nyanụ ọwẹ kpangga a ri ang o-ju ẹjẹẹ yẹkẹẹ, m ri ọlẹrụ ọnyịịla nya Ọngọlahị la ịnyịlẹhị lẹlẹ.

³Ẹla ọlẹ kam la ka ya ta angịlẹ kị wẹẹ yem ya nya ẹla ọhọhọ pwoku ka wuu, a lẹẹ lẹlẹ.

⁴Anụ angịịwa ya kaahị angị ịwụlẹ nya alẹrụ ọnyịịla ọlẹ, á la ọngịrị ka juwa ri ang oriri bala ọ-ka juwa nwa ang ọnwanwa jaabwọ kọ háahị kaka ba kpong-kpong ka?

⁵Lee, anụ tị́ ya kahị la ọngịrị nyọka kpa ahụ nyahị ba ịlọhị ẹ-ẹpwụ nya ẹdịyẹ nya ụkụrwọ ọlẹ lala alẹrụ ọnyịịla ịkịla bala anyịnịna nya Ọngọlahị anyị bala ịSẹfasị ka?

⁶Lee, ịBanabasị bala am ịPọlụ ọlẹ kem, a tị́ ka ri angị ka juwa họ ụkụrwọ ọkịla ene kahị ka ye ang ọ-kpa da ịlahị ụbwọ pyịyọọ lẹ mẹ?

⁷Anụ ya jem wẹẹ, ịsọja ọdẹwụ oyina, a tị́ juwa kọọwa la ịlọmwụ a kaa bá ịlọmwụ omoto lee, ọwa ọ-kaa bịrị okpoko ju ịlọmwụ ụ-ụwa ọ-ọgbẹwụ kpong-kpong? Lee, ọngọ wu ẹrụ oyina ọlẹ kọ juwa họ ụkụrwọ ẹ-ẹpwụ nya ẹrụ nya iku nya alakọnụ a tị́ ka kpa ugbe nya alakọnụ ọọwa ọhẹ-lọhẹ kọnụ nyamwụ kpong-kpong ka? Lee, ọngọ gbe ịna oyina a tị́ juwa kọ ka kpa enyi ẹmẹ nya ẹna ịịwa kọnụ nyamwụ kpong-kpong ka ịnyịnyị?

⁸Ẹlẹwẹ kam ya lẹ, irya nya ọngịnyị ehe kem, m tị́ kpa ya wẹ lee ehile nya Ohe Oluhye á tị́ myị jwoo ịnyịnyị tam ka?

⁹Ee, ehile myị jwoo, chajị, ị da ẹ-ẹpwụ nya ehile nya iMosisi ẹ-ẹgẹhẹ yẹkẹẹ, “A ya ori ju ẹna ọlẹ kọ juwa ru ịrayịsị ọ-ọnụ ka. Chajị kọ ka jẹ́-ẹ ri ịrayịsị ịịwa mẹ.” Anụ ya ká ajị nya ẹna ọlam-ọlam ọlẹ a du ká Ohe Oluhye da ehile ọwẹ?

¹⁰Ánụ́ jẹ́ ká ajị nyahị ahị angịnyị ehe, a du ká Ohe Oluhye da ehile ọọwa ka? Ịnyịlẹhị ịnyị, ajị nyahị a du ká Ohe Oluhye da ehile ọọwa ju ụ-ụpwụ lẹ. Ọ họ ịnyị, chajị ká ọngọlẹ kọ juwa wu ẹrụ ka jẹ́-ẹ wu ẹrụ ọọwa la ẹhị ọrịrịị-rịrị gbe ọ-ka la ebwo ọhẹ lẹpwụ nya ang nya ẹrụ ọọwa. Ká ọngọlẹ kọ tị juwa ru ịrayịsị tịtị ka jẹ́-ẹ juwa ru ịrayịsị ọọwa la ẹhị ọrịrịị-rịrị gbe ọ-ka la ebwo ọhẹ bwu ẹpwụ nya ajẹ nya ịrayịsị ịịwa ịnyịnyị.

¹¹Anụ ya jem wẹẹ. Jaabwọ kaahị ayịdang ya ugbe nya ang nya Olegu Ịgọgọ tọ ẹ-ẹpwụ nyanụ wẹ lẹ, ó-ri kahị ri apyobwuna nya ang-abwọ nya odehe bwu ẹga nyanụ, ọọwa a ri ang ọtụka ọ-kịlaahị kịla lẹ?

¹²Ó-ri ká ọháha nyanụ á jẹ́ juwa chiwu angịkịla odehe ọlẹ, anụ ya kaahị angịlẹ, ịnọ, ọ chịla ká ọháha nyanụ ọọwa ka chiwu lụmẹ gụ angịkịla ịịwa ka? Ịnọ, opwopwoku ịnyị ẹ-ẹga nyahị kpá lẹ, anụ yẹ kahị baanụ itu nya ọọwa kpong-kpong? Ma, ọkọkọ nya ọọwa lẹ, ahị jam ju ugbodu ẹ-ẹpwụ nya akama ọnyị myị ọnyị ọlẹ kahị lẹẹ yẹ wuu, chajị kahị ka ri angị ku ẹrụ ọnyịịla nya ịKịrayịsị ọlẹ iwe la ụgbẹyị ọhẹ-lọhẹ kpong-kpong ka.

¹³Ánụ́ jẹ́ yẹkẹẹ, ang oriri nya angịlẹ kị kaa myị ẹrụ ha Ohe Oluhye u-ube ịgọgọ ọtụka nya ala iJuu nyị kaa bwu ẹpwụ nya ang oriri olube ịgọgọ ọọwa ka? Lee, anụ tị́ jẹ́ ịnyịnyị yẹkẹẹ, angịlẹ kị ri angị myị ẹrụ ụ-ụwa ẹ-ẹga ọkịla iya nya Ohe Oluhye nyaa kaa la ebwo ọhẹ lẹpwụ nya iyo nya iya ịkịlaakịla ịlụwa ịnyịnyị lẹ ka?

¹⁴Ịnyịnyị-ịnyịnyị, Ọngọlahị a hunọ yẹkẹẹ, angịlẹ kịị nyị juwa ya ẹrụ ọnyịịla pyẹ nyị tịtị ka ye uri ọ-kpa da ịlaa ụbwọ bwu ẹpwụ nya ụkụrwọ nya ẹrụ ọnyịịla oyaya pyẹ ọọwa tịtị lẹlẹ.

¹⁵Ma, am ayịdang lẹ, ḿ tị jam ba ọngọngọhẹ itu yẹkẹẹ, ị họ ham ịnyị mẹ pyii, kpong-kpong ka. Ọlẹ kam dọmwụ lẹẹ da ụpwụ ọlẹ lẹ, ḿ dọọ du wanụ chajị kanụ ka họ ang ọlịnyị ọhẹ-lọhẹ ham ka ịnyịnyị! Chajị, ó-ri kam dọmwụ gbugbu kẹhị, ọ hám gụ ịngịngịhyẹ ọ-ka họ ká ẹlẹlẹ ọlẹpwụ ọnụ nyam ka kpụ igu ẹ-ẹpwụ nya ogu ọchịchị, chajị nya ụkụrwọ nya Ọngọlahị ọlẹ kam lẹẹ họ.

¹⁶Chajị, ọ ri nya ịlẹhị, m jam ya ẹrụ ọnyịịla ọlẹ pyẹ odu ịnyị. Ḿ la ịngịngịhyẹ nya ịlọm, m ka kpa chị ogu ẹ-ẹpwụ nyamwụ kpong-kpong ka. Chajị, jaabwọ ká Ohe Oluhye ayịdang a ya ehile nyamwụ dam lẹẹ, nyọka juwa kpa ẹrụ ọnyịịla ọlẹ ya pyẹ lẹ, m̀ ka ri enyi gu obyi ó-ri kam myị ya ẹrụ ọnyịịla ọọwa pyẹ kpong-kpong ka.

¹⁷Lẹ, ó-ri kaam ayịdang á myị kpa ọkịlẹtụ nyam wuu lẹpwụ-lẹpwụ, juwa họ ụkụrwọ ọọwa aalẹ, m ka ye uri nyam bwu ẹga nya Ohe Oluhye lẹ. Ma, ọ́ tị riri ká irya nyam á juwa tụ ọọwa pyịpyị wẹwẹ aalẹ, am kpangga, Ohe Oluhye a tị tụụbwọ hi ụkụrwọ nya ẹrụ ọnyịịla ọ-kpa ya pyẹ nyamwụ ọlẹ kọ hunọ lẹẹlẹẹ ju ụ-ụbwọ pyii lẹlẹ.

¹⁸Ee lẹ, ụma nya uri ọlanyị, m tị́ ka ye lẹẹ mẹ? Uri ọọwa ri yẹkẹẹ, m ka kpa ẹrụ ọnyịịla nya ịKịrayịsị ọlẹ kaka ya pyẹ je angịnyị ehe la ọgahị ododu. Chajị kam ka ba angịịwa itu pyii nyọka họ ịngịngịhyẹ ham lala ọngọ ya ẹrụ ọnyịịla pyẹ jwaa kpong-kpong kaka.

¹⁹Lẹẹlẹẹ lẹ, m la ịlọm ẹ-ẹga ọlẹ ká ọng myị́ ọng wuu ji lẹ. Chajị, ḿ ri ọnyọhị nya ọngọngọhẹ ka. Ma, m tị hu ịlọm lala ọnyọhị nya ọng myị́ ọng wuu chajị kam ka jẹ́-ẹ bwula ọọwa gbile iru nya angịnyị lụmẹ-lụmẹ kịla ịKịrayịsị, jaabwọ kam ka jụ họ kaka ba myị́.

²⁰Chajị nya ọọwa lẹ, ụka kam họ ụkụrwọ pwụ ẹga nya ala iJuu, m kaa kpa ịlọm lala ala iJuu ịnyịnyị, chajị kam ka jẹ́-ẹ bwula ọọwa gbilaa ha ịKịrayịsị myị́. Ịnọ, m jẹ́ kaam ayịdang á juwa e-ekpeleji nya ehile nya iMosisi lẹẹlẹẹ kaka. Ma, ụka kam yẹ angịlẹ kị ji ekpeleji nya ehile nya iMosisi ọọwa, m kaa kpa ịlọm lala ọngọ ji ẹpwụ nya ehile ọọwa ịnyịnyị wẹẹ. Chajị kam ka jẹ́-ẹ bwula ọọwa gbilaa ha ịKịrayịsị kpịlọ.

²¹Ọ ri nya ịlẹhị. Ịnọ, ḿ ri ogbodiya ẹ-ẹga nya ehile nya Ohe Oluhye kaka. Chajị, m ji ekpeleji nya ehile nya ịKịrayịsị lẹẹlẹẹ lẹ. Ma, ụka kam yẹ angịlẹ kị jẹ́ ehile nya Ohe Oluhye lẹka, m kaa kpa ịlọm lala angịịwa, chajị kam ka jẹ́-ẹ bwula ọọwa gbile angị jẹ́ ehile nya Ohe Oluhye lẹka ịịwa kịla ịKịrayịsị ịnyịnyị!

²²Ụka kam pwụ ẹga nya angị la dẹwụ-dẹwụ ẹ-ẹpwụ nya ọmyịmyị ọlala, m kaa kpa ịlọm lala ọngọ la dẹwụ-dẹwụ ịnyịnyị, chajị kam ka jẹ́-ẹ bwula ọọwa gbilaa ha ịKịrayịsị kpịlọ. M kaa ya ịlọm dẹẹchụ bala ọ-ya ịlọm dẹja ẹ-ẹga nya ụma nya angịnyị la datị-datị wuu, chajị kam ka jẹ́-ẹ bwula ọọwa họ ká angịhyẹ lẹpwụ nyaa ka chịda ha ịKịrayịsị pyii myị́ ịnyịnyị.

²³M kaa họ ang ịwẹ ịnyị wuu, chajị nya ịlahị ọkaka nya ẹrụ ọnyịịla ọ-kpa ya pyẹ nyam ọlẹ, chajị kaam ayịdang ka jẹ́-ẹ ri ugu nya ahị ọwawa nya ẹrụ ọnyịịla ọọwa tanụ anụ angị myịmyị ịkịla wuu kpịlọ ịnyịnyị.

²⁴Anụ tị jẹ́ jaabwọ ká angịlẹ kị juwa da awụlẹ ịwẹẹ nya ụnyẹ ọrụrụ myị́, kaa rụnyẹ wuu jaabwọ kị ju iru kaka ba. Ma, ọngọ ookpokpo ụbwọọmwụ lẹpwụ nyaa kem, ị tị kaa da ogu nya ụnyẹ ọrụrụ myị́ ọọwa bala ọ-kaa ya ang ọgahị nya ụnyẹ ọrụrụ ọọwa ha lẹ. Lẹ, anụ́-ụ juwa rụnyẹ nya ọmyịmyị ọlala nyanụ ọlẹ ọgwọgụ, chajị kị ka jẹ́-ẹ danụ ogu nyamwụ lụka ohyẹẹkpẹ ịnyịnyị mẹ.

²⁵Ọng myị́ ọng ọlẹ kọ juwa tịtọ kọ ka ri ọngọ kụrụ-kụrụ ẹ-ẹpwụ nya ayịlọ nya ụnyẹ ọrụrụ ọlịnyị wuu kaa ri ọngọ wu ịlọmwụ kpa myị́ bwula o-juwa họ ang myị́ ang ịkịla wuu meme la abwọ, chajị kọ ka jẹ́-ẹ ye okpo ọkụrụ egbeju nya angị kụrụ-kụrụ myị́ ịnyịlẹhị. Ịwa juwa maga ju okpo ọkụrụ egbeju ọlẹ kọ kaa bịrị-bịrị myị́. Ma, ịnyahị ahị angịnyị nya Ohe Oluhye, tị ri okpo ọkụrụ egbeju ọlẹ kọ tị ka juwa pyịyọọ gbe oyi myị́ oyi.

²⁶Ịnyị a du kaam ayịdang á jam rụnyẹ nya ọmyịmyị ọlala nyam ọlẹ hwolo hwolo ka lẹ. Ịnyị a tị du kam jam ma uya nya ẹla nya Ohe Oluhye ọlẹ ọhọhọ lala ọngọ juwa da ọhụ awụ juujuujuu ododu ka ịnyịnyị lẹ.

²⁷Ma, ọkọkọ nya ọọwa lẹ, m kaa juwa yẹ ugbinyịrọ nyam ọlẹ akama nya ịlẹhị-ịlẹhị, chajị kọ ka jẹ́-ẹ juwa ju ihi hiigu-hiigu myị́, chajị kaam ọngọ juwa ya ẹla nya Ohe Oluhye ju angịkịla, ka mwọọgịlẹ ri ọngọlẹ kị ka ku dodehe lala ọngọ chịla-chịla kaka, lụka ohyẹẹkpẹ kpong-kpong kaka.