Read idege 2 ALA ỊKỌRỊNTỊ 1 Bible Online

2 ALA ỊKỌRỊNTỊ 1 - idege bible

2 ALA ỊKỌRỊNTỊ 1

¹Ụpwụ ọlẹ bwu ẹga nyam am ịPọlụ ọlẹrụ ọnyịịla nya ịKịrayịsị iJisọsị bwula irya nya Ohe Oluhye. Ọ myịmyị bwu ẹga nya iTimoti ọnyadahị ẹ-ẹpwụ nya ịKịrayịsị. Ahị jam dọọ du wanụ anụ ala ịchọọchị nya Ohe Oluhye ịla ịKọrịntị bala angị ịgọgọ nya Ohe Oluhye ịkịla ịlẹ kị juwa ọ-ọpyị nya Akaya wuu.

²Ọnahị bala okpunyi nya Ohe Oluhye Adahị bala ịnya Ọngọlahị iJisọsị ịKịrayịsị a juwa tanụ.

³Ahị ọwawa a juwa ha Ohe Oluhye Adịda nya Ọngọlahị iJisọsị ịKịrayịsị. Ohe Oluhye a ri Adịda nya ahyẹẹrwẹrwa ọlala wuu bala Ohe Oluhye nya ẹjẹ ọkpụ́kpụ wuu lẹ.

⁴Ọwa ayịdang a ri Ọngọlẹ kọ kaa kpụ́ụhị ahị angị myị ẹrụ ọnyịịla ọlẹ ẹjẹ ẹ-ẹpwụ nya akama ọyẹyẹ nyahị wuu, chajị kahị tịtị ka jẹ́-ẹ kpụ́ angịkịla ịlẹ kị ka ji ẹpwụ nya akama ẹjẹ bwula ẹjẹ ọkpụ́kpụ ọọwa ọlẹ ká Ohe Oluhye ya hahị lẹlẹ.

⁵Chajị, jaabwọ kaahị ayịdang jam bába yẹ akama ta ịKịrayịsị mwụ aba ba lẹ, ịnyịnyị-ịnyịnyị, ahị tịtị jam bwula ịKịrayịsị la ẹjẹ ọkpụ́kpụ mwụ aba ba lẹlẹ.

⁶Bwula ọọwa lẹ, akama ọyẹyẹ nyahị wuu ri, chajị kanụ ka jẹ́-ẹ bwula ọọwa la ẹjẹ ọkpụ́kpụ bala ọ-ka jẹ́-ẹ wu ọchịda nya Ohe Oluhye ọyị ịnyị! Ụka kahị tị la ẹjẹ ọkpụ́kpụ lẹ aalẹ, ẹjẹ ọkpụ́kpụ nyahị ọọwa a tịtị kaa chị wunu bwula ugbodu ojuju onyudiyo ọlẹ kanụ juwa la ẹ-ẹpwụ nya akama ọyẹyẹ tahị ịnyịnyị wuu lẹlẹ.

⁷Ẹhị ọrịrịị-rịrị ọlẹga nyanụ ọlẹ kahị la wuu lẹ, ọ́ la geng-geng kpong-kpong ka. Chajị, ahị jẹ́ yẹkẹẹ, jaabwọ kanụ wẹẹ yẹ akama tahị lẹ, anụ tịtị ka bwula ọọwa la ẹjẹ ọkpụ́kpụ tahị ịnyịnyị pyii lẹ.

⁸Anụ anyadahị ẹ-ẹpwụ nya ịKịrayịsị, ahị́ tịtọ kanụ ka juwa ẹ-ẹpwụ nya ukpowu u-uhye nya akama ịlẹ kahị yẹ wuu ọ-ọpyị nya Echiya kpong-kpong ka. Chajị, iru nya ụma nya ị-tụ pyịpyị ikpelego la datị-datị ịlẹ kị kịlaahị kịla, wẹ chịhị ọgụ ụ-ụwa gbee, kahị la ẹhị ọ-da hile nya ọhịhị nya ịlọhị dọmwụ kpong-kpong kaka.

⁹Ang odudu nya ọọwa ri yẹkẹẹ, ọ lahị lala Ohe Oluhye nyaa chị eje nya igu ọ-ka gbugbu nyahị lẹ, du ká igu juwa chọya juhi ịnyịnyị ịnyị. Ma, ọ́ tị lịnyị ẹ-ẹga nyahị, chajị kọọwa ka họ kahị ka jẹ́-ẹ dahịhile ịlọhị ahị ayịdang kaka. Ma, kahị ka juwa dahịhile Ohe Oluhye lẹpwụ-lẹpwụ wuu kem. Chajị, Ọwa-à ri Ọngọlẹ kọ kaa wule angị gbugbu eji bwula igu myị́ lẹ.

¹⁰Ọwa-à tị ri Ohe Oluhye Ọngọlẹ kọ kaa gbahị kpehe bwu ẹpwụ nya akama myị́ akama ọlẹpwụ nyahị ọ-ọnụ nya igu wuu ene-ene lẹ. Ọwa tị ri Ọngọlẹ kọ ka myịmyị-ị̀ juwa gbahị kpehe bwu ẹpwụ nya akama ịlịnyị ịlịlahị ịnyịnyị myịmyị lẹ. Ẹ-ẹga nya Ohe Oluhye kem, ẹhị ọrịrịị-rịrị nyahị a tị ji kọ ka juwa gbahị kpehe bwu ẹpwụ nya akama ịlịnyị ịlịlahị ịnyịnyịịnyị pyịyọọ lẹlẹ.

¹¹Anụ cheri kanụ juwa dahị ụbwọ bwula abwọ ọrịrị chajị nyahị mẹ. Chajị ká iru nya angịnyị lụmẹ-lụmẹ ka jẹ́-ẹ chị ọkẹkẹnị o-oluhye nya ahị ọwawa nya Ohe Oluhye ọlẹ kọ ka wa kụrụụhị bwula ọwẹwẹ nya iru nya abwọ ọrịrị ịịwa wuu mẹ.

¹²Chajị, ang ọlẹ kahị jam hi ọbọọchẹ ju ri yẹkẹẹ, ibeenu nya irya ọ-la ọngịnyị eje ọlẹpwụ ọkịlẹtụ nyahị ri yẹkẹẹ, ahị kpa ịgọgọ ọlala bala ẹla nya ịlẹhị nya Ohe Oluhye, juwa họ abwẹla nyahị wuu ọ-la odehe ọlẹ, tụ ọ-la ịlahị nyanụ anụ ayịdang. Ahị́ tị họ ọlẹ, bwula ẹla ọjẹ́jẹ nya odehe ọlẹ ka. Ma, ahị họ ọọwa bwula ọhaha ọnahị nya Ohe Oluhye ọlẹ kọ hu hahị.

¹³Ụma nya ang ịlẹ kanụ ka jẹ́-ẹ wa myị́ bala ịlẹ kanụ ka jẹ́-ẹ wo etu nyaa myịmyị myị́ kem, a lẹẹ kahị lẹẹ da du wanụ lẹ. Ẹhị ọrịrịị-rịrị nyam ri yẹkẹẹ, anụ ka la ọ-jẹ́ myịmyị yẹẹyẹẹ bwula ala ịwẹ jịra ugbẹnyị,

¹⁴gụ jaabwọ kanụ jẹ́ ang ọọwa une-une wẹ ene-ene, chajị ká ọọwa ka jẹ́-ẹ họ kanụ ka juwa chị ọkẹkẹnị juhi gbee pwụ ọbaba, jaabwọ kaahị ayịdang tịtị ka chị ọkẹkẹnị junu anụ ịnyịnyị la ẹnụtụrụ nya Ọngọlahị iJisọsị mẹ.

¹⁵Chajị nyọlẹ kam jẹ́ myịmyị ịnyị yẹkẹẹ, ọwẹwẹ nyam ka ri ọkẹkẹnị nyanụ, a du kam me obyi lụka nya ọgbanyẹ-ọgbanyẹ yẹkẹẹ, m ka warị wẹ ẹga nyanụ, chajị kanụ ka jẹ́-ẹ la ahị ọwawa ugbabwọ imiiye bwula ọọwa lẹlẹ.

¹⁶Chajị, ịnọ, m me obyi, kam ka bwu ẹga nyanụ kele ka ọpyị nya ịMẹsịdoniya, ene kam ka bwu ịMẹsịdoniya warị wẹ ịnyanụ, ịnọ, kanụ ka dam ụbwọ ẹ-ẹpwụ nya ẹdịyẹ ohihi nyam kele ka ọpyị nya iJudiya.

¹⁷Ọlẹ kam me obyi ọọwa ịnyị lẹ, anụ ya ká eje ọchịchị nyam ọọwa á bwu ẹpwụ nya irya nyam nya ịlẹhị-ịlẹhị ka? Lee, m tị́ kpa irya ọ-da ohu-ogo da ọhụ-amwụ nya alodehe ịlẹ kị jẹ́ Ohe Oluhye ka, me obyi ọọwa, chajị kam ka juwa họ “Ee” bala ọ-họ “Ehe” ju awụlẹ lụka ookpokpo mẹ?

¹⁸Bwula ẹla nya ịlẹhị nya Ohe Oluhye Ọngọ chịla o-hu ọkịlẹtụ ha, ẹla myị́ ẹla ọlẹ kahị kaa ya bwu ọnụ nyahị jenu wuu lẹ, ọ́ kaa ri o “Ee” bala o “Ehe” ju awụlẹ lụka ookpokpo kpong-kpong ka!

¹⁹Chajị, Ọnyẹwẹ nya Ohe Oluhye ọlẹ kọ ri iJisọsị ịKịrayịsị, ọlẹ kahị kaa ya ẹla nya Ohe Oluhye chajị nyamwụ jenu ịnyịnyịịnyị lẹ, ẹla nyamwụ a kaa ri o “Ee” bala o “Ehe” ju awụlẹ lụka ookpokpo kpong-kpong ka. Ma, ẹla nya ịKịrayịsị ụka myị́ ụka wuu kaa ri o “Ee” kem. Ẹla ọọwa kpangga, iSilivanọsị bala iTimoti bala am ayịdang a kpa kaka ya jenu lẹ.

²⁰Chajị, ịKịrayịsị ayịdang kpangga a ri o “Ee” nya ọnụ ọmyịmyị ọnyị myị ọnyị wuu ọlẹ ká Ohe Oluhye myị hahị lẹ. Ịnyị a du kaahị ayịdang kaa ya “Amẹn” ju ọnụ ọmyịmyị ọọwa bwula ịKịrayịsị nyọka ya ogbo ogwogwo wuu ha Ohe Oluhye lẹlẹ.

²¹Ma, Ohe Oluhye ayịdang a ri Ọngọlẹ kọ kaa ya ọngịrị hahị bala anụ du kahị jẹ́ godayị kpakpakpa ẹ-ẹpwụ nya ịKịrayịsị lẹẹ pyịyọọ lẹ. Ohe Oluhye a tị ri ọngọ chụhị, ya ọngịrị nyamwụ hahị, kahị ka ri angị kpa ẹrụ ọnyịịla nyamwụ ọlẹ ya pyẹ lẹẹ, ịnyịnyị lẹlẹ.

²²Ohe Oluhye ayịdang hu ịna nya ẹjẹẹ o-juhi ju ha ịlọmwụ baahị lẹ. Ịnyị, Ohe Oluhye a hu Olegu Ịgọgọ nyamwụ kụ ẹ-ẹpwụ ọkịlẹtụ nyahị, chajị ká Olegu Ịgọgọ ọọwa ka ri ang o-juhi ahị angịnyị nya Ohe Oluhye wuu ẹjẹẹ datị lala angịnyị nyamwụ lẹlẹ.

²³M jam be ẹkọ wụrụ Ohe Oluhye nya olibeenu nyam u-uhye nya ẹla ọlẹ. Ẹla ọọwa ri yẹkẹẹ, ọ́ hám kam ka warị wẹ ịKọrịntị, chajị nyọka yẹnụ akama ka. Ịnyị kpangga, a du kam da ọwẹwẹ nyam yi lẹ.

²⁴Chajị, ụkụrwọ nya Ohe Oluhye ọhọhọ nyahị ẹ-ẹpwarịrị nyanụ, á ri nyọka juwa tụụnụ ba ẹ-ẹpwụ nya ọmyịmyị ọlala nyanụ kpong-kpong ka. Ma, ahị ri angị danụ ụbwọ, chajị kanụ ka la ọkẹkẹnị nya ịlẹhị-ịlẹhị bwula ọọwa, chajị anụ ri angị godayị kpakpakpa ẹ-ẹpwụ nya Ọngọlahị ene-ene lẹ.