Read idege 2 ALA ỊKỌRỊNTỊ 10 Bible Online

2 ALA ỊKỌRỊNTỊ 10 - idege bible

2 ALA ỊKỌRỊNTỊ 10

¹Am ịPọlụ ọlẹ ayịdang a lẹẹ bịlẹnụ bwula ọwụlẹlẹ bala ọdụmwọ ọlala nya ịKịrayịsị lẹ. Am a tị ri ọngọlẹ kanụ kaa yẹkẹẹ, am nyị kaa nyiri i-ijata nyanụ dẹyị-dẹyị lala oriri lẹlẹ. Ma, ụka kaam nyị́ rụ bwu ẹga nyanụ kpá lẹ, am nyaa kaa chị ila lala ịkpala mwọọgịlẹ lẹlẹ.

²Anụ chuchuu, anụ myị ká ọhọhọ nyanụ a gbilem kaka kpa ọngịrị ụbwọ warị lụka kam ka wẹ ijata nyanụ koo! Chajị, ó-ri ịnyị ka aalẹ, m la ọngịrị ka mẹ ẹla o-ya myị́ nyam jẹ ẹ-ẹga nya angịlẹ kị wẹẹ me irya yẹkẹẹ, ụma nya ọháha ọ-lala ịnya alodehe ịlẹ kị jẹ́ Ohe Oluhye ka, ahị nyaa lẹẹ kpa họ ụkụrwọ nyahị ọlẹ lẹ.

³Chajị, ọ ri nya ịlẹhị, ahị jam hịhị ẹ-ẹpwụ nya odehe ọlẹ odu ịnyị, i-irya nya alodehe ịlẹ kị jẹ́ Ohe Oluhye ka, ahị angịnyị nya Ohe Oluhye a jam kpa ma uya nya ọmyịmyị ọlala ọlẹ kpong-kpong ka.

⁴Ụma nya ang-abwọ nya ẹwụ ịlẹ kahị lẹẹ kpa dẹwụ nya ọhịhị nya ọngịnyị nya Ohe Oluhye oriri ọlẹ lẹ, ị́ ri ang-abwọ ị-lala ụma nya ịnya alodehe ịlẹ kị jẹ́ Ohe Oluhye ka lẹ ka. Ma, ang-abwọ nya ẹwụ ịlẹ kị bwu ẹga nya Ohe Oluhye, ịnyị! Ịwa, ahị tị kaa kpa ta ụbwọ ẹwụ nya aluji nyahị wuu ayịreji gbanggbang lẹ.

⁵Ahị kaa ta ịwẹẹ ọnọọkịla ọdada wuu ayịreji. Ahị kaa ta irya nya ọbọọchẹ ohihi nya angịlẹ wuu kị kaa tụ ang ọjẹ́jẹ nya ịlẹhị chajị nya Ohe Oluhye wuu pyịpyị ayịreji ịnyịnyị. Bwula ọọwa lẹ, ahị kaa kpa angịlẹ wuu kị la irya ụhwahị ịlịnyị nya tịrẹkpẹ wẹ ụgbẹyị nya ẹla nya Ohe Oluhye gbee ká angịịwa ka ri angị ju ihi nya ịKịrayịsị yẹẹyẹẹ.

⁶Ịnyị, ụka ọlẹ kanụ chị ihi nya Ọngọlahị ojuju yẹẹyẹẹ lẹ, ehe wuu gede-gede ẹ-ẹpwarịrị nyanụ lẹ aalẹ, ahị kaa nwụlanọ nyọka juwa yẹ angị myị ju ihi hiigu-hiigu kaka, akama lụka ọọwa lẹlẹ.

⁷Jaabwọ ká ang ọlẹ kanụ wẹẹ kpa ugbẹhị ọlẹpwụ ẹhị nyanụ yẹ, menu ká ang ọọwa la lẹ, anụ kpa irya nya ọọwa kem chị eje nya ẹla u-uhye nya ang ọọwa kpong-kpong ka. Lẹ, ó-ri ká ọngọngọhẹ nyanụ á juwa kọ dahịhile ịlọmwụ yẹkẹẹ, ọwa nyị ri ịnya ịKịrayịsị nya ịlẹhị-ịlẹhị lẹ aalẹ, ọngọọwa a nwụ irya nyamwụ me yẹẹyẹẹ kọ jẹ́ ịnyịnyị yẹkẹẹ, ahị angịkịla ihihi wuu nyị tịtị juwa ẹ-ẹpwụ nya ịKịrayịsị lala ọwa-ọwa ayịdang mẹ.

⁸Chajị, ó-riri kam dọmwụ jam chị ogu chịchị lụmẹ kpoye jaabwọ kọ chịla u-uhye nya ọngịrị ọlẹ ká Ọngọlahị ya juhi ụbwọ kahị ka kpa họ kanụ ka juwa wule kịlahị-ịlahị ẹ-ẹpwụ nya ọmyịmyị ọlala nyanụ wẹwẹ aalẹ, ọ́ ka lam oyoyi ka. Chajị, Ohe Oluhye á ya ọngịrị ọọwa hahị nyọka kpa tanụ ayịreji kpong-kpong ka.

⁹Chajị nya ọọwa lẹ, ọ juwa lanụ lala o-ri yẹkẹẹ, ileta kem, am nyaa wẹẹ da du warị kaka junu uhi-uhi lẹlẹ ka!

¹⁰Chajị angịhyẹ juwa yẹkẹẹ, “Chaaa! ỊPọlụ ọwẹ lee, ọngịrị nyamwụ wuu tị ri ịnya ileta o-ya ẹla ọnyọọngịrị bala ẹla olilo kem ọdada lẹ! Ma, ụka kọọwa ayịdang á warị wẹ ijata, ọ tị kaa ri ọngọ mịlẹ mịlẹ bala o-ya ala ịlẹpẹpẹ kem ụka ọlịnyị.”

¹¹Anụ angị ya ụma nya ẹla ọlịnyị wuu, anụ wo mẹ. Ịngịngịhyẹ á ri ang ọdatị ẹ-ẹpwụ nya ileta ịlẹ kahị kaa da du wanụ lụka kahị ji ijata nyanụ ka bala ang ọlẹ kahị kaa họ lụka ọlẹ kahị juwa tanụ kpong-kpong ka.

¹²Ọ ri nya ịlẹhị yẹkẹẹ, ahị ayịdang lẹ, ahị́ ka jẹ́-ẹ byị ẹjẹ́-ẹ juwa kpa ịlọhị kele ka iwe-ahụrụ nya angịkịla ịlẹ kị wẹẹ ya ịlaa dodehe hiigu-hiigu ị-ịlahị nyanụ lee ọ-chụ ịlọhị pwoku angịịwa kpong-kpong ka. Chajị, ịwa lẹ, ị juwa kaa hu alogu nyaa ịwa-ịwa nọ nya ụbajị o-me enyi ẹpwụ nyaa bala ọ-kaa chụ ọhịhị nyaa ịwa-ịwa kaka pwoku awụlẹ ịnyịnyị. Ọlẹ kị kaa họ ịnyị lẹ, ọọwa mẹjẹ yẹkẹẹ, ị́ la ọ-jẹ́ myịmyị ọhẹ-lọhẹ juwa ẹ-ẹpwụ nyaa kpong-kpong ka.

¹³Ma, ahị ayịdang lẹ, ogu ọchịchị nyahị wuu á kaa kpoye nya ẹga ọlẹ ká Ohe Oluhye ya ọngịrị nyamwụ hahị kaka ba ka. Ma, ahị kaa chị ogu nyahị ọọwa meme la ẹga ọlẹ ká Ohe Oluhye ya ọngịrị ọ-kpa họ ụkụrwọ nyamwụ ọlẹ hahị kaka ba kem. Ọngịrị ọ-kpa họ ụkụrwọ ọọwa a kpahị kaka họ ụkụrwọ gbee kahị wunu ọyị wẹ ịnyịnyị lẹ.

¹⁴Chajị, ọlẹ kahị wẹẹ wanụ jula ebwo nya ụkụrwọ nyahị lẹ, ọọwa á ri yẹkẹẹ, ahị juwa nịra cheechee kpoye nya iwe-ahụrụ nya ụkụrwọ nyahị lẹ ka. Chajị, ahị ayịdang kpangga a ri angịlẹ kahị kpa ẹrụ ọnyịịla nya ịKịrayịsị ọlẹ warị kaka ya jenu nya ọgbanyẹ-ọgbanyẹ lẹ.

¹⁵Chajị nya ọọwa lẹ, ụka kahị juwa kpanụ chị ogu, ọọwa ri yẹkẹẹ, ahị juwa chị ogu ju ụkụrwọ nya angịkịla ịlẹ kị ji ẹpwụ nya oba-oyi nya ụkụrwọ nyahị ahị ka lẹ ka. Ma, ẹhị ọrịrịị-rịrị nyahị ri yẹkẹẹ, jaabwọ ká ọmyịmyị ọlala nyanụ ka juwa nwa kele kịlahị-ịlahị ịnyịnyịịnyị kaka ba, ịnyị, iwe-ahụrụ nyọka juwa họ ụkụrwọ nyahị ẹ-ẹpwarịrị nyanụ a tịtị ka jẹ́-ẹ da gbamm hahị kaka ba pwoku ọngịrị ọlẹ ká Ohe Oluhye ya juhi ụ-ụbwọ nya ọ-kpa họ ụkụrwọ ọọwa ịnyịnyị lẹlẹ.

¹⁶Chajị, kahị ka jẹ́ bwula ọọwa, juwa kpa ẹrụ ọnyịịla ọlẹ ya pyẹ kpoye nya ọpyị nyanụ kele ka epwoja ịkịla ịnyịnyị. Chajị kahị ka jẹ́-ẹ juwa chị ogu ju ụkụrwọ nya angịkịla ịlẹ kị họhọ kpá wuu ene-ene lẹ, kpong-kpong kaka lẹlẹ.

¹⁷Chajị, ị da kpehe ụ-Ụpwụ Ịgọgọ ẹ-ẹgẹhẹ yẹkẹẹ, “Ọng myị́ ọng ọlẹ kọ juwa tịtọ kọ ka chị ogu lẹ aalẹ, ọngọọwa a juwa chị ogu ju ụkụrwọ ọlẹ ká Ọngọlahị họ kem mẹ.”

¹⁸Chajị, oo-ya dodehe ọlẹ kọ bwu ọnụ nya ọngịnyị ehe ayịdang kpehe chajị nya ịlọmwụ, a ri nya ịlẹhị kpong-kpong ka. Ma, o-ya dodehe u-uhye nya ọngịnyị ehe ọlẹ kọ bwu ọnụ nya Ọngọlahị ayịdang kpehe kpangga a ri nya ịlẹhị lẹ!