Read idege 2 ALA ỊKỌRỊNTỊ 11 Bible Online

2 ALA ỊKỌRỊNTỊ 11 - idege bible

2 ALA ỊKỌRỊNTỊ 11

¹Ịnọ, ọ hám kanụ jẹ́-ẹ kpa ugbodu ojuju dam ọhụ pịlẹ ẹ-ẹpwụ nya uchi ọchịchị nyam chẹẹ. Anụ chuchuu kanụ họ ịnyị mẹ!

²Chajị, ụma nya ijiiji ọlẹ ká Ohe Oluhye kaa la kpangga a ri ụma nya ijiiji ọlẹ kam lẹẹ kpa la ọháha ọlẹpwụ nyam ẹ-ẹga nyanụ lẹ. Chajị, m ya ẹla nyanụ ha ịKịrayịsị lala ahụ nyamwụ bwula ẹrụ ọnyịịla ọlẹ kam kpa kaka ya jenu lẹ. M họ ịnyị, chajị kam ka jẹ́-ẹ nwụlanụ nọ yẹẹyẹẹ gbe ịKịrayịsị ọlẹ kọ ri ọrụnụ, jaabwọ ká ọyẹẹnọ ọlẹ kọ jẹ́ ọlẹng ẹnẹnẹhẹ lẹka, kaa nwụla ịlọmwụ nọ gbe ọrụ nyamwụ.

³Ma, lẹẹlẹẹ lẹ, uko ọchịchị nyam chajị nyanụ ri yẹkẹẹ, jaabwọ ká ilo kpa ijẹẹhị nyamwụ pịrị Iivu ju lụka nyamwụ lẹ, ó-ri ká Ohe Onyobyi á tịtị hụ irya nyanụ ahị lẹẹlẹẹ hi ọhịhị ọgbagbịlagba nyanụ bala ọkịlẹtụ onyoowuru nyanụ ọlẹ kanụ kaa kpa gbịgba ha ịKịrayịsị ene-ene lẹ, ḿ jẹ́ datị ka.

⁴Chajị, m wo oja yẹkẹẹ, anụ nyị dodo juwa ye ọng myị́ ọng ọlẹ kọ juwa warị kaka ya ẹla nya Ohe Oluhye jenu chajị nya iJisọsị ọkịla ọhẹ gụ iJisọsị ọlẹ kahị kpa kaka ya jenu ene-ene lẹ. Anụ tị juwa ye ẹla Ohe oyaya nyaa ọọwa bajẹ gbaa ịnyịnyị lẹ. Anụ tị juwa ye olegu ọkịla gụ Olegu Ịgọgọ ọlẹ kanụ ye lụka nyahị ịnyịnyị lẹ. Anụ tị myịmyị dodo juwa ye ẹrụ ọnyịịla ọkịla ju ụbwọ gụ ẹrụ ọnyịịla ọlẹ kahị kpa kaka ya jenu lụka nyahị ịnyịnyị lẹ.

⁵Am ayịdang lẹ, angị myị ẹrụ ọnyịịla ịlẹpwarịrị nyanụ ịlẹ kanụ wẹẹ hu lala angị ịtụka-ịtụka ikpelego wuu lẹ, ḿ me irya yẹkẹẹ, am ri ochiche gwaa kpong-kpong ịnọ tị koo!

⁶Ó-riri ká omyi ọ-kpa ya ẹla dodehe nyam am á rụ ala rụ byoobyoo kpong-kpong ka, wẹwẹ aalẹ, ḿ hi ịbẹ ẹ-ẹpwụ nya ang ọjẹ́jẹ chajị nya Ohe Oluhye kpong-kpong ka. Ahị ayịdang dọmwụ kaa da ẹlẹwẹ wụlẹ ya jenu gede-gede ụka wuu ẹ-ẹpwụ nya ang myị́ ang ọhọhọ nyahị wuu.

⁷Anụ ya jem wẹẹ! Ó ri ọlẹ kam kpa ịlọm weji bẹdẹẹ ị-ịlahị nyanụ, chajị kanụ ka ri angị la ihi-ihi bala ọlẹ kam ya ẹrụ ọnyịịla nya Ohe Oluhye ọlẹ junu la ọ-chịnụ ịnya nyamwụ kpong-kpong ka lẹ, ọọwa ri ọhọbịrị kam họ lẹ?

⁸M dọmwụ họ ala ịchọọchị ịlẹga ọkịla ri lụka ọlẹ kam juwa ẹ-ẹga nyanụ bwula ọlẹ kam kaa ye okpoko bwu ụbwọ nyaa yẹẹnụ dada.

⁹Ụka ọlẹ kam juwa ẹ-ẹga nyanụ wẹẹ lẹ, ụka myị́ ụka wuu kam ji ẹpwụ nya ọbaba, ḿ kaa hu olo nya ọọwa chụ ọngọngọhẹ lẹpwụ nyanụ kpong-kpong ka. Anyadahị ẹ-ẹpwụ nya ịKịrayịsị ịlẹ kị bwu ọpyị nya ịMẹsịdoniya a kpa okpoko wam ọlẹ kọ du kam họ ọbaba nyam wuu myị́ lẹ. Ẹ-ẹpwụ nya ang myị́ ang wuu, m jẹ́ kpa ịlọm, chajị kam ka ri olo ha ọngọngọhẹ nyanụ kpong-kpong ka. Ịnyịnyị, m tị ka jẹ́-ẹ họ kele kịlahị-ịlahị pyịyọọ lẹlẹ.

¹⁰Bwula ẹla nya ịlẹhị nya ịKịrayịsị ọlẹ kọ jam ẹ-ẹpwụ nyam, m jam ya dodehe yẹkẹẹ, ọngọngọhẹ á juwa o-oye nya ọpyị nya Akaya wuu, kọ ka jẹ́-ẹ tụ ọnụ nyam pịrị myị́ ẹ-ẹpwụ nya ogu ọchịchị nyam o-oluhye nya ẹlẹwẹ myị́ kpong-kpong kaka.

¹¹Anụ me irya yẹkẹẹ, am nyị juwa ya ẹlẹwẹ tanụ chajị nya, anụ ọ-hám há ka? Ehe! Ohe Oluhye jẹ́ yẹkẹẹ, anụ nyị hám jam.

¹²M ka juwa kịlahị-ịlahị la ụkụrwọ ọlẹ kam lẹẹ kpa họ, chajị kam ka jẹ́-ẹ bwula ọọwa ku angị ya ẹrụ ọnyịịla ịtụka nyanụ ịwẹ iwe nyọka jẹ́-ẹ ye ịngịngịhyẹ yụbwọ chị ẹ-ẹpwụ nya ogu ọchịchị nyaa kpong-kpong kaka. Jaabwọ kịịwa ayịdang wẹẹ wa ịlaa lala ịwa bala ahị nyaa ji ẹpwụ nya iwe-ahụrụ ookpokpo ẹ-ẹpwụ nya ụkụrwọ nya Ohe Oluhye ọhọhọ ọlẹ wẹẹ.

¹³Chajị, ụma nya angịnyị ịlịịwẹ ri abala nya angị ya ẹrụ ọnyịịla pyẹ. I ri angị họ ụkụrwọ la ijẹẹhị, ọlẹ kị juwa da ugba nya alẹrụ ọnyịịla ịlam-ịlam nya ịKịrayịsị kụrụ bwula ijẹẹhị nyaa ọọwa, nyọka yụbwọ kụrụ angịnyị angịkịla a-ahị.

¹⁴Ọhọhọ nyaa ọọwa á ri ịngịhyẹ ọlụnụna kpong-kpong ka. Chajị, Ohe Onyobyi ayịdang kọ ri adịda nya ukpowu okpem-kpem riri lẹ, ọ kaa da ugba nya ahịgboo nya alegu-ẹrụ nya Ohe Oluhye kụrụ ịlọmwụ la ijẹẹhị ụhwahị nyamwụ myị́ ịnyịnyị.

¹⁵Chajị nya ọọwa lẹ, ó-ri ịngịngịhyẹ ọlẹbyẹbyị ka, ó-ri ká angị ri anchẹ ị-myị ẹrụ nya Ohe Onyobyi á ka juwa kpa abwụma nya anchẹ nya abwẹla ọnyịịla nya Ohe Oluhye ịnyịnyị. Ma, ị tị ka ye uri ọlẹ kọ ka pwoku ang onyobyi nyaa ọlẹ kị wẹẹ họ pyii lụka ohyẹẹkpẹ.

¹⁶M tịtọ kam ka ma ẹla ọlẹ ya jenu myịmyị. Anụ hum lala oluchi ẹ-ẹpwụ nya irya nyanụ ka, chuchuu! Ma, ọ́ tị riri kam menu oluchi meme wẹwẹ aalẹ, anụ cheri kanụ yem lala oluchi odu mẹ. Chajị, kam ka jẹ́-ẹ la ogu ọchịchị ọhẹ pyịnyẹng chẹẹ mẹ!

¹⁷Ẹlẹwẹ kam wẹẹ ya lẹẹlẹẹ lẹ, ọ-Ọngọlahị a wẹẹ kpam ya ka. Ma, m jam ya ẹla ọlẹ dodehe bwula uchi ọchịchị nyam ẹ-ẹpwụ nya ogu ọchịchị ọwẹ kem.

¹⁸Aliru nya angịkịla ịlẹ kị wẹẹ kpa ang-abwọ ilodehe ọlẹ chị ogu bẹ? Lẹ, am tịtị ka chị ogu ịnyịnyị chẹẹ taa lẹ.

¹⁹Chajị, anụ la ịlọnụ kaa kpa ugbodu ojuju hịnyọhi ha aluchi la ọkẹkẹnị bwula ẹla ọjẹ́jẹ lụmẹ nyanụ, jaabwọ kanụ kaa ya.

²⁰Ọlịnyị a du kanụ wẹẹ ru ẹkpaaga la ọnụ ujiji ha angịlẹ kị wẹẹ kpanụ họ myị́ lẹ. Chajị ọ́ riri ká angịịwa á juwa kpanụ yẹ ụhị lala anyịhị wẹwẹ lee o-juwa beenu be riri hwẹẹhwẹẹ wẹwẹ lee o-juwa yẹẹnụ yẹ dada bwula ọ-họnụ họ ri la datị-datị wẹwẹ lee o-juwa jẹnụ jẹjẹ u-uhye chẹẹchẹẹchẹẹ, jaabwọ kọ háa há wẹwẹ lee ọdọmwụ waanụ abwọ wa a-ahị pyarị wẹwẹ wẹẹ, ọọwa, á ka rinu ẹlẹlẹhẹ kpong-kpong kaka.

²¹Ó-ri ọhọhọ ọlịnyị kọ hiigu gụ lẹ aalẹ, ọ tị tị mwọọgịlẹ ka ri ang ọ-lam oyoyi ẹ-ẹga nyahị ahị lẹ! Chajị ụka ọlẹ kaahị ayịdang juwa tanụ lẹ, jaabwọ kahị ri angị la dẹwụ-dẹwụ lụmẹ jaabwọ ká angịhyẹ kaa ya lẹ, ahị́ byẹjẹ kaa họnụ ala ịtịpyọ ịlịnyị myị́ kpong-kpong ka! Ma, ọ́ tị ri ká ịngịngịhyẹ á juwa ká angị ịlịnyị á ka byị ẹjẹ́-ẹ juwa kpa chị ogu myị́ aalẹ, am ayịdang jam ya dodehe bwula uchi ọchịchị nyam yẹkẹẹ, am tịtị ka byị ẹjẹ́-ẹ juwa chị ogu u-uhye nya ang ịlịnyị taa myị́ ịnyịnyị!

²²Chajị, ó-ri kị yẹkẹẹ, ịwa nyị ri ala iJuu aalẹ, m tịtị ri ala iJuu ịnyịnyị. Ọ́ tị ri kị yẹkẹẹ, ịwa nyi ri ala Isirẹlụ aalẹ, ọnyị nya ala Isirẹlụ, m tịtị ri ịnyịnyị lẹ. Ọ́ tị ri kị yẹkẹẹ, ịwa nyị ri anyị nya Ebiraham aalẹ, ọnyị nya Ebiraham, m tịtị ri ịnyịnyị lẹ.

²³Ó-ri kị yẹkẹẹ, ịwa nyị ri anchẹ nya ịKịrayịsị aalẹ, ọ ri nya ịlẹhị, m jam ya ẹla ọlẹ dodehe lala am nyaa juwa hya ụla. Ma, am ayịdang a tị jẹ́ ri ọnchẹ ọlam-ọlam nya ịKịrayịsị gwaa ịwa wuu wẹẹ lẹ. Chajị, m ri ọngọ họ ụkụrwọ ọnyọọngịrị ha ịKịrayịsị gwaa. M yẹ akama olube nya agba la iru nya ụka lụmẹ-lụmẹ gwaa, chajị nya ụkụrwọ ọlẹ lẹ. I nyim enyiri ugbabwọ ọlẹ kị ka jẹ́-ẹ wawa myị́ kaka, o-oluhye nya ẹrụ ọnyịịla ọlẹ gwaa. M kaa jẹ ju ọnụ nya igu ogbugbu chwẹẹ lụka lụmẹ-lụmẹ chajị nya ẹrụ ọnyịịla ọlẹ ịnyịnyị.

²⁴Ala iJuu kpa ugboji nyim enyiri lala ịnụ ohu kụrụ iwo, iwo kụrụ ihikichu lala ugbabwọ ịrụ, chajị nya ẹrụ ọnyịịla ọlẹ jẹ́ lẹ!

²⁵Ala iRom kpa ọgọdọ nyaa nyim enyiri lala ugbabwọ ịta jẹ́ lẹ. Ị tị da ajwọ mịlam ugbabwọ ookpokpo jẹ́ ịnyịnyị lẹ. Ụgbọ nya enyi nyahị bịrị lahị ẹ-ẹpwụ nya ihu ọtụka lala ugbabwọ ịta jẹ́ lẹ. Ụka ọkịla juwa kam juwa yẹ akama ẹ-ẹpwarịrị nya ihu ọtụka lodu ookpokpo bala ahị ọpyẹpyẹ ookpokpo lẹpwụ-lẹpwụ ụka ká ụgbọ nya enyi nyahị bịrị.

²⁶Ẹ-ẹpwụ nya anyị ọkaka nyam ịnyịnyịịnyị, ụka ọhẹ juwa ká enyi ịtụka-ịtụka kaa myị yẹm dada. M kaa ji ẹpwụ nya akama nya angị nu angịnyị ang la agbụrụ. M kaa ji ẹpwụ nya akama o-bwu ẹpwụtụbwọ nya ala iJuu nyahị bala akama o-bwu ẹpwụtụbwọ nya ala iJentayịlị bala akama o-bwu ẹpwụtụbwọ nya alepweji ịtụka. M kaa ji ẹpwụ nya akama olugbileji. M kaa ji ẹpwụ nya akama ọlẹpwụ nya ihu ịtụka-ịtụka. M kaa ji ẹpwụ nya akama o-bwu ẹpwụtụbwọ nya abala nya angị kaa wụrụ ịlaa anyadịda nyahị ẹ-ẹpwụ nya ịKịrayịsị.

²⁷M kaa ji ẹpwụ nya ịnyịrọ ọ-chị́ pyẹpyẹ bala ọjụjụ nya ụkụrwọ ọnyọọngịrị ọhọhọ ịnyịnyịịnyị. Iru nya odu lụmẹ-lụmẹ juwa kam kaa kụ lahị, kpa une kẹhị kpong-kpong ka, gbee ká ahị kaa pyẹ. M kaa juwa ẹ-ẹpwụ nya imyi ọnwụnwụ bala imyi-enyi ịnyịnyị. M kaa juwa ẹ-ẹpwụ nya ọ-nọ la imyi, m kaa nọ la ohu bala o-yé ịngịngịhyẹ kụrụ ugbinyịrọ nyam ọlẹ kpong-kpong ka ịnyịnyị.

²⁸Ọ́ dọmwụ ba oo-ri yẹkẹẹ, ị-tụ pyịpyị i-bwu odehe ịwẹ wuu juwa wẹ chịm ogu kem ka. Ma, olo nya ụkụrwọ nya Ohe Oluhye ọhọhọ jam yẹ rịrịm ẹnẹnẹẹnụ wuu bwula ọlẹ kam juwa kaa me imahị nya ịlẹhị-ịlẹhị u-uhye nya ala ịchọọchị ịlẹga la datị-datị wuu ịnyịnyịịnyị.

²⁹Chajị, ọla ịchọọchị olale, a tị́ ri ọngọ dẹwụ-dẹwụ ẹ-ẹpwụ nya ọmyịmyị ọlala nyamwụ kaam ịPọlụ ọlẹ á ka ma uya ju ọdẹwụ-dẹwụ nya ọngọọwa lala ịnya ịlọm ka? Lee, ọngịnyị nya Ohe Oluhye olale, a tị́ juwa kọ ri ká ọnya nya ọhọbịrị ọhọhọ á wu ọngọọwa lẹ, kaam ịPọlụ ọlẹ á ka juwa ẹ-ẹpwụ nya ochipwuu nya ịlẹhị-ịlẹhị o-oluhye nyamwụ kpong-kpong ka ịnyịnyị?

³⁰Ó-ri ká ịngịngịhyẹ á juwa kaam ịPọlụ ọlẹ á ka kpa chị ogu chị tụbwọ aalẹ, ụma nya ang ịlẹ kị kaa chị ọdẹwụ-dẹwụ nyam ehe kem, a ri ang ịịwa lẹlẹ.

³¹Ohe Oluhye ọlẹ kọ ri Adịda nya Ọngọlahị iJisọsị, Ọwa Ohe Oluhye, Ọngịnyị nya ahị ọwawa pwụ ụka myị́ ụka ayịdang jẹ́ yẹkẹẹ, ọ-ọnọọkịla, am nyaa wẹẹ me kpong-kpong ka.

³²Ụka ọhẹ juwa ugbeene, ká agaba nya ọpyị ọlẹ kọ ji ekpeleji nya adịrahụ Aretasị ya, nyị juwa gbe ọnụ ogirigba nya epweji nya ịDamasịkọsị wuu, chajị kịị nyị ka jẹ́-ẹ wum lahị-lahị ụ-ụwa mẹ.

³³Ma, angịhyẹ tị hum ju ẹ-ẹpwụ nya udo ọhẹ bwu iwa nya iwindo olugulọ nya epweji ọọwa kpoye kele koye ọlaanyị ene kam jẹ́-ẹ be hi ẹpwụtụbwọ nyamwụ myị́ ụka ọọwa.