Read idege 2 ALA ỊKỌRỊNTỊ 12 Bible Online

2 ALA ỊKỌRỊNTỊ 12 - idege bible

2 ALA ỊKỌRỊNTỊ 12

¹Ịnọ, m jẹ́ kọ ri ang opwoku ham kam ka juwa chị ogu ịnyị koo. Ma, m tị ka ya ẹla rụ́ ọyị ọyẹyẹ a-arụrụ bala ang ịkpịbaa ịlẹ ká Ọngọlahị wụrụ mẹjẹ ọngọhẹ jenu lẹẹlẹẹ lẹ.

²Chajị, m jẹ́ ọlẹng ọhẹ ẹ-ẹpwụ nya ịKịrayịsị, kị kpa ọlẹng ọọwa rụ kele ka epwoohe ọhata lala ẹka iwo kụrụ ine kẹkpẹ lẹ. Ó-ri kị kpọọ kele ẹ-ẹpwụ nya ugbinyịrọ lahị-lahị ịịwẹ, ḿ jẹ́ datị ka. Ọ́ tị ri kị kpọọ kpa kele ka ụwa a-arụrụ, ḿ jẹ́ datị ka. Ohe Oluhye ayịdang a jẹ́ lẹlẹ.

³Ang ọlẹ kam jẹ́ ụbwọọmwụ ri yẹkẹẹ, ị hu ọlẹng ọọwa kpa rụ kele ka uhye-ọgba ka ẹga ọlẹ kị wụrụ ịParadayịsị. Ó-ri kị kpọọ kele ẹ-ẹpwụ nya ugbinyịrọ lahị-lahị, ḿ jẹ́ datị ka. Ọ́ tị ri kị kpọọ kpa kele ka ụwa a-arụrụ, ḿ jẹ́ datị ka. Ohe Oluhye ayịdang a jẹ́ lẹlẹ.

⁴Ụka ká ọlẹng ọọwa pwụ ụwa, ọ kpa ụrụ nya ịlọmwụ wo ụma nya ala ịlẹ ká ọnụ nya ọngịnyị ehe á ka jẹ́-ẹ ya dodehe myị́ kpong-kpong ka. Ụma nya ala ịịwa ri ala ịlẹ kị dọmwụ ya ẹga da ha ọngịnyị ehe ọhẹ-lọhẹ nyọka yaa ya dodehe je angịkịla kpong-kpong ka ịnyịnyị.

⁵Ịnọ, ó-ri kam ka chị ogu lẹ, ịnọ, ụma nya ọngịnyị ọlịịwẹ kem, m ka kpa chị ogu lẹlẹ. Ma, ḿ ka jẹ́-ẹ chị ogu u-uhye nya ịlọm am kaka. Kẹnẹ-kẹnẹ, ó-ri ọ-chị ogu u-uhye nya ọdẹwụ-dẹwụ nya ịlọm ụbwọọmwụ lẹ mẹ ịnyị!

⁶Ọ ri nya ịlẹhị, ịnọ, ọ́ tị ri kam tịtọ nyọka kpa ịlọm chị ogu chịchị wẹẹ, ịnọ, ọ́ ka ri ẹla nya uchi ọhọhọ ka. Chajị, ịnọ, m ka juwa ya ẹla nya ịlẹhị rụ́ ịlọm. Ma, m tị gwooja gwo hịnyọ la ọ-họ ịnyị. Chajị ká ọngọngọhẹ á ka jẹ́-ẹ juwa me irya ogidogbo u-uhye nyam am ịlọm dachichi gụ irya ọlẹ kọ chịla omeme u-uhye nya ọhịhị nyam ọlẹ kọ juwa kpẹhị nya ịlọmwụ yẹ bala ang ọmẹjẹ o-bwu ọnụ nyam kpehe tụtụm kpong-kpong kaka.

⁷Ma, chajị nyọka họ chajị kam ka jẹ́-ẹ, juwa nwa ọbọọchẹ gidogbo o-oluhye nyori yẹkẹẹ, Ohe Oluhye wụrụ iru nya ang ịlẹbyẹbyị ịtụka ịlịnyị mẹjẹm kpong-kpong kaka, a du ká Ohe Oluhye hu ịngịhyẹ nọ ọlẹ kọ kaa juwa gu ugbinyịrọ nyam chọọchọọ ịnyịnyịịnyị lẹlẹ. Ọọwa lẹ, ang ọọwa a yẹ ri ọlẹrụ nya Ohe Onyobyi ayịdang ọlẹ kọ kaa warị kaka nyim enyiri họọ, chajị kam ka jẹ́-ẹ juwa nwa gidogbo ẹ-ẹpwụ nya ọbọọchẹ ohihi myị́ kaka lẹlẹ.

⁸M bịlẹ Ọngọlahị ẹ-ẹpwụ nya abwọ ọrịrị ugbabwọ ịta gbẹgbịlẹ, chajị ká Ohe Oluhye ka tụ ang ọọwa kịnyaa him.

⁹Ma, Ọngọlahị wẹ byim yẹkẹẹ, “Ụbwọ ọdada o-bwula ọnahị nyam a nwang mẹ, ịPọlụ! Chajị, ẹga ká ọdẹwụ-dẹwụ ọlala á ji lụmẹ, ụ-ụwa kpangga, ọngịrị ọtụka nyam Am Ọngọlahị a kaa jẹ́-ẹ chị ehe gede-gede jịra myị́ lẹ.” Chajị nya ọọwa lẹ, am ịPọlụ ka juwa chị ọkẹkẹnị ọtụka-ọtụka, juwa chị ogu ẹ-ẹpwụ nya ọdẹwụ-dẹwụ ọlala nyam pyịyọọ, chajị ká ọngịrị ọtụka nya ịKịrayịsị ka jẹ́-ẹ ji uhye nyam myị́ ịnyịnyị lẹ.

¹⁰Ang ịlẹ kị kaa wẹ chịm ogu wuu, lala ọdẹwụ-dẹwụ ọlala nyam wuu bala oyoyi ọchịchị jum nya angịnyị ehe wuu bala akama ọyẹyẹ ọ-yẹ rịrịm wuu bala ị-tụ pyịpyị nyam wuu bala ang ọjụjụ ịlẹ kị kaa wẹ chịm ogu wuu lẹ, ị́ kaa rim ẹlẹlẹhẹ kpong-kpong ka, o-oluhye nya ẹnyị nya ịKịrayịsị. Chajị, ụka kam juwa ẹ-ẹpwụ nya ọdẹwụ-dẹwụ, m kaa jẹ́-ẹ ye ọngịrị bwu ẹga nya ịKịrayịsị ha ịlọm myị́ lẹ.

¹¹M ri oluchi bwula ụma nya ala ịwẹ kam wẹẹ ya dodehe wuu lẹ! Ma, anụ ayịdang a tị tụm ọnụ nya uchi ọchịchị ọọwa ene lẹ. Chajị, ịnọ, anụ kpangga a chịla kanụ ka yam dodehe hiigu-hiigu je angịkịla la ịlọnụ lẹ! Chajị, ọ ri nya ịlẹhị, ịnọ, ḿ ri ịngịngịhyẹ koo! Ma, ọngọngọhẹ lẹpwụ nya angị ya ẹrụ ọnyịịla pyẹ ịlẹ kanụ wẹẹ hu nya angị ịtụka nyanụ wuu lẹ, ị́ kpa ụgbẹyị ọhẹ-lọhẹ gụm am ayịdang kpong-kpong ka.

¹²Chajị, ang i-ju ẹjẹẹ ịlẹ kị chịm am ayịdang ehe lala ọlẹrụ ọnyịịla ọlam-ọlam nya ịlẹhị-ịlẹhị nya ịKịrayịsị ẹ-ẹpwarịrị nyanụ la gede-gede bwula ụkụrwọ ọhọhọ ẹ-ẹpwụ nya ugbodu ojuju onyudiyo nyam wuu bala ang i-ju ẹjẹẹ i-bwu ẹga nya Ohe Oluhye hireji ịlẹ kam họ wuu bala ụkụrwọ ẹbyẹbyị ọhọhọ nya Ohe Oluhye wuu bala ụkụrwọ ịlẹ kị chị ọngịrị ọtụka-ọtụka nya Ohe Oluhye ehe ẹ-ẹpwarịrị nyanụ wuu ịnyịnyị.

¹³Chajị, ụgbẹyị oyina kpangga, m tị́ bwu mẹ ọháha jẹ ẹ-ẹga nya ala ịchọọchị ịlẹga ọkịla lụmẹ gụ ọlẹga nyanụ anụ kpong-kpong? Lee, ọlẹ kam pwa yẹkẹẹ, ánụ ka nwụm uri nya ụkụrwọ ọlẹ kam họ ị-ịnyanụ la ịlọnụ kaka, a tị́ mwọọgịlẹ ri ang onyobyi lẹ mẹ? Ó-ri kọ ri ọhọbịrị lẹ aalẹ, anụ tị tị hịnyọhi ham mẹ!

¹⁴Ọ ri nya ịlẹhị, ogu-ẹdịyẹ ọlẹ kam lẹẹ nwụlanọ nyọka warị, wẹ ẹga nyanụ, a ka ju ugbabwọ ọhata lẹlẹ. Ma, ḿ tị tịtọ kam ka ri olo hanụ la ụgbẹyị ọhẹ-lọhẹ ka, chajị a-ang o-bwu ẹga nyanụ wẹ ẹga nyam, m juwa tịtọ ka. Ma, anụ ayịdang kpangga ịnyị! Chajị odehe ọlẹ lẹ, ọọnyị a kaa nwụla ang ugu nọ gbe adamwụ ka! Ma, adịda a kaa nwụla ang ugu nọ gbe ọnyị nyamwụ lẹ. Ịnyịnyị, m tịtọ kọ ka la ẹ-ẹga nyanụ bala am adanụ ẹ-ẹpwụ nya ẹla nya Ohe Oluhye lẹ!

¹⁵Ịnyị a du kọ kaa ri ang ọkẹkẹnị ọtụka ham nyọka juwa hu ang ọlẹ kam la bala am ayịdang wuu lẹpwụ-lẹpwụ ha chajị nya ugbodu okpukpuru nyanụ ịnyịnyịịnyị pyịyọọ lẹ! Ee lẹ, ịịyẹ a tị́ du kpong-kpong, kaanụ ayịdang hám lụmẹ kaka kpoye ịnyị lẹ, kanụ tị mwọọgịlẹ juwa la ọháha ọpyịnyẹng kaka kpoye ẹ-ẹga nyam am tị kwiwa mẹ?

¹⁶Bwula ọọwa lẹ, anụ ka jẹ́ yẹkẹẹ, am ayịdang nyị́ ri olo hanụ la ụgbẹyị ọhẹ-lọhẹ kaka ịnyịlẹhị. Ma, m jẹ́ ká angịhyẹ ka juwa yẹkẹẹ, nyị lịnyị la kpá lẹ, olijẹẹhị ọtụka, am nyaa tị́ riri! Lẹ, am nyị juwa kpa ijẹẹhị nyam ọọwa họnụ ri la ụgbẹyị ọkịla lẹ.

¹⁷Ọwẹwẹ nyam u-uhye nya ọọwa ri yẹkẹẹ, anụ ya jem wẹẹ, angịlẹ kam du ẹrụ warị wẹ ẹga nyanụ wuu lẹ, m daa warị chajị nyọka warị kaka họnụ ri ham?

¹⁸Am ayịdang a bịlẹ ịTayịtọsị nya ịlẹhị-ịlẹhị ene kọ myị warị wẹ ẹga nyanụ, lụka ọlẹ kam doo ẹrụ warị bala ọnyadahị ọkịla ẹ-ẹpwụ nya ịKịrayịsị ịnyịnyị lẹ! Anụ ya ká ịTayịtọsị họnụ ri la ụgbẹyị ọhẹ-lọhẹ lụka ọọwa kpong-kpong? Ụ-ụma nya olegu ookpokpo, am bala ịTayịtọsị a kpa họ ụkụrwọ ẹ-ẹpwarịrị nyanụ ka? Ọgụ-ẹpẹtẹ nyam bala ọwa á la ookpokpo ị-ịlahị nyanụ ịnyịnyị ka?

¹⁹Anụ juwa me irya yẹkẹẹ, ahị nyị jam ya ala ịlẹ wuu dodehe hiigu-hiigu rụ́ ịlọhị chajị nyọka juwa ju ịlọhị ju ị-ịlahị nyanụ kem? Ehe! Ịnyị, ọ la kpong-kpong ka. Chajị, ị-ịlahị nya Ohe Oluhye ayịdang kpangga, ahị kaa ya ẹla myị́ ẹla nyahị wuu bwula ịKịrayịsị jenu lẹ! Anụ angị hám há, ee, ang myị́ ang nyahị ọlẹ kahị lẹẹ họ wuu lẹ, ajị nyọka kpa ọmyịmyị ọlala nyanụ wuu wule kele kịlahị-ịlahị kem ịnyị!

²⁰Uko ọchịchị nyam chajị nyanụ wuu lẹẹlẹẹ ri yẹkẹẹ, ọhẹka, ụka kam kaa warị wẹ ẹga nyanụ lẹ, ḿ ka yẹnụ la ụgbẹyị ọlẹ kọ ka la kpakpa jaabwọ kọ mam ma kọ ka la kpong-kpong kaka. Ụka ọọwa, anụ ayịdang á tịtị ka yẹm la ụma nya olegu ọlẹ kanụ ka tịtị juwa ya ẹhị rịrị gbe bwu ẹga nyam kaka ịnyịnyị. M ya ịnyị, chajị, m jam chị uko yẹkẹẹ, ọhẹka, ụka kam pwụ ẹga nyanụ, ang ọlẹ kam ka yẹ ụ-ụwa ka ri ẹla ọmwọmwọ ta awụlẹ nyanụ bala olegu nya ijiiji onyobyi ọlẹpwụ nyanụ bala agbama ojuju ta awụlẹ nyanụ bala ang nya ịlọnụ ịlọnụ ọ-háanụ há kem bala angịnyị ọ-kpa kụ nyanụ bala awụlẹ ọbịrịị-bịrị la ẹlẹlẹ nyanụ bala achala oyaya ta awụlẹ bwula ọbọọchẹ ohihi nyanụ bala ajugu jugu nya o-wo lawụlẹ-ka nyanụ wuu.

²¹Lẹ, uko ọchịchị nyam lẹẹlẹẹ ri yẹkẹẹ, ụka kam ka mwọọgịlẹ warị wẹ ẹga nyanụ lẹ, ọhẹka, Ohe Oluhye nyam ka kpam weji ị-ịlahị nyanụ. Chajị, ọhẹka, m ka juwa bida ọtụka-ọtụka u-uhye nya iru nya angịlẹ kị ri alọhọbịrị ene-ene kị tị myị yẹ irya da kpong-kpong kaka. Ịhọbịrị nyaa ịịwa ri owuru ọlala ka a-abwẹla ọhọhọ bala ụya ọhọhọ nyaa wuu bala ọhịhị nya uhila ọlala ẹ-ẹga nya ang onyobyi ọhọhọ nyaa wuu.