Read idege 2 ALA ỊKỌRỊNTỊ 13 Bible Online

2 ALA ỊKỌRỊNTỊ 13 - idege bible

2 ALA ỊKỌRỊNTỊ 13

¹Ụka ọlẹ a lẹẹ ka ju ụka ọhata kam ka warị wẹ ẹga nyanụ lẹlẹ. Lẹ, ibeenu ọlọnụ nya angịnyị angị imiiye lee angị ịta pyii, ahị ka jẹ́-ẹ kpa chị eje oluhye egbeju nya angịlẹ wuu kị wụrụ eje wẹ ịnyanụ lẹlẹ. Chajị, ịnyị, Ụpwụ Ịgọgọ a ya lẹ!

²Jaabwọ kam da angịlẹ wuu kị họ ang onyobyi ene-ene ọna bala anụ angịkịla wuu lụka ọlẹ kam warị la ogu-ẹdịyẹ oheeye nyam lẹ, m myịmyị jam ma ọna ọọwa danụ lẹẹlẹẹ yẹkẹẹ, ó-ri kam warị ugbẹnyị kaka tọnụ ẹ-ẹpwụ nya iwe-ahụrụ nya ọhọbịrị ọhọhọ ịịwa wẹẹ lẹ aalẹ, anụ angịịwa á ka be hi akama ọlẹ kam ka yẹnụ kpong-kpong kaka.

³Ang odudu nya ọọwa ri yẹkẹẹ, akama ọlẹ kam ka yẹ angịịwa a ka ri ang o-ju ẹjẹẹ hanụ yẹkẹẹ, ịKịrayịsị ayịdang nyaa lẹẹ kpam ya ala ịlẹ wuu ịnyịlẹhị, jaabwọ kaanụ ayịdang tịtọ nya ang o-ju ẹjẹẹ pyii lẹlẹ. Chajị, anụ ayịdang dọmwụ jẹ́ yẹkẹẹ, ụkụrwọ ọlẹ ká ịKịrayịsị nyị họ ẹ-ẹpwarịrị nyịwa lẹ, nyị́ la dẹwụ-dẹwụ kpong-kpong ka. Ma, ọngịrị ọtụka nyamwụ nyaa ya chị ehe ẹ-ẹpwarịrị nyanụ ịnyịlẹhị lẹ.

⁴Chajị, bwula ọlẹ ká ịKịrayịsị da ugbinyịrọ ọdẹwụ-dẹwụ nyahị ahị angịnyị ehe kụrụ a du kị gu ọọ iloo ba okoji la ugbinyịrọ ọdẹwụ-dẹwụ ọọwa lẹ. Ma, lẹẹlẹẹ lẹ, ịKịrayịsị ọọwa tị wuleji bwula igu juwa hịhị pyịyọọ, bwula ọngịrị nya Ohe Oluhye lẹ. Ịnyịnyị, ahị ayịdang a tịtị ri angị la dẹwụ-dẹwụ ẹ-ẹpwụ nya ịKịrayịsị lẹlẹ. Ma, ọngịrị nya Ohe Oluhye ọlẹpwụ nya ịKịrayịsị ọọwa, ahị tịtị jam kpa họ ụkụrwọ ọlẹga nyanụ lẹlẹ.

⁵Anụ wụla ọhịhị nya ịlọnụ yẹ yẹẹyẹẹ, kanụ chị eje nya ẹla ọọwa ha ịlọnụ, chajị kanụ ka jẹ́-ẹ jẹ́ datị ó-ri kaanụ ayịdang á juwa yụbwọ chị ọmyịmyị ọlala nyanụ kpa ụ-ụwa gogo pyịyọọ daalẹ wẹẹ. Anụ ma ịlọnụ yẹ yẹẹyẹẹ wẹẹ! Lee, anụ ayịdang á tị́ jẹ́ la ịlọnụ kpong-kpong yẹkẹẹ, ịKịrayịsị iJisọsị nyị juwa ẹ-ẹpwụ nyanụ kaka? Lee, ọmyịmyị ọlala ọlẹpwụ nyanụ ọwẹ tị́ ri ụma nya ọmyịmyị ọlẹ kị gba ugu gba deeji lẹ!

⁶Ẹhị ọdahịhile nyam ẹ-ẹga nyanụ ri yẹkẹẹ, anụ ayịdang ka jẹ́ yẹẹyẹẹ yẹkẹẹ, ọmyịmyị ọlala ọlẹpwụ nyahị ahị lẹ, ó ri ụma nya ọmyịmyị ọlẹ kị gba ugu gbagba deeji kpong-kpong ka.

⁷Ma, abwọ ọlẹ kahị lẹẹ rị ha Ohe Oluhye chajị nyanụ ri kanụ ka họ ịngịngịhyẹ onyobyi kpong-kpong ka gbanggbang. Ị-ịnya o-ri yẹkẹẹ, ọhọhọ ọnyịịla nyanụ anụ a ka chị ọ-họ hiigu lụmẹ nyahị ahị ehe lẹlẹ, tị koo! Ma, chajị kanụ ka jẹ́-ẹ ri angị họ ang ọnyịịla ị-ịlahị nya Ohe Oluhye kem ịnyị! Ọ ri nya ịlẹhị, ahị lẹ, ọ la angịhyẹ lala abala nya alẹrụ ọnyịịla ọlẹ, ahị nyaa ri bwula ọdẹwụ-dẹwụ ọlala nyahị lẹ.

⁸Ahị ayịdang tị lẹ, áhị́ kaa họ ịngịngịhyẹ ọlẹ kọ kaa tụ ẹla nya ịlẹhị nya Ohe Oluhye pyịpyị kpong-kpong ka. Ma, ẹla nya ịlẹhị ọọwa kpangga kem, ahị kaa họ lẹ.

⁹Chajị, ahị kaa chị ọkẹkẹnị ju ọdẹwụ-dẹwụ ọlala nya ịlọhị ahị, lụka ọlẹ kanụ tị juwa la gogo ẹ-ẹpwụ nya ọmyịmyị ọlala nyanụ hiigu-hiigu. Chajị, ahị kaa raabwọ ha Ohe Oluhye chajị nyanụ kanụ ka nwa kaka ri adam ọlẹng ẹ-ẹpwụ nya ọmyịmyị ọlala nyanụ.

¹⁰Chajị nya ọọwa a du kam lẹẹ da ala ịlẹ wuu ju i-ileta du wanụ lụka ọlẹ kam juwa i-ijata tanụ lẹka lẹlẹ. Chajị, ụka kanụ nwụ họ ene kam ka pwụ eji warị lẹ, kam tụtụm ka kpa ọngịrị ọlẹ ká Ọngọlahị ya ham yẹnụ akama la ụgbẹyị ọhẹ-lọhẹ kpong-kpong kaka. Chajị, Ọngọlahị á ya ọngịrị ọọwa ham nyọka kpa tanụ ayịreji ka. Ma, ọ ya ọngịrị ọọwa ham kam ka kpa nwụ́ ọmyịmyị ọlala nya angịnyị ehe kele kịlahị-ịlahị ịnyị!

¹¹Ẹla otuku nyam ri yẹkẹẹ, anụ anyadam ẹ-ẹpwụ nya ịKịrayịsị, anụ kpahị mẹ. Anụ́-ụ cheri kanụ nwụ abwẹla ọhọhọ nyanụ rịrị yẹẹyẹẹ mẹ. Anụ cheri kanụ wo ụbwọ ogbile ụ-ụrụ nyam wuu kanụ juwa kpa họ ụkụrwọ mẹ. Anụ́-ụ la ọ-myị ju awụlẹ ẹ-ẹpwarịrị nyanụ, kanụ juwa kpa awụlẹ la okpunyi mẹ. Aalẹ, Ohe Oluhye nya ọháha bala okpunyi ka juwa tanụ pyịyọọ lẹ.

¹²Anụ ju awụlẹ ọnụ nya ọnụ ọdachị nya anyadịda ẹ-ẹpwụ nya ịKịrayịsị ham mẹ.

¹³Angịnyị nya Ohe Oluhye ịlẹgẹlẹ wuu ya, am nyị da ọnụ chịnụ ha ịwa ọgwọgụ!

¹⁴Ká ọnahị nya Ọngọlahị iJisọsị ịKịrayịsị bala ọháha nya Ohe Oluhye bala ọhọlawụlẹ nya Olegu Ịgọgọ a juwa tanụ wuu mẹ. [Ị da ụpwụ oheeye ọlẹ du kịla ala ịKọrịntị bwu epweji nya iFilipayị ọlẹ kọ ri epweji ọtụka ọhẹ ọ-ọpyị nya ịMẹsịdoniya. ỊTayịtọsị bala iLukọsị, ị ya du ẹrụ kpa kịlaa lẹ.]