Read idege 2 ALA ỊKỌRỊNTỊ 2 Bible Online

2 ALA ỊKỌRỊNTỊ 2 - idege bible

2 ALA ỊKỌRỊNTỊ 2

¹Chajị nya ọọwa lẹ, eje ọchịchị nyam ri yẹkẹẹ, ḿ tịtọ ká ọwarị wẹ nyam ka ri ọwarị kaka duunu ayiiji ọbwọbwọ kpong-kpong ka.

²Chajị, ó-ri kam warị kaka duunu ayiiji lẹ, o-owo anyị a tị́, tị tị ka ri angị ka họ kam ka la ọkẹkẹnị mẹ? Anụ angịịwa pyii ịlẹ, ịnọ, kam wẹẹ ka du ayiiji kpangga, a tị ri angịlẹ kanụ ka ya ọkẹkẹnị ọọwa ham lẹlẹ.

³Irya ọlịnyị pyii, a du kam chị eje nyọka da ileta da du wanụ ọkọkọ nyọka warị la ịlọm kaka ye ayiiji ọbwọbwọ bwu ẹga nyanụ anụ angịlẹ ịnọ, kanụ ka hu ọkẹkẹnị ọchịchị ham lẹ. Chajị, m dahịhileenu anụ wuu yẹkẹẹ, ọkẹkẹnị ọchịchị nyam am ayịdang a tịtị ri ọkẹkẹnị ọchịchị nyanụ lẹ.

⁴Chajị, ụpwụ ọlẹ kam da du wanụ ugbeene lẹ, m dọọ ẹ-ẹpwụ nya ujujwo bala ang ọjụjụ nya ọkịlẹtụ nyam la egbejida a-ahị. Ḿ tị da ụpwụ ọọwa, chajị nyọka duunu ayiiji ọbwọbwọ ka. Ma, ịnyọka họ, chajị kanụ ka jẹ́ jaabwọ kaanụ wuu hám lụmẹ nya ịlẹhị-ịlẹhị kaka ba ịnyị!

⁵Anụ wo mẹ! Ọ́ riri ká ọngọhẹ á juwa ọlẹ kọ họ ẹla o-hi ọnụ ẹ-ẹpwarịrị nyanụ tụbwọ aalẹ, ọ ri nya ịlẹhị, ẹla ọọwa ka jụm kpá ịnyịnyị! Ma, ám ụbwọm tị ka. Ọ ka jụụnụ ịnyịnyị. Lẹ, ó-ri ẹla ọlẹ kam ka ya la ọngịrị-ọngịrị ụbwọm ta ọngọọwa hiinu deeji ka.

⁶Lẹ, akama ọlẹ kaanụ aluche myị ọnụ ju awụlẹ ene kanụ-ụ hu akama ọọwa ha ọngọọwa lẹ, ọ nwa ba ịnyị mẹ.

⁷Lẹẹlẹẹ lẹ, ọ chịla kanụ ka hịnyọhi ha ọngọọwa bala o-juwa kpụ́ ọngọọwa ẹjẹ lẹ. Ó-ri ịnyị ka aalẹ, ụka ká ọkịlẹtụ ọ kpenyi nya ujujwo nya ẹla ọọwa á kịlọọ kịla ị-ịnyịrọ lẹ aalẹ, ọ ka mileji pwụrẹrẹ ẹ-ẹpwụ nya ọmyịmyị ọlala nyamwụ lẹlẹ.

⁸Chajị nya ọọwa lẹ, m jam bịlẹnụ kanụ ka kpa ọháha ọlala ye ọngọọwa myịmyị tịrẹkpẹ wẹ ẹpwụ nyanụ lẹẹlẹẹ lẹ.

⁹Chajị, egbeju nya ụpwụ ọlẹ kam da du wanụ ri chajị nyọka dọọ warị kaka ma ihi ojuju nyanụ yẹ ẹ-ẹpwụ nya ang myị́ ang wuu ịlẹ kam ya jenu.

¹⁰Anụ wo mẹ! Ọng myị́ ọng ọlẹ kanụ hịnyọhi ọ-họ pyị nyamwụ họọ lẹ aalẹ, m tịtị hịnyọhi ha ọngọọwa ịnyịnyị lẹ. Chajị, ó-riri kam ka hịnyọhi ha ọngọhẹ ẹ-ẹpwụ nya ọ-họ pyị nyamwụ, tụbwọ aalẹ, ẹnyị nyanụ pyii, m ka kpa họ ịnyị ị-ịlahị nya ịKịrayịsị lẹ.

¹¹M ka họ ọọwa ịnyị, chajị nyọka ku Ohe Onyobyi iwe nyọka kụrụụhị kụrụ myị́ kaka. Chajị, ahị ayịdang jẹ́ ang chajị nya obyi omeme inyibyi nya Ohe Onyobyi wuu.

¹²Ụka kam pwụ epweji nya ịTịrowasị, nyọka kaka ya ẹrụ ọnyịịla nya ịKịrayịsị lẹ, Ọngọlahị Ohe Oluhye họ ká ụgbẹyị nya ụkụrwọ ọhọhọ họọ ụ-ụwa wụrụ da pwọọ ham.

¹³Ma, irya nyam á tị hụhụ e-eji kpong-kpong ka. Chajị, ḿ yẹ ịTayịtọsị ọnyadahị ẹ-ẹpwụ nya ịKịrayịsị ụ-ụwa ka. Ọọwa lẹ, m da alụwa ọkpahị lẹ, m yegiri rụ kele ka ọpyị nya ịMẹsịdoniya lẹlẹ.

¹⁴Ma, m ji Ohe Oluhye obe lụmẹ, Ọwa Ọngọlẹ kọ kaa kpahị chẹwụ nya ọkụrụ-kụrụ ẹ-ẹpwụ nya ịKịrayịsị ụka wuu bala o-juwa kpahị mẹ ang jẹ angịnyị ehe chajị nya ịKịrayịsị ọọwa tụ ẹga myị́ ẹga da ịnyịnyịịnyị, jaabwọ ká oru ọchịchị nya ida choru kwọkwọ ọnyịịla kaa nyi epepe ka ẹga myị́ ẹga wuu.

¹⁵Chajị, ahị ayịdang a ri ida ochoru kwọkwọ nya ịKịrayịsị ha Ohe Oluhye ị-ịlahị nya angịlẹ kị ri angị juwa jẹdịyẹ bwu ụgbẹyị nya ọchịda nya Ohe Oluhye bala ị-ịlahị nya angịkịla ịlẹ kị juwa jẹdịyẹ dịrẹ ụgbẹyị nya ayịreji ọtata ịnyịnyị lẹ.

¹⁶Ẹ-ẹga nya alụgbẹyị nya ayịreji ọtata ọọwa lẹ, ahị kaa nyaa oru ọtịpyọ lala ahị nyaa ri igu ọlẹ kọ kaa nwụ ọngịnyị ehe. Ma, ẹ-ẹga nya angịlẹ kị juwa ụ-ụgbẹyị nya ọchịda tị lẹ, ahị ri ida ochoru kwọkwọ nya ọhịhị ọlẹ kọ kaa kpa ọhịhị kịlaa ịwa. Ẹ-ẹpwụ nya ẹla ọlịịwẹ lẹ, anụ ya ká ọngọngọhẹ nyahị jam kọ ka nwa ụga nya ụkụrwọ ọlẹ ụbwọọmwụ myị́ tịtị?

¹⁷Chajị, ahị ayịdang lẹ, áhị́ lala aliru nya angịhyẹ ịkịla ịlẹ kị kaa kpa ẹrụ ọnyịịla nya Ohe Oluhye ọlẹ weji bwula o-juwa yoo dodehe la ọgụ ọlẹ kị ka bwu ye apyobwuna olodehe ọlẹ ka. Ma, jaabwọ ká Ohe Oluhye ayịdang a duuhi ẹrụ ọlẹ la ịlọmwụ lẹ, ẹla nya ịlẹhị ọlẹpwụ nyahị wuu bwula ịKịrayịsị, ahị kaa kpa ya ẹrụ ọnyịịla ọọwa dodehe ị-ịlahị nya Ohe Oluhye je angịnyị ehe wuu lẹ.