Read idege 2 ALA ỊKỌRỊNTỊ 3 Bible Online

2 ALA ỊKỌRỊNTỊ 3 - idege bible

2 ALA ỊKỌRỊNTỊ 3

¹Ẹlẹwẹ kahị wẹẹ ya lẹ, ọ juwa lanụ lala ahị nyaa jam kpa ịlọhị chị ogu ododu lẹ, lee? Anụ ya kọ baba hahị, kahị ka juwa kpa ileta ọ-da ịlọhị wụlẹ ọhẹ bwu ẹgẹhẹ warị wẹ ẹga nyanụ pyii-pyii ene, jaabwọ ká angịhyẹ wẹẹ họ bala o-juwa ye ileta ọlịnyị bwu ẹga nyanụ anụ lẹ?

²Ehe! Ileta ọlịnyị á baba hahị la ọkpakpa kaka. Chajị, anụ ayịdang kpangga a ri ileta ọ-dahị wụlẹ ọọwa ọlẹ kị da ba ọkịlẹtụ nyanụ gede-gede ká angịnyị wuu ka jọ́ọ bala ọ-ka juwa wọọ wa la ịlaa ịnyịnyị lẹlẹ.

³Chajị, ọngịnyị nya Ohe Oluhye oriri nyanụ ọwẹ a mẹjẹ yẹkẹẹ, anụ kpangga a ri ileta ọlẹ ká ịKịrayịsị da ya duuhi ẹrụ lẹlẹ. Ụ-ụma nya ebe ọ-da ụpwụ nya angịnyị ehe, ịKịrayịsị a kpa da ileta ọọwa ka. Ma, Olegu Ịgọgọ nya Ohe Oluhye ọlẹ kọ juwa hịhị, ọ kpa dọọ lẹ. Ụ-ụma nya uginikpo nya ẹjwọ, ịKịrayịsị a tị da ileta ọọwa ba kpong-kpong ka. Ma, ọkịlẹtụ nyanụ anụ angịnyị ehe kpangga, a ri uginikpo ọọwa ọlẹ kọ da ileta ọọwa ba lẹ.

⁴Ịịwẹ, ahị bwula ẹhị ọ-da hile ọnyọọngịrị yẹkẹẹ, anụ anyị kpangga a ri ileta nyahị bwula ịKịrayịsị ị-ịlahị nya Ohe Oluhye ịnyịlẹhị lẹlẹ.

⁵Jaabwọ ká ọngịrị ọ-kpa họ ụkụrwọ ọọwa á tị bwu ẹga nyahị ahị la ịlọhị ka lẹ, irya nya ọ-jụ ịngịngịhyẹ họ la ịlọhị myị́, á tịtị jam ẹ-ẹpwụ nyahị kpong-kpong ka. Chajị, Ohe Oluhye ayịdang kpangga a ri, “Á-jụ-họ-myị́” nyahị ẹ-ẹpwụ nya ang myị́ ang wuu lẹ!

⁶Ohe Oluhye a ri Ọngọ ya ọngịrị ọ-nwa ụga hahị, du kahị ri angị myị ẹrụ nya iro ọnwanwa onyeewe nyamwụ ọlẹ lẹẹ lẹ. Iro ọnwanwa onyeewe nya Ohe Oluhye ọọwa á bwula ọngịrị nya ehile ọ-da ju ụ-ụpwụ ka. Ma, o-bwula ọngịrị nya Olegu Ịgọgọ nya Ohe Oluhye ịnyị! Chajị ehile ọ-da ju ụ-ụpwụ kaa kpa igu ogbugbu kịla ọngịnyị ehe. Ma, ọhịhị ọlala, Olegu Ịgọgọ a tị kaa kpa kịla ọngịnyị ehe lẹ.

⁷Ehile nya iMosisi wẹwẹ kọ ri ang ọ-kpa igu ogbugbu kịla angịnyị ehe iloyi nyamwụ bala o-ri ang ọlẹ kị tị dọọ da u-uhye nya uginikpo nya ẹjwọ kem ịnyịnyị lẹ, Ohe Oluhye chị ẹbyẹbyị nya ogbo nyamwụ ọlẹ kọ juwa wuru wuru ehe lụka ọọwa. Ọ ri nya ịlẹhị, owuru wuru nya ogbo ọọwa myị́ hi ahị nya iMosisi ugbeene, ma, ọ tị wuru lụmẹ gbee ká ala Isirẹlụ wuu á yẹhị nyaa gu iMosisi myị́ kpong-kpong lụka ọọwa ka.

⁸Ee lẹ, anụ ya ká Ohe Oluhye á ka chị ẹbyẹbyị ọtụka nya ogbo nyamwụ ehe lụka ọlẹ ká Olegu Ịgọgọ nyamwụ jam họ ụkụrwọ ẹ-ẹpwụ nya angịnyị ehe lẹẹlẹẹ, lụmẹ gụ ụma nya ogbo ọọwa ọlẹ kọ ya chị ehe lụka nya iMosisi pyii ka?

⁹Chajị, ó-ri ká Ohe Oluhye á byẹjẹ chị ẹbyẹbyị nya ogbo nyamwụ ehe ha alụka ọlẹ ká ehile juwa kpa eje owuwu kem kịlaa lẹ, anyanyị, anụ tị́ me irya ká Ohe Oluhye tị tị ka bwu chị ẹbyẹbyị nya ogbo nyamwụ ọọwa ehe lụmẹ pyii kaka ba, mẹjẹ alụka nya Olegu Ịgọgọ ọngọlẹ kọ lẹẹ chị eje ọ-rụ angịnyị rụ nya Ohe Oluhye ehe mẹjẹ angịnyị ugbẹnyị mẹ?

¹⁰Nya ịlẹhị ịnyị, jaabwọ ká ahịgboo nya ẹnụ ọchịchị kaa tụ ahịgboo nya ọya biri myị́ wẹẹ, ịnyịnyị, ahịgboo nya ẹbyẹbyị nya ogbo nya Ohe Oluhye ọlụka ọlẹ, a tịtị tụ ọlụka nya iMosisi biri gbanggbang myị́ lẹlẹ.

¹¹Chajị, ogbo ọlụka nya iMosisi ọlẹ kọ chịpwụrụ ahyaahị wẹwẹ lẹ, ọ lehe hiigu-hiigu lụka nyamwụ myị́. Lẹ, anyanyị, anụ tị́ me irya ká ogbo ọlụka ọlẹẹlẹẹ kọ ka juwa pyịyọọ, tịtị ka lehe lụmẹ pyii kaka ba mẹ?

¹²Ụma nya ahị ọdahịhile ọnyọọngịrị ọlịịwẹ ahị la ẹ-ẹpwụ nya ẹrụ ọnyịịla ọlẹ, a du kahị kaa la ọnụ o-ya ẹla myị́ ọtụka ọlẹ lẹ.

¹³Ang odudu nya ọọwa ri yẹkẹẹ, ẹbyẹbyị nya Ohe Oluhye ọlẹ kọ ya chị ehe hahị lẹẹlẹẹ lẹ, ó ri ụma nya ẹbyẹbyị nyamwụ ọlẹ kọ ya chị ehe une-une kem lụka nya iMosisi kpong-kpong ka. Chajị, jaabwọ ká iMosisi ya ang kụrụ ahị nyamwụ ugbeene lẹ, ala Isirẹlụ á jẹ́ yẹ owuru wuru nya ogbo ọọwa pwụ ọbaba nyamwụ kpong-kpong kaka.

¹⁴Nya ịlẹhị ịnyị, ọ́ dọmwụ ba ọ-ọọwa kem ka. Ma, ọkịlẹtụ nya ala Isirẹlụ wuu kpụ idu chwiichwii ẹ-ẹga nya ẹla nya Ohe Oluhye pyịyọọ daalẹ ọlẹ ịnyịnyị. Chajị nya ọọwa a du ká ụka myị́ ụka ká ala Isirẹlụ á wa ẹla nya Ohe Oluhye bwu ẹpwụ nya Ụpwụ Onyogo la ọwawa lẹ, kị kaa myị-ị ju ihi nya ẹla ọọwa kpong-kpong ka lẹlẹ. Chajị, apwụ ọ-chị ahị nya iMosisi ọọwa ri ang o-ju ẹjẹẹ yẹkẹẹ, ọkịlẹtụ nyaa wuu tuku tịyẹ tịyẹ ẹ-ẹga nya ẹla nya Ohe Oluhye lẹ. Chajị ịKịrayịsị ụbwọọmwụ kẹnẹ-kẹnẹ a ri ọngọlẹ kọ kaa wụrụ apwụ nya ukpowu nya ọkịlẹtụ ọọwa daarụ hi angịlẹ wuu kị myị lọọ lẹlẹ.

¹⁵Nya ịlẹhị ịnyị, dọmwụ pyịyọọ daalẹ ọlẹ, ụka myị́ ụka kị juwa wa ụpwụ nya ehile nya iMosisi, apwụ ọ-chị ahị nyaa ọọwa kaa tụ ọkịlẹtụ nyaa ku tịyẹ tịyẹ wẹẹ.

¹⁶Ma, ụka myị́ ụka ká ọngịnyị á tị jahị nyamwụ kpata da Ọngọlahị lẹ aalẹ, apwụ ọ-chị ahị nya ukpowu ọọwa a kaa nwụla hi ọngọọwa a-ahị ụbwọọmwụ wẹẹ lẹ.

¹⁷Lẹẹlẹẹ lẹ, Olegu Ịgọgọ a ri Ọngọlahị ọọwa lẹlẹ. Ẹ-ẹga myị́ ẹga ọlẹ ká Olegu Ịgọgọ nya Ọngọlahị ọọwa á tị ji lẹ aalẹ, ẹ-ẹga ọọwa, ọngịnyị ọ-la ịlọmwụ la a kaa ji ịnyịnyị lẹlẹ.

¹⁸Lẹẹlẹẹ lẹ, jaabwọ kaahị angịnyị nya Ohe Oluhye á ya apwụ ọhẹ kụrụ ịlọhị a-ahị nyahị kaka lẹlẹ, ahị a ri angịlẹ kahị kaa chị ahịgboo nya ogbo nya Ọngọlahị la ehe mẹjẹ alodehe jaabwọ ká ịnyọ ọyọyị kaa chị ahịgboo nya ila ehe lẹlẹ. Chajị, ụka kahị juwa yẹ ogbo nya Ọngọlahị la ọọwa ịnyịnyịịnyị lẹ, ọọwa a kaa juwa nwụ ọhịhị nyahị ma onyeewe kaka la abwụma nya Ọngọlahị kịlahị-ịlahị gụ olene-ene ẹ-ẹpwụ nya ogbo nyamwụ ọlala bwula ọngịrị nya Olegu Ịgọgọ ọlẹ kọọwa a ri Ọngọlahị la ayịdang lẹlẹ.