Read idege 2 ALA ỊKỌRỊNTỊ 4 Bible Online

2 ALA ỊKỌRỊNTỊ 4 - idege bible

2 ALA ỊKỌRỊNTỊ 4

¹Jaabwọ ká Ohe Oluhye ayịdang a hu ụkụrwọ nya ẹrụ ọnyịịla ọlẹ ọ-kpa ya pyẹ juhi ụ-ụbwọ bwula ahyẹẹrwẹrwa nyamwụ lẹ, ọkịlẹtụ á kpụhị enyi kpong-kpong ka.

²Ọkọkọ nya ọọwa lẹ, ahị yẹ irya da bwu ụgbẹyị nya abwẹla inyibyi ịkpịbaa iloyoyi ịlẹ kahị kaa họ ene-ene wuu lẹ. Ahị cheji ba abwẹla nya ijẹẹhị ọhọhọ bala ọnọọkịla omeme ọ-kpa kpịla ẹla nya Ohe Oluhye oyaya pyẹ abwọ ịnyịnyị lẹ. Ọọwa lẹ, ahị jam kpa ẹla nya ịlẹhị nya Ohe Oluhye o-ya dodehe gede-gede je angịnyị da ịlọhị wụlẹ, ya je angịnyị ehe ị-ịlahị nya Ohe Oluhye, chajị ká irya ọ-la ọngịnyị eje ọlẹpwụ nya ọng myị́ ọng wuu ka jẹ́-ẹ rihi ibeenu ịnyịlẹhị lẹlẹ.

³Chajị, ó-riri ká ẹrụ ọnyịịla nyahị ọlẹ kahị lẹẹ kpa ya pyẹ, á kpịbaa kpụkpụ tụbwọ aalẹ, ọ kpịbaa ị-ịlahị nya angịlẹ kị byi ka ụgbẹyị nya ayịreji ọtata ụbwaa kem.

⁴Ang odudu ká ịnyaa lịnyị ri yẹkẹẹ, Ohe Onyobyi ọlẹ ká alodehe ịlẹ kị myị la Ohe Oluhye ka, kaa gbịgba ha lala ohe nyaa lẹ, Ohe Onyobyi ọọwa kpụ angịịwa idu chwiichwii, chajị kị ka jẹ́-ẹ yẹ ahịgboo nya ẹrụ ọnyịịla nya ẹbyẹbyị nya ịKịrayịsị, ọngọlẹ kọ ri abwụma nya abwẹla ọnyịịla nya Ohe Oluhye ayịdang kpong-kpong kaka.

⁵Chajị ẹ-ẹpwụ nya ẹla nya Ohe Oluhye oyaya pyẹ dodehe nyahị ọọwa lẹ, a-ahị ịlọhị, ahị kaa hu hwaa ka uhye ka. Ma, ịKịrayịsị iJisọsị, ahị kaa ya dodehe lala Ọngọ ri Ayịbaba Agụgụ nyahị wuu lẹ. Ọọwa lẹ, ahị kaa ya ịlọhị dodehe jenu lala angị myị ẹrụ hanụ kem, chajị nya ẹnyị nya iJisọsị lẹlẹ.

⁶Chajị Ohe Oluhye Ọngọlẹ kọ da ahịgboo ehile ugbeene lụka kọ họ odehe ọlẹ yẹkẹẹ, “Ahịgboo, ahụ nyị hi ehe bwu ẹpwụ nya ukpowu mẹ,” kọ lịnyị lẹ, Ọwa Ohe Oluhye ọọwa a ri Ọngọlẹ kọ họ ká ahịgboo nyamwụ jam wuru ẹ-ẹpwụ nya ọkịlẹtụ nyahị, du kahị jẹ́ ang chajị nya ogbo nya Ohe Oluhye ọọwa ọlẹ kọ juwa wuru u-uhye nya ahị nya ịKịrayịsị ịnyịnyịịnyị lẹẹ lẹlẹ.

⁷Ma, ẹ-ẹpwụ nyahị ahị angị dẹwụ-dẹwụ ịlẹ kahị lala ẹja ọpyị ọlam-ọlam ọlẹ kọ kaa bene myị́, Ohe Oluhye a mwọọgịlẹ tụụbwọ hi ụdụ ọlịnya nya ẹrụ ọnyịịla chajị nya ẹbyẹbyị nya ogbo nyamwụ ọ-kpa ya pyẹ ọlẹ juhi ụ-ụbwọ lẹẹ lẹlẹ. Ohe Oluhye họ ịnyị, chajị kọ ka la gbadaa yẹkẹẹ, ọ-ọngịrị nya ịlọhị, ahị nyaa lẹẹ kpa họ ịngịngịhyẹ ọlẹpwụ nya ẹrụ ọnyịịla ọọwa myị́ ka. Ma, ọngịrị ọgụgụ ọtụka nya Ohe Oluhye ụbwọọmwụ kẹnẹ-kẹnẹ, Ọ lẹẹ kpa họ ụkụrwọ ọọwa bwulahị ịnyịlẹhị lẹlẹ.

⁸Ọ ri nya ịlẹhị, aluji nyahị kaa tụụhị beji kpalị-kpalị ẹ-ẹga myị́ ẹga ịnyịnyịịnyị. Ma, ị́ tị chịhị ẹkpa beji myị́ pyịyọọ kpong-kpong ka. Ọ ri nya ịlẹhị, ụka ọhẹ, ahị kaa juwa ẹ-ẹpwụ nya ụhwahị nya ịwẹẹ ọdada. Ma, ọkịlẹtụ, á tị kaa kpụhị enyi ka.

⁹Ọ ri nya ịlẹhị, ahị kaa la ọ-tụ pyịpyị ụka myị́ ụka. Ma, Ohe Oluhye á tị kaa tụụbwọ hiihi kpong-kpong ka. Ọ ri nya ịlẹhị, aluji nyahị kaa huuhi mileji. Ma, ị́ tị kaa tahị ayịreji myị́ kpong-kpong ka.

¹⁰Bwula agbayị ịlịịwẹ wuu, ugbinyịrọ nyahị ọlẹ a kaa juwa ikpokpo arụrụ nya igu ogbugbu, jaabwọ ká oluji kpa igu yẹ ugbinyịrọ nya ịKịrayịsị dada lụka kọ jam la ọhịhị odehe ọlẹ ịnyịnyị lẹ. Ọlịnyị ẹ-ẹga nyahị, chajị ká ọhịhị nya iJisọsị ayịdang ka jẹ́-ẹ juwa chị ịlọmwụ ehe ẹ-ẹpwụ nya ọhịhị nya ugbinyịrọ nyahị ọlẹ lẹẹlẹẹ.

¹¹Chajị, ụka ọlẹ kahị jam la ọhịhị odehe ọlẹ wẹẹ lẹ, ahị jam tụụbwọ hi ịlọhị ga ha igu chajị nya ẹnyị nya iJisọsị. Chajị ká ọhịhị ọlịgọgọ nya iJisọsị ayịdang ka jẹ́-ẹ juwa chị ehe lẹẹlẹẹ u-uhye nya ugbinyịrọ nyahị ọdẹwụ-dẹwụ ọlẹ kọ ka gbugbu myị́.

¹²Ịịwẹ, igu ogbugbu a jam bwu họ ụkụrwọ tụ ugbinyịrọ nyahị ahị angị ya ẹrụ ọnyịịla ọlẹ pyẹ jenu pyịpyị lẹ. Ma, ọhịhị ọlịgọgọ nya ịKịrayịsị a tị wẹẹ họ ụkụrwọ ẹ-ẹpwụ nyanụ anụ bwula ẹrụ ọnyịịla ọọwa lẹlẹ.

¹³Ụma nya olegu nya ọmyịmyị ọlala ọlẹ kahị la ọ-ọkịlẹtụ nyahị kpangga, ọngọlẹ kọ da ẹla ọlẹ kpehe ụ-Ụpwụ Ịgọgọ a tịtị la ịnyịnyị lẹ. Ọ ya ẹla ọọwa yẹkẹẹ, “M la ọmyịmyị yẹẹyẹẹ u-uhye nya ẹla ọlẹ a du kam lẹẹ ya ẹla ọọwa dodehe lẹ.” Ịnyịnyị, ahị ayịdang a tịtị la ọmyịmyị yẹẹyẹẹ u-uhye nya ala ịwẹ a tịtị du kahị wẹẹ ya aa dodehe jenu lẹlẹ.

¹⁴Chajị ahị la ịlọhị jẹ́ myịmyị yẹkẹẹ, Ohe Oluhye Ọngọ wule Ọngọlahị iJisọsị eji bwula igu, tịtị ka wuleehi ahị ayịdang bala anụ eji bwula igu ta iJisọsị ọọwa, chajị kọ ka kpahị kaka jịra i-ijata nya ịlọmwụ ị-ịlahị pyii wẹẹ.

¹⁵Chajị, ụma nya ang ịlẹ wuu kị wẹẹ họ ẹ-ẹga nyahị lẹ, ị họ ịnyị chajị nyanụ anụ angị myịmyị. Chajị ká ụka ọlẹ ká ahị ọwawa nya ọnahị nya Ohe Oluhye ọlẹ á nwa kịlahị-ịlahị gbee kọ wu aliru nya angịnyị ọyị lẹ, ká angịịwa tịtị ka jẹ́-ẹ juwa raabwọ, juwa ji Ohe Oluhye obe ẹ-ẹpwụ nya ogbo ogwogwo họọ lụmẹ-lụmẹ chajị nya ọọwa lẹlẹ.

¹⁶Chajị nya ọọwa lẹ, ọkịlẹtụ á kpụhị enyi kpong-kpong ka. Chajị, ọ ri nya ịlẹhị yẹkẹẹ, ugbinyịrọ nyahị olodehe ọlẹ lẹ, ogogo ọlala nyamwụ jam chụ hi ịnyịnyịịnyị lẹ! Ma, ọngịnyị onyeewe ọlẹpwụ nyahị ọlaanyị tị lẹ, ọ jam ye ọngịrị onyeewe bwu ẹga nya Ohe Oluhye ẹnẹnẹẹnụ.

¹⁷Chajị, ụma nya akama ọlụka o-kpii ọlẹ kọ lẹẹ yẹ ugbinyịrọ nyahị odehe ọlẹ lẹẹlẹẹ lẹ, ọ ri ang ọnwụlahị nọ gbe ụka ọlẹ kahị ka la ogbo o-gbe oyi myị́ oyi o-ju ọchụ me-ka nya Ohe Oluhye tọọ, lụka ohyẹẹkpẹ.

¹⁸Chajị, ẹhị-ang nyahị ahị, angị myị la Ohe Oluhye á juwa u-uhye nya ang-abwọ ịlam-ịlam ilodehe ịlẹ ká ẹhị nya ọngịnyị ehe jẹ́ wẹẹ yẹ ẹ-ẹhị kpong-kpong ka! Ma, ẹ-ẹga nya ang nya olegu bala ang-abwọ ilepwoohe ịlẹ ká ọngịnyị ehe á ka jẹ́-ẹ yẹ ẹ-ẹhị kaka, irya nyahị a ji ụbwọọmwụ lẹlẹ. Chajị, ang-abwọ nya odehe ịlẹ ká ọngịnyị jẹ́-ẹ yẹ ẹ-ẹhị lẹ, ị́ kaa ri ehe ta ehe ka. Ma, ang-abwọ nya ahị ọwawa nya Olegu nya Ohe Oluhye ịịwa ịlẹ kị jẹ́-ẹ yẹyẹ ẹ-ẹhị ka lẹ, ị ri ang ịlẹ kị ka ri ehe o-gbe oyi myị́ oyi pyịyọọ.