Read idege 2 ALA ỊKỌRỊNTỊ 5 Bible Online

2 ALA ỊKỌRỊNTỊ 5 - idege bible

2 ALA ỊKỌRỊNTỊ 5

¹Chajị, ahị jẹ́ yẹkẹẹ, ụka myị́ ụka ká ẹpwang nya ugbodu okpukpuru nyahị ọlẹ kọ ri ugbinyịrọ olodehe ọlẹ á gu cheji lẹ aalẹ, Ohe Oluhye a ka kpahị rụ kele ka epwoohe kaka la ẹpwang o-gbe oyi myị́ oyi nyamwụ ọlẹ kị kpa ụbwọ nya ọngịnyị ehe nwụ́ kaka lẹ, ahị ka hụ ụ-ụwa pyịyọọ pwụ ụka myị́ ụka lẹlẹ.

²Chajị, jaabwọ kahị jam chị eru ụka myị́ ụka wuu chajị nya akama bala ang ọ-jụ ugbinyịrọ nyahị ọlẹ jụ lụmẹ lẹ, iwoo nya ẹpwa olepwoohe ọlẹ ká Ohe Oluhye ka hu dakụrụụhị kaa juwa wuhi ụka myị́ ụka.

³Chajị, ụka ká Ohe Oluhye á da ịnawụ nyamwụ ọọwa kụrụụhị kpá lẹ, ugbodu okpukpuru nyahị á tụtụm ka jẹ́-ẹ dụwa nmori-nmori ị-ịlahị nyamwụ lụka ohyẹẹkpẹ kpong-kpong kaka.

⁴Chajị nya ọọwa lẹ, ọlẹ kahị lẹẹ chị eru, chajị nya olo nya ang ọjụjụ ọlẹpwụ nya odehe ọlẹ lụka ọlẹ kahị da ugbinyịrọ ọlẹ kụrụ wẹẹ lẹ, eru ọchịchị ọọwa á ri chajị nyọka pwọ ugbinyịrọ ọlẹ deeji, chajị kahị ka jẹ́-ẹ la ịlọhị bwu ẹpwụ nya akama ọyẹyẹ ka. Ma, ọ ri, chajị kahị ka jẹ́-ẹ la ugbinyịrọ onyeewe o-bwu epwoohe ọlẹ ká Ohe Oluhye ka ya dakụrụụhị, chajị ká ọhịhị nya ịKịrayịsị ayịdang ka jẹ́-ẹ wu ugbinyịrọ ogbugbu myị́ nyahị ọlẹ mile pyịyọọ.

⁵Ọngọlẹ kọ nwụla iwe-ahụrụ ọọwa nọ gbehi a ri Ohe Oluhye ayịdang, Ọngọlẹ kọ hu Olegu Ịgọgọ nyamwụ hahị nya ang o-ju ẹjẹẹ nya ọọwa lẹ!

⁶Chajị nya ọọwa a du kahị kaa la ẹjẹ ọkpụ́kpụ nya ịlẹhị-ịlẹhị ẹ-ẹpwụ ọkịlẹtụ nyahị lụka wuu lẹ. Chajị, ahị jẹ́ yẹkẹẹ, jaabwọ kahị lẹẹ ẹ-ẹpwụ nya ugbinyịrọ ọlẹ kọ ri ẹpwa nya ugbodu okpukpuru nyahị lẹẹlẹẹ odehe ọlẹ wẹẹ lẹ, ọọwa mẹjẹ yẹkẹẹ, áhị́ juwa i-ijata nya Ọngọlahị olepwoohe lẹka.

⁷Chajị, a-ahịgboo nya ugbẹhị ọyọyị ọlam-ọlam ọwẹ, a kaa kpahị jẹdịyẹ nya ọhịhị nyahị ahị angịnyị nya Ohe Oluhye ka. Ma, ahịgboo nya olegu ọlẹpwụ nyahị bwula ọmyịmyị ọlala nyahị ịnyị!

⁸Ahị la ẹjẹ ọkpụ́kpụ nya ịlẹhị-ịlẹhị. Ọ dọmwụ háahị kahị ka rụ hi ugbinyịrọ ọlẹ kele kaka hụ ta Ọngọlahị lẹẹlẹẹ lẹ.

⁹Chajị nya ọọwa lẹ, ó-riri kahị juwa ji ẹ-ẹpwa nya Ọngọlahị tọọ ta lẹ lee o-juwa ẹ-ẹga ọkịla aalẹ, aga ọmama nyahị wuu kaa ri yẹkẹẹ, ahị tịtọ kahị ka juwa họ ang ọlẹ kọ ka kpụ Ọngọlahị ịpyọ kem.

¹⁰Chajị, ọng myị́ ọng lẹpwụ nyahị wuu juwa ka kele kaka godayị rịrị ị-ịlahị nya ẹchị nya eje ọlala nya ịKịrayịsị pyii, lụka ọlẹ kọ ka lahị eje. Ụ-ụwa, ọngọngọọng a ka jẹ́-ẹ ye uri ọnyịịla lee uri ọtịpyọ kwiwa nya ang myị́ ang ọnyịịla lee ọtịpyọ ọlẹ kahị jam kpa ugbinyịrọ nyahị họ la ọhịhị nyahị olodehe ọlẹ lẹlẹ.

¹¹Ịnyị a du, jaabwọ kaahị ayịdang jẹ́ ang ọlẹ ká uhi nya Ọngọlahị ojuju ri lẹ, kahị lẹẹ ya ẹrụ ọnyịịla ọlẹ je angịnyị ehe la ọngịrị ọngịrị, chajị kị tịtị ka jẹ́-ẹ myị juhi lẹlẹ. Ma, Ohe Oluhye la ịlọmwụ a tị jẹ́ ụma nya angịlẹ kahị ri yẹẹyẹẹ lẹ. Ahị tị la ẹhị ọrịrịị-rịrị yẹkẹẹ, anụ ayịdang dọmwụ ka jẹẹhị ịnyịnyị myị́ bwula irya ọ-kpa gu ẹla ene hi awụlẹ ọlẹpwụ nyanụ ọwẹ.

¹²Áhị́ myịmyị jam maga nyọka ma ịlọhị ya dodehe jenu kaka. Ma, ọkọkọ nya ọọwa lẹ, ahị jam maga kahị ka ya jenu ụma nya ang ọlẹ kanụ ka yụbwọ chị kpa hi ọbọọchẹ juhi. Ahị họ ịnyị, chajị kanụ ka jẹ́-ẹ ye ẹla ọlẹ kanụ ka kpa ya je angịkịla ịwẹ kị wẹẹ kpa angịnyị ehe chị ogu bwula iwe-ahụrụ nya angịịwa kem, hi ọ-ka yẹ abwẹla nya ọkịlẹtụ nya angịịwa ene.

¹³Ahị lẹ, ó-riri kahị jam hya ụla hyahya, jaabwọ ká angịhyẹ wẹẹ yaya aalẹ, ahị hya ụla ọọwa ha Ohe Oluhye. Ọ́ tị ri kahị la irya ọkẹm-kẹm tụbwọ aalẹ, ahị la irya ọọwa chajị nyanụ anụ ayịdang.

¹⁴Chajị ọháha nya ịKịrayịsị ọlẹpwụ nyahị a jam gbileehi kaka họ ụkụrwọ nyamwụ ọlẹ lẹ. Chajị ahị jẹ́ myịmyị yẹkẹẹ, jaabwọ ká ịKịrayịsị gbu igu wọnụ nya angịnyị ehe wuu ju ene-ene lẹlẹ, ahị wuu tịtị gbu igu ọọwa tọọ ịnyịnyị lẹ.

¹⁵Chajị ịKịrayịsị gbu igu ọọwa wọnụ nyahị ahị angịnyị ehe wuu ju, chajị ká angịlẹ wuu kị juwa la ọhịhị onyeewe nyamwụ lẹ, á tụtụm ka juwa hịhị ha ịlaa kpong-kpong kaka. Ma, kị ka juwa hịhị ha ịKịrayịsị ọọwa ọlẹ kọ gbu wọnụ nyaa ju ene kọọ wuleji bwula igu juwa hịhị myịmyị.

¹⁶Chajị nya ọọwa lẹ, bwu ọlẹẹlẹẹ kịlahị, áhị́ jam kaa kpa irya nya ugbinyịrọ ọlẹpwụ nyahị ọlẹ chị eje u-uhye nya ọhọhọ nya ọngọngọhẹ kaka. Ọ ri nya ịlẹhị, ịnọ, ahị kpa irya nya ugbinyịrọ ọlịnyị chị eje u-uhye nya ọhọhọ nya ịKịrayịsị ẹnẹhẹ lẹ. Ma, lẹẹlẹẹ lẹ, ahị́ tị kaa họ ịnyị kpong-kpong kaka.

¹⁷Chajị nya ọọwa lẹ, ó-ri ká ọngịnyị ehe á myị la ịKịrayịsị lẹ aalẹ, ọngọ onyeewe, ọngọọwa a ri lẹlẹ. Chajị, abwẹla onyogo nya ọhọbịrị ọhọhọ nyamwụ wuu chịpwụrụ hyoo lẹ. Abwẹla onyeewe nya ọhịhị nya ịKịrayịsị ụbwọọmwụ kem, ọngọọwa a la ugbẹnyị lẹlẹ.

¹⁸Ohe Oluhye ayịdang a tị ri ọngọ họ ụkụrwọ ịwẹ wuu hahị lẹ. Ohe Oluhye a ri Ọngọlẹ kọ kpahị kaka họ okpunyi bala ịlọmwụ bwula ịKịrayịsị du kaahị bala Ohe Oluhye jẹ́ ri ọnyị bala adịda lẹẹ lẹlẹ. Ọọwa lẹ, Ohe Oluhye a tụụbwọ hi ụkụrwọ ọọwa juhi ụ-ụbwọ lẹẹ, kahị ka ri angị kpa angịnyị ehe ịkịla kaka họ okpunyi bala Ohe Oluhye ịnyịnyị lẹlẹ.

¹⁹Ọọwa ri yẹkẹẹ, Ohe Oluhye ayịdang a wẹẹ kpa alodehe ọlẹ kaka họ okpunyi bala ịlọmwụ bwula ịKịrayịsị lẹlẹ. Ịnyị a du ká Ohe Oluhye á myị wa ọhọbịrị nya angịlẹ kị myị la ịKịrayịsị ju taa pyịpyị ugbẹnyị kaka wẹ lẹlẹ. Ọọwa lẹ, Ohe Oluhye a tụụbwọ hi ụkụrwọ nya ọ-kpa angịnyị ehe kaka họ okpunyi bala Ọwa Ohe Oluhye ọlẹ juhi ụ-ụbwọ lẹẹ lẹlẹ.

²⁰Chajị nya ọọwa lẹ, angị ku ọmwakpa nya ịKịrayịsị, ahị ri lẹẹ odehe ọlẹ lẹlẹ. Ọọwa lẹ, Ohe Oluhye a lẹẹ kpa ọnụ nyahị wụrụụnụ ẹpwa nya okpunyi ka ẹga nya ịlọmwụ lẹlẹ. Ịnyị a du kahị jam bịlẹnụ ku ọmwakpa nya ịKịrayịsị kanụ ka kẹwẹ kaka họ okpunyi bala Ohe Oluhye lẹlẹ.

²¹Chajị, ịnọ, ọ ri nya ịlẹhị, ịKịrayịsị ayịdang á họ ang onyobyi kpong-kpong ka. Ma, chajị nya ọhọbịrị ọhọhọ nyahị ahị angịnyị ehe wuu a du ká Ohe Oluhye du ịKịrayịsị ẹrụ warị kaka ye igu nya ọhọbịrị ọhọhọ nyahị ọọwa gbu hahị, chajị kahị ka jẹ́-ẹ bwula ịKịrayịsị la abwẹla ọnyịịla nya Ohe Oluhye lẹlẹ.