Read idege 2 ALA ỊKỌRỊNTỊ 6 Bible Online

2 ALA ỊKỌRỊNTỊ 6 - idege bible

2 ALA ỊKỌRỊNTỊ 6

¹Jaabwọ kahị ri alụkụrwọ ọọwa bala Ohe Oluhye ayịdang lẹlẹ, ahị jam bịlẹnụ nya ịlẹhị-ịlẹhị yẹkẹẹ, ọnahị nya Ohe Oluhye ọlẹ kanụ ye wẹ lẹ, anụ myị kọ ri ang ododu kokoo!

²Chajị, Ohe Oluhye la ịlọmwụ ya ẹla ẹ-ẹgẹlẹ yẹkẹẹ, “Am ayịdang ke ụrụ la omyi nyanụ lụka ọlẹ kọ chịla-chịla lẹ. Am ayịdang tị danụ ụbwọ la ẹnụtụrụ nya ọchịda ịnyịnyị lẹ.” Lẹ, anụ wo mẹ! Ọlẹẹlẹẹ a ri ụka ọchịla-chịla ọọwa lẹlẹ. Alẹ a tị ri ẹnụtụrụ nya ọchịda ọọwa ịnyịnyị lẹlẹ.

³Áhị́ kaa myị-ị họ ụma nya abwẹla ọhẹ-lọhẹ ọlẹ kọ ka ri ang ọ-ka kịla ọngọngọhẹ ata kpong-kpong ka. Ang odudu kahị ka họ ịnyị ri, chajị ká ọngọngọhẹ á ka jẹ́-ẹ ye ịngịngịhyẹ onyobyi me ụchụ u-uhye nya ẹrụ ọnyịịla ọlẹ kahị lẹẹ kpa ya pyẹ kpong-kpong kaka.

⁴Chajị, ọkọkọ nya ọọwa lẹ, ahị kaa họ abwẹla olihi-ihi ọlẹ kọ ka jẹ́-ẹ mẹẹhị jẹ angịkịla lala anchẹ ị-myị ẹrụ nya Ohe Oluhye nya ịlẹhị ụ-ụgbẹyị ọnyị myị ọnyị wuu. Ahị mẹ ọọwa jẹ bwula ugbodu ojuju ọtụka ọlala nyahị ẹ-ẹpwụ nya ị-tụ pyịpyị nyahị wuu bala ẹ-ẹpwụ nya akama ọyẹyẹ ọ-yẹ rịrịịhị wuu bala ẹ-ẹpwụ nya ang ọjụjụ ọ-yẹẹhị dada wuu.

⁵Ahị myịmyị mẹ ọọwa jẹ lụka nya enyiri o-nyiihi nyi nya aluji bala ụka nya agba o-juhi ju wuu bala ụka kahị ji ẹpwụ nya uyawụ ọjụgba jụgba nya aluji nyahị wuu bala ụka nya ụkụrwọ ọhọhọ nya ịlẹhị-ịlẹhị nyahị bala ụka nya eji ogbegbe juwa kụ ịlahị nyahị bala ẹ-ẹpwụ nya ọ-hụ limyi nyahị wuu ịnyịnyị.

⁶Ahị myịmyị mẹ ịlọhị jẹ lala anchẹ nya Ohe Oluhye bwula ọhịhị ocheri-cheri ọlala bala o-juwa mẹ ang ọlẹ kahị jẹ́ chajị nya Ohe Oluhye jẹ yẹẹyẹẹ bala ugbodu ojuju onyudiyo ọlala nyahị bala ọnahị ọhọhọ nyahị bala ọ-chị ọhịhị onyeewe nya Olegu Ịgọgọ ọlẹpwụ nyahị ehe wuu bala ọháha nya ịlẹhị-ịlẹhị ọlala nyahị.

⁷Ahị myịmyị mẹ ịlọhị jẹ ọlịnyị bwula ẹla nya ịlẹhị kem oyaya ẹ-ẹpwụ nya ẹrụ ọnyịịla o-ya pyẹ nyahị bala ọngịrị nya Ohe Oluhye ọlẹ kahị ya chị ehe ha angịnyị ehe. Ahị myịmyị chị ịlọhị ehe mẹjẹ bwula abwẹla ọnyịịla nya Ohe Oluhye ayịdang ọhọhọ ọlẹ kọ ri ang-abwọ nya ẹwụ nya Olegu Ịgọgọ ọlẹ kahị kaa kpa u-upwuriri bala ụpụpịla nyahị ịnyịnyị.

⁸Ahị họ ang ịwẹ wuu ẹ-ẹpwụ nya ihi ọlala bala ihi ọlala ka wuu, ẹ-ẹpwụ nya ohi oruru onyobyi bala ohi oruru ọnyịịla wuu. Angịnyị huuhi lala angị ju edawụ-ka ịlẹ kị kaa hụ angịnyị ahị. Ma, angị ya ẹrụ ọnyịịla nya ẹla nya ịlẹhị nya Ohe Oluhye, ahị tị ri lẹ.

⁹Angịnyị juwa huuhi lala angịlẹ kị jéjé kpong-kpong ka. Ma, ahị aliru nya angịnyị a tị jẹ́, juwa kpa ru ohi ju ka ẹga myị́ ẹga lẹlẹ. Ị juwa gahị ha igu ogbugbu. Ma, yẹ mẹ! Ahị tị jam la ọhịhị yẹẹyẹẹ. Ọ ri nya ịlẹhị, akama yẹhị lụmẹ. Ma, igu á tị nwụhị ka.

¹⁰Ọ ri nya ịlẹhị, ẹla nya ayiiji ọbwọbwọ kaa họhị lụmẹ. Ma, ahị tị kaa juwa ẹ-ẹpwụ nya ọkẹkẹnị ọtụka ọchịchị ụka wuu. Ọ ri nya ịlẹhị, ahị ri ikpehika ẹ-ẹpwụ nya odehe ọlẹ. Ma, ahị a tị kaa họ ká aliru nya angịnyị lụmẹ-lụmẹ kaa kpụ ụdụ nya ang nya Olegu lẹlẹ. Ọ ri nya ịlẹhị, áhị́ la ịngịngịhyẹ nya odehe ọlẹ kpong-kpong ka. Ma, ahị a tị la ang myị́ ang ịlẹ kị tị ka jẹ́-ẹ juwa hahị pyịyọọ lẹlẹ.

¹¹Anụ aligu nyahị ịla ịKọrịntị ee, ahị ya ẹla ohwongkpo jenu kpá lẹ! Ahị tị wụrụ ọkịlẹtụ nyahị wuu da dodo hanụ ịnyịnyị lẹ!

¹²Ọháha ọlẹ kahị la ẹ-ẹga nyanụ lẹ, ọ́ chụ hi kpong-kpong ka. Ma, ọháha nyanụ anụ ọlẹ kanụ la ẹ-ẹga nyahị lẹ, ọ tị chị ẹhya kporii lụmẹ lẹ.

¹³Lẹ, m jam ya ẹla ọlẹ tanụ lẹẹlẹẹ lala anụ anyị nyam ẹ-ẹpwụ nya Ọngọlahị la lẹ! Anụ chuchuu, kanụ tịtị wụrụ ọkịlẹtụ nyanụ wuu da gbadaa hahị, jaabwọ kahị họ wẹ ẹ-ẹga nyanụ mẹ.

¹⁴Anụ la ọ-yẹ ju lawụlẹ ọhẹ-lọhẹ bala angị jẹ́ Ohe Oluhye-ka lẹ koo! Chajị, ịịyẹ kpakpakpa, a tị́ ri ang ọlẹ ká abwẹla ọnyịịla bala abwẹla onyobyi bába la kanụ yẹ kpong-kpong? Lee, ale, anụ tị́ yẹ ká ahịgboo bala ukpowu la ọ-yẹ ju lawụlẹ kpong-kpong ịnyịnyị?

¹⁵Ọ-myị ju awụlẹ ọlanyị, ịKịrayịsị a tị́ ka jẹ́-ẹ la bala Ohe Onyobyi myị́ kpá ẹnẹnẹhẹ wẹẹ? Lee, ịịyẹ ọngọ myị la Ohe Oluhye a tị́ ka jẹ́-ẹ bába la bala ọngọlẹ kọ myị la Ohe Oluhye kpong-kpong ka, ịnyịnyị wẹẹ?

¹⁶Lee, ọ-myị ju awụlẹ oyina, ube ịgọgọ nya Ohe Oluhye a tị́ ka jẹ́-ẹ la bala ohe ojiga myị́ wẹẹ? Chajị, ahị ayịdang a ri ube ịgọgọ nya Ohe Oluhye ọlẹ kọ juwa hịhị lẹ. Chajị, Ohe Oluhye la ịlọmwụ ya dodehe ịnyị lẹẹ ẹ-ẹgẹlẹ yẹkẹẹ, “Am ayịdang ka kụ ẹpwa ẹ-ẹpwụ ọkịlẹtụ nya angịnyị nyam. M ka juwa jẹdịyẹ ẹ-ẹpwarịrị nyaa. Am ayịdang a ka ri Ohe Oluhye nyaa lẹlẹ. Ịwa, a tị, tịtị ka ri angịnyị nyam Am ịnyịnyị lẹlẹ.

¹⁷Chajị nya ọọwa lẹ, anụ gba kpehe bwu ẹpwụ nya angị jẹ́m Am Ohe Oluhye jẹ́-ka, kanụ chị ebwo datị ham mẹ. Ịnyị, Ọngọlahị a ya lẹ. Anụ yụbwọ nyanụ gu ịngịngịhyẹ ọlẹ kọ chịrị ị-ịlahị nyam Am Ohe Oluhye ka. Ó-ri kanụ myị họ ịnyị lẹ aalẹ, M tịtị ka yenu bajẹ ha ịlọm lẹlẹ.

¹⁸Ọọwa lẹ, Am Ohe Oluhye a ka ri Adanụ lẹlẹ. Ọọwa lẹ, anụ tịtị ka ri anyị alẹng bala anyị anyang nyam ịnyịnyị lẹlẹ. Ịnyị, Ọngọlahị Agụgụ ọtụka a ya lẹ.”