Read idege 2 ALA ỊKỌRỊNTỊ 7 Bible Online

2 ALA ỊKỌRỊNTỊ 7 - idege bible

2 ALA ỊKỌRỊNTỊ 7

¹Jaabwọ kahị la iru nya ọnụ ọmyịmyị ịlịịwẹ wuu bwu ẹga nya Ohe Oluhye lẹlẹ, anụ angị hám há, anụ cheri kahị juwa hụ́ ịlọhị cheri-cheri ẹ-ẹpwụ nya abwẹla ọhọhọ nyahị wuu, bwu ẹpwụ nya ang myị́ ang ọlẹ kọ ka chị ugbinyịrọ nyahị ịrị lee ọ-chị olegu nyahị ịrị, kahị la ịgọgọ kpẹẹkpẹẹ bwula uhi nya Ohe Oluhye ojuju ẹ-ẹpwụ nya ang myị́ ang wuu mẹ.

²Anụ cheri kanụ wụrụ ọkịlẹtụ nyanụ wuu da dodo gbadaa hahị mẹ. Chajị, áhị́ họ ọngọngọhẹ nyanụ, ịngịngịhyẹ onyobyi ka. Ahị́ tị bịrị ọngọngọhẹ nyanụ la ụgbẹyị ọhẹ-lọhẹ ka lee ọ-họ ọngọngọhẹ nyanụ ri la ụgbẹyị ọhẹ-lọhẹ kpong-kpong ka ịnyịnyị.

³Ḿ jam ya ẹla ọlẹ tanụ lẹẹlẹẹ, chajị nyọka kpụnụ abyị kpong-kpong ka. Chajị, m ya jenu ene-ene yẹkẹẹ, jaabwọ kanụ juwa ẹ-ẹpwụ nya ọkịlẹtụ nyahị lụmẹ lẹ, ó-ri ọhịhị ri lee igu ogbugbu, ahị nwụlanọ kahị ka juwa tanụ ẹ-ẹpwụ nyamwụ lẹ.

⁴Jaabwọ ká ẹhị ọ-da hileenu hile nyam lụmẹ nya ịlẹhị-ịlẹhị lẹ, m jam kpanụ hi ọbọọchẹ lụmẹ ịnyịnyị. M la ẹjẹ ọkpụ́kpụ nya ịlẹhị-ịlẹhị chajị nyanụ. Bwula ọọwa lẹ, ẹ-ẹpwụ nya iru nya ọ-tụ pyịpyị ịlẹ wuu kam ji ẹpwụ nyaa lẹ, ọkẹkẹnị ọtụka-ọtụka jam mwụmwụ lala enyi ẹ-ẹpwụ nyam lẹ.

⁵Chajị, ụka ọlẹ kahị pwụ ọpyị nya ịMẹsịdoniya lẹ, ugbinyịrọ nyahị ọlẹ á la ịnyọ ọmwụmwụ ụ-ụwa kpong-kpong ka. Ma, akama la datị-datị yẹẹhị dada bwu ịkịka ọnyị myị ọnyị wuu. Uya nya ọ-tụ pyịpyị o-bwu ẹga nya angịnyị ehe chịhị ọgụ. Uhi ojuju nya ịlẹhị-ịlẹhị ọlẹpwụ ọkịlẹtụ nyahị tụụhị beji kpalị-kpalị ụ-ụwa.

⁶Ma, Ohe Oluhye Ọngọlẹ kọ kaa kpụ́ angịlẹ ká ọkịlẹtụ juwa kpaa enyi nya ịlẹhị-ịlẹhị wuu ẹjẹ lẹ, ọ kpụ́ụhị ẹjẹ ụ-ụwa bwula ọwẹwẹ nya ịTayịtọsị.

⁷Ọ-ọwẹwẹ nya ịTayịtọsị ọọwa kem, a du kahị la ẹjẹ ọkpụ́kpụ ịnyị ka. Ma, oja ọlẹ kọ kpa kaka jahị chajị nya ẹjẹ ọkpụ́kpụ ọlẹ kọọwa ayịdang la bwu ẹga nyanụ a du lẹ. Chajị, ịTayịtọsị warị kaka ya dodehe jaabwọ kanụ juwa wu iwoo nyam lụmẹ kaka ba bala o-juwa bida u-uhye nya ọjụjụ ọlẹ kam la bala jaabwọ kanụ juwa nwụlanọ nyọka ya ẹla ọnyịịla yẹm dada ịnyịnyị. Oja ọọwa họ kam la ọkẹkẹnị gụ olene-ene.

⁸Lẹẹlẹẹ lẹ, ileta ọlẹ kam da du tọnụ ene-ene, kọ họ kanụ la ujujwo nya ọkịlẹtụ lẹ, ḿ chị ijẹma nyamwụ kpong-kpong kaka. Ịnọ, ụka nya ọgbanyẹ-ọgbanyẹ lẹ, m chị ijẹma lụka ọlẹ kam wo yẹkẹẹ, ileta ọọwa nyị hu ọjụjụ hanụ, ọ ri nya ịlẹhị, ọjụjụ ọọwa á tata ka.

⁹Ma, ọkẹkẹnị ọlẹ kam lẹẹ chị lẹẹlẹẹ lẹ, ó ri chajị nyọlẹ kam họ kanụ la ọjụjụ ọọwa koo! Ma, ọ ri chajị nyọlẹ ká ọjụjụ ọọwa kpanụ kaka yẹ irya da lẹ. Chajị, ụma nya ọjụjụ ọ-lala ịnyanụ ọwẹ kpangga, a ri irya nya Ohe Oluhye lẹ. Ịnyị a du ká ọhọhọ nyahị ọọwa á bịrịịnụ ịngịngịhyẹ kpong-kpong kaka lẹlẹ.

¹⁰Chajị, ó-ri ká uhi nya Ohe Oluhye ojuju ọlẹpwụ ọkịlẹtụ nya ọngịnyị ehe á kpa ọngọọwa kaka la ọjụjụ nya ọkịlẹtụ u-uhye nya ọhọbịrị ọhọhọ nyamwụ, ká ọngọọwa á yẹ irya da bwu ẹpwụ nya ọhọbịrị nyamwụ ọọwa lẹ, ọ lịnyị a kaa kpa ọngọọwa kaka wu ọchịda nya Ohe Oluhye ọyị lẹ, ọngọọwa a kaa chị ijẹma la ụgbẹyị ọhẹ-lọhẹ kpong-kpong kaka lẹlẹ. Ma, jaabwọ ká ọjụjụ ọlẹpwụ ọkịlẹtụ u-uhye nya ọhọbịrị ọhọhọ nya alodehe ịlẹ kị jẹ́ Ohe Oluhye ka, á ri ịnya irya ọyẹda ka lẹ, ịnyaa ịwa kaa kpa igu ogbugbu kem kịlaa!

¹¹Chajị, anụ kụ ẹhị yẹ ụma nya ila ọchịchị ẹ-ẹga nya ẹla nya Ohe Oluhye ọhọhọ ọlẹ ká ọjụjụ ọlẹpwụ ọkịlẹtụ nyanụ bwula uhi nya Ohe Oluhye ojuju ọwẹ kpa wanụ wẹẹ! Chajị, ọọwa họ kanụ nwụ ịlọnụ rịrị ẹ-ẹpwụ nya abyị ọlala nyanụ lẹ. Ọ tị myịmyị họ kanụ la agbama ojuju ọnyịịla u-uhye nya abyị ọlala nya ịlọnụ lẹ. Ọ tị họ kanụ la uhi ojuju ọlẹ kọ pwoku ịnyịnyị lẹ. Ọ họ kanụ la ọháha bala iwoo nyam owuwu gụ olene-ene lẹ. Ọ myịmyị họ kanụ nwụlanọ nyọka yẹ angịlẹ kị họ ẹla ọchịla-ka, akama opwoku ịnyịnyị lẹ. Bwula ọọwa lẹ, anụ yịlẹ abyị ọlala nya ịlọnụ u-uhye nya ẹlẹwẹ wuu yẹẹyẹẹ lẹ.

¹²Ọ ri nya ịlẹhị, m da ileta nya ọgbanyẹ ọlaanyị du wanụ. Ma, ḿ tị dọọ chajị nya ọngọlẹ kọ họ ang onyobyi wẹ lee ọngọlẹ ká ọngọọwa họ ang onyobyi ba kpangga ka. Ọkọkọ nya ọọwa lẹ, m da ileta ọọwa du wanụ chajị ká o-ya dodehe nya ileta ọọwa ka họ kanụ ka jẹ́-ẹ yẹ jaabwọ kanụ juwa họ hiigu yẹẹyẹẹ ẹ-ẹga nya ẹla ọ-họ kpụhị ịpyọ nyanụ wuu la kaka ba ị-ịlahị nya Ohe Oluhye ịnyị!

¹³Chajị nya ọọwa a du kahị la ẹjẹ ọkpụ́kpụ bwu ẹga nyanụ lụmẹ lẹ. Ọ́ ba ẹ-ẹjẹ ọkpụ́kpụ ọọwa kem ka. Ahị myịmyị la ọkẹkẹnị ọtụka-ọtụka bwula ọlẹ kanụ họ ká ịTayịtọsị la ọkẹkẹnị nya ịlẹhị-ịlẹhị. Chajị, ẹhị ọ-kpa ju ịTayịtọsị ju hiigu-hiigu nyanụ hu ịnyọ ọmwụmwụ ha olegu nyamwụ lụmẹ.

¹⁴Ene ká ịTayịtọsị ka warị wẹ ẹga nyanụ lẹ, m kpanụ chị ogu hiigu-hiigu ị-ịlahị nyamwụ. Ánụ́ tị chị oyoyi jum kpong-kpong kaka, bwula ọhọhọ hiigu lụmẹ nyanụ lẹ. Chajị, ụma nya ẹla nya ịlẹhị ọlẹ kam kaa ya jenu ene-ene, a wẹẹ kam kpa chị ogu ya je ịTayịtọsị chajị nyanụ ịnyịnyị lẹlẹ. Ọ tị ri nya ịlẹhị wẹ lẹ.

¹⁵Bwula ọọwa lẹ, ọháha ọlẹpwụ nya ịTayịtọsị ọlẹga nyanụ la ọngịrị gụ olene-ene lẹ. Chajị, ọ kaa kpịtịya ụka wuu jaabwọ kaanụ wuu nwụlanọ nyọka ju ihi nya ẹla ọlẹ kọ juwa ya jenu bala jaabwọ kanụ juwa kpa uhi ojuju nya Ohe Oluhye wuu, kpahị jwoo lụmẹ ụka kọ juwa tanụ.

¹⁶Ma, m jam chị ọkẹkẹnị ọtụka-ọtụka chajị nyanụ lẹẹlẹẹ lẹ. Chajị lẹẹlẹẹ lẹ, m ka jẹ́-ẹ dahịhile ang ọnyịịla ọhọhọ nyanụ ẹ-ẹpwụ nya ang myị́ ang wuu myị́ lẹ.