Read idege 2 ALA ỊKỌRỊNTỊ 8 Bible Online

2 ALA ỊKỌRỊNTỊ 8 - idege bible

2 ALA ỊKỌRỊNTỊ 8

¹M tịtọ kam ka ya jenu lẹẹlẹẹ, ụma nya ang ọlẹ ká Ohe Oluhye jam họ ha ala ịchọọchị ịlọpyị nya ịMẹsịdoniya bwula ọnahị nyamwụ.

²Chajị, ịnọ, ị juwa ẹ-ẹpwụ nya ọmayẹ nya ọ-tụ pyịpyị ọtụka-ọtụka. Ma, jaabwọ ká ọkẹkẹnị ọchịchị ọlẹpwụ ọkịlẹtụ nyaa tị lụmẹ kaka kpoye lẹ, ọkẹkẹnị ọọwa juwa mwụ kpehe bwu ẹpwụ nya ụdụ ọkpụkpụ nya ọnahị ọhọhọ lụmẹ nya ịlẹhị-ịlẹhị nyaa lụka ọlẹ ịnọ ká ẹbyahị nyaa lụmẹ.

³Ịwa ayịdang hu ha, jaabwọ ká ụbwọ nyaa ka pwụ myị́. Dọmwụ jaabwọ kaam ayịdang ri ibeenu nyaa kaka ba lẹ, ị họ kpoye nya ẹga ọlẹ ká ụbwọ nyaa ka pwụ myị́ lẹ. Chajị, bwula irya ọchụchụ ọlọkịlẹtụ nya ịlaa kem,

⁴ịwa ayịdang a kpa bịlẹhị nya ịlẹhị-ịlẹhị kahị ka myị haa kị ka hu ọhaha ọọwa ha, chajị nyọka ya du kaka da angịnyị nya Ohe Oluhye ịla iJerusalẹm ụbwọ lẹ. Chajị, ọ ri ang nya ọkẹkẹnị ọtụka haa lụmẹ, nyọlẹ kị ka kiji jẹ́-ẹ da angịkịla ụbwọ bwula ọhaha nyaa ọọwa.

⁵Ọhọhọ nyaa ọọwa kpoye nya ẹhị ọrịrịị-rịrị nyahị. Ma, ịwa ayịdang hu ịlaa ha Ọngọlahị jene-jene. Ọọwa lẹ, ị myịmyị hu ịlaa hahị bwula irya nya Ohe Oluhye lẹlẹ.

⁶Ajị nya ọọwa a du kahị bịlẹ ịTayịtọsị yẹkẹẹ, jaabwọ kọọwa ayịdang dọmwụ nya ụkụrwọ ọọwa ene lẹlẹ, kọ ka myọọ myị́ họ bwula ọwarị wẹ ẹga nyanụ kaka ye ọhaha nya ọnahị ọlẹ bwu ẹga nyanụ ịnyịnyị lẹlẹ.

⁷Chajị, jaabwọ kaahị ayịdang jẹ́ yẹkẹẹ, ẹ-ẹpwụ nya ọmyịmyị ọlala nyanụ bala ẹla oyaya nyanụ bala ang ọjẹ́jẹ chajị nya Ohe Oluhye bala ọkpịra-kpịra ọlala ẹ-ẹpwụ nya ang myị́ ang wuu bala ọháha ọlala nyanụ ọlẹga nyahị lụmẹ kaka kpoye wẹ ene lẹlẹ, ahị tịtọ kanụ tịtị ka họ hiigu-hiigu nya ịlẹhị-ịlẹhị ẹ-ẹpwụ nya ọhaha o-hu ha ọnahị ọlẹ ịnyịnyị!

⁸Ḿ jam ya ẹla ọlẹ tanụ lala ehile ọ-danụ dada ka. Ma, m jam ya dodehe jenu jaabwọ ká angịkịla juwa kpa ila ọchịchị họ ọhaha nyaa, chajị kanụ tịtị ka jẹ́-ẹ mẹ ọháha nya ịlẹhị-ịlẹhị ọlala nyanụ anụ jẹ bwula ọhọhọ ịnyịnyị nyanụ.

⁹Chajị, m jẹ́ yẹkẹẹ, anụ jẹ́ ang chajị nya ọnahị nya Ọngọlahị iJisọsị ịKịrayịsị ayịdang. Jaabwọ kọọwa ayịdang, ịnọ, ri ọngọ kpụ ụdụ ọtụka-ọtụka e-epwoohe ene kọ tị tụụbwọ hi ịlọmwụ kaka ri okpehika, chajị kanụ ka bwula ẹbyahị nyamwụ ọọwa ri angị kpụ ụdụ ẹ-ẹpwụ nya ẹla nya Ohe Oluhye.

¹⁰Irya nyam ọlẹ kam jam junu ẹ-ẹpwụ nya ẹla ọlẹ ri yẹkẹẹ, ụma nya ụkụrwọ ọnyịịla ọlẹ kanụ dọmwụ nya ọhọhọ ihwomwu lẹ, anụ yụbwọ chọọ gogo mẹ. Chajị, ọ́ ba, oo-ri yẹkẹẹ, anụ anyị a ri angị tịtọ nya o-hu ọhaha ọọwa ha lẹ kem ka, ma, anụ kpa irya ọlẹpwụ nya ọkịlẹtụ nyanụ wuu lẹpwụ-lẹpwụ họọ ịnyịnyị ihwomwu.

¹¹Lẹ, anụ kpa ọnwụla nọ bwu ẹpwụ nya olegu nyanụ ọọwa, myị́ ụkụrwọ ọọwa myị́ họ bwula o-hu ang ọlẹ kanụ la juwa lẹẹlẹẹ ha mẹ.

¹²Chajị, ó-ri ká irya nya ang o-hu ha la ọkẹkẹnị, á juwa ẹ-ẹpwụ ọkịlẹtụ nya ọngịnyị ehe lẹ aalẹ, ọpyị ọdahụ, ọngọọwa hụ u-uhye nya ọhaha ọọwa bwu ẹga nya Ohe Oluhye ka bwula jaabwọ ká ọngọọwa la ang juwa ẹ-ẹpwụ kaka ba ene.

¹³Irya nyam á ri yẹkẹẹ, ụka kanụ da angịkịla ụbwọ ẹ-ẹpwụ nya akama nyaa kpá lẹ, kaanụ ayịdang ka yẹ ri alẹbyahị bwula ọọwa ka.

¹⁴Ma, ang ọlẹ kam tịtọ ri yẹkẹẹ, ká ang myị́ ang ọlẹ wuu kanụ la ka ri ang ọgaga mememe. Lẹ, ọlẹẹlẹẹ kanụ ye ang ji ụ-ụbwọ wẹẹ lẹ, kanụ ka chị ịnyanụ ọọwa ebwo ya du kele kaka da angịkịla ịlẹ kị ji ẹpwụ nya ẹbyahị lalẹ ụbwọ. Ụka kịịwa á tị la lụmẹ lẹ, ị tịtị ka chị ịnyaa ebwo kpa kaka danụ anụ angị lala lụmẹ-ka ụbwọ ẹ-ẹgẹlẹ ịnyịnyị. Chajị ká ang myị́ ang wuu ka ri ang ọ-la mememe ka oyiye-oyiye mẹ.

¹⁵Chajị, ị da kpehe ụ-Ụpwụ Ịgọgọ ẹ-ẹgẹlẹ yẹkẹẹ, “Angịlẹ kị tụtụguru gbudum lẹ, ị́ la lụmẹ kpoye kpong-kpong ka. Angịlẹ kịịwa ayịdang á tị tụtụguru gbuu ka, lẹ, ọhẹ-lọhẹ á gaa ịwa amwụ kpong-kpong ka ịnyịnyị.”

¹⁶Lẹẹlẹẹ, ahị jam ji Ohe Oluhye obe lụmẹ. Chajị nyọlẹ ká Ohe Oluhye họ kọ chị ịTayịtọsị ila nyọka kpahị junu, jaabwọ kọ la ẹ-ẹpwụ nyahị ahị ayịdang ịnyịnyị.

¹⁷Chajị, ọ́ ba, oo-ri yẹkẹẹ, ịTayịtọsị ke ụrụ la ọbịlẹ bịlẹ nyahị u-uhye nya ọọwa kem ka. Ma, ọwa ayịdang nwụlanọ bwu ẹpwụ nya irya nya ịlọmwụ wuu lẹpwụ-lẹpwụ yẹkẹẹ, ọwa nyị juwa ka warị wẹ ẹga nyanụ.

¹⁸Ahị jam du ọnyadahị ọlẹ ẹ-ẹpwụ nya ịKịrayịsị ba ịTayịtọsị warị wẹ ẹga nyanụ ịnyịnyị. Ọwa ayịdang ri ọngọlẹ kọ ru ohi ọnyịịla lụmẹ ẹ-ẹpwụ nya ịchọọchị nya Ohe Oluhye iloye ọlẹ wuu, chajị nya ẹla nya Ohe Oluhye oyaya pyẹ nya ịlẹhị-ịlẹhị nyamwụ.

¹⁹Ọ́ ba ọ-ọwẹ kem ka! Ma, ala ịchọọchị nya Ohe Oluhye ịlẹgẹlẹ chụ ọlẹng ọlẹ kọ ka ri ọngọ dịrẹhị ẹ-ẹpwụ nya ụkụrwọ ọnahị nya Ọngọlahị ọlẹ kahị lẹẹ họ nyọka ya ogbo ha ẹnyị nya Ọngọlahị bala ọ-ka mẹjẹ yẹkẹẹ, irya ọchụchụ nya ọkịlẹtụ nya ịlọhị, ahị nyaa lẹẹ kpa myị ẹrụ ọọwa lẹ.

²⁰Ọnwụla nọ nyahị ri yẹkẹẹ, áhị́ tịtọ kahị ka họ ịngịngịhyẹ ọlẹ kahị ka la abyị nyamwụ u-uhye nya ẹla nya iru nya okpoko nya ọhaha ọnahị ọtụka ọlẹ kahị lẹẹ myịnụ ẹrụ nyamwụ kpong-kpong ka.

²¹Chajị, irya nyahị ri yẹkẹẹ, ahị ka juwa họ ang ọlẹ kọ ka la ihi-ihi kem. Ọ́ ba oo-ri ang olihi ị-ịlahị nya Ọngọlahị ayịdang kem ka. Ma, ang ọlẹ kọ ka la ihi-ihi ị-ịlahị nya angịnyị ehe ịnyịnyị kpịlọ ịnyị!

²²Ahị jam du ọnyadahị ọlẹ ẹ-ẹpwụ nya ịKịrayịsị ẹrụ ba angịlẹ warị wẹ ẹga nyanụ ịnyịnyị. Jaabwọ kaahị ayịdang wụla ọhọhọ nyamwụ yẹ tata lẹlẹ, ahị jam ri ibeenu yẹkẹẹ, ọ ri ọngọ la ila ọchịchị ẹ-ẹpwụ nya ụkụrwọ nya Ohe Oluhye ọhọhọ lụmẹ. Dọmwụ bwula ọlẹ kọ hu ọkịlẹtụ nyamwụ wuu dahịhileenu lụmẹ lẹ, ọ nwụlanọ gụ olene-ene nyọka danụ ụbwọ lẹ.

²³Anụ wo mẹ! ỊTayịtọsị ọlẹ kọ wẹẹ warị wẹ ẹga nyanụ lẹ, ọ ri ọngọ da ụbwọ nyam ọlẹ kaam bala ọwa ri alụkụrwọ ookpokpo ẹ-ẹpwụ nya ẹrụ ọmyịmyị hanụ. Anyadahị ịkịla ẹ-ẹpwụ nya ịKịrayịsị ịlẹ kọọwa bala ịwa tị wẹẹ bajẹ lẹ, angịlẹ ká ala ịchọọchị nya Ohe Oluhye ịlẹgẹlẹ du ẹrụ tọnụ ịnyị! Ịwa ayịdang ri angị kaa họ ẹla ọ-ka ya ogbo ha ịKịrayịsị ụka wuu.

²⁴Chajị nya ọọwa lẹ, anụ cheri kanụ juwa mẹ ọháha ọlala nyanụ jẹ ala ịchọọchị nya Ohe Oluhye ịkịla wuu bwula angịlẹ mẹ. Chajị ká ọlẹ kahị lẹẹ kpanụ chị ogu wuu ya jaa lẹ, kọ ka ri ang ododu kaka ịnyịnyị mẹ!