Read idege 2 ALA ỊKỌRỊNTỊ 9 Bible Online

2 ALA ỊKỌRỊNTỊ 9 - idege bible

2 ALA ỊKỌRỊNTỊ 9

¹Lẹẹlẹẹ lẹ, ọ́ dọmwụ baba ham kam ka da ụpwụ kaka ya abwaabwọhẹ tanụ u-uhye nya ọhaha o-hu ha du kaka da angịnyị nya Ohe Oluhye ịla iJerusalẹm ụbwọ tụtụm kaka.

²Chajị, am ayịdang jẹ́ yẹkẹẹ, anụ nwụlanọ nya ịlẹhị-ịlẹhị nyọka da ụbwọ ẹ-ẹpwụ nya ọhaha o-hu ha ọọwa lẹ. Ịnyị a du kam lẹẹ kpanụ chị ogu ya je alọpyị nya ịMẹsịdoniya wuu yẹkẹẹ, “Alọpyị nya Akaya lẹ, ịwa nwụlanọ bwu ihwomwu ihwomwu nyọka hu ọhaha ọlẹ ha lẹ!” Ọọwa lẹ, ọnwụla nọ lụmẹ nyanụ ọọwa a hu ila ọchịchị ha alụwa nya ịlẹhị-ịlẹhị lẹlẹ.

³Lẹ, m jam du anyadahị ẹ-ẹpwụ nya ịKịrayịsị ịlẹ ẹrụ warị wẹ ẹga nyanụ, kanụ ka họ ká ọlẹ kahị kpanụ chị ogu u-uhye nya ẹla ọlẹ wuu ka ri ang ododu kaka lẹlẹ. Chajị kanụ ka jẹ́-ẹ nwụlanọ yẹẹyẹẹ nyọka họ jaabwọ kam byinu ya, anụ nyị họ mẹ!

⁴Ó-ri ịnyị ka, ụka ká ala ịMẹsịdoniya á warị kaka yẹm kọ ri kị yẹ yẹkẹẹ, anụ nyị́ nwụlanọ kaka lẹ aalẹ, ọhọhọ nyanụ ọọwa a ka mwọọgịlẹ kpahị weji nya ịlẹhị-ịlẹhị lẹlẹ. Anụ ayịdang, ọ tị dọmwụ ka ri oyoyi ha gụụhị wẹẹ lẹ. Chajị, ọọwa ka ri yẹkẹẹ, ẹhị ọ-da hileenu ọlẹ kam la ene kam ya ẹla ọọwa jaa wuu lẹ, ọ ka ri ang ododu ị-ịlahị nyaa tị tị lẹ.

⁵Chajị nya ọọwa a du kam bịlẹ anyadahị ịlẹ ẹ-ẹpwụ nya ịKịrayịsị, du kam lẹẹ daa ẹrụ ji ịlahị warị wẹ ẹga nyanụ lẹlẹ. Chajị, ụka kị warị lẹ, kị ka me obyi chajị nya ọhaha ọlẹ kanụ myị ọnụ ene-ene bala ọ-ka nwụla ọhaha ọọwa nọ gbe ụka ọlẹ kanụ ka hwoo ham lẹlẹ. Chajị ká ọọwa ka mẹjẹ yẹkẹẹ, ọ-ọngọngọhẹ a gbileenu kaka họ ọhaha ọọwa ka, ma, ang ọlẹ kaanụ ayịdang họhọ bwu ẹpwụ nya irya nya ịlọnụ ịnyị!

⁶Anụ wo ẹla ọlẹ myịmyị mẹ! Ọng myị́ ọng ọlẹ kọ tụụbwọ pịrị kpa hụ ajẹ nya ang ẹ-ẹrụ, ọngọọwa a tịtị kaa kpa ang nya bwu ẹrụ chwengkpe lẹ. Ọngọlẹ kọ tị pyẹ ụbwọ nyamwụ maa, juwa hụ ajẹ nya ang ẹ-ẹrụ, ọngọọwa a tịtị kaa go ang nya ẹrụ bajẹ yongkpo kpa nya bwu ẹrụ ịnyịnyị lẹ.

⁷Lẹ, ọng myị́ ọng nyanụ a cheri kọ juwa hu ha jaabwọ ká irya nya ọkịlẹtụ nyamwụ byoo kaka ba mẹ. Ị-ịnya ọhọhọ ẹ-ẹpwụ nya ijẹma ọchịchị lee ịnya ọhọhọ ẹ-ẹpwụ nya ogbile-gbile nya irya nya angịkịla tị ka. Chajị, angịlẹ kị kaa hu ọhaha nyaa ịwa ha la ọkẹkẹnị ọchịchị kem, ẹla nyaa a kaa kpụ Ohe Oluhye ịpyọ lẹ.

⁸Ohe Oluhye ayịdang la ọngịrị ka wahị nyamwụ kụrụụnụ, chajị kanụ ka la ang myị́ ang wuu lụmẹ mwụ aba ba gbee ká ịngịngịhyẹ á ka ganụ amwụ kpong-kpong kaka. Ọọwa lẹ, anụ ka myịmyị-ị̀ ye, ka juwa kpa họ ụkụrwọ ọnyịịla ịnyịnyịịnyị kịlahị-ịlahị lẹlẹ.

⁹Chajị, ị ya ẹla ụ-Ụpwụ Ịgọgọ rụ́ Ohe Oluhye ẹ-ẹgẹlẹ yẹkẹẹ, “Ọwa ayịdang ri Ọngọlẹ kọ kaa hu ang ga ha angịnyị ehe mwụ aba ba lẹ. Ọwa ri Ọngọ kaa wahị kụrụ ikpehika ẹ-ẹpwụ nya ang myị́ ang wuu lẹ! Abwẹla ọnyịịla nyamwụ kaa juwa kịlahị-ịlahị pyịyọọ gbe oyi myị́ oyi.”

¹⁰Ohe Oluhye ayịdang Ọngọlẹ kọ kaa hu ajẹ nya ang nya ẹrụ ha ọngọ hụ ajẹ bala ọ-kaa họ ká angịnyị kaa ye ịkaa ri lẹ, Ohe Oluhye a ri Ọngọlẹ kọ ka họ ká ang ọlala nyanụ wuu ka juwa chị anyị da ịlaa kele kịlahị-ịlahị bwula ahị ọwawa nyamwụ lẹlẹ. Ohe Oluhye a ka myịmyị-ị̀ họ ká ugbe ọhyahya nya abwẹla ọnyịịla ọhọhọ nyanụ ọwẹ ka jẹ́-ẹ chị anyị da ịlaa kịlahị-ịlahị ịnyịnyị lẹlẹ.

¹¹Ohe Oluhye ka họ kanụ ka kpụ ụdụ nya ịlẹhị-ịlẹhị ẹ-ẹpwụ nya ang myị́ ang wuu, chajị kanụ ka jẹ́-ẹ, juwa pyẹ ụbwọ nyanụ maa juwa hu ha ẹ-ẹpwụ nya ọnahị ọhọhọ, chajị ká ọọwa ka jẹ́-ẹ kpa obe ojiji ọtụka-ọtụka kịla Ohe Oluhye bwula ẹrụ ọmyịmyị nyahị ọlẹ.

¹²Chajị, ọ́ ba oo-ri yẹkẹẹ, ụkụrwọ nya ọnahị ọhọhọ nyanụ ọwẹ ka da angịnyị nya Ohe Oluhye ịkịla ịlaanyị ụbwọ kem ka. Ma, ọ ka ri ang ọ-kpa obe ojiji ọtụka-ọtụka kịla Ohe Oluhye bwula ọọwa ịnyịnyị.

¹³Chajị, ó-ri kanụ myị họ ọhaha ọnahị ọwẹ ịnyịlẹhị lẹ aalẹ, ihi ojuju nyanụ ọọwa ka mẹjẹ yẹkẹẹ, anụ ji oye nya ẹrụ ọnyịịla nya ịKịrayịsị ọlẹ lẹ. Ịnyị, ọ ka kpa ogbo ogwogwo kịla Ohe Oluhye lẹlẹ. Ịnyị lẹ, iru nya angịnyị a ka juwa gwogbo ha Ohe Oluhye chajị nya ụbwọ ọ-pyẹ maa lụmẹ nyanụ, juwa hu ọhaha ha nya ọ-kpa kaka daa ịwa angịnyị nya Ohe Oluhye ụbwọ bala angịkịla wuu ịnyịnyị lẹlẹ.

¹⁴Ọọwa lẹ, ịwa wuu a ka juwa raabwọ chajị nyanụ bwula ọháha ọlala nya ịlẹhị-ịlẹhị ẹ-ẹga nyanụ, chajị nya ọhaha ọnahị nya Ohe Oluhye ọlẹ kọ ya hanụ lụmẹ kaka kpoye lẹlẹ.

¹⁵Obe ojiji a juwa ha Ohe Oluhye Ọngọlẹ kọ kaa hu ọhaha ọtụka ọlẹ ká ọnụ nya ọngịnyị ehe á ka jẹ́ ya dodehe myị́ kaka, ga ha angịnyị nyamwụ.