Read idege ALA ỊGALETIYA 1 Bible Online

ALA ỊGALETIYA 1 - idege bible

ALA ỊGALETIYA 1

¹Ụpwụ ọlẹ bwu ẹga nyam am ịPọlụ ọngọ ri ọlẹrụ ọnyịịla nya ịKịrayịsị. Ọ-ọngịnyị ehe ọhẹ-lọhẹ a chụm ka. Ọchụchụ nyam ọlẹ-ẹ́ bwu ẹpwụtụbwọ nya ọngịnyị ehe ka, iJisọsị ịKịrayịsị ayịdang bala Ohe Oluhye Adịda ọlẹ kọ wule ịKịrayịsị eji bwula igu, a chụm dum ẹrụ ọlẹ lẹ.

²Am bala anyadam ẹ-ẹpwụ nya ịKịrayịsị ịlẹgẹlẹ jam da ọnụ chịnụ, anụ ala ịchọọchị ịlọpyị nya ịGaletiya wuu.

³Ká ọnahị bala okpunyi nya Ohe Oluhye bala ịnya iJisọsị ịKịrayịsị a juwa tanụ wuu mẹ.

⁴IJisọsị ịKịrayịsị ọọwa a hu ọhịhị nyamwụ kịla iya wọnụ nya ịhọbịrị nyahị ju, chajị kọ ka bwula ọọwa gbahị kpehe hi ẹpwụtụbwọ nya ang inyibyi ịhọhọ nya odehe ọlẹ wuu lẹ. ỊKịrayịsị họ ịnyị jaabwọ kọ pwoku irya nya Ohe Oluhye nyahị ọlẹ kọ ri Ohe Oluhye Adahị.

⁵Ká ogbo ogwogwo a juwa ha Ohe Oluhye pyịyọọ gbe oyi myị́ oyi pwụ ụka myị́ ụka. Amẹn.

⁶Ọ lam ahịbwuu lụmẹ jaabwọ kanụ dodo juwa tụụbwọ hi Ohe Oluhye Ọngọlẹ kọ gbileenu ba ịlọmwụ bwula ọnahị nya iJisọsị ịKịrayịsị, du kanụ mwọọgịlẹ juwa rụnyẹ ba ọmẹjẹ nya ẹrụ ọnyịịla ọkịla ọlẹ kọ datị hi ịnya ịKịrayịsị lẹẹlẹẹ lẹ.

⁷Ịnọ, ẹrụ ọnyịịla ọkịla ọhẹ-lọhẹ á juwa gụ ẹrụ ọnyịịla nya iJisọsị ịKịrayịsị ọlẹ kam ya jenu kaka. Ma, m tị jam ya ẹla ọlẹ jenu chajị nya angịlẹ kị wẹẹ hụnụ ahị bwula ọlẹ kị juwa ju ẹrụ ọnyịịla nya ịKịrayịsị ọlẹ ụhwa hanụ.

⁸Ma, ó-riri kaahị ayịdang lee olegu-ẹrụ ọhẹ á bwu epwoohe bwubwu warị kaka ya ẹla nya Ohe Oluhye ọhẹ ọkịla datị hi ụma nyọlẹ kahị ya jenu wẹ ene-ene lẹ aalẹ, eje nya obwila ọkaka a wu ọngọọwa mẹ.

⁹Ẹla ọlẹ kahị ya jenu ẹnẹhẹ lẹ, m myịmyị jam ma ẹla ọọwa ya jenu lẹẹlẹẹ yẹkẹẹ, ó-ri ká ọngọngọhẹ á warị kaka ya ẹla nya Ohe Oluhye ọkịla ọhẹ ọlẹ kọ datị hi ẹrụ ọnyịịla ọlẹ kanụ wo bwu ọnụ nyahị ene kanụ-ụ myị la ẹla nya Ohe Oluhye ọọwa aalẹ, eje nya obwila ọkaka a wu ọngọọwa mẹ.

¹⁰Ọ juwa lanụ lala am nyaa juwa tịtọ ká angịnyị ehe a ka ya ọnahị nyam lẹ, lee? Ehe! Ịnyị, ọ la ka! Ọnahị o-bwu ẹga nya Ohe Oluhye, m tịtọ kem lẹ. Anụ me irya yẹkẹẹ, am nyị jam tịtọ nyọka ri ọnụ-ọnyị ị-ịlahị nya angịnyị ehe? Ehe! Chajị, ó-ri kam juwa họ ịnyị lẹ, ịnọ, ḿ tụtụm tị ka jẹ́-ẹ ri ọnchẹ nya ịKịrayịsị nya ịlẹhị-ịlẹhị kaka.

¹¹Anụ anyadam ẹ-ẹpwụ nya ịKịrayịsị, anụ wo myịmyị yẹẹyẹẹ mẹ. Ẹla nya Ohe Oluhye ọlẹ kam kpa kaka ya jenu lẹ, ẹla ọọwa á da emyo bwu ẹga nya ọngịnyị ehe ọhẹ-lọhẹ kpehe kpong-kpong ka.

¹²Chajị, ḿ ye ẹrụ ọnyịịla ọọwa bwu ẹpwụtụbwọ nya ọngịnyị ehe ọhẹ-lọhẹ ka. Ọ-ọngịnyị ehe ọhẹ-lọhẹ a tị mẹ ẹrụ ọnyịịla ọọwa jẹm ka ịnyịnyị. Ma, iJisọsị ịKịrayịsị ayịdang a chọọ ehe wụrụ mẹjẹm lẹ.

¹³Anụ wo oja jaabwọ kam kaa la ọhịhị lụka onyogo ọlẹ kam juwa gbịgba ha Ohe Oluhye e-ekpeleji nya ehile nya iMosisi wẹẹ. Anụ wo oja jaabwọ kam juwa kaa tụ angịlẹ wuu kị myị la iJisọsị ịKịrayịsị pyịpyị ọtụka-ọtụka bala jaabwọ kam juwa kaa tịtọ nyọka ta ịchọọchị nya Ohe Oluhye ayịreji gbanggbang ịnyịnyị.

¹⁴Ụka ọọwa lẹ, m jẹ́ ọhọhọ nya ehile nya iMosisi ọọwa gbọgbịlọ gụ alịkpa nyam ịkịla wuu. Ụka ọọwa lẹ, m juwa kaa kpa ọngịrị nyam wuu họ abwẹla nya adahị igogo anyị wuu jịra gụ angịkịla nyam ịịwa wuu ịnyịnyị.

¹⁵Ma, Ohe Oluhye kpa ahyẹẹrwẹrwa nyamwụ chụm bwu ẹpwụ-ẹpwụ nya ịnam bwula ọnahị nyamwụ lẹ, ọ be ẹkọ wụrụm lẹẹ kaka ri ọngọ myị ẹrụ họọ lẹlẹ. Ịnyị, ụka kọ nwa Ohe Oluhye ayịdang lẹ,

¹⁶Ọ chị ịKịrayịsị Ọnyẹwẹ nyamwụ ehe mẹjẹm, chajị kam ka jẹ́-ẹ ya ẹrụ ọnyịịla nya ịKịrayịsị ọọwa je ala iJentayịlị lẹlẹ. Ụka ọọwa lẹ, ḿ tị kele kaka ye eje-obyi ọchịchị ọhẹ-lọhẹ bwu ẹpwụtụbwọ nya ọngọngọhẹ ọlẹ kọ ri ịwọ bala ugbinyịrọ ka.

¹⁷Ụka ọọwa lẹ, ḿ tị kele ka iJerusalẹm ka ẹga nya angịlẹ kị ri alẹrụ ọnyịịla nya ịKịrayịsị ọlẹ jene nyam kpong-kpong ka ịnyịnyị. Ọkọkọ nya ọọwa lẹ, m rụ kele ka ọpyị nya ala Arebyiya ahyaahị ụka ọọwa. Ịnyị lẹ, m nya bwu ụwa kele ka epweji nya ịDamasịkọsị lẹlẹ.

¹⁸Ụka ká ẹka ịta lẹpwụ-lẹpwụ chịpwụrụ kpá, m kele ka iJerusalẹm kaka yẹ iPita ẹ-ẹhị wẹẹ lẹ. M hụ ta iPita lala ẹnụtụrụ iwo kụrụ ịrụ kem.

¹⁹Ḿ yẹ ọngọngọhẹ lẹpwụ nya alẹrụ ọnyịịla nya ịKịrayịsị ọkịla kaka. Kẹnẹ-kẹnẹ, iJemsi ọnyịnịna nya Ọngọlahị iJisọsị ụbwọọmwụ mẹ ịnyị.

²⁰Ohe Oluhye ayịdang ri ibeenu nyam yẹkẹẹ, ẹla nya ịlẹhị, am nyaa lẹẹ da du wanụ lẹ!

²¹Ụka kọ nọ chẹẹ lẹ, m myịmyị kpehe kele ka ịpyị nya ala iSiriya bala ịpyị nya ala iSilisiya ịnyịnyị.

²²Ụka ọọwa lẹ, ala ịchọọchị ịlẹ kị juwa ọ-ọpyị nya iJudiya wuu á yẹm ẹ-ẹhị ẹnẹnẹhẹ lẹka.

²³Ene-ene lẹ, ị wo oja chajị nyam yẹkẹẹ, am nyị ri ọngọlẹ kaam nyị kaa tụ ịwa angịlẹ kịị nyị myị la iJisọsị ịKịrayịsị pyịpyị ene-ene, ma, am nyị tị mwọọgịlẹ jam ya ẹrụ ọnyịịla ọlẹ kaam nyị juwa kaa tịtọ kaam nyị ka ta ayịreji ene-ene je angịkịla lẹẹlẹẹ lẹ.

²⁴Ịnyị lẹ, ị juwa gwogbo ha Ohe Oluhye o-oluhye nyam lẹlẹ.