Read idege ALA ỊGALETIYA 2 Bible Online

ALA ỊGALETIYA 2 - idege bible

ALA ỊGALETIYA 2

¹Ụka ká ẹka iwo kụrụ ine chịpwụrụ kam kpá lẹ, am ịPọlụ ayịdang bala ịBanabasị bajẹ kele ka iJerusalẹm. M kpa ịTayịtọsị ba ịlọm kele ụka ọọwa ịnyịnyị.

²Am kele ụka ọọwa ịnyị, chajị nyọlẹ ká Ohe Oluhye la ịlọmwụ chọọ ehe mẹjẹm ene. Ụka kam pwụ ụwa, m kele kaka yẹ alegbeju ịgbahị nya ịchọọchị ẹ-ẹhị ẹ-ẹpwụ nya ọjịra-jịra nyaa ịwa alegbeju kem. Ịnyị lẹ, m tịrọnụ ya jaa wuu ang chajị nya ẹrụ ọnyịịla ọlẹ kam kaa kpa ya je ala iJentayịlị ịnyịnyịịnyị lẹlẹ. Chajị, ḿ tịtọ ká ụkụrwọ ọlẹ kam họhọ wuu bwu ẹkpẹ-ẹkpẹ lẹ bala ọlẹ kam lẹẹ họ lẹẹlẹẹ, ka ri ang otimajẹ kpong-kpong ka.

³Ọ ri ịnyịlẹhị yẹkẹẹ, ịTayịtọsị ọlẹ kọ baahị kele ka ụwa lẹ, ala iGiriki, ọ ri lẹ. Ma, ị́ tị ya, nyị da ịTayịtọsị ụwụwụ mẹ, pyii lala ala iJuu anyị ayịdang kpong-kpong ka.

⁴Kẹnẹ-kẹnẹ, abala nya angịhyẹ ịlẹ kị kaa wụrụ ịlaa anyadịda nyahị ẹ-ẹpwụ nya ịKịrayịsị ododu, ká angịhyẹ kpaa kele ka ẹpwụ nya ọjịra-jịra ọọwa, ịnọ, a juwa ya ịTayịtọsị, nyị ka da ụwụwụ pyii ụbwaa lẹlẹ. Abala nya angịịwa kpa ịlaa warị wẹ ẹpwụ nya ogu nyahị yoyi-yoyi chajị kị ka jẹ́-ẹ wụla ịlọhị ọlala ọlẹpwụ nya ịKịrayịsị ọlẹ yẹ. Chajị kị ka jẹ́-ẹ gbileehi kaka ju ka ẹpwụ nya agbịrịnyọọnyọ nya ehile nya iMosisi ọkpakpa myịmyị pyii wẹẹ.

⁵Ma, áhị́ tị myị ẹla ọọwa jwaa ụpẹnị kpong-kpong ka, chajị ká ẹla ịlẹhị nya ẹrụ ọnyịịla nya ịKịrayịsị ọlẹ ka jẹ́-ẹ godayị rịrị pyịyọọ hanụ myị́.

⁶Ụka kam tịrọnụ nya ẹla nyam ya je angịlẹ kị juwa hu ihi haa lala alegbeju ịgbahị ịịwa kpá lẹ, ịwa ayịdang á ya irya onyeewe ọhẹ-lọhẹ ham gụ irya onyogo nyam ka. Ẹ-ẹga kam ji lẹ, olegbeju oriri nyaa bala olegbeju oriri ka, á rim ẹlẹlẹhẹ ka. Chajị Ohe Oluhye á kaa hu ọngọngọhẹ ọnụ-ọnyị datị kpong-kpong ka.

⁷Ang ọlẹ ká alegbeju ịwẹ yẹ ẹ-ẹga nyam ri yẹkẹẹ, Ohe Oluhye ayịdang nyaa chụm, họ, kam ri ọngọ ya ẹrụ ọnyịịla ọlẹ pyẹ je ala iJentayịlị ịnyịlẹhị jaabwọ ká Ohe Oluhye chụ iPita nya ọngọ ya ẹrụ ọnyịịla ọlẹ pyẹ je ala iJuu ịnyịnyị lẹ.

⁸Chajị, jaabwọ ká Ohe Oluhye ya ọngịrị ha iPita nyọka kpa ya ẹrụ ọnyịịla ọlẹ pyẹ je ala iJuu lẹ, ịnyịnyị, Ohe Oluhye a tịtị ya ọngịrị nyamwụ ọọwa ham lẹẹ, kam ka kpa ya ẹrụ ọnyịịla ọlẹ pyẹ je ala iJentayịlị lẹlẹ.

⁹IJemsi, iPita bala ịJọn anyị kị ri alegbeju ikopya i-wu ịchọọchị nya Ohe Oluhye ayịdang kpa lẹ, ị ri ibeenu jaabwọ ká Ohe Oluhye la ịlọmwụ a ya ụkụrwọ ọtụka nya ẹrụ ọnyịịla ọlẹ o-ya pyẹ him ụbwọ lẹẹ ịnyịlẹhị lẹ, ị yụbwọ nyaa jum am ayịdang ụ-ụbwọ bala ịBanabasị ịnyịnyị lala alogu ịlẹpwụ nya ụkụrwọ ookpokpo. Ịnyị lẹ, ahị myị ju awụlẹ yẹkẹẹ, ịwa anyị a ri alẹrụ ọnyịịla ha ala iJuu mẹ. Kaahị a tịtị ri alẹrụ ọnyịịla ha ala iJentayịlị ịnyịnyị mẹ lẹlẹ.

¹⁰Ẹla ọlẹ kị ya ụbwọọmwụ ri yẹkẹẹ, ahị nyị-ị maga kaahị nyị juwa họ ọhaha kpa kaka da ikpehika ịlẹpwụ nyịwa ụbwọ mẹ. Ọọwa kpangga tị ri ang ọlẹ kam kaa juwa kpa họhọ ene-ene lẹ.

¹¹Ụka ọhẹ dọmwụ juwa ká iPita warị wẹ epweji nya Antiyọkọ, kam yalibyi lọọ ị-ịlahị nya aluche, chajị ụma nya ẹla ọlẹ kọ họ ụ-ụwa lẹ, ó pwoku kpong-kpong ka lụmẹ.

¹²Chajị ụka nya ọgbanyẹ ọlẹ ká iPita pwụ ụwa lẹ, ọ juwa kaa ju epwedii nya ang oriri ta ala iJentayịlị ịlẹ kị ri anyadahị ẹ-ẹpwụ nya ịKịrayịsị ụ-ụwa. Ọọwa lẹ, ụka kọ yẹ angịlẹ ká iJemsi du ẹrụ warị lẹ, iPita a mwọọgịlẹ chị ịlọmwụ ebwo hi epwedii nyaa ịwa ala iJentayịlị lẹlẹ. IPita họ ịnyị, chajị ọ juwa juhi nya angịlẹ ká irya nyaa ri ọ-ka da ala iJentayịlị ịlẹpwụ nya ịchọọchị wuu ụwụwụ lala ịwa-ịwa ala iJuu pyii.

¹³Ụka ọọwa, ala iJuu ịla ịchọọchị ịlụwa juwa la ahị imiiye lala iPita ayịdang u-uhye nya ẹla ọọwa, gbee kị dọmwụ gbile ịBanabasị ba ịlaa ju kele ịnyịnyị.

¹⁴Ụka kam yẹ jaabwọ kị juwa jẹdịyẹ dịrẹ ụgbẹyị nya ịlẹhị nya ẹrụ ọnyịịla ọlẹ kpụrụrụ kaka lẹ, m kpụ iPita abyị ị-ịlahị nyaa ịwa aluche wuu lẹlẹ. M byoo yẹkẹẹ, “IPita ee! Ọ tị́ lanyị kaahụ ayịdang ịnọ jẹ́-ẹ wẹẹ tụụbwọ hi abwẹla ọhọhọ nyanụ anụ ala iJuu deeji, juwa ba ọhọhọ nya ala iJentayịlị jẹ wuu lẹ, ká tụtụm myịmyị juwa byi ala iJentayịlị, nyị mwọọgịlẹ juwa họ abwẹla nyanụ anụ ala iJuu pyii mẹ ugbẹnyị?”

¹⁵Ọ ri nya ịlẹhị, ahị lẹ, ahị ri anyị ileji nya ala iJuu ịlẹ kahị kaa dịrẹ ehile nya Ohe Oluhye. Áhị́ ri ala iJentayịlị ịhọbịrị ịlẹ kị jẹ́ Ohe Oluhye ka lẹ ka.

¹⁶Ma, ahị tị jẹ́ yẹkẹẹ, i-ihi nya ehile ịịwa ojuju a kaa họ ká ọngịnyị ehe kaa ri ọlabwẹla ọnyịịla ị-ịlahị nya Ohe Oluhye ka. Kẹnẹ-kẹnẹ, bwula ọkịlẹtụ o-hu ha iJisọsị ịKịrayịsị lẹpwụ-lẹpwụ ụbwọọmwụ a kaa kpa ọngịnyị ehe kaka ri ọlabwẹla ọnyịịla nya Ohe Oluhye lẹ. Ịnyị a du kaahị ala iJuu ịlẹ ayịdang tị tị hu ọkịlẹtụ nyahị wuu lẹpwụ-lẹpwụ ha iJisọsị ịKịrayịsị, chajị ká Ohe Oluhye ka bwula ọọwa huuhi lala alabwẹla ọnyịịla ị-ịlahị nya ịlọmwụ lẹẹ ịnyịnyị lẹlẹ. Chajị, e-ehile ọkpakpa myị́, Ohe Oluhye a kaa kpa wa ọngịnyị ehe ọhẹ-lọhẹ lala ọlabwẹla ọnyịịla ị-ịlahị nya ịlọmwụ kpong-kpong ka.

¹⁷Ee lẹ, ó-ri ká aga ọmama nyahị ẹ-ẹpwụ nya o-juwa kpụ nịrọ ịKịrayịsị ọlẹ á mwọọgịlẹ chịhị ehe lala angị juwa dawa ẹ-ẹpwụ nya ọhọbịrị ọhọhọ myịmyị wẹẹ lẹ, ọọwa tị mẹjẹ yẹkẹẹ, ịKịrayịsị ayịdang a juwa guhi gbaa ju ka ẹpwụ nya ọhọbịrị ọhọhọ ọọwa lẹ, lee? Ehe! ỊKịrayịsị á ka jẹ́-ẹ họ ịnyị kpong-kpong kaka.

¹⁸Chajị, ó-ri kam myịmyị juwa tịrẹkpẹ kaka họ ehile ịlẹ kam pwa ene-ene yẹkẹẹ, i-ihi nyaa ojuju a ka chịm da myị kaka lẹ aalẹ, m tịtị ri ọngọhọbịrị ị-ịlahị nya Ohe Oluhye pyịyọọ wẹẹ!

¹⁹Am lẹ, m tị jẹ́ gede-gede yẹkẹẹ, ẹ-ẹga ká ehile nya iMosisi ji lẹ, m ta iri kpini-kpini lala am nyaa gbugbu lẹ. Chajị ijata ojiji nya ehile ọọwa kpangga, a họ kam jẹ́ igu ogbugbu nyam ọọwa ẹ-ẹga nya ehile nya iMosisi lẹ. Ọ tị lịnyị, chajị kam ka jẹ́-ẹ juwa hịhị ha Ohe Oluhye ugbẹnyị lẹ.

²⁰Chajị, ị gum iloo ba okoji ta iJisọsị ịKịrayịsị ene-ene lẹ. Lẹ, ám ayịdang a lẹẹ hịhị lẹẹlẹẹ kaka, ma, ịKịrayịsị ọngọ kụ ẹpwụ nyam mẹ ịnyị. Chajị, ọhịhị nyam ọlẹ kam lẹẹ hịhị odehe ọlẹ lẹ, m jam lọọ bwula ẹhị ọ-da hile ịKịrayịsị Ọnyẹwẹ nya Ohe Oluhye, Ọngọlẹ kam há lụmẹ gbee kọ hu ịlọmwụ kpa kaka kịla iya chajị nyam.

²¹Am lẹ, ám ka jẹ́-ẹ ya ẹta nyam chị ọnahị ọtụka nya Ohe Oluhye ọlẹ beji kpá ẹnẹnẹhẹ kaka. Chajị, ó-ri ajị nya ehile ọkpakpa myị́ kọ du ká Ohe Oluhye á kaa kpa wa ọngịnyị ehe lala ọlabwẹla ọnyịịla ị-ịlahị nya ịlọmwụ lẹ, ịnọ, igu ọlẹ ká ịKịrayịsị gbu wọnụ nyahị ju lẹ, ọ́ ka jẹ́-ẹ ju apyobwuna hahị kpong-kpong kaka.