Read idege ALA ỊGALETIYA 3 Bible Online

ALA ỊGALETIYA 3 - idege bible

ALA ỊGALETIYA 3

¹Anụ ala ịGaletiya ee! Ó-ri ịịwẹ, anụ mịla ju ẹmwa lụmẹ lẹ? Ogbu nya ịyẹ, a tị́ wunu ịịwẹ lala ọnyị ọlẹ kị kpa ụhwa chọ́ọ ẹjị mẹ? Ọọwa ri yẹkẹẹ, ánụ kpịtịya jaabwọ kahị chabwọ ya jenu kpẹẹkpẹẹ jaabwọ ká igu ọlẹ ká iJisọsị ịKịrayịsị gbu u-uhye nya okoji wọnụ nyahị jula kaka ba kaka?

²Anụ ba kam tọnụ ịtọ ookpokpo ọlẹ wẹẹ! Ọ ri ajị nya ehile ọkpakpa nyanụ myị́ a du ká Ohe Oluhye hu Olegu Ịgọgọ nyamwụ hanụ lẹlẹ? Lee, ánụ tị́ jẹ́ ká ajị nyọlẹ kanụ wo ẹrụ ọnyịịla ọlẹ ene kanụ myị la iJisọsị ịKịrayịsị nyaa du lẹ, kaka?

³Anụ ala ịGaletiya, anụ ri aluchi riri ị-ịlẹhị? Ọọwa ri yẹkẹẹ, ụkụrwọ ọlẹ ká Olegu Ịgọgọ dọmwụ nya ọhọhọ ẹ-ẹpwụ nyanụ lẹ, anụ juwa tịtọ kaanụ a ka myị́ ụkụrwọ ọọwa myị́ họ bwula ọngịrị nya ịlọnụ, anụ ayịdang lẹ?

⁴Lee, iru nya ang ịtụka la datị-datị ịlẹ kị họ jịra ẹ-ẹga nyanụ wuu lẹ, ị tị́ ri ang otimajẹ lẹ? Am ayịdang myị yẹkẹẹ, ọ́ ka ri ang ododu ka.

⁵Ọọwa ri yẹkẹẹ, ajị nya ehile nya iMosisi ọkpakpa myị́ nyanụ a du ká Ohe Oluhye juwa hu Olegu Ịgọgọ nyamwụ hanụ ịnyịnyịịnyị bala o-juwa họ ụkụrwọ ẹbyẹbyị ẹ-ẹpwarịrị nyanụ lẹlẹ? Lee, ánụ tị́ jẹ́ ká ajị nyọlẹ kanụ wo ẹrụ ọnyịịla ọlẹ ene kanụ myị la iJisọsị ịKịrayịsị nyaa du lẹ, kaka?

⁶Anụ kpịtịya nya Ebiraham wẹẹ! Ụpwụ Ịgọgọ ya ẹla rwọ́ọ yẹkẹẹ, “Ebiraham kpa ọkịlẹtụ nyamwụ lẹpwụ-lẹpwụ myị la Ohe Oluhye lẹ, Ohe Oluhye tịtị wọọ lala ọlabwẹla ọnyịịla ị-ịlahị nya ịlọmwụ ọọ-la ọọwa.”

⁷Bwula ọọwa lẹ, anụ tị́ yẹ-ẹ wẹ lẹ. Angịlẹ wuu kị kpa ọkịlẹtụ nyaa lẹpwụ-lẹpwụ myị la Ohe Oluhye ụbwaa kem a ri anyị ịlam-ịlam nya Ebiraham ị-ịlahị nya Ohe Oluhye lẹ.

⁸Ịnyị a du ká Ụpwụ Ịgọgọ yẹ ene-ene yẹkẹẹ, ụka nyị juwa warị ị-ịlahị ká ala iJentayịlị ịlẹ wuu kịị nyị ka myị-ị hu ọkịlẹtụ nyaa wuu dahịhile Ohe Oluhye lẹ aalẹ, Ohe Oluhye nyị tịtị ka waa lala alabwẹla ọnyịịla ị-ịlahị nya ịlọmwụ ọọ-la ọọwa lẹ. Ịnyị, Ohe Oluhye a jene-jene du ẹla ọlẹpwụ nya Ụpwụ Ịgọgọ ọọwa ẹrụ kaka ya ẹrụ ọnyịịla ọlẹ je Ebiraham yẹkẹẹ, “Am Ohe Oluhye ka wahị kụrụ alepwoja wuu bwulang ị-ịlahị wẹẹ.”

⁹Chajị nya ọọwa lẹ, jaabwọ ká Ohe Oluhye wahị kụrụ Ebiraham ọọ-la ajị nyọlẹ kọ kpa ọkịlẹtụ nyamwụ wuu myị la Ohe Oluhye wẹẹ, ịnyịnyị, Ohe Oluhye a tịtị ka wahị kụrụ angịkịla ịlẹ wuu kị ka myị-ị kpa ọkịlẹtụ nyaa lẹpwụ-lẹpwụ myị la Ohe Oluhye lẹlẹ.

¹⁰Ma, ẹ-ẹga nya angịlẹ wuu kị juwa kpụ nịrọ ehile nya iMosisi ọkpakpa kem nya ang nya abwẹla ọnyịịla nyaa ịwa ị-ịlahị nya Ohe Oluhye lẹ, ịwa ayịdang juwa ẹ-ẹpwụ ọnụ nya ọlọ owuwu nya Ohe Oluhye ene-ene lẹ. Chajị, ị da kpehe ụ-Ụpwụ Ịgọgọ yẹkẹẹ, “Ọlọ owuwu nya Ohe Oluhye a juwa ha ọng myị́ ọng ọlẹ kọ ka myị-ị juwa dịrẹ ehile myị́ ehile ọlẹ kị da ẹ-ẹpwụ nya ụpwụ nya ehile nya iMosisi, juwa haa jịra kpẹẹkpẹẹ kpong-kpong ka.”

¹¹Ịnyịlẹhị ịnyị, ọ la gbadaa yẹkẹẹ, Ohe Oluhye á kaa wa ọngịnyị ehe nya ọlabwẹla ọnyịịla ị-ịlahị nya ịlọmwụ chajị nya ehile ọkpakpa myị́ nya ọngọọwa kpong-kpong ka. Chajị, Ụpwụ Ịgọgọ yẹkẹẹ, “Ọng myị́ ọng ọlẹ wuu ká Ohe Oluhye á wa nya ọlabwẹla ọnyịịla ị-ịlahị nya ịlọmwụ bwula ọmyịmyị ọlala nya ọngọọwa ẹ-ẹga nya Ohe Oluhye lẹ aalẹ, ọngọọwa a ka la ọhịhị nya Ohe Oluhye myị́ lẹlẹ.”

¹²Ma, ẹ-ẹga ká ehile nya iMosisi ayịdang tị ji lẹ, ọngịrị nyamwụ á kpụ nịrọ ọmyịmyị ọlala kpong-kpong ka. Ọkọkọ nya ọmyịmyị ọlala lẹ, Ụpwụ Ịgọgọ yẹkẹẹ, “Ọng myị́ ọng ọlẹ kọ myị juwa họ ang myị́ ang ọlẹ wuu ká ehile ya dodehe kpẹẹkpẹẹ myị jịra gbanggbang ụbwọọmwụ kẹnẹ-kẹnẹ a ka jẹ́-ẹ la ọhịhị nya Ohe Oluhye myị́ lẹlẹ.”

¹³Ene-ene lẹ, ahị juwa ẹ-ẹpwụ nya ọlọ owuwu u-uhye nya ehile nya iMosisi ọbịrịị-bịrị. Ọọwa lẹ, ịKịrayịsị a warị kaka gbahị kpehe bwu ẹpwụ nya ọlọ owuwu nya ehile ọọwa bwula ọlẹ kọ warị kaka ye okilo nya ọlọ owuwu nya Ohe Oluhye ọọwa nwa hahị lẹlẹ. Chajị Ụpwụ Ịgọgọ yẹkẹẹ, “Ọng myị́ ọng ọlẹ kị wu kpa kaka nwụ u-uhye nya okoji lẹ aalẹ, ọngọọwa ri ọngọlẹ ká ọlọ ọgaga nya Ohe Oluhye wu lẹ.”

¹⁴ỊKịrayịsị gbu igu ọwẹ ịnyị, chajị ká ala iJentayịlị ịlẹ kị myị la Ohe Oluhye wuu ka jẹ́-ẹ ye ahị ọwawa ọlẹ ká Ohe Oluhye la ịlọmwụ myị ọnụ ha Ebiraham ene-ene bala ọ-chajị kaahị angịlẹ wuu kahị hu ọkịlẹtụ nyahị wuu myị́ la Ohe Oluhye lẹ, tịtị ka jẹ́-ẹ ye Olegu Ịgọgọ ọlẹ ká Ohe Oluhye myị ọnụ hahị ene-ene ịnyịnyị.

¹⁵Anụ anyadam ẹ-ẹpwụ nya ịKịrayịsị, anụ ba kam chụ ang ọlẹ kpịta hanụ wẹẹ. Anụ tị́ jẹ́ yẹkẹẹ, ahyaahị ká angịnyị ehe, á nwa iro ha awụlẹ u-uhye nya ịngịngịhyẹ ene lẹ aalẹ, ọngọngọhẹ á kaa bịrị iro ọnwanwa ọọwa myị́ kaka lee ọ-jẹ́ kaa ya ịngịngịhyẹ dọọ uhye kpong-kpong myị́ kaka.

¹⁶Ịnyịnyị, Ohe Oluhye a tịtị bwu myị ọnụ ha Ebiraham la iro ọnwanwa bala ugbe ọlịlahị ọlẹpwụ nya Ebiraham lụka ọọwa lẹlẹ. Ụpwụ Ịgọgọ á ya ẹla ọọwa rụ́ iru nya egbe ịlẹpwụ nya Ebiraham ka. Ma, ugbe ookpokpo kem, ọ rụ́ lẹ. Ọọwa mẹjẹ yẹkẹẹ, ịKịrayịsị, Ohe Oluhye a rụ́ lẹ.

¹⁷Ang ọlẹ kam wẹẹ ya ri yẹkẹẹ, Ohe Oluhye ayịdang lẹẹ nwa iro ọọwa ha Ebiraham lala ẹka ụnọ da ẹka ohu kụrụ iwo chiriri ene-ene ká Ohe Oluhye ya ehile ha adahị igogo anyị. Lẹ, anyanyị, ehile ọọwa ọlẹ kọ ku ẹkpẹ a tị́ ka jẹ́-ẹ tụ iro ọnwanwa nya Ohe Oluhye ọlaanyị kọ nwa ene-ene lẹ, ku myị́, kpụ kọ ka jẹ́-ẹ bịrị ọ-họ jịra nya ọnụ ọmyịmyị ọọwa myị́ wẹẹ?

¹⁸Chajị, ó-ri ehile nya iMosisi ọkpakpa myị́ nya angịnyị ehe kị kaa kpa ye ahị ọwawa nya Ohe Oluhye myị́ lẹ, ịnọ, ahị ọwawa nya Ohe Oluhye á tụtụm ka ri ang o-bwula ọnụ ọmyịmyị nya Ohe Oluhye kpong-kpong kaka. Ma, ahị tị jẹ́ yẹkẹẹ, ahị ọwawa nya Ohe Oluhye juwa ha Ebiraham, bwula ọnụ ọlẹ ká Ohe Oluhye ayịdang myị họọ ịnyị ene-ene.

¹⁹Ee lẹ, ó-ri kọ ri ịnyị lẹ, ịyẹ a tị́, tị tị du ká ehile nya iMosisi ji lẹẹ mẹ? Ohe Oluhye ya ehile nyamwụ ọọwa ha ọngịnyị ehe, chajị kị ka jẹ́-ẹ bwula ọọwa jẹ́ ang ọlẹ kọ ri ang onyobyi ọhọhọ ị-ịlahị nya Ohe Oluhye datị. Ohe Oluhye hu ehile nọ haa kịnọọ, gbee pwụ ụka ọlẹ ká ugbe ọlẹpwụ nya Ebiraham ọlẹ ká Ohe Oluhye myị ọnụ họọ ene-ene, ka warị lụka ohyẹẹkpẹ ịnyịlẹhị. Ene ká ehile ọọwa ka pwụ ẹpwụtụbwọ nya aluche nya angịnyị ehe kpá lẹ, ọ jẹ bwu ụbwọ nya alegu-ẹrụ nya Ohe Oluhye kele ka ẹpwụtụbwọ nya ọngọ ookpokpo ọhẹ ọlẹ kọọwa a ri ịmọnọ ọ-kpa ehile ọọwa kịla aluche nya angịnyị ehe ịịwa pyii ụka ọọwa.

²⁰Ọọwa ri yẹkẹẹ, ụma nya ẹla ọlẹ ká angịnyị ehe á la ebwo ọhẹ ọlẹ kị ka jẹ́-ẹ họ ẹ-ẹpwụ nyamwụ pyii kem ụbwọọmwụ a baba kị ka kpa alịmọnọ họ ẹla ọọwa lẹ. Ịnyị a du jaabwọ ká Ohe Oluhye ri Ọngọ ookpokpo lẹ, kọ kpa ọlịmọnọ ọhẹ-lọhẹ ene kọọ myị ọnụ ọọwa ha Ebiraham la iro ọnwanwa kaka lẹlẹ.

²¹Ee lẹ, ọọwa ri yẹkẹẹ, ehile nya Ohe Oluhye juwa tụ ọnụ ọmyịmyị nyamwụ pyịpyị lẹ, lee? Ịgọgọ ẹnẹnẹhẹ! Chajị, ó-ri ká ehile ọhẹ-lọhẹ la ịlọmwụ á juwa ọlẹ kọ jẹ́-ẹ la ọngịrị ya ọhịhị ha ọngịnyị ehe myị́ lẹ, ịnọ, ehile ọọwa ụbwọọmwụ a tị tị ka ri ang ọ-ka jẹ́-ẹ họ ká ọngịnyị ehe ka ri ọlabwẹla ọnyịịla ị-ịlahị nya Ohe Oluhye myị́ kem lẹlẹ.

²²Ma, ang ọlẹ ká Ụpwụ Ịgọgọ ya ri yẹkẹẹ, odehe ọlẹ wuu bala ang myị́ ang ịlẹpwụ nyamwụ wuu nyị juwa ẹ-ẹpwụ nya eje owuwu o-oluhye nya ọhọbịrị ọhọhọ ọgbalẹ-gbalẹ. Eje ọọwa wu aluche nya angịnyị ịnyị wuu, chajị ká ahị ọwawa ọlẹ ká Ohe Oluhye myị ọnụ la iro ọnwanwa ene-ene nọ gbe angị myịmyị, ka jẹ́-ẹ juwa ha angịnyị ehe myị́ bwula ọmyịmyị ọlala u-uhye nya iJisọsị ịKịrayịsị lẹlẹ.

²³Ene ká ụka nya ọmyịmyị ọlala u-uhye nya iJisọsị ịKịrayịsị ka pwụ lẹ, ahị wuu juwa lala ị-nyaa tụ ụgbẹyị kuhi lala alagba ẹ-ẹpwụtụbwọ nya ehile ịwẹ, gbee pwụ ụka ọlẹ ká Ohe Oluhye wụrụ ụgbẹyị nya ọmyịmyị ọlala u-uhye nya iJisọsị ịKịrayịsị ọọwa da gbadaa hahị.

²⁴Ọọwa ri yẹkẹẹ, ụka ọọwa lẹ, ehile, a ri ọngọlẹ kọ juwa kpahị ụgbẹyị gbee pwụ ụka nya ọwẹwẹ nya iJisọsị ịKịrayịsị lẹlẹ. Ọlịnyị, chajị ká Ohe Oluhye ka jẹ́-ẹ wahị lala alabwẹla ọnyịịla bwula ọmyịmyị ọlala u-uhye nya iJisọsị ịKịrayịsị.

²⁵Ma, lẹẹlẹẹ, jaabwọ ká ụgbẹyị nya ọmyịmyị ọlala ẹ-ẹga nya iJisọsị ịKịrayịsị wụrụ da hahị lẹlẹ, áhị́ tụtụm myịmyị ri angị juwa e-ekpeleji nya ehile ịwẹ ọkpakpa ugbẹnyị kpong-kpong kaka.

²⁶Chajị, anụ angịlẹ wuu kanụ juwa ẹ-ẹpwụtụbwọ nya ịKịrayịsị iJisọsị lẹ, anụ ri anyị nya Ohe Oluhye bwula ọlẹ kanụ kpa ọkịlẹtụ nyanụ lẹpwụ-lẹpwụ myị la iJisọsị ịKịrayịsị lẹ.

²⁷Anụ wo mẹ, anụ angịlẹ wuu kị tụụnụ chị awụlẹ bala iJisọsị ịKịrayịsị bwula enyi Ohe ọ-hụnụ hụ la ẹnyị nya ịKịrayịsị wuu lẹ, ọọwa mẹjẹ yẹkẹẹ, anụ da abwẹla ọnyịịla nya ịKịrayịsị ayịdang kụrụ ịlọnụ kpá ene-ene lẹ.

²⁸Chajị nya ọọwa lẹ, ọdatị á ji ẹ-ẹga nya angịnyị nya Ohe Oluhye kpong-kpong kaka. Ó-ri ká ọngịnyị á ri ala iJuu riri lee o-ri ala iJentayịlị riri lee o-ri ọnyọhị riri lee o-ri ọnyọhị ri ka lee o-ri ọnyang riri lee o-ri ọlẹng riri, tụbwọ aalẹ, ahị wuu yẹ ri ọngọ ookpokpo ẹ-ẹpwụ nya ịKịrayịsị lẹ.

²⁹Jaabwọ kaahị wuu tị ri angịnyị nya ịKịrayịsị lẹlẹ, ahị wuu ri anyị ịtụma nya Ebiraham bwula ọọwa ịnyịnyị lẹ. Chajị nya ọọwa lẹ, ahị angịịwa wuu a ka ri ugu nya ahị ọwawa nya Ohe Oluhye jaabwọ kọ myị ọnụ ha Ebiraham ene-ene ịnyịnyị lẹ.