Read idege ALA ỊGALETIYA 4 Bible Online

ALA ỊGALETIYA 4 - idege bible

ALA ỊGALETIYA 4

¹Nya ang o-ju ẹjẹẹ, anụ tị jẹ́ ịnọ, ọ ri ịnyịlẹhị yẹkẹẹ, ọnyị ọlẹ kọ ri ọnụ-ọnyadamwụ pyii a kaa la ang ugu nya adamwụ lụka ohyẹẹkpẹ lẹ. Ma, iwe-ahụrụ nya ọnụ-ọnyị ọlịnyị bala iwe-ahụrụ nya ọnchẹ á kaa gụ awụlẹ ọdọdẹpwa nyaa lụka nya enjwo nya ọnyị ọọwa kpong-kpong ka.

²Chajị, lụka nya enjwo nya ọnyị ọọwa lẹ, ọ kaa la angịlẹ kị kaa kpẹhị rịrọọ bala ang myị́ ang ịkịla ịlẹga nyamwụ wuu, gbee pwụ ụka ọlẹ ká ọnyị ọọwa kaa nwa ọngịnyị jaabwọ ká adamwụ ka hu ụka ọọwa nọ.

³Ịnyịnyị, ọ la ẹ-ẹga nyahị ahị lẹ, ụka kahị ri anjwo ichiche ẹ-ẹga nya irya nya Ohe Oluhye ọhọhọ wẹẹ lẹ, ahị ri anyịhị nya ehile la datị-datị ịkpakpa bwula ọngịrị nya alegu inyibyi nya ihye ijiga ilodehe ọlẹ wuu.

⁴Ma, ụka ká ụka ọlẹ ká Ohe Oluhye hunọ pwụ eji lẹ, Ohe Oluhye a du Ọnyẹwẹ nyamwụ ẹrụ warị wẹ odehe ọlẹ lẹlẹ. Ịnyị, ọnyang a jẹnyị nyamwụ lẹ, ọ mọọ lẹlẹ. Ọnyẹwẹ ọọwa hịhị e-ekpeleji nya ehile nya iMosisi lala ala iJuu ịkịla ịnyịnyị.

⁵Ohe Oluhye doo ẹrụ warị la ọgụ ọlịnyị, chajị kọ ka jẹ́-ẹ warị kaka gbahị ahị angịlẹ wuu kahị juwa e-ekpeleji nya ehile ọọwa kpehe. Chajị ká Ohe Oluhye ka jẹ́-ẹ bwula ọọwa yehi ahị alodehe lala angị ri ọnụ-ọnyị nya ịlọmwụ.

⁶Ang o-ju ẹjẹẹ nyori yẹkẹẹ, ahị yẹ ri ọnụ-ọnyị nya Ohe Oluhye ịnyịlẹhị a ri Olegu Ịgọgọ nya Ọnyẹwẹ ọlẹ ká Ohe Oluhye ya du warị wẹ ẹpwụ ọkịlẹtụ nyahị lẹ. Olegu ọọwa a kaa kpahị wụrụ Ohe Oluhye yẹkẹẹ, “Adada Ohe Oluhye Adịda nyam” lẹ.

⁷Chajị nya ọọwa lẹ, ánụ myịmyị juwa ẹ-ẹpwụ nya ọnyọhị oriri lẹẹlẹẹ kaka. Ma, ọnụ-ọnyị nya Ohe Oluhye mẹ ịnyị. Jaabwọ ká Ohe Oluhye huunu ọnụ-ọnyị nyamwụ lẹẹlẹẹ lẹlẹ, ang ugu nya Ohe Oluhye ri ịnyanụ ịnyịnyị bwula ọọwa lẹ.

⁸Ene-ene lụka ọlẹ kanụ jẹ́ Ohe Oluhye lẹka lẹ, anụ juwa kaa yẹ ụhị lala ọnyọhị e-ekpeleji nya ọngịrị nya alegu inyibyi nya ihye ijiga ịlẹ kị ri Ohe Oluhye la ịlọmwụ ka.

⁹Ma, lẹẹlẹẹ lẹ, anụ jẹ́ Ohe Oluhye lala Adanụ ayịdang ugbẹnyị lẹ. Dọmwụ jaabwọ kọ chịla kam ka ya ri yẹkẹẹ, Ohe Oluhye la ịlọmwụ jẹ́ẹnụ lala angị ri ọnụ-ọnyị nyamwụ lẹẹlẹẹ lẹ. Ee lẹ, jaabwọ kọ lịnyị lẹlẹ, anyanyị, anụ tị́ ka jẹ́-ẹ juwa tịtọ nyọka tịrẹkpẹ kaka ke ụrụ la omyi nya alegu inyibyi nya ihye ijiga ilodehe ịlẹ kị la dẹwụ-dẹwụ bala o-ri ang i-hi deeji, myịmyị mẹ? Lee, anụ tị́ myị ọnụ nyọka kele kaka yẹ ri anyịhị nyaa myịmyị lẹ?

¹⁰Ịịyẹ a tị́ du kanụ juwa hu ẹnụtụrụ ịhyẹ bala o-juwa hu ịya ịhyẹ bala o-juwa hu ẹka ịhyẹ bala ụka ịhyẹ la datị-datị nọ juwa chị ịgọ nyaa ịnyịnyịịnyị pyịyọọ daalẹ ọlẹ mẹ?

¹¹Ọ lam uhi-uhi lụmẹ hanụ wẹẹ! Lee, anụ tị́ ka myị ká aga ọlẹ kam ma junu wuu ka ri ang ododu ịnyịlẹhị lẹ?

¹²Ọ ri ịnyịlẹhị, ala iJuu, m ri lẹ. Ma, lẹẹlẹẹ lẹ, aḿ tị myị juwa e-ekpeleji nya ehile nya ala iJuu taa kaka, lala anụ ala iJentayịlị lẹ. Lẹ, anụ anyadam ẹ-ẹpwụ nya ịKịrayịsị, anụ chuchuu kanụ juwa gbocho hi ẹpwụ nya ehile ọkpakpa lala am-am ịnyịnyị mẹ. Anụ ayịdang jẹ́ ene-ene yẹkẹẹ, ịwa nyị́ họm ịngịngịhyẹ onyobyi kpong-kpong ka.

¹³Anụ kpịtịya wẹẹ! Ụka kam warị wẹ ịnyanụ lụka nya ọgbanyẹ-ọgbanyẹ lẹ, ẹdụrụ ọlẹ kọ jụm a du kam hụ tanụ juwa ya ẹrụ ọnyịịla ọlẹ junu lẹ.

¹⁴Ọ ri ịnyịlẹhị, ẹdụrụ nyam ọọwa ri ang o-hu akama hanụ lụmẹ. Ma, ánụ tị pwam lee ọ-yẹhị dam bwee kpong-kpong ọọ-la ọọwa ka. Ma, ọkọkọ nya ọọwa lẹ, anụ yem bajẹ labwiye-abwiye lala am nyaa ri olegu-ẹrụ nya Ohe Oluhye ayịdang lee lala am nyaa ri ịKịrayịsị iJisọsị ayịdang dọmwụ lẹ.

¹⁵Ee lẹ, ale ọ-la yaya lụmẹ nyanụ ọọwa ẹ-ẹga nyam, a tị́ ji alẹ mẹ? Am ayịdang ri ibeenu nyanụ yẹkẹẹ, ó-ri kọ chịkpẹẹ hanụ lụka ọọwa, ịnọ, ọ lala anụ nyaa ka dọmwụ gba egbahị nya ịlọnụ anụ ayịdang jum ụ-ụwa ju-elego lẹ.

¹⁶Anụ ya jem wẹẹ, ó ri, m mwọọgịlẹ yẹ ri oluji nyanụ alẹ chajị nya ẹla nya ịlẹhị ọlẹ kam wẹẹ ya jenu lẹ, lee?

¹⁷Anụ wo mẹ! Angị ịkịla ịwẹ kị wẹẹ maga nya ọ-mwụụnụ mwụ bwula igu o-wunu wu wẹ wuu lẹ, i-irya ọnyịịla, ị wẹẹ kpa họọ kpong-kpong ka. I juwa tịtọ kị ka chịnụ ebwo him, chajị kanụ ka jẹ́-ẹ juwa yẹ báa ịwa ụbwaa-ụbwaa, juwa daa ụbwọ ịnyịnyị kem.

¹⁸Ma, ó-ri ká ọngịnyị á juwa kpa irya ọnyịịla ẹ-ẹpwụ aalẹ, igu o-wu ọngịnyị ọngọkịla wu ri ang ohiigu ụka wuu. Lẹ, ó-riri kam juwa ji tanụ lee ḿ juwa ji tanụ ka aalẹ, anụ́-ụ myị ká igu oriri nyam bala anụ a juwa pyịyọọ mẹ.

¹⁹Anụ anyị ịmama nyam ẹ-ẹpwụ nya ịKịrayịsị ee, anụ wo mẹ! Akama ọ-la lẹẹlẹẹ ọlẹ kam lẹẹ yẹ junu myịmyị lụka oheeye lẹ, ọ-lala ịnya ọnyang ọlẹ kọ juwa hya ụma o-okube. Am ka juwa họ ịnyị kele kịlahị-ịlahị gbee pwụ ụka ọlẹ ká abwẹla ọnyịịla nya ịKịrayịsị ka jẹ́-ẹ chị ehe bwulanụ pyii lẹ.

²⁰Ang, ịnọ, kaam ayịdang ka jẹ́-ẹ juwa i-ijata nyanụ lẹẹlẹẹ, chajị kam ka jẹ́-ẹ jaabwọ kam ka kpa ọnụ nyam ya ẹla ọlẹ kọ tọm tanụ, chajị, ẹla nyanụ ọwẹ jam hum pwẹẹpwẹẹ lụmẹ lẹ.

²¹Ọ ri, anụ angịlẹ kanụ wẹẹ tịtọ kanụ ka kpa ịlọnụ kele ka ekpeleji nya ehile nya iMosisi wuu lẹ, ánụ wo jaabwọ ká ehile ọọwa ayịdang ya ka?

²²Chajị, ị da ụ-Ụpwụ Ịgọgọ yẹkẹẹ, Ebiraham nyị ma anyị alẹng imiiye. ỊHẹga ọlẹ kọ ri ọnyọhị, ri ịnịna nya ọnyị ọhẹ. ISera ọlẹ kọọwa á ri ọnyọhị ka, ri ịnịna nya ọnyị ọkịla.

²³Ọnyị ọlẹ ká ahụ ọnyọhị ma ha Ebiraham lẹ, ị mọọ la ọgụ ọlẹ kị kaa kpa ma anyị ịkịla wuu. Ma, ọnyị ọlẹ ká ahụ ọlẹ kọ ri ọnyọhị ka, ma lẹ, ị ma ọnyị ọọwa bwula ọ-họ jịra nya ọnụ ọmyịmyị ọlẹ ká Ohe Oluhye myị ha Ebiraham ene-ene.

²⁴Ahị hu oja nya ịhụ imiiye ịwẹ nya ang ọkpịta wẹẹ. Anyang-angị imiiye ịwẹ ku ọmwakpa nya iro ọnwanwa imiiye ịlẹ ká Ohe Oluhye nwa. ỊHẹga ahụ ọnyọhị ọọwa ku ọmwakpa nya iro ọlẹ ká Ohe Oluhye nwa ha iMosisi ọ-ọgbọdọ nya ịSayịnayị. Anyị ịlẹ ká ịHẹga ma wuu lẹ, ọ maa ju ka ẹpwụ nya ọnyọhị oriri ịnyịnyị.

²⁵Jaabwọ ká ịHẹga ku ọmwakpa nya iro ọnwanwa ọlọgbọdọ nya ịSayịnayị ụ-ụwa a-Arebyiya wẹẹ, ịnyịnyị, ọ myịmyị ku ọmwakpa nya iJerusalẹm olodehe ọlẹ lẹ. Ịnyịnyị, epweji nya iJerusalẹm ọọwa bala angịnyị ịlụwa wuu a juwa ẹ-ẹpwụ nya ori ọchịchị lẹlẹ.

²⁶Ma, iJerusalẹm olepwoohe lẹ, ọwa á juwa ẹ-ẹpwụ nya ori ọchịchị kpong-kpong ka. IJerusalẹm olepwoohe ọwẹ a ri ịnyahị ahị angị myịmyị lẹ.

²⁷Chajị, ị da kpehe ụ-Ụpwụ Ịgọgọ yẹkẹẹ, “Ahụ, ọnyang ọtụma ọlẹ ká ma ọnyị ẹnẹnẹhẹ lẹka, chị ọkẹkẹnị lẹẹlẹẹ mẹ! Ahụ ọnyang ọlẹ ká hya ụma nya ọnyị ọmama hya ẹnẹnẹhẹ lẹka wẹ lẹ, wuleji ká da kpuu lẹhụ nya ọkẹkẹnị ọtụka ịnyịnyị lẹẹlẹẹ mẹ! Chajị, ahụ ọnyang ọlẹ kị gba ugu deeji ene-ene wẹ lẹ, anyị nyang ahụ a mwọọgịlẹ ju iru gụ anyị nya ụpwụng ọlẹ kị hu nya ọnụ-ahụ gụng ugbẹnyị lẹ.”

²⁸Anụ anyadam ẹ-ẹpwụ nya ịKịrayịsị, ahị wuu ri anyị nya Ohe Oluhye lẹẹlẹẹ bwula ọnụ ọmyịmyị nya Ohe Oluhye jaabwọ ká Ayịsiki ri ọnyị ọlẹ ká iSera ma bwula ọnụ ọlẹ ká Ohe Oluhye myị haa ene-ene ịnyịnyị lẹ.

²⁹Jaabwọ ká ọnyị ọlẹ ká ịHẹga ma la ọgụ ọlẹ kị kaa kpa ma anyị ịkịla wuu, juwa tụ ọnyị ọlẹ ká iSera ma bwula Olegu Ịgọgọ pyịpyị lụka ọọwa lẹ, ịnyịnyị, ọ-tụ pyịpyị a tịtị juwa ẹ-ẹga nyahị ahị lẹẹlẹẹ lẹlẹ.

³⁰Ma, anụ kpịtịya mẹ! Ị da kpehe ụ-Ụpwụ Ịgọgọ yẹkẹẹ, “Anụ ku ahụ ọnyọhị ọwẹ bala ọnyị nyamwụ rụ hi ẹpwa ọlẹ mẹ. Chajị ọnyị nya ahụ ọnyọhị ọwẹ á ka bá ịngịngịhyẹ nya ang ugu nya adaa bá la ta ọnyị nya ahụ ọlẹ kọọwa á ri ọnyọhị ka lẹ ka.”

³¹Lẹ, anụ anyadam ẹ-ẹpwụ nya ịKịrayịsị, ị-ịlahị nya Ohe Oluhye lẹ, áhị́ ri anyị nya ahụ ọnyọhị ọwẹ kpong-kpong ka. Ma, ị-ịlahị nya Ohe Oluhye lẹ, ahị ri anyị nya ahụ ọlẹ kọọwa á ri ọnyọhị ka wẹ.