Read idege ALA ỊGALETIYA 5 Bible Online

ALA ỊGALETIYA 5 - idege bible

ALA ỊGALETIYA 5

¹Anụ wo mẹ! Ajị kahị ka la ịlọhị pyịyọọ a du ká ịKịrayịsị warị kaka gbahị kpehe bwu ẹpwụ nya ọnyọhị oriri nya ehile ọkpakpa wuu lẹ. Chajị nya ọọwa lẹ, anụ cheri kanụ juwa godayị rịrị la ọngịrị ẹ-ẹpwụ nya ịlọnụ ọlala ọọwa mẹ. Anụ tụtụm kpa ịlọnụ tịrẹkpẹ ka ẹpwụ nya ọnyọhị nya ehile ọkpakpa oriri myịmyị kaka.

²Anụ wo mẹ! Am ịPọlụ jam byinu yẹkẹẹ, ó-ri kanụ kele kaka da ụwụwụ lala ala iJuu ayịdang lẹ aalẹ, ọọwa ri yẹkẹẹ, ụkụrwọ ọlẹ wuu ká ịKịrayịsị họ hanụ lẹ, ọ́ tịtị ju apyobwuna hanụ kpong-kpong kaka.

³M myịmyị jam danụ ọna nya ịlẹhị-ịlẹhị yẹkẹẹ, ọng myị́ ọng nyanụ ọlẹ kọ kele kaka da ụwụwụ ene lẹ aalẹ, ọngọọwa kpa ịlọmwụ kele ka ekpeleji nya ehile ịkịla ọkpakpa wuu kọ ka juwa kpaa ịwa wuu họ ụkụrwọ jịra pyii lẹ.

⁴Anụ angịlẹ kanụ juwa tịtọ kanụ ka ri alabwẹla ọnyịịla bwula ehile nya iMosisi ọkpakpa myị́ wẹ wuu lẹ, anụ wo mẹ. Anụ hụla ịlọnụ hwaarịị deeji hi ịKịrayịsị lẹ. Anụ tị gba ịlọnụ kpehe hi ẹpwụ nya ẹmwụ-enyi nya ọnahị nya ịKịrayịsị ịnyịnyị bwula ọọwa lẹ.

⁵Chajị, ahị jẹ́ yẹkẹẹ, ọngịrị nya Olegu Ịgọgọ nya Ohe Oluhye ka juwa dahị ụbwọ ẹ-ẹpwụ nya ọmyịmyị ọlala nyahị ọlẹ kahị lẹẹ kpa kụ ọlọyị gbe ụka ọlẹ kahị ka bá abwẹla ọnyịịla nya Ohe Oluhye bá la tọọ ị-ịlahị pyii lẹ.

⁶Chajị bwula ọlẹ kahị yẹ ju lawụlẹ bala iJisọsị ịKịrayịsị lẹlẹ, ụwụwụ ọdada nyahị lee ụwụwụ ọdada-ka wuu, á ri ẹlẹlẹhẹ kaka. Ang ọlẹ kọ ri ẹla ụbwọọmwụ ri yẹkẹẹ, ká ọmyịmyị ọlala nyahị ọlẹga nya ịKịrayịsị wuu ka juwa chị ịlọmwụ ehe bwula ọháha ọlala nyahị yẹẹyẹẹ mẹ ịnyị.

⁷Ịnọ, anụ juwa rụnyẹ kele kịlahị-ịlahị hiigu-hiigu ẹ-ẹpwụ nya ẹrụ ọnyịịla ọlẹ ọhọhọ kpá wuu lẹ. Ee lẹ, o-owo a tị ri ọngọ hunu abwọ la ihi ojuju nya ẹla nya ịlẹhị ọọwa lẹẹlẹẹ mẹ?

⁸O-Ohe Oluhye ayịdang ọlẹ kọ wụrụụnụ chị ịlọmwụ ọgụ a gbileenu ju ka ẹpwụ nya ẹlẹwẹ kpong-kpong ka.

⁹Anụ́-ụ kpịtịya mẹ. Ijọnwa ochiche-ochiche a kaa kpa ịkaa mịrị kaka ri ọtụka-ọtụka lẹ.

¹⁰Ma, ẹhị ọ-da hileenu nya ịlẹhị-ịlẹhị nyam bwula Ọngọlahị ri yẹkẹẹ, ánụ ka la irya ọkịla ọhẹ-lọhẹ datị hi irya ọlẹpwụ nyam am kpong-kpong ka. Ma, ẹ-ẹga nya ọngọlẹ kọ wẹẹ yiinu yi bwuru-bwuru wuu lẹ, ụma nya ọng myị́ ọng ọlẹ ká ọngọọwa á riri, ọ́ ka dayi la akama ọyẹyẹ u-uhye nya ọọwa pyii kaka.

¹¹Anụ anyadam ẹ-ẹpwụ nya ịKịrayịsị, anụ wo mẹ. Anụ ya kọ ri ká ẹla nya Ohe Oluhye oyaya pyẹ nyam á juwa myị ju ẹla nya ụwụwụ ọdada lala ala iJuu ịkịla pyịyọọ daalẹ wẹẹ lẹ, ịnọ, kị tụtụm ka juwa tụm pyịpyị lụmẹ-lụmẹ jaabwọ kị wẹẹ họ wẹ? Aḿ myị ịnyị ka. Chajị, ó-ri kam họ ịnyị lẹ, ịnọ, ẹla nya Ohe Oluhye ọlẹ kam lẹẹ ya rụ́ igu ogbugbu nya ịKịrayịsị u-uhye nya okoji wuu lẹ, ịnọ, ọ́ ka jẹ́-ẹ wụ ọngọngọhẹ ẹjẹ kpong-kpong kaka.

¹²M mama ịịlẹ, ká angịwẹ ayịdang kị wẹẹ yiinu yi bwuru-bwuru u-uhye nya ụwụwụ ọdada wuu, ka myị-ị ru ịlaa ụgba kpẹẹ ịnyịnyị lẹ.

¹³Anụ anyadam ẹ-ẹpwụ nya ịKịrayịsị, Ohe Oluhye wụrụụnụ chị ịlọmwụ ọgụ, chajị kanụ ka la ịlọnụ bwu ẹpwụ nya ehile nya ọhọhọ nya ala iJuu ịnyị! Lẹ, anụ kpa ịlọnụ ọlala nyanụ ọọwa juwa họ ang ọlẹ ká imyi nya ugbinyịrọ nyanụ juwa tịtọ kaka. Ọkọkọ nya ọọwa lẹ, anụ́-ụ juwa kpa ọháha ọlala nya ịlẹhị-ịlẹhị myị ẹrụ ha awụlẹ yẹẹyẹẹ mẹ.

¹⁴Chajị ehile nya Ohe Oluhye wuu do pịlẹ u-uhye nya ẹla ookpokpo ọlẹ, ọngịnyị ọọnang ka háng nya ịlẹhị-ịlẹhị lala ịlọng pyii.

¹⁵Ma, ọ́ tị ri kanụ juwa be awụlẹ ri lee o-juwa gu awụlẹ angịrị lala iyo ịlẹpwamẹ, ọkọkọ nya ọháha nya ịlẹhị-ịlẹhị ọlala ẹ-ẹga nya awụlẹ lẹ aalẹ, anụ́-ụ kpahị ju ịlọnụ ọgwọgụ mẹ. Ó-ri ịnyị ka aalẹ, anụ tụbwọọ ka hụla awụlẹ hwẹẹhwẹẹ wuu lẹ.

¹⁶Ẹla ọlẹ kam wẹẹ ya jenu ri yẹkẹẹ, anụ́-ụ myị ká Olegu Ịgọgọ nya Ohe Oluhye a juwa kpanụ ẹ-ẹpwụ nya ang myị́ ang nyanụ wuu ọlẹ kanụ ka họ mẹ. Aalẹ, ánụ ka ri ọnyọhị nya imyi nya ang myị́ ang ịlẹ kị kaa ma ugbinyịrọ nyanụ ma kaka.

¹⁷Chajị, imyi nya ang ịlẹ kị kaa ma ugbinyịrọ ma wuu lẹ, ị kaa juwa tụ irya nya Olegu Ịgọgọ pyịpyị, irya nya Olegu Ịgọgọ tị, tịtị kaa juwa tụ imyi nya ang nya ugbinyịrọ ịịwa pyịpyị ịnyịnyị. Chajị ang ịwẹ wuu imiiye-imiiye ri aluji nya awụlẹ. Ịnyị a du kanụ kaa jụ ang ọnyịịla ọlẹ kanụ juwa tịtọ nyọka họhọ, họ myị́ kaka lẹlẹ.

¹⁸Anụ kpịtịya mẹ. Ó-ri ká Olegu Ịgọgọ nya Ohe Oluhye á juwa kpanụ ẹ-ẹpwụ nya ang myị́ ang ọhọhọ nyanụ wuu lẹ aalẹ, anụ́ tụtụm myịmyị ka juwa e-ekpeleji nya ehile nya iMosisi ọhẹ-lọhẹ ọkpakpa kaka.

¹⁹Ang ịlẹ ká imyi nya ugbinyịrọ kaa kpa ọngịnyị ehe kaka họ la gede-gede. Ịwa a lẹẹ lẹ: Ụya ọhọhọ, owuru ọlala ka a-abwẹla, ọhịhị nya uhila ọlala ẹ-ẹpwụ nya ang onyobyi ọhọhọ,

²⁰ihye ijiga ọkpụkpụ wuu, ụhwa ojuju wuu, uji myị́ uji ojuju wuu, ẹla ọmwọmwọ wuu, ijiiji onyobyi ọlala wuu, agbama ojuju wuu, ang nya ịlọng ịlọng ọ-háng há kem, ọngịnyị ọngọkịla ọmyịmyị-ka wuu, olegu nya ebwo ọchịchị ọlala wuu,

²¹imajẹ nya ang nya ọngịnyị ọkịla ọlala wuu, ere ọnwanwa juwa ya, ọjịra-jịra nya ụya ọyaya onyobyi juwa ri ang oriri okomba wuu bala ụma nya ang inyibyi ịkịla ịhọhọ ịlịịwẹ wuu. Jaabwọ kam danụ ọna u-uhye nya ang ịlịịwẹ ene-ene lẹ, m myịmyị jam danụ ọna lẹẹlẹẹ yẹkẹẹ, ọng myị́ ọng ọlẹ kọ juwa họ ang ịtịpyọ ị-lala ịlịịwẹ wuu á ka jẹ́-ẹ ri ugu nya ịpyị Adịrahụ nya Ohe Oluhye kpong-kpong kaka.

²²Ma, ugbe nya Olegu Ịgọgọ nya Ohe Oluhye tị ri, ọháha nya ịlẹhị-ịlẹhị ọlala, ọkẹkẹnị ọlẹ kọ kaa gbu enyi-ka ọlala, okpunyi ọlala ọ-ọkịlẹtụ, ugbodu ojuju onyudiyo ọlala ẹ-ẹga nya angịkịla, ọnahị ọlala ẹ-ẹga ká angị ịkịla ji, ọngịnyị ọnyịịla oriri, ọngọ chịla o-hu ọkịlẹtụ ha oriri,

²³ọdụmwọ ọlala bala ang ọ-họ ba o-oyi. Ehile ọhẹ-lọhẹ á kaa tụ ụma nya ịngịngịhyẹ lẹpwụ nya ang ịwẹ pyịpyị kpong-kpong kaka.

²⁴Ahị angịlẹ wuu kahị ri ịnya ịKịrayịsị iJisọsị lẹ, ahị hu irya nya ang inyibyi bala imyi nya ang ịlẹ kị kaa ma ugbinyịrọ nyahị ma wuu kpa kaka gu iloo ba okoji ta ịKịrayịsị lẹ.

²⁵Jaabwọ kahị la ọhịhị onyeewe nyahị ọlẹ bwu ẹpwụtụbwọ nya Olegu Ịgọgọ lẹ, ahị cheri kahị ya iwe da ha Olegu Ịgọgọ kem, kọ juwa kpahị ẹ-ẹpwụ nya ang myị́ ang nyahị wuu ọlẹ kahị ka họ ịnyịnyị mẹ.

²⁶Chajị nya ọọwa lẹ, anụ myị kahị myịmyị juwa hi ọbọọchẹ ẹ-ẹpwụ nya ịlọhị kaka lee o-juwa du agbama ju awụlẹ kaka lee o-juwa la ijiiji onyobyi ẹ-ẹga nya awụlẹ kpong-kpong kaka ịnyịnyị.