Read idege ALA ỊGALETIYA 6 Bible Online

ALA ỊGALETIYA 6 - idege bible

ALA ỊGALETIYA 6

¹Anụ anyadam ẹ-ẹpwụ nya ịKịrayịsị, ó-ri ká ọngọngọhẹ lẹpwụ nyanụ á tịrẹkpẹ kele myịmyị juwa họ ang onyobyi aalẹ, anụ angịlẹ kanụ ri angị juwa họ irya nya Olegu Ịgọgọ nya Ohe Oluhye yẹẹyẹẹ wẹẹ, anụ́-ụ juwa nwụ ọgụ-ẹpẹtẹ nya ọngọọwa rịrị yẹẹyẹẹ mẹ. Ma, anụ́-ụ tị-ị juwa kpa olegu ọdụmwọ họ ụkụrwọ ọọwa! Kanụ kpahị ju ịlọnụ ọgwọgụ lụka ọlịnyị mẹ, chajị kaanụ ayịdang tịtị ka chabwọ kpụ ẹpwụ nya ọmayẹ ọlịnyịnyị la ịlọnụ kpong-kpong kaka mẹ.

²Anụ cheri kanụ juwa bá olo nya akama nya awụlẹ bá kpa ta awụlẹ ịnyịnyịịnyị mẹ. Chajị, abwẹla ọlịnyị ọhọhọ a ri ihi nya ehile nya ịKịrayịsị ojuju jịra lẹ.

³Anụ wo mẹ! Ọngọngọhẹ ọlẹ kọ juwa kpa ịlọmwụ ka uhye gụ iwe-ahụrụ nya ịlọmwụ, ụka ọlẹ kọ tị ri ịngịngịhyẹ ka aalẹ, ọngọọwa juwa pịrị ịlọmwụ ju ododu wẹẹ.

⁴Ọng myị́ ọng lẹpwarịrị nyanụ a juwa wụla ụma nya abwẹla ọhọhọ nya ịlọmwụ yẹ yẹẹyẹẹ ọgwọgụ mẹ. Ó-ri kọ juwa họ hiigu lẹ aalẹ, ọ ka juwa kpa ọ-jẹ́ họhọ hiigu nyamwụ ọọwa chị ogu la ịlọmwụ ịlọmwụ myị́. Ma, ọngọọwa a tị juwa chụ ụkụrwọ nya ịlọmwụ ọọwa kaka pwoku ọhọhọ nya ọngọngọhẹ ọkịla kpong-kpong kaka.

⁵Chajị ọng myị́ ọng nyahị wuu ka kpa olo nya ụkụrwọ ọhọhọ ọlẹ kọ chụ́ụhị e-egbeju pyii la ịlọhị lẹ.

⁶Anụ angịlẹ kanụ ri angịlẹ kị wẹẹ mẹ ang mẹjẹẹnụ wuu lẹ, anụ́-ụ juwa chị ang myị́ ang ịnyịịla ịlẹ kanụ la, ebwo ha angịmẹjẹ nyanụ ịịwa ịnyịnyịịnyị mẹ.

⁷Anụ myị kị pịrịịnụ ju koo! Chajị, ọngọngọhẹ á ka jẹ́-ẹ họ Ohe Oluhye ri myị́ kpong-kpong kaka. Chajị, ugbe ọlẹ ká ọngịnyị á ya tọ ẹ-ẹrụ, ụma nya ugbe ọọwa pyii, ọngọọwa a kaa hya ịnyịnyị lẹ.

⁸Chajị, ọng myị́ ọng ọlẹ kọ juwa tọ ugbe nya abwẹla ọhọhọ ha ugbinyịrọ nyamwụ bwula o-juwa dịrẹ imyi nya ugbinyịrọ nya ịlọmwụ kem aalẹ, ọngọọwa tịtị ka bwula ugbinyịrọ nyamwụ ọọwa hya igu ogbugbu ta ayịreji pyịyọọ. Ma, ọng myị́ ọng ọlẹ kọọwa á tị juwa tọ ugbe nya abwẹla ọhọhọ ha Olegu Ịgọgọ bwula o-juwa dịrẹ irya nya Olegu Ịgọgọ kem aalẹ, ọngọọwa tịtị ka bwula Olegu Ịgọgọ ọọwa la ọhịhị ọmyịmyị-ka pyịyọọ ịnyịnyị pyii.

⁹Lẹ, anụ myị ká abwọ a juwa chị́ịhị pyẹpyẹ ẹ-ẹpwụ nya ụkụrwọ ọnyịịla ọhọhọ kpong-kpong kaka. Chajị ó-ri kahị kpụ ịbwọ ẹ-ẹpwụ nya ụkụrwọ nyahị ọọwa ọhọhọ ka aalẹ, ahị ka ye uri nyahị lụka ohyẹẹkpẹ pyii, ị-ịlahị wẹẹ.

¹⁰Chajị nya ọọwa lẹ, ụka myị́ ụka ká ụgbẹyị nya ang ọnyịịla ọhọhọ ha ọngịnyị á wụrụ da hahị nya ọnahị ọhọhọ lẹ aalẹ, ahị cheri kahị juwa họ ịnyị pyii ha angịnyị wuu mẹ. Ọgụgụ wuu ri, ang ọnyịịla ọhọhọ ẹ-ẹga nya angịlẹ kị ri angịnyị nya Ohe Oluhye lala ahị-ahị.

¹¹Anụ tị́ wẹẹ yẹ jaabwọ kam lẹẹ kpa abigbiidii ịkpọyị-kpọyị da ụpwụ ọlẹ la ụbwọ nya ịlọm du wanụ lẹ.

¹²Anụ wo mẹ! Angịlẹ kị juwa tịtọ kị ka họ ang ọlẹ ká angịnyị ehe ka waa yẹkẹẹ, nyị juwa họ ụkụrwọ ọnyịịla lụmẹ kem, a wẹẹ yẹ rịrịịnụ pyii yẹkẹẹ, anụ nyị da ụwụwụ lala ala iJuu mẹ lẹ. Ang odudu kị juwa họ ịnyị kẹnẹ-kẹnẹ ri, chajị kị ka jẹ́-ẹ be hi ẹpwụ nya ọ-tụ pyịpyị ọlẹ kọ juwa kụ ọlọyị gbe angịlẹ wuu kị juwa ya ẹla nya Ohe Oluhye rụ́ igu ọlẹ ká ịKịrayịsị gbu u-uhye nya okoji.

¹³Ọ jụm jụ lẹ, angịlẹ wuu kịịwa ayịdang wẹẹ da ụwụwụ chajị nyọlẹ kị myị ju ụwụwụ ọdada ọọwa lẹ, ị́ myị kaa juwa kpa ehile nya Ohe Oluhye ihihi ịkịla wuu kpakpa jịra ka. Ma, ị juwa maga chajị ká ụka kanụ myị jwaa wuu, kanụ da ụwụwụ kpá lẹ, kị ka jẹ́-ẹ juwa kpa ụwụwụ ọdada nyanụ ọọwa chị ogu lụka ohyẹẹkpẹ.

¹⁴Am ayịdang lẹ, ang ọlẹ kọ ri ẹla ologu nyam á ji ẹgẹgẹhẹ dala u-uhye nya igu ọlẹ ká Ọngọlahị iJisọsị ịKịrayịsị gbu u-uhye nya okoji chajị nyahị ahị alodehe ọlẹ wuu kaka. Chajị bwula igu ogbugbu nya ịKịrayịsị ọọwa, ị tịtị gum iloo ba okoji ẹ-ẹga ká odehe-ọjwọjwọ bala ang ịlẹpwụ nyamwụ wuu ji, bwula ọlẹ kam ji ẹkpẹ nyam daa lẹ. Ị tị, tịtị gu odehe-ọjwọjwọ ọọwa bala ang ịlẹpwụ nyamwụ wuu iloo ba okoji ịnyịnyị ẹ-ẹga kam ji, bwula ọlẹ kị tịtị pwam lẹ.

¹⁵Ó-ri ká ọngịnyị ehe á da ụwụwụ dada lee ó-ri ká ọngọọwa á da ụwụwụ dada ka, ọọwa á ri ẹlẹhẹ kpong-kpong ị-ịlahị nya Ohe Oluhye ka. Kẹnẹ-kẹnẹ, ang ọlẹ kọ ri ẹla ị-ịlahị nya Ohe Oluhye ri ọ-ka họhị kahị ka jẹ́-ẹ ri angịnyị inyeewe họọ mẹ ịnyị.

¹⁶Ká okpunyi bala ahyẹẹrwẹrwa nya Ohe Oluhye a juwa ha angịlẹ wuu kị juwa hịhị ba ehile nya ọhịhị onyeewe ọlẹ jẹ wuu mẹ.

¹⁷Anụ wo mẹ, bwu alẹ ọlẹ kele kịlahị, ḿ tịtọ ká ọngọngọhẹ nyanụ ka hu akama ọhẹ-lọhẹ ham kpong-kpong kaka. Chajị ekpuru nya ang ịlẹ kị lẹẹ ị-ịnyịrọ nyam lẹ, ị ri ang o-ju ẹjẹẹ yẹkẹẹ, am ri ịnya iJisọsị ịKịrayịsị ịnyịlẹhị-ịlẹhị lẹ.

¹⁸Ká ọnahị nya Ọngọlahị iJisọsị ịKịrayịsị a juwa ta olegu nyanụ, anụ anyadam ẹ-ẹpwụ nya ịKịrayịsị mẹ. Amẹn.