Read idege ALA EFESỌSỊ 1 Bible Online

ALA EFESỌSỊ 1 - idege bible

ALA EFESỌSỊ 1

¹Ileta ọlẹ jam bwu ẹga nyam am ịPọlụ, ọngọlẹ ká Ohe Oluhye chụ kọ ka ri ọlẹrụ ọnyịịla nya iJisọsị ịKịrayịsị. M jam dọọ du wanụ anụ angịnyị nya Ohe Oluhye ilepweji nya Efesọsị ịlẹ kanụ chịla o-hu ọkịlẹtụ ha ẹ-ẹpwụ nya ọhịhị nyanụ ọlẹpwụ nya ịKịrayịsị iJisọsị wuu.

²Ká ọnahị bala okpunyi nya Ohe Oluhye Adahị bala ịnya ịKịrayịsị iJisọsị Ọngọlahị a juwa tanụ wuu mẹ.

³Ahị ọwawa a ri ịnya Ohe Oluhye ọlẹ kọ ri Adịda nya Ọngọlahị iJisọsị ịKịrayịsị. Chajị, Ohe Oluhye ọọwa a ri Ọngọlẹ kọ wahị nya Olegu Ịgọgọ nyamwụ kụrụụhị bwula ịKịrayịsị ẹ-ẹpwụ nya iwe-ahụrụ oluhye ta ịKịrayịsị wuu ayịdang lẹ.

⁴Chajị, Ohe Oluhye chụhị kahị ka ri angịnyị nyamwụ bwula ịKịrayịsị ene-ene ká Ohe Oluhye họ odehe ọlẹ. Chajị kahị ka jẹ́-ẹ ri angị la ịgọgọ bala ọ-la abyị ọkpụkpụ ọhẹ-lọhẹ kaka ị-ịlahị nya Ohe Oluhye lẹlẹ.

⁵Ohe Oluhye me obyi la ịlọmwụ ene-ene yẹkẹẹ, Ọwa nyị ka kpahị wuu kaka ri anyị nya ịlọmwụ bwula ịKịrayịsị, jaabwọ ká irya nya obyi omeme nya ọháha nyamwụ la ẹ-ẹga nyahị.

⁶Ohe Oluhye họ ịnyị, chajị ká ọháha ọlẹbyẹbyị ọnahị ọtụka nyamwụ ọlẹ kọ hu ga hahị ododu bwula Ọnyẹwẹ nyamwụ ọlẹ kọ họ́ọ lụmẹ, chajị ká ọọwa ka ri ang ọ-kpa ogbo ogwogwo kịla Ohe Oluhye.

⁷Bwula ịKịrayịsị ọọwa, ahị la ọchịda nya Ohe Oluhye, ọlẹ ká ịKịrayịsị kpa ịwọ nya ịlọmwụ ra ihi nyamwụ wọnụ nyahị ju lẹlẹ. Ịnyị a du ká Ohe Oluhye hịnyọhi ịhọbịrị nyahị wuu hahị bwula ụdụ nya ọnahị ọchakụ-chakụ ọtụka nya Ohe Oluhye ẹ-ẹga nyahị wuu lẹ.

⁸Ịnyị, Ohe Oluhye a hu ọnahị ọtụka nyamwụ ọọwa ga hahị mwụ aba ba, jaabwọ ká ẹla ọjẹ́jẹ ọtụka nyamwụ bala abwẹla ọkpẹẹkpẹẹ nyamwụ la kaka ba lẹlẹ.

⁹Bwula ọọwa a du ká Ohe Oluhye kpa chị irya okpori-kpori ọkpịbaa nyamwụ ehe mẹjẹẹhị, jaabwọ ká obyi omeme ọnyịịla nyamwụ la lẹ.

¹⁰Obyi omeme nya Ohe Oluhye ọọwa ọlẹ kọ juwa tịtọ kọ ka họ jịra lụka ohyẹẹkpẹ ọlẹ kọ hunọ ri yẹkẹẹ, Ohe Oluhye tịtọ kọ ka kpa angịnyị wuu ịlẹ kọ họhọ kaka jịra ẹ-ẹga ookpokpo chajị kị ka jẹ́-ẹ jẹ́ ịKịrayịsị lala olegbeju nyaa wuu, tụ ang myị́ ang ịkịla ilodehe ọlẹ wuu bala ang ịlẹ wuu kị juwa e-epwoohe.

¹¹Chajị bwula ịKịrayịsị ọọwa, ahị angịlẹ kahị myị la Ohe Oluhye nya ọgbanyẹ-ọgbanyẹ, ịlẹ ká Ohe Oluhye chụhị chụ ha ịlọmwụ lẹ, ahị la ugu nya ahị ọwawa nyamwụ Ọwa Ohe Oluhye Ọngọlẹ kọ kaa họ ang myị́ ang wuu ba irya nya obyi omeme nya ịlọmwụ jẹ lẹ.

¹²Lẹ, Ohe Oluhye chụhị ahị angịnyị nya ọgbanyẹ-ọgbanyẹ ịlẹ kahị lẹẹ la ẹhị ọrịrịị-rịrị ọnyịịla bwula ịKịrayịsị, kahị ka juwa la ọhịhị ọlẹ kọ ka ya ogbo ha ẹnyị ọlẹbyẹbyị nyamwụ ụka wuu.

¹³Ịnyịnyị, ọ la ẹ-ẹga nyanụ ala iJentayịlị lẹ. Ụka ọlẹ kanụ wo ẹrụ ọnyịịla nya ẹla nya ịlẹhị ọlẹ kọ chịnụ da lẹ, anụ kpa ọkịlẹtụ nyanụ wuu myị la ịKịrayịsị. Ọọwa lẹ, Ohe Oluhye a chịnụ ebe nya ẹjẹẹ nya angịnyị nyamwụ oriri bwula ọlẹ kọ hu Olegu Ịgọgọ nyamwụ hanụ, jaabwọ kọ myị ọnụ wẹ lẹlẹ.

¹⁴Olegu Ịgọgọ nya Ohe Oluhye ọọwa a ri ang o-ju ẹjẹẹ yẹkẹẹ, ahị juwa ka ye ugu nya ọchịda ọlẹ ká Ohe Oluhye myị ọnụ hahị ịnyịlẹhị lẹlẹ. Olegu Ịgọgọ ọọwa a tị myịmyị họ kahị jẹ́ yẹkẹẹ, Ohe Oluhye juwa ka kpahị ahị angịnyị nyamwụ wuu kaka wu achinege nya ọchịda nyamwụ ọọwa ọyị pyii ịnyịlẹhị lẹlẹ. Chajị nya ọọwa lẹ, ká ogbo ogwogwo wuu a juwa ha ẹnyị ọlẹbyẹbyị nya Ohe Oluhye mẹ.

¹⁵Ịnyị a du ụka kam wo jaabwọ kanụ juwa kpa ọkịlẹtụ nyanụ wuu myị la Ọngọlahị iJisọsị ịKịrayịsị bala ọlẹ kanụ juwa la ọháha nya ịlẹhị-ịlẹhị ẹ-ẹga nya angịnyị nya Ohe Oluhye ịkịla wuu lẹ,

¹⁶kam juwa kaa kpịtịya nyanụ ẹ-ẹpwụ nya abwọ ọrịrị nyam ụka wuu, juwa ji Ohe Oluhye obe chajị nyanụ lẹlẹ.

¹⁷M jam bịlẹ Ohe Oluhye Adịda nya ogbo ẹbyẹbyị ọlẹ kọ ri Ohe Oluhye nya Ọngọlahị iJisọsị ịKịrayịsị, kọ ka hu Olegu Ịgọgọ nyamwụ hanụ, ká Olegu Ịgọgọ ọọwa ka hu ẹla ọjẹ́jẹ nya Ohe Oluhye hanụ bala o-juwa wụrụ Ohe Oluhye mẹ jẹnụ chajị kanụ ka jẹ́-ẹ jẹ́ Ohe Oluhye hiigu-hiigu.

¹⁸M jam bịlẹ Ohe Oluhye kọ ka wụrụ irya nya ọkịlẹtụ nyanụ, chajị kanụ ka jẹ́-ẹ juwa kpa ugbẹhị nya olegu nyanụ yẹ ahịgboo nya ẹla nya ịlẹhị nyamwụ. Chajị kanụ ka jẹ́-ẹ la ẹhị ọrịrịị-rịrị ọnyịịla ẹ-ẹpwụ nya ẹkọ ọlẹ ká Ohe Oluhye ayịdang be wụrụụnụ. Chajị kanụ ka myịmyị jẹ́-ẹ jẹ́ jaabwọ ká ụmụmẹ nya ụdụ ọchakụ-chakụ nya ugu ọlẹbyẹbyị ọtụka nya Ohe Oluhye ọlẹ kọ myị ọnụ ya, Ọwa nyị ka ya ha angị ịgọgọ nya ọọwa wuu, la kaka ba mẹ.

¹⁹M myịmyị jam bịlẹ Ohe Oluhye kanụ ka jẹ́-ẹ jẹ́ jaabwọ ká ọngịrị o-ju ọ-chụ me-ka nyamwụ ọlẹ kọọwa Ohe Oluhye kaa kpa họ ụkụrwọ ẹ-ẹpwụ nyahị ahị angị myị la Ohe Oluhye tịtị lụmẹ kaka ba. Ụma nya ọngịrị ọtụka nya Ohe Oluhye ọlẹpwụ nyahị ọọwa kpangga, Ohe Oluhye a ya chị ehe ẹ-ẹga nya ịKịrayịsị,

²⁰lụka kọ wule ịKịrayịsị eji bwula igu, ene kọọ kpọọ rụ kele kaka hụhụ i-iwe ahụrụ oluhye u-ubwuriri nya ịlọmwụ e-epwoohe lẹ.

²¹Iwe ahụrụ nya ịKịrayịsị olepwoohe ọọwa a ri iwe-ahụrụ ọlẹ kọ la uhye lụmẹ gụ iwe-ahụrụ nya alegbeju igbeji ịkịla wuu bala ịdịrịhụ ịkịla wuu bala alegbeju i-gbe ọpyị ịkịla wuu bala alegbeju ịnyịịngịrị ịkịla wuu bala ayịbaba ịkịla i-ji uhye nya angịnyị wuu lẹlẹ. Iwe ahụrụ nya ịKịrayịsị ọọwa a myịmyị la uhye lụmẹ gụ ụmụmẹ nya ẹnyị olihi-ihi oriri ọkịla ọnyị myị ọnyị wuu lẹlẹ, tụ ẹnyị ilodehe ọ-la lẹẹlẹẹ wẹwẹ lee ẹnyị ịlịnyị ilodehe ọkịla ọlịlahị.

²²Ohe Oluhye ayịdang myịmyị kpa ang myị́ ang ịkịla ịlẹ wuu kọ họhọ kele kaka ji ekpeleji nya ịKịrayịsị ọọwa lẹ. Ọọwa lẹ, Ohe Oluhye a hu ịKịrayịsị ọọwa hwaa kaka ri olegbeju ọgbahị ọtụka ọgụgụ nya ang myị́ ang wuu ịlẹpwụ nya ịchọọchị nya Ohe Oluhye lẹlẹ.

²³Ala ịchọọchị nya Ohe Oluhye ịịwa wuu a ku ọmwakpa nya ẹga nya ugbinyịrọ la datị-datị nya ịKịrayịsị ọlẹ kọ ri olegbeju ọgbahị nya ala ịchọọchị wuu lẹ. Chajị, ẹ-ẹpwụ nya ịchọọchị nya Ohe Oluhye wuu tụchawụlẹ, ọngịrị nya ijata ojiji nya ịKịrayịsị a kaa myị pwẹẹpwẹẹ jịra bwula ịKịrayịsị ọọwa ọngọlẹ kọ kaa hu ahị ọwawa nyamwụ myị ẹpwụ nya ọng myị́ ọng ẹ-ẹga myị́ ẹga wuu lẹlẹ.