Read idege ALA EFESỌSỊ 2 Bible Online

ALA EFESỌSỊ 2 - idege bible

ALA EFESỌSỊ 2

¹Ịnọ, anụ ri angị gbugbu ẹ-ẹpwụ nya olegu nyanụ bwula ihi nya ẹla nya Ohe Oluhye ojuju-ka nyanụ bala ịhọbịrị ịhọhọ nyanụ ene ká Ohe Oluhye ya ọhịhị onyeewe hanụ.

²Ụka onyogo ọọwa lẹ, anụ juwa kaa họ ang myị́ ang nyanụ ba ụgbẹyị nya abwẹla onyobyi ọhọhọ nya alodehe ọlẹ jẹ. Anụ juwa kaa ju ihi nya Ohe Onyobyi ọngọlẹ kọ ri olegbeju nya alegu inyibyi iluhye-ọhụ, ọlẹ kọ juwa kaa họ ụkụrwọ ẹ-ẹpwụ nya angịlẹ wuu kị kaa ju ihi nya ẹla nya Ohe Oluhye ka.

³Ahị ayịdang wuu dọmwụ họ kpá ịnyị ẹnẹhẹ lala ịwa-ịwa ịnyịnyị lẹ. Ụka ọọwa lẹ, ahị juwa kaa họ ang myị́ ang ọlẹ ká imyi nya ugbinyịrọ nyahị bala irya nya ụmaa ọlẹpwụ nyahị á byihi ya ahị nyị họ mẹ, kem. Chajị nya ọọwa lẹ, ịnọ, ahị ayịdang tịtị ri angịlẹ ká eje owuwu nya agbama nya Ohe Oluhye juwa godayị gbe ịnyịnyị lala angịnyị angịkịla wuu.

⁴Ma, Ohe Oluhye tị ri Ọngọ kpụ ụdụ nya ahyẹẹrwẹrwa ọlala lụmẹ du kọ họ ká ọháha ọlala ọtụka nyamwụ chị ehe ẹ-ẹga nyahị wuu lẹ.

⁵Ịnyị a du ụka ọlẹ kahị angị gbugbu ẹ-ẹpwụ nya olegu nyahị wuu riri bwula ịhọbịrị ịhọhọ nyahị lẹ, ká Ohe Oluhye kpahị kaka la ọhịhị onyeewe nyamwụ ta ịKịrayịsị lẹlẹ. Chajị ọnahị nya Ohe Oluhye, ọ kpa chịnụ da wẹ ododu lẹ.

⁶Ịnyị, Ohe Oluhye a kpahị ka ẹpwụ nya ọhịhị onyeewe nya owuleji bwula igu ta ịKịrayịsị lẹ. Ọọwa lẹ, Ohe Oluhye a kpahị kaka hụhụ i-iwe ahụrụ oluhye nya ịKịrayịsị tọọ ẹ-ẹpwụ nya ọngịnyị nya Ohe Oluhye oriri lẹlẹ.

⁷Ohe Oluhye họ ịnyị ẹ-ẹga nyahị chajị kọ ka jẹ́-ẹ la gbadaa gbe ụka myị́ ụka wuu yẹkẹẹ, ụdụ nya ọnahị ọtụka o-ju ọ-chụ me-ka nya Ohe Oluhye ọlẹ kọ ya chị ehe ẹ-ẹga nyahị bwula ọháha ọlala nyamwụ ẹ-ẹpwụ nya ịKịrayịsị lẹ, ọ ri nya ịlẹhị lẹ.

⁸Ọnahị ọgahị ododu nya Ohe Oluhye, Ohe Oluhye a kpa chịnụ da lụka ọlẹ kanụ myị la ẹla nyamwụ lẹ. Ọọwa á tị bwula ịngịngịhyẹ ọlẹ kanụ họ lụbwọ nya ịlọnụ kpong-kpong ka. Chajị, ọgahị ọnahị nya Ohe Oluhye kem, ọ ri lẹ.

⁹Ọchịda nyanụ ọọwa, á ri uri oyeye nya ụkụrwọ ọhọhọ nyanụ ka, lẹ, ọngọngọhẹ á ka jẹ́-ẹ kpa chị ogu kpong-kpong ka.

¹⁰Chajị, ahị angị chịda wuu ri angịlẹ ká Ohe Oluhye họhị-ị họ onyeewe lala ang-abwọ nya ụkụrwọ nyamwụ ẹ-ẹpwụ nya ịKịrayịsị iJisọsị, chajị kahị ka ri angị họ ụkụrwọ ọnyịịla ịlẹ ká Ohe Oluhye ayịdang nwụlanọ gbehi ene-ene kahị ka juwa dịrẹ kpa họ wuu kem.

¹¹Anụ angịlẹ kanụ ri ala iJentayịlị bwu orogo orogo lẹ, anụ kpịtịya nya ọhịhị onyogo nyanụ wẹẹ! Ala iJuu tị́ kaa wụrụụnụ yẹkẹẹ, anụ nyị ri angịlẹ kịị nyị́ da ụwụwụ ka, chajị ala iJuu ayịdang kaa juwa ya ịlaa dodehe lala angị da ụwụwụ. Ụwụwụ ọdada ọọwa tị ri ang ọlẹ ká angịnyị ehe la ịlaa kem, a kaa họ la ụbwọ nya ịlaa.

¹²Anụ kpịtịya mẹ. Ụka ọọwa lẹ, anụ ri angị chị ebwo hi ịKịrayịsị. Ánụ́ tị myịmyị ri angịlẹ kị juwa ẹ-ẹpwụ nya ogu nya ala Isirẹlụ ịlẹ ká Ohe Oluhye chụchụ ha ịlọmwụ ka ịnyịnyị. Ánụ́ tị ri angị la ebwo ọhẹ-lọhẹ ẹ-ẹpwụ nya ọnụ ọmyịmyị ọlẹ ká Ohe Oluhye myị ha angịnyị nyamwụ bwula iro ọnwanwa ụka ọọwa kpong-kpong ka. Ánụ́ tị myịmyị la ẹhị ọrịrịị-rịrị ọnyịịla ọhẹ-lọhẹ ẹ-ẹpwụ nya ọhịhị nyanụ ụka ọọwa ka. Ánụ́ tị jẹ́ Ohe Oluhye lala Ohe Oluhye nyanụ ụka ọọwa ka ịnyịnyị.

¹³Ma, lẹẹlẹẹ, tị bwula ịKịrayịsị lẹ, Ohe Oluhye tụụnụ kaka ju ịlọmwụ chwẹẹ bwu ẹga ọlụrụ nya ọhọbịrị ọhọhọ nyanụ wuu lẹ. Ohe Oluhye họ ịnyị bwula igu ọlẹ ká ịKịrayịsị gbu wọnụ nyanụ wuu ju.

¹⁴Chajị, ịKịrayịsị ayịdang kpangga a ri ụpwụ-ụtụ nya okpunyi ẹ-ẹpwarịrị nyahị ahị wuu tụchawụlẹ du ká ala iJuu bala ala iJentayịlị ri ọngịnyị ọngọ ookpokpo lẹẹ lẹlẹ. Chajị ịKịrayịsị kpa igu ogbugbu nya ugbinyịrọ nyamwụ tụrụ ugulọ nya aluji oriri nya ala iJuu bala ala iJentayịlị ju eji pyịyọọ lẹ.

¹⁵ỊKịrayịsị họ ịnyị bwula ọlẹ kọ warị kaka mwụ ehile nya iMosisi angịrị bala ehile nya ịgọ ọchịchị nya ala iJuu bala abwẹla ọhọhọ inyogo nyaa wuu lẹ. ỊKịrayịsị họ ịnyị chajị kọ ka jẹ́-ẹ tụ alebwo imimiiye ịịwa wuu chị awụlẹ, yáa la ụma nya angịnyị ọngọ ookpokpo ẹ-ẹpwụ nya ịlọmwụ. Ịnyị lẹ, ọ kpa okpunyi nyamwụ warị wẹ ẹpwarịrị nyahị wuu lẹlẹ.

¹⁶Bwula igu ọlẹ ká ịKịrayịsị gbu u-uhye nya okoji, ịKịrayịsị ta uji ọlẹpwarịrị nya ala iJuu bala ala iJentayịlị ayịreji gbanggbang lẹ. Ịnyị lẹ, ị ri ugbinyịrọ ookpokpo bwula igu nya ịKịrayịsị ọlẹ kọ kpa kpaa ịwa alebwo imimiiye tịrẹkpẹ nya chị Ohe Oluhye ọgụ kaka la okpunyi bala Ohe Oluhye lẹlẹ.

¹⁷Ịnyị lẹ, ịKịrayịsị a warị kaka ya ẹrụ ọnyịịla nya okpunyi nyamwụ je alodehe ọlẹ wuu lẹlẹ. Tụụnụ anụ ala iJentayịlị kanụ jiji lụrụ hi Ohe Oluhye bala ala iJuu ayịdang ịlẹ kị ju Ohe Oluhye chwẹẹ ịnyịnyị lẹlẹ.

¹⁸Chajị bwula ịKịrayịsị ọọwa, ahị ala iJuu wuu bala ala iJentayịlị tụchawụlẹ, a kaa jẹ́-ẹ pwụ ijata nya Ohe Oluhye myị́ bwula Olegu Ịgọgọ olookpokpo ọlẹ ká Ohe Oluhye Adịda hu hahị wuu.

¹⁹Chajị nya ọọwa lẹ, anụ ala iJentayịlị wuu á myịmyị ri angga lee alija ịkịla ẹ-ẹga nya angịnyị nya Ohe Oluhye kaka. Anụ ri alụma ookpokpo ta angịnyị nya Ohe Oluhye ịkịla wuu lẹẹlẹẹ lẹ. Alugbiyegu nya Ohe Oluhye kpangga, anụ tị ri ịnyịnyị lẹlẹ.

²⁰Chajị, anụ tịtị ri angịhyẹ lẹpwụ nya alugbiyegu nya Ohe Oluhye ịlẹ kọ nwụ́ hụrụ itiwe nya ube nyamwụ ọlẹ kọ kpa alọmwụ nyamwụ bala alẹrụ ọnyịịla ọlẹ dọmwụ, ká ịKịrayịsị ayịdang a ri ẹjwọ ọnyọọngịrị o-wu itiwe ọọwa kpa lẹ.

²¹ỊKịrayịsị ọọwa ayịdang a lẹẹ wu ang myị́ ang nya ube ọọwa kpa lẹ. Ẹ-ẹpwụ nya ịKịrayịsị ọọwa, ube ọọwa a juwa kaa nwa kịlahị-ịlahị gbee kọ ka ri ube ọlịgọgọ ha Ọngọlahị Ohe Oluhye lẹlẹ.

²²Ẹ-ẹpwụ nya ịKịrayịsị ọọwa, Ohe Oluhye ayịdang a wẹẹ nwụ́ụnụ wuu lawụlẹ bala angịnyị nya Ohe Oluhye ịkịla wuu, chajị kanụ ka jẹ́-ẹ ri ẹpwang ọkụkụ ha Ohe Oluhye bwula Olegu Ịgọgọ nyamwụ ịnyịnyị lẹlẹ.