Read idege ALA EFESỌSỊ 3 Bible Online

ALA EFESỌSỊ 3 - idege bible

ALA EFESỌSỊ 3

¹Ịnyị a du kaam ịPọlụ ọlẹ kam ri ọlagba nya ịKịrayịsị o-oluhye nyanụ anụ ala iJentayịlị, kaa raabwọ ha Ohe Oluhye chajị nyanụ wuu lẹ.

²Chajị, m jẹ́ kaanụ ayịdang wo yẹkẹẹ, Ohe Oluhye nyị hu ụkụrwọ ọọwa jum ụ-ụbwọ bwula ọnahị ọtụka nyamwụ chajị kam ka juwa họ ụkụrwọ ọọwa ẹ-ẹpwarịrị nyanụ lẹ.

³Ohe Oluhye ayịdang la ịlọmwụ a wụrụ obyi omeme ọkpịbaa nyamwụ chị ehe mẹjẹm jaabwọ kam dọmwụ da ju ụ-ụpwụ kpii kaka ya jenu ene-ene lẹlẹ.

⁴Ụka kanụ wa ụpwụ nyam ọlẹ kam lẹẹ da du wanụ lẹ aalẹ, anụ ka jẹ́-ẹ jẹ́ jaabwọ kaam ịPọlụ ọlẹ ayịdang jẹ́ ang chajị nya ẹla ịbaa-ịbaa nya ịKịrayịsị kaka ba lẹlẹ.

⁵Lụka nya oyi nya angị inyogo wuu lẹ, Ohe Oluhye á mẹ ang ịbaa-ịbaa nyamwụ ịịwa jẹ ọngọngọhẹ lẹka. Ma, lẹẹlẹẹ lẹ, Ohe Oluhye jam máa jẹ angịlẹ kọ chị ịgọgọ ju kị ka ri alẹrụ ọnyịịla nya Ọngọlahị bala alọmwụ nya Ohe Oluhye bwula Olegu Ịgọgọ nyamwụ ugbẹnyị lẹ.

⁶Ẹla ịbaa-ịbaa nyamwụ ọọwa ri yẹkẹẹ, bwula ẹrụ ọnyịịla nya Ọngọlahị ọlẹ, Ohe Oluhye họ ká ala iJentayịlị wuu ri angị ka la ugu nya ahị ọwawa nya Ohe Oluhye ta ala iJuu ịnyịnyị lẹ. Chajị, ala iJentayịlị wuu tịtị bába ri ẹga nya ugbinyịrọ nya ịKịrayịsị ọọwa ta ala iJuu ịnyịnyị lẹ. Lẹ, ala iJentayịlị wuu tịtị juwa ẹ-ẹpwụ nya ọnụ ọmyịmyị ọlẹ ká Ohe Oluhye myị ha angịnyị nyamwụ wuu ẹ-ẹpwụ nya ịKịrayịsị ịnyịnyị lẹẹlẹẹ lẹ.

⁷Ẹrụ ọnyịịla ọọwa kpangga, Ohe Oluhye ayịdang a hum lẹẹ kam ka ri ọngọhẹ nya alẹrụ ọnyịịla nyamwụ bwula ọgahị ọnahị nya Ohe Oluhye ọlẹ kọ lẹẹ kpa ọngịrị nyamwụ họ ụkụrwọ ẹ-ẹpwụ nyam lẹlẹ.

⁸Am ịPọlụ ọlẹ kam ri ọhịnyẹnyẹ ẹ-ẹpwụ nya angịnyị nya Ohe Oluhye ịkịla wuu pyii, Ohe Oluhye a tị dachichi chụm, kaam a ka la iwe-ahụrụ olihi ọlẹ lẹ. Chajị kaam a ka juwa kpa ẹrụ ọnyịịla nya ụdụ ọ-la ọbaba nya olegu nya ịKịrayịsị ọlẹ kaka ya pyẹ je ala iJentayịlị wuu lẹlẹ.

⁹Chajị kaam ịPọlụ ọlẹ a ka ri ọngọ ka mẹjẹ angịnyị wuu jaabwọ ká Ohe Oluhye tịtọ kọ ka bwu chị obyi omeme ịbaa-ịbaa nya ịlọmwụ ọọwa ehe lẹlẹ. Chajị ene-ene bwu ụka nya aloyi inyogo nya odehe ọlẹ lẹ, Ohe Oluhye ayịdang Ọngọlẹ kọ họ ang myị́ ang wuu, kpụ obyi omeme nya ịlọmwụ ọọwa ịbaa hi angịnyị wuu ụka ọọwa.

¹⁰Chajị ká Ohe Oluhye ka jẹ́-ẹ bwula ala ịchọọchị nyamwụ chị ẹla ọjẹ́jẹ ọdatị-datị nya Ohe Oluhye ehe mẹjẹ alegbeju nya alegu-ẹrụ wuu bala alegbeju ịnyịngịrị nyaa wuu ụ-ụwa e-epwoohe lẹlẹ.

¹¹Ohe Oluhye họ ịnyị pwoku jaabwọ ká obyi omeme nyamwụ ọlẹ kọ me bwu ọmwụ ọdada la ene-ene. Ịnyị, Ohe Oluhye a họ obyi omeme nyamwụ ọọwa jịra bwula ịKịrayịsị iJisọsị Ọngọlahị lẹlẹ.

¹²Bwula ịKịrayịsị ọọwa, ahị angịlẹ kahị myị lọọ wuu a jẹ́ kaa la ẹla oyaya myị́ bala ọ-la ẹhị ọ-da hile ọ-ka pwụ ijata nya Ohe Oluhye myị́ bwula ọmyịmyị ọlala lẹlẹ.

¹³Chajị nya ọọwa lẹ, m jam bịlẹnụ, anụ chuchuu, ká ọkịlẹtụ a kpụnụ enyi u-uhye nya akama ọlẹ kam lẹẹ yẹ chajị nyanụ kpong-kpong kaka. Chajị, akama nyam ọọwa ka kpa ihi ọlala wanụ.

¹⁴Ịnyị a du kam kaa ya arụụ nyam ku eji ẹ-ẹpwụ nya abwọ ọrịrị ha Ohe Oluhye Adịda chajị nyanụ lẹ.

¹⁵Ẹ-ẹga nya Ohe Oluhye Adịda ọọwa, alọdọdẹpwa ọnyị myị ọnyị wuu e-epwoohe bala odehe ọlẹ a kaa bwula ẹnyị nyaa lẹlẹ.

¹⁶M jam bịlẹ Ohe Oluhye kọ ka kpa ụdụ ọchakụ-chakụ nya ogbo ọlẹbyẹbyị nyamwụ họ ká ọngịnyị onyeewe ọlẹpwụ nyanụ ọwẹ ka jẹ́-ẹ juwa la gogo bwula ọngịrị nya Olegu Ịgọgọ nyamwụ.

¹⁷M myịmyị bịlẹ ká ịKịrayịsị ka warị kaka nọ ẹpwa ẹ-ẹpwụ nya ọkịlẹtụ nyanụ bwula ọmyịmyị ọlala nyanụ ẹ-ẹga nya ịKịrayịsị. M jam bịlẹ chajị kanụ ka jẹ́-ẹ myị ká ọháha ọlala nya ịlẹhị-ịlẹhị kem a ka ri itiwe bala ụtẹ nya ang myị́ ang ọlẹ kanụ ka họ wuu.

¹⁸Chajị kaanụ bala angịnyị nya Ohe Oluhye ịkịla wuu ka jẹ́-ẹ la ọngịrị nya Ohe Oluhye ọlẹ kanụ ka kpa jẹ́ jaabwọ ká ẹpwụ ojuju bala udiyo ọlala bala uhye ọlala bala okpori-kpori ọlala nya ọháha nya ịKịrayịsị la wuu kaka ba.

¹⁹M jam bịlẹ kaanụ wuu ka jẹ́-ẹ jẹ́ ọháha nya ịKịrayịsị ọlẹ kọ lụmẹ kpoye nya ang ọjẹ́jẹ nya angịnyị ehe wuu, chajị ká Ohe Oluhye ka jẹ́-ẹ ya abwẹla ọnyịịla nyamwụ wuu myịnụ pwẹẹpwẹẹ.

²⁰Ẹ-ẹga nya Ohe Oluhye Ọngọlẹ kọ kaa họ ang hahị gụ jaabwọ kahị kaa bịlọọ myị́ kaka ba lee ọ-họ gụ jaabwọ kahị kaa me irya ẹ-ẹpwụ nyahị kaka ba, bwula ọngịrị ọtụka nyamwụ ọlẹ kọ kaa họ ụkụrwọ ẹ-ẹpwụ nyahị, m jam yẹkẹẹ,

²¹ogbo a ri nya Ohe Oluhye ẹ-ẹpwụ nya ịchọọchị nyamwụ wuu bwula ịKịrayịsị iJisọsị bwu oyi myị́ oyi pwụ ụka myị́ ụka mẹ. Amẹn.