Read idege ALA EFESỌSỊ 4 Bible Online

ALA EFESỌSỊ 4 - idege bible

ALA EFESỌSỊ 4

¹Am ịPọlụ ọlẹ kị ju agba u-uhye nya ẹrụ ọnyịịla nya Ọngọlahị ọlẹ, m jam bịlẹnụ kanụ ka juwa la ọhịhị ọlẹ kọ pwoku ẹkọ obebe nya Ohe Oluhye ọlẹ kọ be wụrụụnụ ha ịlọmwụ.

²Kanụ juwa la ọhịhị ọdụmwọ bala ọ-la wụlẹlẹ bala o-juwa la ugbodu ojuju ịnyịnyị ụka wuu mẹ. Kanụ juwa kpa ọháha ọlala nyanụ la ọhịnyọhi onyudiyo ẹ-ẹga nya awụlẹ ịnyịnyị mẹ.

³Anụ cheri kanụ juwa yụbwọ chị ọtụchawụlẹ nyanụ ọwẹ kpa ụ-ụwa gogo bwula ọngịrị nya Olegu Ịgọgọ ẹ-ẹpwụ nya okpunyi ọlala ọlẹ kọọwa a ri ochiri ọ-chị angịnyị ori bawụlẹ myị́ mẹ.

⁴Chajị, ahị ala ịchọọchị nya Ohe Oluhye wuu ri ugbinyịrọ ookpokpo ẹ-ẹpwụ nya ịKịrayịsị. Olegu Ịgọgọ ọlẹ ká Ohe Oluhye ya hahị tị la ookpokpo. Ẹhị ọrịrịị-rịrị ọnyịịla ọlẹ kahị la ẹ-ẹpwụ nya ẹkọ obebe ọlẹ ká Ohe Oluhye be wụrụụhị wuu tị la ookpokpo ịnyịnyị.

⁵Ayịbaba ookpokpo kem, a tị ri Ọngọlahị la lẹ. Ọmyịmyị ọlala ookpokpo, ahị wuu a tị la lẹ. Enyi Ohe ookpokpo, ahị wuu a tị hụ ịnyịnyị lẹ.

⁶Ohe Oluhye Adịda olookpokpo ayịdang kem a tị ri Ohe Oluhye Adịda nyahị wuu lẹ. Ohe Oluhye ọọwa ayịdang a ri Olegbeju Agụgụ nya ọng myị́ ọng nyahị wuu lẹ. Ọwa-à tị kaa juwa kpahị họ ang myị́ ang wuu bala ọ-kaa ya ọngịrị nyamwụ kụ ẹpwụ nya ọng myị́ ọng nyahị wuu ịnyịnyị lẹ.

⁷Ma, ọhaha ọnahị nya Ohe Oluhye ọlẹ kahị la lẹ, ọng myị́ ọng nyahị lọọ ba ẹ-ẹjịra nya ẹga ọlẹ ká ịKịrayịsị ya hahị kaka ba kem.

⁸Ịnyị a du ká Ụpwụ Ịgọgọ ya ẹ-ẹgẹlẹ yẹkẹẹ, “Ụka ká ọngọọwa juwa ka rụ kele ka epwoohe lahị-lahị lẹ, ọ gba iru nya alagba kpehe bwu ẹpwụtụbwọ nya aluji kpa rụ ba ịlọmwụ. Ọọwa lẹ, ọngọọwa a hu iru nya ịhaha nyamwụ la datị-datị ga ha angịnyị ehe lẹlẹ.”

⁹Ịịyẹ a tị́ ri etu nyọlẹ kị yẹkẹẹ, “Ọ rụ ka epwoohe”? Etu nyamwụ ri yẹkẹẹ, ọngọọwa jene hireji bwu uhye-ọgba kele ka ejegu pẹtẹẹ.

¹⁰ỊKịrayịsị ọọwa ọlẹ kọ hireji warị wẹ odehe ọlẹ lẹ, ọwa pyii a ri ọngọlẹ kọ rụ kele ka uhye-ọgba nya epwoohe kaka hụhụ i-iwe ahụrụ ọlẹ kọ la uhye gụgụ wuu lẹ. Ọwa ayịdang a ri ọngọlẹ ká ijata ojiji nyamwụ myị ẹga myị́ ẹga wuu pwẹẹpwẹẹ tụ odehe ọlẹ wuu bala epwoohe ịnyịnyị lẹ.

¹¹Ịhaha nya ịKịrayịsị ịlẹ kọ hu ha ịchọọchị nya Ohe Oluhye ri yẹkẹẹ, angịhyẹ ka ri alẹrụ ọnyịịla nyamwụ, angị ịkịla ka ri alọmwụ ị-ka juwa ya ẹla nya Ohe Oluhye dodehe, angịkịla ka ri angị ka juwa ga tụ epweji-epweji da juwa ya ẹla nya Ohe Oluhye ju angịnyị, angịkịla ka ri angịgbikpịlọ bala ọ-ka ri angịmẹjẹ nya ẹla nya Ohe Oluhye ha ala ịchọọchị ịnyịnyị.

¹²ỊKịrayịsị họ ịnyị chajị ká alegbeju ịịwa wuu ka jẹ́-ẹ ri angị ka juwa nwụla angịnyị nya Ohe Oluhye ịkịla wuu nọ yẹẹyẹẹ chajị kịịwa wuu ka jẹ́-ẹ juwa myị ẹrụ ọnyịịla ọlẹ ha Ohe Oluhye, chajị ká ịchọọchị ọlẹ kọ ri ugbinyịrọ nya ịKịrayịsị ka jẹ́-ẹ la gogo bwula ọọwa myị́.

¹³Kahị juwa họ ịnyị gbee ká ọmyịmyị ọlala nyahị ahị angịnyị nya Ohe Oluhye wuu bala ang ọjẹ́jẹ chajị nya Ọnyẹwẹ nya Ohe Oluhye ka jẹ́-ẹ ri ang olookpokpo mẹ. Chajị kọọwa ka jẹ́-ẹ kpahị kaka ri adam ọlẹng ọ-nwa kaka tọ ịKịrayịsị meme ẹ-ẹpwụ nya ọngịnyị nya Ohe Oluhye oriri nyahị wuu mẹ.

¹⁴Chajị kahị tụtụm ka myịmyị jẹ́-ẹ ri anjwo ichiche ẹ-ẹpwụ nya ọmyịmyị ọlala nyahị, ịlẹ kahị ka juwa da ohu-ogo da ọhụ-amwụ ẹ-ẹpwụ nya ọmyịmyị ọlala nyahị bwula ọmẹjẹ ụhwahị ọhẹ-lọhẹ kaka mẹ. Ụhwahị ọlịnyị kaa bwula ijẹẹhị onyobyi nya angịnyị ehe ịlẹ kị kaa juwa kpa ụgbẹyị ijẹẹhị nya ọnọọkịla omeme hụ angịnyị ahị.

¹⁵Ọkọkọ nya ọọwa lẹ, ọ chịla kahị ka juwa ya ẹla nya ịlẹhị bwula ọháha ọlala ọlẹpwụ nyahị chajị ká ọọwa ka jẹ́-ẹ họ kahị ka juwa nwa kịlahị-ịlahị ẹ-ẹpwụ nya ang myị́ ang wuu lala ịKịrayịsị ọngọlẹ kọ ri olegbeju nyahị.

¹⁶ỊKịrayịsị olegbeju nyahị ọọwa a kaa wuhi ahị angịnyị nya Ohe Oluhye wuu kpa, du kahị la ookpokpo jaabwọ ká ekpiiji nya ugbinyịrọ nyahị kaa wu ẹga myị́ ẹga nya ugbinyịrọ nyahị kpa lẹ. Ịnyị, ụka ká ọng myị́ ọng nyahị á juwa họ ebwo nya ụkụrwọ nyamwụ yẹẹyẹẹ lẹ, ọọwa lẹ, ugbinyịrọ nya ịKịrayịsị ọlẹ kọ ri ịchọọchị nyamwụ a ka juwa nwa ẹ-ẹpwụ nya ọháha ọlala nya ịlẹhị ọọwa lẹlẹ.

¹⁷M jam danụ ọna bwula ẹnyị nya Ọngọlahị yẹkẹẹ, anụ myịmyị juwa họ abwẹla inyibyi lala ala iJentayịlị ịlẹ kị jẹ́ Ohe Oluhye ka lẹ kokoo! Chajị, irya ọtịpyọ o-ju apyobwuna-ka nyaa, ị kaa bajẹ lẹ.

¹⁸Irya nya ọkịlẹtụ nyaa wuu myị la ukpowu. Ị́ la ịngịngịhyẹ ẹ-ẹpwụ nya ọhịhị onyeewe ọlẹ ká Ohe Oluhye kaa ya ha angịnyị nyamwụ kpong-kpong ka. Ọọ-la ọlẹ kị jẹ́ ịngịngịhyẹ chajị nya Ohe Oluhye kpong-kpong ka bwula egbeju ọnyọọngịrị ọlala lụmẹ nyaa.

¹⁹Jaabwọ ká ọkịlẹtụ ọnyọọngịrị nya angị jẹ́ Ohe Oluhye-ka ịịwa da akịrakpa wuu lẹlẹ, ịnyị, ị juwa hu ọhịhị nyaa wuu lẹpwụ-lẹpwụ juwa kpa họ ang inyibyi bwula uhila onyobyi ọlala nyaa lẹlẹ. I juwa kaa chẹhị nyanya ẹ-ẹpwụ nya ang myị́ ang ịlẹ kị chịrị ị-ịlahị nya Ohe Oluhye ịnyịnyị.

²⁰Anụ ya ká ọhịhị ọlịịwẹ ịKịrayịsị a mẹjẹẹhị ya, ahị nyị juwa la mẹ?

²¹Eheehe! Chajị, ẹla ọlẹ kị kpa warị kaka mẹjẹẹnụ lụka kanụ wo ẹla nya Ohe Oluhye ri yẹkẹẹ, ẹ-ẹpwụ nya iJisọsị ayịdang, ẹla nya ịlẹhị ọhọhọ wuu a ji lẹlẹ.

²²Chajị nya ọọwa lẹ, anụ angịnyị nya Ohe Oluhye, anụ nyẹ ụhụ la ọngịnyị onyogo ọlẹpwụ nyanụ deeji mẹ. Chajị, irya nya ọngịnyị onyogo ọlẹpwụ nyanụ ọọwa ri irya nya ọhịhị nya ọhọbịrị ọhọhọ bala o-ri irya ọbịrịị-bịrị bwula ọpịrị ju nya imyi nya ịnyịrọ nyanụ olene-ene.

²³Anụ chuchuu, kanụ ya iwe da ha Ohe Oluhye, chajị ká Ohe Oluhye ka jẹ́-ẹ nwụ olegu ọlẹpwụ ọkịlẹtụ nyanụ ma onyeewe gbanggbang mẹ!

²⁴Kanụ hu ọhịhị onyeewe nya Ohe Oluhye dakụrụ ịlọnụ mẹ. Chajị, Ohe Oluhye hu ọhịhị onyeewe nyamwụ ọọwa hanụ, chajị kanụ ka jẹ́-ẹ la abwụma nya abwẹla ọnyịịla bala ịgọgọ ọlala nyamwụ ọlẹ kọ ri nya ịlẹhị myị́.

²⁵Chajị nya ọọwa lẹ, anụ juwa me ọnọọkịla kokoo! Ọkọkọ nya ọọwa lẹ, ká ọng myị́ ọng nyanụ a juwa ya ẹla nya ịlẹhị je ọọnamwụ mẹ. Chajị, ahị wuu ri ẹga nya ugbinyịrọ nya ịKịrayịsị ọlẹ kọ ri ịchọọchị nya Ohe Oluhye.

²⁶Ó riri ká ẹlẹlẹhẹ á wụng wụ ẹjẹ aalẹ, a myị ká ikẹjẹ-awụrụ ọọwa a gbileng kaka họ ang onyobyi koo! A myị ká agbama ojuju nyang u-uhye nya ẹlẹlẹhẹ a hi juwa gbee da ka alobyi nya ẹnụtụrụ ọọwa kpong-kpong ka.

²⁷A hi iwe ọhẹ-lọhẹ da ha Ohe Onyobyi ẹ-ẹga nya ịlọng kpong-kpong ka!

²⁸Ahụ ọngọlẹ ká kaa yi oyi ene-ene, a myịmyị juwa yi oyi kaka! Ọkọkọ nya ọọwa lẹ, ọngọọwa a juwa họ ụkụrwọ lụbwọ nya ịlọmwụ jaabwọ kọ chịla, chajị kọ ka jẹ́-ẹ la ang ọgwọgụ juwa nyọka da ikpehika ụbwọ ịnyịnyị mẹ.

²⁹Anụ myị ká ẹla onyobyi oyaya ọhẹ-lọhẹ á bwu ọnụ nyanụ kpong-kpong kokoo! Ma, ọkọkọ nya ọọwa lẹ, ụma nya ẹla ọnyịịla ọlẹ kọ ka juwa kpa angịkịla wule kịlahị-ịlahị ẹ-ẹpwụ nya ọmyịmyị ọlala nyaa jaabwọ kọ chịla pwoku lụka ọọwa kem, anụ ka juwa ya lẹlẹ. Chajị ká ẹla ọọwa ka jẹ́-ẹ ri ang o-ju apyobwuna ha angị wowo kem mẹ.

³⁰Anụ họ ang ọlẹ kọ ka hi Olegu Ịgọgọ nya Ohe Oluhye ọnụ ka! Chajị Olegu Ịgọgọ nya Ohe Oluhye ọwẹ, Ohe Oluhye a kpa junu ẹjẹẹ ha ịlọmwụ nọ gbe ẹnụtụrụ ọlẹ ká Ohe Oluhye ka kpanụ kaka wu achinege nya ọchịda nyamwụ ọlẹ kọ ya hanụ ọyị ịnyịlẹhị lẹlẹ.

³¹Lẹ, anụ́-ụ juwa cheji ba ọkịlẹtụ ujujwo ọlala wuu bala agbama ojuju wuu bala ikẹjẹ-awụrụ ọwụwụ wuu bala ẹla ọhwọọhwọọ oyaya wuu bala ẹla onyobyi oyaya juwa kpa bịrị ọngọkịla wuu mẹ. Awụlẹ ọ-wụ ẹjẹ ọhẹ-lọhẹ a ji ẹpwarịrị nyanụ kpong-kpong kaka ịnyịnyị.

³²Ma, ọkọkọ nya ọọwa lẹ, anụ́-ụ juwa la ọkịlẹtụ nya ọnahị bala ahyẹẹrwẹrwa ẹ-ẹga nya awụlẹ mẹ. Kanụ juwa hịnyọhi ọhọbịrị nya awụlẹ wuu ha awụlẹ, jaabwọ ká Ohe Oluhye ayịdang hịnyọhi ịhọbịrị nyanụ wuu hanụ wẹ chajị nya ịKịrayịsị ịnyịnyị mẹ.