Read idege ALA EFESỌSỊ 5 Bible Online

ALA EFESỌSỊ 5 - idege bible

ALA EFESỌSỊ 5

¹Jaabwọ kaanụ wuu ri anyị nya Ohe Oluhye ịlẹ kanụ họ́ọ lụmẹ wẹ lẹlẹ, ọ chịla kanụ ka juwa gbịla Ohe Oluhye ẹ-ẹpwụ nya ang myị́ ang ọhọhọ nyanụ wuu lẹ.

²Ọ myịmyị chịla kanụ ka la ọhịhị nya ọháha ọlala nya ịlẹhị-ịlẹhị, jaabwọ ká ịKịrayịsị ayịdang la ọháha ọtụka ẹ-ẹga nyahị ahị lụmẹ gbee kọ hu ịlọmwụ kaka gbu wọnụ nyahị ju ọlẹ kọ ri ọhaha ochoru kwọkwọ bala iya ọkịlaakịla ị-ịlahị nya Ohe Oluhye.

³Ma, lẹẹlẹẹ lẹ, anụ dọmwụ myị kanụ juwa kpa ẹlẹlẹ nyanụ ya ẹlẹlẹhẹ rụ́ ụya ọhọhọ lee oja onyobyi ojaja rụ́ abwẹla ịlẹ kị chịrị ị-ịlahị nya Ohe Oluhye kaka lee o-juwa ja oja rụ́ ẹhị ọ-chị nyanya nya ang nya angịnyị angịkịla kpong-kpong kaka ịnyịnyị. Chajị, ọ́ chịla ká angịnyị nya Ohe Oluhye ka myịmyị-ị̀ juwa họ ụma nya ang ịlịịwẹ tụtụm kaka.

⁴Ọ́ chịla kanụ ka juwa kpa ọnụ nyanụ ya ụma nya ẹlẹlẹhẹ ọlẹ kọ chịrị lee ẹla-uchi oyaya lee ọngịnyị ọ-kpa hu utungguru la ẹlẹlẹ kpong-kpong ka. Chajị, ụma nya ang ịlịịwẹ á chịla hanụ anụ angịnyị nya Ohe Oluhye ka. Ma, ọkọkọ nya ọọwa lẹ, anụ myị ká obe o-juwa ji Ohe Oluhye ji kem, a juwa ẹ-ẹpwarịrị nyanụ mẹ.

⁵Anụ wo myịmyị mẹ! Ọngọngọhẹ ọlẹ kọ juwa họ ụya lee o-juwa chị ọhịhị nya ịlọmwụ ịrị ẹ-ẹga nya anyang bala alẹng lee o-ri ọngọ juwa chẹhị nyanya nya ang nya angị ịkịla ka. Ọlịnyị kaa kpa ọngịnyị kaka gbịgba ha ang-abwọ ịịwa lala ohe ojiga nyamwụ. Ọngọ ọlịnyị á tị ka jẹ́-ẹ la ugu nya ịpyị Adịrahụ nya ịKịrayịsị bala ịnya Ohe Oluhye kpong-kpong kaka.

⁶Anụ myị ká ọngọngọhẹ a juwa kpa ẹla o-ju apyobwuna-ka ọhẹ-lọhẹ hụnụ ahị koo! Chajị u-uhye nya ang i-hi deeji ịlịnyị wuu a du ká agbama ọtụka nya Ohe Oluhye juwa ka wuru jahị da angịlẹ wuu kị ri angị kaa ju ihi nya Ohe Oluhye kpong-kpong ka pyii lẹlẹ.

⁷Chajị nya ọọwa lẹ, anụ myị kaanụ bala angịnyị inyibyi ịlịnyị ọhẹ-lọhẹ a juwa bá ịngịngịhyẹ bá họ lawụlẹ kokoo!

⁸Chajị, ene-ene lẹ, ịnọ, anụ ayịdang juwa ẹ-ẹpwụ nya ukpowu okpem-kpem nya ọhọbịrị ọhọhọ. Ma, lẹẹlẹẹ lẹ, anụ tị ri angịnyị nya ahịgboo nya abwẹla ọnyịịla nya Ohe Oluhye bwula Ọngọlahị la lẹ. Chajị nya ọọwa lẹ, anụ́-ụ juwa jẹdịyẹ ẹ-ẹpwụ nya ahịgboo nya ịKịrayịsị ọọwa mẹ.

⁹Chajị, ọngịnyị ọnyịịla oriri bala abwẹla ọnyịịla ọlala bala ẹla nya ịlẹhị nya Ohe Oluhye ọlala jịra wuu a ri ugbe ọnwụnwụ nya ahịgboo nya Ohe Oluhye ọọwa lẹ.

¹⁰Anụ́-ụ juwa maga nya ịlẹhị-ịlẹhị, chajị kanụ ka jẹ́-ẹ jẹ́ ụma nya ang ọlẹ kọ kaa kpụ Ọngọlahị ịpyọ yẹẹyẹẹ kem mẹ.

¹¹Anụ myị kanụ kpa ụbwọ nyanụ kaka ju ụkụrwọ nya ukpowu nya ọhọbịrị ọhọhọ kaka, chajị, í ju apyobwuna ọhẹ-lọhẹ ka. Ma, ọkọkọ nya ọọwa lẹ, anụ́-ụ juwa chị ịhọbịrị ịlịnyị ehe a-ahịgboo mẹ.

¹²Chajị, ọ dọmwụ ka ri ang oloyoyi hahị, kọ ri kaahị angịnyị nya Ohe Oluhye á dọmwụ ka juwa ya ẹla rụ́ abwẹla inyibyi ịlẹ ká alọhọbịrị ịwẹ kaa juwa họ ị-ịbaa-ịbaa.

¹³Ma, ang myị́ ang ọlẹ kị tị ya chị ehe a-ahịgboo lẹ aalẹ, ị́ kaa dayi la ọ-jẹ́ ụma nya ang ọlẹ ká ang ọlịnyị ri gede-gede kaka. Chajị, ang myị́ ang ọlẹ kọ kaa chị ang ọkpịbaa ehe, a ri ahịgboo lẹlẹ.

¹⁴Ịnyị a du kị ya lẹẹ ẹ-ẹgẹlẹ yẹkẹẹ, “Oo! Ahụ o-nune bala ọngọ gbugbu ẹ-ẹpwụ nya ọhọbịrị, wuleji ká chị ahị bwula igu, chajị, ká ịKịrayịsị á hu ahịgboo nyamwụ hang mẹ.”

¹⁵Chajị nya ọọwa lẹ, anụ juwa kpahị ju ịlọnụ ọgwọgụ mẹ. Kanụ juwa hịhị lala aluchi kaka. Ma, kanụ juwa hịhị lala angị jẹ́ ẹla ị-ịlahị nya Ohe Oluhye mẹ.

¹⁶Kanụ juwa kpa ụka myị́ ụka ọlẹ kanụ la họ ụkụrwọ ọnyịịla kem mẹ. Chajị, ụka nya ichẹnẹ ọlẹ ri ụka onyobyi lụmẹ.

¹⁷Chajị nya ọọwa lẹ, anụ myị kanụ ri aluchi kokoo! Ma, anụ juwa maga chajị kanụ ka jẹ́-ẹ jẹ́ ang ọlẹ ká irya nya Ọngọlahị ri kpangga mẹ.

¹⁸Ānụ nwa ere ya ka, chajị ọlịnyị ka kpa ọhịhị nyanụ kaka ta ayịreji. Ọkọkọ nya ọọwa lẹ, anụ́-ụ myị ká Olegu Ịgọgọ ā myị̀ ọhịhị nyanụ ụka wuu mẹ.

¹⁹Anụ juwa kpa ẹla i-bwu ẹpwụ nya Eje Ọnyịịla bala i-bwu ẹpwụ nya eje nya ogbo ogwogwo ha Ohe Oluhye bala eje ịgọgọ ya ẹla ta awụlẹ. Anụ mwu eje gwogbo ha Ọngọlahị bwu ọkịlẹtụ nyanụ wuu mẹ.

²⁰Ẹ-ẹpwụ nya ang myị́ ang wuu, anụ́-ụ juwa ji Ohe Oluhye Adịda obe bwula ẹnyị nya Ọngọlahị iJisọsị ịKịrayịsị ụka wuu mẹ!

²¹Anụ́-ụ juwa kpa ịlọnụ keji ha awụlẹ ẹ-ẹpwụ nya ang myị́ ang wuu ọọ-la uhi ojuju nya ịKịrayịsị mẹ.

²²Anụ anyang ịhụ ee, anụ́-ụ juwa kpa ịlọnụ keji ha ọrụnụ anyị jaabwọ kanụ kaa kpa ịlọnụ keji ha Ọngọlahị ayịdang mẹ!

²³Chajị ọrụ-ahụ a ri olegbeju nya ahụ nyamwụ ẹ-ẹpwụ nya ang myị́ ang wuu, jaabwọ ká ịKịrayịsị ayịdang ri olegbeju nya ịchọọchị nya Ohe Oluhye ọlẹ kọ ri ugbinyịrọ nya ịKịrayịsị lẹ. ỊKịrayịsị a tị myịmyị ri Ọngọchịda nya ala ịchọọchị wuu lẹ.

²⁴Lẹ, jaabwọ ká ala ịchọọchị wuu kaa kpa ịlaa ka ekpeleji nya ịKịrayịsị wẹẹ, ịnyịnyị, ọ tịtị chịla ká anyang ịhụ wuu ka juwa kpa ịlaa ka ekpeleji nya ọrụ nyaa ẹ-ẹpwụ nya ang myị́ ang wuu lẹlẹ.

²⁵Anụ ịrụ-ịhụ ee, anụ́-ụ myị ká ịhụ nyanụ anyị a juwa háanụ nya ịlẹhị-ịlẹhị jaabwọ ká ala ịchọọchị wuu há ịKịrayịsị lụmẹ gbee, kọ hu ịlọmwụ kaka gbu wọnụ nyaa wuu ju mẹ.

²⁶ỊKịrayịsị họ ịnyị, chajị kọ ka jẹ́-ẹ bwula ọọwa chị ịgọgọ ju ala ịchọọchị nyamwụ ha Ohe Oluhye bwula ọlẹ kọ kpa enyi bala ẹla nya Ohe Oluhye hwaa cheri-cheri lẹ.

²⁷ỊKịrayịsị họ ịnyị chajị kọ ka jẹ́-ẹ nwụla ala ịchọọchị nyamwụ nọ gbe ịlọmwụ yẹẹyẹẹ lala ahụ onyeewe ọlẹ ká ụhị ọháha nyamwụ juwa kaa hụ́ myịrị-myịrị. Chajị ká ịchọọchị nyamwụ ọọwa á ka da ukpuru ọhẹ-lọhẹ ka lee o-wu eku ka lee ọ-rụ egbina ọhẹ-lọhẹ ọlịnyị kpong-kpong kaka. Chajị ká ịchọọchị ọọwa ka jẹ́-ẹ la ịgọgọ bala ọ-da ukpuru onyobyi ọhẹ-lọhẹ tụtụm kaka.

²⁸Ịnyịnyị, ọ chịla ká ọrụ-ahụ ọnyị myị ọnyị lẹpwarịrị nyanụ tịtị kaa la ọháha nya ịlẹhị-ịlẹhị ẹ-ẹga nya ahụ nyamwụ, jaabwọ kọ ka la ọháha u-uhye nya ugbinyịrọ nya ịlọmwụ ọwa ayịdang lẹlẹ. Ọngọlẹ kọ la ọháha ọlịnyị ẹ-ẹga nya ahụ nyamwụ lẹ aalẹ, u-uhye nya ịlọmwụ ọwa ayịdang a wẹ, kọ wẹẹ la ọháha ọọwa ịnyịnyị lẹlẹ.

²⁹Chajị, ọngọngọhẹ á juwa ọlẹ ká ugbinyịrọ nya ịlọmwụ wọọ ọwa ayịdang ẹjẹ ẹnẹnẹhẹ lẹka. Ma, ọkọkọ nya ọọwa lẹ, ọ kaa juwa ya ang oriri ha ịlọmwụ ri bala o-juwa kaa kpahị ju ịlọmwụ hiigu-hiigu ụka wuu ịnyịnyị.

³⁰ỊKịrayịsị kaa họ ịnyịnyị hahị, chajị, ahị ala ịchọọchị a ri ẹga nya ugbinyịrọ la datị-datị nya ịKịrayịsị lẹ.

³¹Chajị, Ụpwụ Ịgọgọ yẹkẹẹ, “Chajị nyọlẹ a du ká ọlẹng ọnyị myị ọnyị ka tụụbwọ hi adamwụ bala ịnamwụ kaka ye ahụ nya ụbwọ nya ịlọmwụ, kọọwa bala ahụ nyamwụ angị imimiiye ịịwa ka yẹ ri ọngọ ookpokpo lẹlẹ.”

³²Ẹla ọkpịbaa ọlẹ kị ya wẹ ẹgẹwẹ lẹ, ọ la kpori-kpori lụmẹ. M jam da ẹla ọọwa wụlẹ ya jenu yẹkẹẹ, ẹla ọọwa juwa me ịchọọchị ụchụ lala ahụ nya ịKịrayịsị lẹ.

³³Ma, ẹlẹwẹ juwa ya ẹla tanụ anụ ahụ bala ọrụ ịnyịnyị. Lẹ, ọng myị́ ọng lẹpwụ nyanụ a juwa la ọháha ẹ-ẹga nya ahụ nyamwụ lala ịlọmwụ mẹ. Ká ahụ a tị, tịtị juwa ju ọrụ nyamwụ ihi hiigu-hiigu ụka wuu ịnyịnyị mẹ.