Read idege ALA EFESỌSỊ 6 Bible Online

ALA EFESỌSỊ 6 - idege bible

ALA EFESỌSỊ 6

¹Anụ anyị anjwo ichiche ee, anụ́-ụ juwa ju adanụ bala ịnanụ anyị ihi hiigu-hiigu bwula ọngịrị nya Ọngọlahị la mẹ. Chajị, ọọwa a ri ang ọchịla-chịla ị-ịlahị nya Ohe Oluhye lẹ.

²Chajị, ehile nya ọgbanyẹ-ọgbanyẹ ọlẹ ká Ohe Oluhye da angịnyị ehe kọ ya ọnụ ọmyịmyị bọ́ọ ẹ-ẹgọ haa ri yẹkẹẹ, “Anụ ju adanụ bala ịnanụ anyị ihi mẹ.

³Chajị ká ang myị́ ang nyanụ wuu ka jẹ́-ẹ ri ahị ọwawa hanụ mẹ. Chajị kanụ ka myịmyị jẹ́-ẹ ri ehe tata ẹ-ẹpwụ nya odehe ọlẹ ịnyịnyị mẹ.”

⁴Anụ adịda ị-ma anyị ee, anụ juwa du agbama ju anyị nyanụ kpong-kpong ka. Ma, ọkọkọ nya ọọwa lẹ, anụ́-ụ juwa kpa anyị nyanụ nwa ẹ-ẹpwụ nya ẹla nya Ohe Oluhye la ụgbẹyị ọlẹ kọ ka pwoku ọ-nwụ rịrị bala ọmẹjẹ nya Ọngọlahị la ayịdang mẹ.

⁵Anụ anchẹ ee, anụ́-ụ juwa ju ihi nya ayịbaba nyanụ anyị ilodehe ọlẹ yẹẹyẹẹ, ẹ-ẹpwụ nya ọ-hụ́ kpákpakpa bala uhi ojuju la ọkịlẹtụ ookpokpo wuu lala o-ri yẹkẹẹ, ịKịrayịsị ayịdang, anụ nyaa wẹẹ myị ẹrụ ha lẹlẹ, mẹ.

⁶Ma, ị-ịnya, ọ tị ka juwa myị ẹrụ ọọwa i-ijata nya ayịbaba nyanụ anyị kem, chajị kịịwa angịnyị ehe ka juwa wahị ọnyịịla hanụ ka. Ma, ọkọkọ nya ọọwa lẹ, anụ́-ụ juwa myị ẹrụ ọọwa lala angị ri anchẹ nya ịKịrayịsị ayịdang ịlẹ kanụ juwa họ irya nya Ohe Oluhye bwu ẹpwụ ọkịlẹtụ nyanụ wuu mẹ.

⁷Kanụ juwa myị ẹrụ ọọwa wuu la ọkpịra-kpịra ọlala ha ayịbanụ anyị lala o-ri yẹkẹẹ, Ọngọlahị iJisọsị ayịdang, anụ nyaa wẹẹ myị ẹrụ, hi angịnyị ehe da lẹlẹ mẹ.

⁸Chajị, anụ tị́ jẹ́ yẹkẹẹ, ó riri kahị ri ọnyọhị riri lee o-ri ọnyọhị-ka aalẹ, ang myị́ ang ọnyịịla ọlẹ ká ọng myị́ ọng á họ odehe ọlẹ aalẹ, uri nya ang ọọwa pyii, ọngọọwa a ka ye bwu ụbwọ nya Ọngọlahị la lẹlẹ.

⁹Anụ ayịbaba ee, anụ́-ụ juwa kpahị ju anchẹ ilekpeleji nyanụ yẹẹyẹẹ ịnyịnyị mẹ. Anụ myị ká akama ọ-ka yẹ anchẹ nyanụ yẹ, a mwọọgịlẹ ri ododo ọ-kpa jwaa uhi-uhi kem nyanụ ka. Kanụ kpịtịya ịnyịnyị mẹ! Ọngọlẹ kọ ri Ayịbaba nyanụ anụ bala anchẹ nyanụ ịịwa wuu juwa e-epwoohe! Oku nya ẹla ọchịchị hiigu ha ọngọhẹ datị, hi ọngọkịla á tị juwa ẹ-ẹga nyamwụ ọwa kpong-kpong kaka.

¹⁰Anụ anyadam, ẹla otuku nyam ri, anụ́-ụ myị kanụ juwa la gogo ẹ-ẹpwụ nya Ọngọlahị la, kanụ juwa nwanwa kịlahị-ịlahị ẹ-ẹpwụ nya ọngịrị ọtụka nya ụmụmẹ nyamwụ ịnyịnyị mẹ.

¹¹Kanụ go ang-abwọ nya agidi nya ẹwụ ọdada nya Ohe Oluhye wuu kụrụ ịlọnụ mẹ. Chajị kanụ ka jẹ́-ẹ bwula ọọwa godayị rịrị giri-giri, jẹ́ juwa tụ ijẹẹhị nya Ohe Onyobyi wuu pyịpyị myị́ mẹ.

¹²Chajị, ẹwụ ọdada nyahị ọlẹ kahị lẹẹ da lẹ, áhị́ jam dọọ tụ ịwọ bala ugbinyịrọ ọhẹ-lọhẹ pyịpyị ka. Ma, angịlẹ kahị jam dẹwụ ọọwa tụ pyịpyị ri alegu inyibyi ịnyịịngịrị bala alegbeju igbeji ịtụka nyaa wuu bala ọ-dẹwụ tụ alegu inyibyi ịlẹ kị ri alegbeju ịkpẹhị rịrị ukpowu nya odehe nya ọhọbịrị ọhọhọ wuu pyịpyị. Ahị myịmyị jam dẹwụ tụ alegu inyibyi ịnyị myị́ ịnyị pyịpyị ịlẹ wuu kị ji iwe-ahụrụ oluhye wuu, juwa họ ụkụrwọ nya egbeju ọnyọọngịrị ọlala ẹ-ẹga nya Ohe Oluhye ịnyịnyị.

¹³Chajị nya ọọwa lẹ, anụ́-ụ go ang-abwọ ị-kpa dẹwụ nya Ohe Oluhye wuu kpa ụ-ụbwọ nyanụ giri-giri mẹ. Chajị kanụ ka jẹ́-ẹ bwula ọọwa godayị rịrị kpakpakpa myị́ ẹ-ẹpwụ nya oyi onyobyi ọlẹ mẹ. Chajị, ụka kanụ dẹwụ ọọwa kpá lẹ, kanụ ka jẹ́-ẹ ri angị kụrụ-kụrụ mẹ.

¹⁴Chajị nya ọọwa lẹ, anụ godayị rịrị ụ-ụwa giri-giri mẹ. Kanụ hu ẹla nya ịlẹhị ọhọhọ nyanụ chị ọhị gbanggbang lala ugba ọchọhị nyanụ mẹ. Kanụ juwa kpa abwẹla ọnyịịla ọhọhọ nyanụ ke ịlọnụ lala ọkụmada ọkụrụ ọkịlẹtụ nyanụ mẹ.

¹⁵Ká ẹrụ ọnyịịla nya okpunyi ọlẹ ọ-kpa ya pyẹ nyanụ a ku ọmwakpa nya ugbẹtẹ o-ju ẹta nyanụ mẹ.

¹⁶Ọ́ ba ang-abwọ nya ẹwụ ịwẹ kem ka. Ma, anụ́-ụ myị ká ọmyịmyị ọlala nyanụ ọlẹga nya Ohe Oluhye a ku ọmwakpa nya ọkụmada ọ-kpa ụ-ụbwọ nyanụ ịnyịnyị mẹ. Chajị kanụ ka jẹ́-ẹ juwa kpa ọmyịmyị ọlala nyanụ ọọwa tụ ịnmọ ilila-lila nya ịmayẹ inyibyi nya Ohe Onyobyi kịnyaa hi ịlọnụ ụka wuu myị́ mẹ.

¹⁷Anụ myị ká ọchịda nya ugbodu okpukpuru nyanụ ọwẹ a ri ang o-juwa keenu ke lala okpo o-ke egbeju nya ẹwụ mẹ. Ká ẹla nya Ohe Oluhye ọlẹpwụ nyanụ a ri oge ọ-kpa dẹwụ nyanụ bwula ọngịrị nya Olegu Ịgọgọ mẹ.

¹⁸Kanụ juwa raabwọ ha Ohe Oluhye ẹ-ẹpwụ nya Olegu Ịgọgọ ụka wuu. Kanụ juwa kpa abwọ ọrịrị ọnyị myị ọnyị wuu bala ọbịlẹ-bịlẹ nyanụ kịlahị nya Ohe Oluhye mẹ. Anụ́-ụ juwa la ẹhị ọkpịra-kpịra ẹ-ẹpwụ nya eji ogbegbe la abwọ ọrịrị, kanụ juwa bịlẹ Ohe Oluhye nya ịlẹhị-ịlẹhị chajị nya angị ịgọgọ ịkịla wuu ịnyịnyị mẹ.

¹⁹Anụ́-ụ juwa bịlẹ chajị nyam am ịPọlụ ịnyịnyị, chajị ká Ohe Oluhye ka hu ẹla oyaya myị́ ham, chajị ụka kam ka pyẹ ọnụ nyam maa, juwa ya ẹla nya Ohe Oluhye rụ́ ẹrụ ọnyịịla ọkpịbaa ọlẹ lẹ, kam ka jẹ́-ẹ juwa ya ẹla ọọwa la ọngịrị-ọngịrị myị́ mẹ.

²⁰Chajị, ẹrụ ọnyịịla ọọwa, m ri ọngọ ku ọmwakpa nyamwụ lẹẹ ẹ-ẹpwụ nya ọlagba ọlẹ kam ri lẹ. Lẹ, anụ́-ụ bịlẹ chajị kam ka jẹ́-ẹ juwa ya ẹrụ ọnyịịla la ọngịrị-ọngịrị myị́, jaabwọ kọ chịla kam ka ya kaka ba mẹ.

²¹Lẹẹlẹẹ, m jam du iTikikọsị ọlẹ kọ ri ọnyadahị ọ-hám há ẹ-ẹpwụ nya ịKịrayịsị bala o-ri ọngọ myị ẹrụ ọ-chị la o-hu ọkịlẹtụ ha ẹ-ẹpwụ nya Ọngọlahị la ẹrụ warị wẹ ẹga nyanụ kọ ka ya ang myị́ ang ọlẹga nyahị wuu jenu lẹ.

²²Ang odudu kam lẹẹ doo ẹrụ warị wẹ ẹga nyanụ ri, chajị kọ ka warị kaka ya iwe-ahụrụ ọlẹga nyahị jenu bala ọ-ka jẹ́-ẹ junu anụ ayịdang ọhụ ẹ-ẹpwụ ọkịlẹtụ nyanụ ịnyịnyị.

²³Ká okpunyi bala ọháha bala ọmyịmyị ọlala o-bwu ẹga nya Ohe Oluhye Adịda bala ẹga nya Ọngọlahị iJisọsị ịKịrayịsị a juwa hanụ anụ anyadahị ẹ-ẹpwụ nya ịKịrayịsị wuu mẹ.

²⁴Ká ọnahị nya Ohe Oluhye a juwa hanụ anụ angịlẹ wuu kanụ wẹẹ la ọháha ọlẹ kọ kaa gbu-enyi kaka, ẹ-ẹga nya Ọngọlahị iJisọsị ịKịrayịsị wuu mẹ.