Read idege ALA IFILIPAYỊ 1 Bible Online

ALA IFILIPAYỊ 1 - idege bible

ALA IFILIPAYỊ 1

¹Ụpwụ ọlẹ jam bwu ẹga nyam am ịPọlụ bala iTimoti, ahị angị ri anchẹ nya ịKịrayịsị iJisọsị. Ahị jam dọọ du wanụ anụ angịnyị nya ịKịrayịsị iJisọsị ịlẹ kanụ juwa ọ-ọpyị nya iFilipayị bala angịgbikpịlọ nya Ohe Oluhye ịlụwa bala angị daa ụbwọ ẹ-ẹpwụ nya ụkụrwọ nya ịchọọchị.

²Ká ọnahị bala okpunyi nya Ohe Oluhye Adahị bala ịnya Ọngọlahị iJisọsị ịKịrayịsị a juwa tanụ mẹ.

³M kaa kpịtịya nyanụ ẹ-ẹpwụ nya abwọ ọrịrị ụka myị́ ụka wuu, juwa ji Ohe Oluhye nyam obe chajị nyanụ.

⁴Abwọ myị́ abwọ ọlẹ kam kaa rị ha Ohe Oluhye ụka wuu lẹ, m kaa raabwọ ọọwa la ọkẹkẹnị, juwa kpịtịya nyanụ ịnyịnyịịnyị.

⁵M kaa ji Ohe Oluhye obe lụmẹ chajị nyanụ o-oluhye nyọlẹ kanụ ri angị da ụbwọ ẹ-ẹpwụ nya ụkụrwọ nya ẹrụ ọnyịịla o-ya pyẹ ọlẹ, bwu ụka ọlẹ kanụ wo ẹla ọọwa la ẹnụ nya ọgbanyẹ-ọgbanyẹ pyịyọọ da warị wẹ ọlẹẹlẹẹ.

⁶M jẹ́ myịmyị yẹkẹẹ, Ohe Oluhye ayịdang ọlẹ kọ dọmwụ nya ụkụrwọ ọnyịịla ọọwa ẹ-ẹpwụ nya ọhịhị nyanụ lẹ, Ọ́ ka dayị la ọ-kpa ụkụrwọ ọọwa ka ịlahị gbee, da ka ọ-chị eju nyamwụ la ẹnụtụrụ ohyẹẹkpẹ nya iJisọsị ịKịrayịsị kaka.

⁷Ịnyị, ọ tị chịla kam ka juwa me irya chajị nyanụ lẹ. Chajị, anụ ayịdang jam ẹ-ẹpwụ nya ọkịlẹtụ nyam lụmẹ o-oluhye nyọlẹ kanụ kaa godayị rịrị tam ẹ-ẹpwụ nya iwe-ahụrụ ọnyị myị ọnyị wuu ọlẹpwụ nya ẹrụ ọnyịịla ọmyịmyị nya Ohe Oluhye ọlẹ kọ ya ham. Ụka kam juwa ẹ-ẹpwụ nya ube nya agba jiji lee ụka ọlẹ kam juwa kpa ẹla nya ịlẹhị oyaya, juwa da ẹrụ ọnyịịla ọlẹ wụlẹ lee o-juwa ya ẹrụ ọnyịịla ọlẹ pyẹ dodehe, anụ kaa ji ẹkpẹ nyam giri-giri hiigu-hiigu.

⁸Chajị, Ohe Oluhye la ịlọmwụ ri ibeenu nyam yẹkẹẹ, ọháha ọgẹnẹ-gẹnẹ nya ịKịrayịsị iJisọsị, am nyaa kaa kpa wu iwoo nyanụ ụka wuu ịnyịlẹhị lẹ.

⁹Abwọ ọrịrị nyam chajị nyanụ tị ri, ká Ohe Oluhye ka họ ká ọháha ọlala ọlẹpwụ nyanụ ka juwa nwa lụmẹ ka ịlahị-ịlahị, kanụ ka la ẹla ọjẹ́jẹ nyamwụ bala ọ-ka la ọngịrị ọ-kpa gu ẹla ene hi awụlẹ datị ẹ-ẹpwụ ọkịlẹtụ nyanụ yẹẹyẹẹ.

¹⁰Chajị, ká ọọwa ka họ kanụ ka jẹ́-ẹ chụ ang ọlẹ kọ chịla-chịla gụgụ wuu ị-ịlahị nya Ohe Oluhye ụka wuu myị́. Ọọwa lẹ, anụ ka la charị-charị ị-ịlahị nya Ohe Oluhye bala ọ-la abyị ọhẹ-lọhẹ kaka, gbee pwụ ẹnụtụrụ ohyẹẹkpẹ nya ịKịrayịsị ọlẹ kọ juwa warị lẹlẹ.

¹¹Ịnyị lẹ, ọhịhị nyanụ a ka juwa nwụ́ ugbe nya abwẹla ọnyịịla nya Ohe Oluhye ịnyịnyịịnyị, bwula iJisọsị ịKịrayịsị, chajị ká ọọwa ka chị ẹbyẹbyị nya Ohe Oluhye ehe, du ká angịnyị ka juwa gwogbo họọ lẹlẹ.

¹²M tịtọ kaanụ anyadam ẹ-ẹpwụ nya ịKịrayịsị ka jẹ́ yẹkẹẹ, ang ịlẹ kị họ wẹ ẹ-ẹga nyam wuu lẹ, ị họ chajị ká ọọwa ka da ẹrụ ọnyịịla ọlẹ ụbwọ nya ọpyẹpyẹ ka ịlahị-ịlahị gụ olene-ene lẹ!

¹³Chajị, agba ojuju nyam ọlẹ họ ká alọdọdẹpwa nya adịrahụ ọlẹgẹlẹ bala iru nya angịnyị ịkịla wuu ri ibeenu yẹkẹẹ, ajị nya ẹrụ ọnyịịla ọlẹ ọ-kpa ya pyẹ nyam lala ọnchẹ nya ịKịrayịsị kpangga nyaa du kịị nyị jum agba lẹẹ ẹ-ẹgẹlẹ lẹlẹ.

¹⁴Iru nya anyadahị ẹ-ẹpwụ nya ịKịrayịsị ịlẹgẹlẹ ịhyẹ jam ọlẹ ká agba ojuju nyam ọlẹ a ri ang ọlẹ kọ họ kị juwa dahịhile Ọngọlahị la nya ịlẹhị-ịlẹhị myị́, du kị jam ya ẹrụ ọnyịịla nya Ohe Oluhye pyẹ la uhi ojuju kaka, gụ olene-ene lẹ.

¹⁵Ọ ri nya ịlẹhị, angịhyẹ lẹpwụ nya angịịwa juwa ya ẹrụ ọnyịịla nya ịKịrayịsị dodehe bwula ọkịlẹtụ nya ijiiji onyobyi ọlala bala olegu nya ụpwụ ọdada. Ma, angịkịla tị juwa kpa irya ọgbagbịla ya ẹrụ ọnyịịla ọọwa pyẹ.

¹⁶Angịlẹ kị juwa ya la irya ọgbagbịla lẹ, ị juwa kpa ọháha ọlala myị ẹrụ ọọwa, chajị, ị jẹ́ yẹkẹẹ, ajị nyọlẹ kaam nyị jam dẹwụ ju ẹrụ ọnyịịla nya ịKịrayịsị ọlẹ kpangga nyaa du kaam nyị jam u-ube nya agba ọlẹ ịnyịlẹhị lẹ.

¹⁷Angị ịkịla ịlẹ kị juwa kpa irya nya ijiiji onyobyi ya ẹrụ ọnyịịla nya ịKịrayịsị pyẹ lẹ, ị juwa kpa irya nya ụpwụ ọdada họ ụkụrwọ ọọwa nya ang ojuju kem. Ịwa lẹ, í juwa kpa irya ọgbagbịla họ ụkụrwọ ọọwa ka. Ma, ị juwa maga nyọka họm jụm ẹ-ẹpwụ nya ube nya agba ọlẹ kam ji kem.

¹⁸Ma, ọọwa wuu á tị rim ẹlẹlẹhẹ ka. Ọkẹnẹ-kẹnẹ ri yẹkẹẹ, ó ri ịnya ọ-da ịbịla-ịbịla kụrụ ahị wẹwẹ lee ịnya ẹla nya ịlẹhị wẹwẹ aalẹ, ị tị́ wẹẹ kpa ẹrụ ọnyịịla nya ịKịrayịsị ya pyẹ lẹlẹ, ọọwa a ri ọkẹkẹnị ọtụka nyam lẹlẹ.

¹⁹Ee, m juwa chị ọkẹkẹnị nya ịlẹhị-ịlẹhị. Chajị, m jẹ́ yẹkẹẹ, bwula ọngịrị nya abwọ ọrịrị nyanụ bala ụbwọ ọdada nya Olegu Ịgọgọ nya iJisọsị ịKịrayịsị lẹ, o-ya dodehe nya ang ịlẹ wuu ka ri ọ-gba kpehe nyam bwu ẹpwụ nya akama myị́.

²⁰Chajị, ọ ri irya nyam nya ịlẹhị-ịlẹhị bala ẹhị ọrịrịị-rịrị nyam yẹkẹẹ, oyoyi, á ka jum kpong-kpong ka. Ma, ọkọkọ nya ọọwa lẹ, m la ẹhị ọ-da hile yẹkẹẹ, jaabwọ kọ kaa la ene-ene lẹ, m ka juwa kpa ugbinyịrọ nyam ọlẹ họ ang ọlẹ kọ ka ya ogbo ha ịKịrayịsị pyii lẹ. Ó ri ọhịhị ri lee igu ogbugbu riri aalẹ, ịnyị, m ka juwa họ pyịyọọ lẹlẹ.

²¹Chajị, am lẹ, ịKịrayịsị ayịdang a ri ọhịhị nyam lẹlẹ. Igu ogbugbu nyam tị ka ri ang nya apyobwuna ọtụka ham ị-ịlahị nya ịKịrayịsị ọọwa ịnyịnyị.

²²Ma, ó tị ri kọọ ka jam la ọhịhị nya ugbinyịrọ nyam ọlẹ wẹẹ, á ka ri ang ọ-ka họ ká ụkụrwọ nyam á ka nwụ́ ugbe gụ ọọwa-ọọwa wẹẹ tụbwọ aalẹ, igu ọ-ka gbugbu bala ọhịhị lẹ, ḿ tị tị jẹ́ ọlẹ kam ka ka chụ datị hi ọkịla kaka.

²³Chajị, ọlẹẹlẹẹ lẹ, am ayịdang jam chị ọkịlẹtụ agiye ẹ-ẹga nya igu ọ-ka gbugbu bala ọ-ka myịmyị-ị̀ jam la ọhịhị nya ugbinyịrọ ọlẹ wẹẹ. Chajị, ịnọ, iwoo nya igu ọ-ka gbugbu chajị kam ka jẹ́-ẹ rụ kaka hụ ta ịKịrayịsị juwa wum, chajị ọọwa a ju apyobwuna ham am ayịdang gụ lẹ.

²⁴Ma, am, ọ tị ka hi jam la ọhịhị ẹ-ẹpwụ nya ugbinyịrọ ọlẹ tị baba hanụ anụ gụ, chajị kam ka jẹ́-ẹ juwa myị ẹrụ hanụ wẹẹ.

²⁵Chajị nya ọọwa lẹ, m jẹ́ yẹkẹẹ, m jam ka hi la ọhịhị tanụ ka ịlahị nyọka juwa danụ ụbwọ chajị kanụ ka jẹ́-ẹ juwa nwa ka ịlahị-ịlahị ẹ-ẹpwụ nya ọkẹkẹnị nya Ohe Oluhye ọlala bala ọmyịmyị ọlala nyanụ wuu lẹ.

²⁶Chajị, kanụ ka jẹ́-ẹ ye ang ọtụka-ọtụka ọlẹ kanụ ka juwa gwogbo ha Ohe Oluhye ẹ-ẹpwụ nya ịKịrayịsị iJisọsị bwula ọlẹ kam wẹẹ ka warị wẹ ẹga nyanụ myịmyị mẹ.

²⁷Ọkẹnẹ-kẹnẹ ri yẹkẹẹ, anụ́-ụ myị ká abwẹla ọhọhọ nyanụ ọlẹpwụ nya ọhịhị ọlẹ wuu a ri ang ọlẹ kọ chịla-chịla pwoku ang ọmẹjẹ nya ẹrụ ọnyịịla nya ịKịrayịsị yẹẹyẹẹ mẹ. Chajị, óo riri kam warị wẹwẹ kaka yẹnụ yẹ lee ó riri kam warị wẹwẹ ka, kam ka juwa wo oja ọnyịịla chajị nya ọ-jẹ́ họ hiigu lụmẹ nyanụ bala ogodayị rịrị kpakpakpa nyanụ ẹ-ẹpwụ nya olegu ookpokpo ọlala bala irya ookpokpo ọlẹ kọ ka kpanụ anụ wuu kaka chẹkpẹ ju awụlẹ ẹ-ẹpwụ nya uya ọmama ju ọmyịmyị ọlala nyanụ wuu u-uhye nya ẹrụ ọnyịịla ọlẹ mẹ.

²⁸Anụ juwa ju uhi nya aluji ịlẹ kị juwa tụụnụ pyịpyị ẹ-ẹpwụ nya ịngịngịhyẹ kpong-kpong ka. Chajị, ọ-tụ pyịpyị nyaa ọọwa, a ri ang o-ju ẹjẹẹ yẹkẹẹ, ịwa ayịdang juwa jẹdịyẹ ụ-ụgbẹyị nya ayịreji ọtata lẹlẹ. Ma, ẹ-ẹga nyanụ anụ tị lẹ, ọ-tụ pyịpyị ọọwa a tịtị ri ẹjẹẹ yẹkẹẹ, anụ juwa jẹdịyẹ ụ-ụgbẹyị nya ọchịda ọlẹ kaanụ ayịdang la bwu ẹga nya Ohe Oluhye ịnyịlẹhị lẹlẹ.

²⁹Chajị, ọ ri iwe-ahụrụ ọlẹ ká Ohe Oluhye nwụlanọ gbenu ene-ene yẹkẹẹ, nyị ka ba o-ri yẹkẹẹ, anụ nyị ka ri angị myị la ẹnyị nya ịKịrayịsị ịịwẹ lẹ kem ka. Ma, anụ nyị ka yẹ akama chajị nya ẹnyị nya ịKịrayịsị pyii ịnyịnyị.

³⁰Ọọwa ri yẹkẹẹ, ahị bala anụ anyị a wẹẹ ma uya nya akama ọyẹyẹ ọọwa ta ịKịrayịsị lawụlẹ lẹlẹ. Ụma nya akama ọọwa ọlẹ kanụ kpẹhị nya ịlọnụ yẹ ẹ-ẹga nyam ene-ene wuu bala akama ọlẹ kanụ wẹẹ kpa ụrụ nyanụ wo oja nyamwụ ẹ-ẹga nyam lẹẹlẹẹ, a ri akama ọọwa lẹlẹ.