Read idege ALA IFILIPAYỊ 2 Bible Online

ALA IFILIPAYỊ 2 - idege bible

ALA IFILIPAYỊ 2

¹Chajị nya ọọwa lẹ, ó ri ká ọhịhị onyeewe nya ịKịrayịsị ọlala nyanụ, á hu ọhụ ojuju hanụ juwa lee o-hu ẹjẹ ọkpụ́kpụ ẹ-ẹpwụ nya ọháha ọlala nyanụ juwa lee ó ri ká ọ-họ lawụlẹ nya Olegu Ịgọgọ á juwa lee ọgẹnẹ-gẹnẹ bala ahyẹẹrwẹrwa ọlala ẹ-ẹga nya awụlẹ á juwa hanụ,

²tụbwọ aalẹ, anụ chuchuu, kanụ juwa họ ká ọkẹkẹnị ọchịchị ọtụka nyam ọlẹ a tị tị jịra kpẹẹkpẹẹ bwula o-juwa la irya ọtụchawụlẹ ookpokpo nyanụ bala o-juwa kpa ọkịlẹtụ ookpokpo la ọháha nya ịlẹhị-ịlẹhị nyanụ bala irya bala olegu ookpokpo ọlala nyanụ ụka wuu tịtị mẹ.

³Anụ myị kanụ juwa kpa irya nya ang nya ụbwọ nya ịlọnụ-ịlọnụ kem họ ẹla lee o-juwa kpa ọbọọchẹ nya ọ-jẹ́ lụmẹ nya ịlọnụ họ ịngịngịhyẹ koo. Ma, ọkọkọ nya ọọwa lẹ, anụ́-ụ juwa kpa ịlọnụ keji kanụ juwa wa angịkịla nyanụ nya angị họ hiigu gụ ịlọnụ mẹ.

⁴Anụ myị ká ọngọngọọng lẹpwụ nyanụ a juwa tịtọ nya ịlahị ọkaka nya ịlọmwụ-ịlọmwụ kem ka. Ma, anụ́-ụ juwa tịtọ nya ịlahị ọkaka nya angịnyị aananụ ịkịla ịnyịnyị mẹ.

⁵Irya ọdụmwọ ọlẹ ká ịKịrayịsị iJisọsị ayịdang la lẹ, anụ́-ụ myị ká irya ọlịnyị a ji ẹpwụ nyanụ anụ ịnyịnyị mẹ. Chajị, ị ya ẹla rụ́ ịKịrayịsị ẹ-ẹgẹlẹ yẹkẹẹ,

⁶Ọ ri nya ịlẹhị, ịnọ, ịKịrayịsị ju abwụma nya ọhịhị nya Ohe Oluhye. Ma, ịKịrayịsị ayịdang á tị myị hu ịlọmwụ hwaa kaka ta Ohe Oluhye meme ẹ-ẹpwụ nya ịngịngịhyẹ nyamwụ kpong-kpong ka.

⁷Ma, ọkọkọ nya ọọwa lẹ, ịKịrayịsị pwọ ihi ọlala ọọwa neeji lẹ, ọ mwọọgịlẹ kpa ịlọmwụ weji kaka ji iwe-ahụrụ nya ọnchẹ oriri, bwula ọlẹ kọ warị wẹ odehe ọlẹ kaka da abwụma nya ugbinyịrọ nya ọngịnyị ehe kụrụ lẹlẹ.

⁸Ịnyị, ụka kọ warị la abwụma nya ọhịhị nya ọngịnyị ehe kpá lẹ, ọ kpa ịlọmwụ weji ẹ-ẹpwụ nya ihi ojuju gbee pwụ igu ogbugbu ọlẹ kọ dọmwụ ri igu oloyoyi ogbugbu u-uhye nya okoji lẹlẹ.

⁹Ịnyị a tịtị du ká Ohe Oluhye hu ịKịrayịsị ọọwa hwaa kele kaka hụ iwe-ahụrụ ọlẹ kọ la uhye gụ iwe-ahụrụ ịkịla wuu lẹlẹ. Ọọwa lẹ, ọ ju ịKịrayịsị ẹnyị ọlẹ kọ ri ẹnyị ọtụka gụ ẹnyị ịkịla wuu ịnyịnyị lẹlẹ.

¹⁰Ịnyị a du ká Ohe Oluhye hunọ yẹkẹẹ, ẹnyị nya iJisọsị ọọwa ayịdang kpangga, ọng myị́ ọng olodehe ọlẹ wuu bala alepwoohe wuu tụ ang myị́ ang ọlẹ kọ ji ekpeleji nya odehe ọlẹ, nyaa ka juwa ya arụụ nyaa kụ eji ha, juwa gbịgba ha ụbwọọmwụ ịnyịnyị pyii lẹlẹ.

¹¹Ohe Oluhye myịmyị hunọ yẹkẹẹ, ẹlẹlẹ nya ọng myị́ ọng wuu nyị ka juwa ya iJisọsị ịKịrayịsị ọọwa dodehe lala Ayịbaba Ọ-lọọ la pyii, chajị nyọka ya ogbo ha Ohe Oluhye Adịda ịnyịnyị lẹ.

¹²Chajị nya ọọwa lẹ, anụ angị hám há ee! Jaabwọ kanụ ri angị kaa ju ihi ụka myị́ ụka ene-ene lẹlẹ, anụ myị ká ihi o-jum ju nyanụ ọọwa a ba ụ-ụka ọlẹ kam juwa tanụ kem kaka. Ma, ọ chịla kanụ ka juwa ju ihi ọọwa gụ olene-ene lẹẹlẹẹ kam juwa jiji tanụ ka ịnyịnyị. Chajị kanụ ka jẹ́-ẹ juwa kpa ọ-hụ́ kpakpakpa bala uhi ojuju ẹ-ẹpwụ nyanụ, juwa họ ụkụrwọ nya ọchịda nya Ohe Oluhye ọlẹpwụ nyanụ ọwẹ gbee, kọ ka chị eju mẹ.

¹³Chajị, Ohe Oluhye ayịdang la ịlọmwụ a ri Ọngọlẹ kọ wẹẹ họ ụkụrwọ ẹ-ẹpwụ nya ọhịhị nyanụ, juwa hu imyi nya ụkụrwọ ọhọhọ họọ danụ bala ọ-ya ọngịrị ọ-kpa họ ụkụrwọ ọọwa myị́ hanụ jaabwọ kọ ka pwoku irya nya obyi omeme nya ịlọmwụ lẹ.

¹⁴Anụ myị kanụ juwa họ ịngịngịhyẹ nyanụ ẹ-ẹpwụ nya ala ọ-mwọ ya lee ịwẹẹ ọdada ọhẹ-lọhẹ kpong-kpong ka.

¹⁵Chajị kanụ ka jẹ́-ẹ ri angị la abyị ọhẹ-lọhẹ ka bala o-ri angị họ ịngịngịhyẹ onyobyi kpong-kpong kaka, lala anyị ịkpẹẹkpẹẹ nya Ohe Oluhye ịlẹ kị da ukpuru onyobyi ọhẹ-lọhẹ kaka ẹ-ẹpwụ nya odehe onyobyi ọkụrwa-kụrwa a-abwẹla ọlẹ ká angịnyị ịlẹpwụ nyamwụ ri angịnyị inyibyi, ị-pyị ẹla nya ịlẹhị anyoko mẹ. Chajị ká abwẹla ọnyịịla ọhọhọ nyanụ ka juwa wuru lala ahịgboo ha alodehe ịịwa mẹ.

¹⁶Kanụ juwa yụbwọ wu ẹla nya ọhịhị nya Ohe Oluhye ọọwa kpa ụ-ụwa gogo pyịyọọ mẹ. Chajị kam ka jẹ́-ẹ nwa ọbọọchẹ u-uhye nyanụ la ẹnụtụrụ ohyẹẹkpẹ nya ịKịrayịsị yẹkẹẹ, ụnyẹ nya ẹrụ ọnyịịla ọlẹ kam rụ ẹ-ẹpwarịrị nyanụ bala ụkụrwọ ọlụwa wuu lẹ, ó ri ang ododu kaka mẹ.

¹⁷Ọ́ dọmwụ ri ká igu ogbugbu nyam á ka ri ang oku ọmwakpa nya ịwọ ọ-yẹ hụ iya ọkịlaakịla ha Ohe Oluhye bwula ọmyịmyị ọlala nyanụ ọwẹ, ịnọ, ọ ka hám lụmẹ. Chajị, m jam chị ọkẹkẹnị tanụ anụ wuu lụmẹ.

¹⁸Chajị nya ọọwa lẹ, ịnyịnyị, ọ tịtị chịla kaanụ ayịdang ka juwa chị ọkẹkẹnị ọtụka-ọtụka ọlẹ tam lẹlẹ.

¹⁹Lẹẹlẹẹ lẹ, m jam la ẹhị ọrịrịị-rịrị bwula Ọngọlahị iJisọsị kam ka du iTimoti ẹrụ warị wẹ ẹga nyanụ ahyaahị, chajị kam ka jẹ́-ẹ la ẹjẹ ọkpụ́kpụ bwula oja owowo chajị nyanụ bwu lọọ.

²⁰Chajị, ḿ la ọngọkịla ọhẹ-lọhẹ ọlẹ kọ la irya ọkpẹẹkpẹẹ bala ila ọchịchị ẹ-ẹga nya ọkpahị junu yẹẹyẹẹ dala iTimoti kaka.

²¹Chajị, angịkịla wuu lẹ, ang ang nya ụbwọ nya ịlaa kem, ị juwa me irya ju lẹlẹ. Ị́ myị juwa kpahị ju ụkụrwọ nya iJisọsị ịKịrayịsị ọhọhọ kaka.

²²Ma, anụ ayịdang ri ibeenu jaabwọ ká iTimoti bwu chị ịlọmwụ ehe bwula ụkụrwọ ọhọhọ myị́ nyamwụ bala jaabwọ kaam bala ọwa lala ọnyị bala adịda ọọ-la ẹrụ ọlẹ kọ kaa myị ham yẹẹyẹẹ ẹ-ẹpwụ nya ụkụrwọ nya ẹrụ ọnyịịla o-ya pyẹ ọlẹ ịnyịnyịịnyị.

²³Chajị nya ọọwa lẹ, m la ẹhị ọrịrịị-rịrị kam ka doo ẹrụ warị wẹ ẹga nyanụ ahyaahị, ụka kam yẹ jaabwọ ká ang ọlẹga nyam á juwa la lẹ.

²⁴M dahịhile Ọngọlahị yẹkẹẹ, Ọ ka họ kọ ka chịkpẹẹ ham am ayịdang kam ka warị la ịlọm ị-ịlahị lụka ọtata-ka ịnyịnyị.

²⁵M me irya yẹkẹẹ, ọ ri ang ọbaba kam ka du Epafurodayịtọsị ọnyadam ẹ-ẹpwụ nya ịKịrayịsị warị wẹ ẹga nyanụ ịnyịnyị. Ọwa ayịdang ri ọngọ họ ụkụrwọ ọlẹ tam lala ịsọja nya ịKịrayịsị. Ọwa-à ri ọngọ myị ẹrụ ham ku ọmwakpa nyanụ lẹlẹ.

²⁶Chajị, ọ ri ang ọ-nwọọ ọwa ayịdang imyi lụmẹ chajị nyọka yẹnụ anụ wuu ẹ-ẹhị. Chajị, ụka ọlẹ kanụ wo yẹkẹẹ, ẹdụrụ nyị jụ Epafurodayịtọsị kanụ juwa chị uko lẹ, ọ tọọ olujwo lụmẹ.

²⁷Nya ịlẹhị ịnyị, ẹdụrụ ọọwa jwọọ lụmẹ kaka kpoye. Ọ dọmwụ hi pyịnyẹng, ịnọ, kọ ka gbu la ẹdụrụ ọọwa. Ma, Ohe Oluhye tị yọọ ahyẹẹrwẹrwa du kọ chọọ da lẹ. Ọ-ọọwa ụbwọọmwụ kem dọmwụ ka. Ma, Ohe Oluhye yẹm am ayịdang ahyẹẹrwẹrwa ịnyịnyị. Chajị, ó ri ká Epafurodayịtọsị á gbu, ịnọ, ọ ka ri ang ujujwo ọ-da ujujwo uhye ham lẹ.

²⁸Ọlịnyị a du kọ ri ang ọ-chịm ila nya ịlẹhị-ịlẹhị nyọka du Epafurodayịtọsị ẹrụ warị wẹ ẹpwarịrị nyanụ lẹ. Chajị, ụka kanụ yọọ lẹ, kanụ ka jẹ́-ẹ chị ọkẹkẹnị ọtụka-ọtụka mẹ. Ọọwa lẹ, ujujwo ọlẹpwụ nyam am tịtị ka myị́ bwula ọọwa lẹlẹ.

²⁹Lẹ, anụ́-ụ ye Epafurodayịtọsị yẹẹyẹẹ wẹ ẹpwarịrị nyanụ la ọkẹkẹnị lala ọnyadanụ ọnyịịla ẹ-ẹpwụ nya Ọngọlahị la mẹ. Anụ́-ụ cheri kanụ juwa ju angịnyị nya Ohe Oluhye ịlịnyị ihi yẹẹyẹẹ kịlahị-ịlahị mẹ.

³⁰Chajị, ọ hi pyịnyẹng, ịnọ, kọọwa ayịdang ka gbu chajị nya ụkụrwọ nya Ọngọlahị la ọlẹ kọ hu ọhịhị nyamwụ wuu lẹpwụ-lẹpwụ ga ha igu, juwa myịm ẹrụ ku ọmwakpa nyanụ.