Read idege ALA IFILIPAYỊ 3 Bible Online

ALA IFILIPAYỊ 3 - idege bible

ALA IFILIPAYỊ 3

¹Ẹla ohyẹẹkpẹ-ẹkpẹ wuu ri yẹkẹẹ, anụ anyadam ẹ-ẹpwụ nya ịKịrayịsị, anụ́-ụ juwa chị ọkẹkẹnị ẹ-ẹpwụ nya Ọngọlahị ọgwọgụ mẹ. Ó ri ang o-hu olo ham abwọhẹ nyọlẹ kam lẹẹ ma ala ịlẹ kam ya jenu ẹnẹhẹ lẹ ya, ẹ-ẹpwụ nya ụpwụ ọlẹ ka. Chajị, m jẹ́ yẹkẹẹ, ọọwa a ri ang ọ-ka wunu kpa gogo ẹ-ẹpwụ nya ọmyịmyị ọlala nyanụ lẹ.

²Anụ́-ụ juwa kpahị ju ịlọnụ ọgwọgụ ẹ-ẹga nya angịlẹ kị wẹẹ họ abwẹla lala ibwu bala o-juwa họ ang onyobyi kem bala o-juwa kpụ nịrọ ụwụwụ ọdada nya ugbinyịrọ olodehe ọlẹ kem ịnyịnyị mẹ.

³Chajị, ahị angịlẹ kpangga a ri angị da ụwụwụ ọlẹ kọ ri nya ịlẹhị ị-ịlahị nya Ohe Oluhye lẹ. Chajị, ahị a kaa gbịgba ha Ohe Oluhye ẹ-ẹpwụ nya olegu lẹ bala ọ-kaa kpa ịKịrayịsị iJisọsị kem chị ogu lẹ. Áhị́ kaa kpụ nịrọ ọhọhọ nya ugbinyịrọ nyahị ọlẹ ẹ-ẹpwụ nya ịgba ọgbagba ha Ohe Oluhye kpong-kpong ka.

⁴Ọ ri nya ịlẹhị yẹkẹẹ, ó ri kọ hám nyọka wa ang ịlẹ kọ du ká ọngịnyị ehe kaa kpụ nịrọ ọhọhọ nya ugbinyịrọ ọlẹ, ịnọ, m ka ye wa. Chajị, ó ri ká ọngọngọhẹ á juwa me irya yẹkẹẹ, ọwa nyị ye ịngịngịhyẹ ka kpụ nịrọ u-uhye nya ugbinyịrọ ọlẹ juwa aalẹ, am ka ye wa gụ ịnya ọngọọwa.

⁵Chajị, ị dam ụwụwụ la ẹnụtụrụ ọhaneku ọlẹ kị kpa mam. Chajị, m ri ala Isirẹlụ. Imwawụ nya iBenjamịn, m bwu lẹ. M ri ala iHiburu ka oyiye oyiye. Ẹ-ẹga nya ehile nya iMosisi ọjẹ́jẹ lẹ, m ri ọngọhẹ lẹpwụ nya ala ịFarisii ịlẹ kị kaa kpa ehile ọọwa kpẹẹkpẹẹ.

⁶Ẹ-ẹga nya ila ọchịchị ẹ-ẹpwụ nya ehile ọọwa ọ-kpa họ ụkụrwọ lẹ, m chị ila ẹ-ẹpwụ nya ọọwa gbee kam ri ọngọ tụ ịchọọchị nya Ohe Oluhye pyịpyị. Ẹ-ẹga nya abwẹla ọnyịịla ọhọhọ ọlịlahị nya ehile nya iMosisi lẹ, ḿ la abyị ọhẹ-lọhẹ ẹ-ẹpwụ nya ọọwa kpong-kpong ka.

⁷Ma, ụma nya ang myị́ ang ịlẹ, ịnọ, kam ka wa ju nya ang nya apyobwuna ha ịlọm lẹ, m tụụbwọ hyaa byi enyi lẹẹlẹẹ wuu, chajị nya ẹnyị nya ịKịrayịsị lẹ.

⁸Nya ịlẹhị ịnyị, m tụụbwọ hi ang myị́ ang wuu ọlẹga nyam byi-enyi o-oluhye nya ang o-ju apyobwuna ọtụka ọlẹpwụ nya ang ọjẹ́jẹ chajị nya ịKịrayịsị iJisọsị Ọngọlam la lẹ. Chajị nya ẹnyị nya ịKịrayịsị ọọwa, a du kam tụụbwọ hi ang myị́ ang ọlẹga nyam wuu byi enyi gbanggbang lẹlẹ. Chajị, m wa ang ịịwa wuu lala ang i-hi deeji ịlọtẹwụụ, chajị kam ka jẹ́-ẹ ri apyobwuna nya ịKịrayịsị ọọwa ha ịlọm ịnyịlẹhị lẹ!

⁹Chajị, ụka kam la ọhịhị nya ịKịrayịsị ọọwa ẹ-ẹpwụ nyam lẹ, kam tụtụm ka myịmyị-ị̀ la abwẹla ọnyịịla nya ịlọm ọlẹ kọ kaa bwula ehile nya iMosisi ọkpakpa kaka. Ma, kam ka la ụma nya abwẹla ọnyịịla ọlẹ kọ kaa bwula ọmyịmyị ọlala u-uhye nya ịKịrayịsị. Abwẹla ọnyịịla ọọwa a ri abwẹla ọnyịịla nya Ohe Oluhye ayịdang ọlẹ ká ọmyịmyị ọlala kem, ọngịnyị ehe a kaa kpa lọọ myị́ lẹlẹ.

¹⁰Chajị ká ọọwa ka họ kam ka jẹ́-ẹ jẹ́ ịKịrayịsị yẹẹyẹẹ bala ọngịrị nya owuleji bwula igu nyamwụ, kam ka jẹ́-ẹ bá akama nyamwụ bá yẹ tọọ bala ọ-ka jẹ́-ẹ la abwụma nya igu ogbugbu nyamwụ tọọ ịnyịnyị.

¹¹Chajị kọ ka jẹ́-ẹ chịkpẹẹ ham nyọka wuleji bwula igu bwula ịKịrayịsị iJisọsị ọọwa ịnyịnyị myị́.

¹²Ọọwa á tị ri yẹkẹẹ, am ayịdang wu iwe-ahụrụ ọọwa ọyị lẹ lee ọ la kpẹẹkpẹẹ kpá lẹ, lẹka. Ma, m jam maga nya ịlẹhị-ịlẹhị, chajị kam ka ye apyobwuna nya iwe-ahụrụ ọlẹ kọ du ká ịKịrayịsị iJisọsị ayịdang kpa chụm bala o-hum nya ọngịnyị nya ịlọmwụ ịnyịnyị lẹ.

¹³Anụ anyadam ẹ-ẹpwụ nya ịKịrayịsị, ḿ wa ịlọm lala ọngọ wu iwe-ahụrụ ọọwa ọyị yẹẹyẹẹ lẹka. Ma, ang ookpokpo ọlẹ kam kaa họ ri yẹkẹẹ, m kaa deeri nya ang ịlẹ kị ji ẹkpẹ nyam. Ọọwa lẹ, m kaa juwa nịra cheechee ba iwe-ahụrụ ọnyịịla ọlịlahị ọọwa ịnyịnyịịnyị lẹlẹ.

¹⁴M jam kpa ọmyịmyị ọlala nyam rụnyẹ kele kịlahị-ịlahị ka ẹga ọlẹ ká Ohe Oluhye hu ang ọgahị ọlịnya lụmẹ nyamwụ nọ gbehi ẹ-ẹpwụ nya ẹkọ obebe ọlịgọgọ nyamwụ ọlẹ kọ be wụrụụhị bwula ịKịrayịsị iJisọsị lẹ.

¹⁵Ahị angịlẹ wuu kahị ri adam ọlẹng ẹ-ẹpwụ nya ẹla nya Ohe Oluhye wuu lẹlẹ, anụ́-ụ cheri kahị juwa kpa irya ọọwa họ ụkụrwọ kịlahị-ịlahị mẹ. Ma, ọ́ tị ri ká ụgbẹyị ọhẹ-lọhẹ á juwa ká irya nyanụ á la kpakpa ka aalẹ, Ohe Oluhye ayịdang la ịlọmwụ ka chị ang ọọwa ehe hanụ lẹ.

¹⁶Ọkẹnẹ-kẹnẹ ri yẹkẹẹ, ahị cheri kahị juwa yụbwọ chị ang ọnyịịla ọlẹ kahị la ene lẹ, kpa ụ-ụwa gogo, juwa kpa họ ụkụrwọ pyịyọọ mẹ.

¹⁷Anụ anyadam ẹ-ẹpwụ nya ịKịrayịsị, anụ́-ụ juwa gbịlam kele kịlahị-ịlahị mẹ bala o-juwa yẹ angịlẹ kị wẹẹ la ọhịhị ọlẹ kọ pwoku ịnyahị ahị angị ri ang o-ju ẹjẹẹ hanụ ẹ-ẹpwụ nya ọmyịmyị ọlala ọlẹ ịnyịnyị mẹ.

¹⁸Chajị, iru nya angịnyị lụmẹ-lụmẹ ịlẹ kam dọmwụ ya ẹla chajị nyaa jenu ẹnẹhẹ lẹlẹ, m myịmyị jam ma ẹla ọọwa ya lẹẹlẹẹ, la egbejida a-ahị yẹkẹẹ, ịwa ayịdang juwa la ọhịhị ọlẹ kọ mẹjẹ yẹkẹẹ, ịwa nyị ri aluji nya ịKịrayịsị bala igu nyamwụ ọlẹ kọ gbu u-uhye nya okoji chajị nyahị.

¹⁹Ọbaba nya ọhịhị nya angịịwa ka ri ayịreji ọtata o-obwila. Chajị, ugbẹpwụ nyaa ọkpakpa kem a ri Ohe Oluhye nyaa ịwa lẹlẹ. Ụma nya ang inyibyi iloyoyi ịlẹ kị juwa họ a dachichi ri ang ịlẹ kị kaa juwa kpa chị ogu mwọọgịlẹ lẹlẹ. Irya nyaa wuu lẹpwụ-lẹpwụ lẹ, ẹ-ẹpwụ nya ang-abwọ nya odehe ọlẹ kem, ọ ji lẹlẹ.

²⁰Ma, ahị angịnyị nya Ohe Oluhye wuu tị lẹ, epwoohe a ri ẹpwa nya adahị lẹ. Ụ-ụwa, ahị tị lẹẹ la ẹhị ọrịrịị-rịrị gbe, ká Ọngọchịda nyahị ọlẹ kọ ri Ọngọlahị iJisọsị ịKịrayịsị ka bwu mwẹẹkpẹ warị lẹlẹ.

²¹ỊKịrayịsị ọọwa ayịdang a ka nyẹ ugbinyịrọ ọdẹwụ dẹwụ nyahị ọlẹ deeji lẹ, ọ ka hu ụma nya ugbinyịrọ ọlẹbyẹbyị ọ-lala ịnya ịlọmwụ kụrụụhị lụka ọọwa, bwula ọngịrị nyamwụ ọlẹ kọ kaa kpa họ ká ang myị́ ang wuu kaa ji ekpeleji nya ịlọmwụ myị́ lẹlẹ.