Read idege ALA IFILIPAYỊ 4 Bible Online

ALA IFILIPAYỊ 4 - idege bible

ALA IFILIPAYỊ 4

¹Chajị nya ọọwa lẹ, anụ anyadam ẹ-ẹpwụ nya ịKịrayịsị ịlẹ kanụ hám lụmẹ, ká iwoo nyanụ kaa wum lụmẹ, anụ ayịdang a ri ọkẹkẹnị ọtụka nyam lẹ. Anụ lam ihi-ihi lụmẹ lala okpo ọkụrụ egbeju nya adịrahụ ayịdang. Lẹ, anụ cheri kanụ godayị kpakpakpa ẹ-ẹpwụ nya Ọngọlahị la mẹ, anụ aligu nyam ịlẹ kanụ hám lụmẹ.

²Lẹẹlẹẹ, m jam bịlẹ Iyodiya bala iSintike nya ịlẹhị-ịlẹhị yẹkẹẹ, anụ chuchuu kanụ myị ju awụlẹ ẹ-ẹpwụ nya Ọngọlahị la mẹ!

³M jam bịlẹng ahụ ọngọlẹ ká ri Ọlọm ọnyịịla ẹ-ẹpwụ nya ụkụrwọ ọlẹ ịnyịnyị yẹkẹẹ, aa chuchuu, ká da anyang imiiye ịwẹ ụbwọ ẹ-ẹpwụ nya okpunyi ọhọhọ ọwẹ ham mẹ. Chajị, ịwa ayịdang a ri angị kaa rịrị chii, juwa dam ụbwọ nya ịlẹhị-ịlẹhị ẹ-ẹpwụ nya ụkụrwọ nya ẹrụ ọnyịịla ọlẹ bala iKilementi bala angịkịla ịlụwa wuu ịlẹ kị ri alụkụrwọ ọlẹ tam ịnyịnyị, ọlẹ ká ẹnyị nyaa ịwa wuu juwa ẹ-ẹpwụ nya ụpwụ nya ọhịhị nya Ohe Oluhye lẹlẹ.

⁴Anụ́-ụ juwa chị ọkẹkẹnị nya ịlẹhị-ịlẹhị ẹ-ẹpwụ nya Ọngọlahị la ụka wuu mẹ. M myịmyị juwa byinu yẹkẹẹ, anụ́-ụ juwa chị ọkẹkẹnị nya ịlẹhị-ịlẹhị ẹ-ẹpwụ nya Ọngọlahị la mẹ.

⁵Anụ́-ụ myị ká olegu ọdụmwọ ọ-kpa la ugbodu ojuju onyudiyo nyanụ ẹ-ẹga nya angịnyị ehe wuu a juwa kụ ehe gede gede mẹ. Chajị, ụka nya ọwẹwẹ nya Ọngọlahị ju chwẹẹ lụmẹ lẹ!

⁶Anụ la uko ọchịchị u-uhye nya ịngịngịhyẹ kpong-kpong ka. Ma, ẹ-ẹpwụ nya ang myị́ ang wuu, anụ́-ụ juwa raabwọ ha Ohe Oluhye bala o-juwa bịlọọ bịlẹ la obe ojiji, kanụ juwa gu ang ị-banụ ba wuu ẹnyị ya je Ohe Oluhye la abwọ ọrịrị ọọwa mẹ.

⁷Ó ri kanụ họ ịnyị lẹ aalẹ, okpunyi nya Ohe Oluhye ọlẹ kọ kaa kpoye nya ọ-jẹ́ myịmyị nya angịnyị ehe wuu, a ka juwa wu ọkịlẹtụ nyanụ bala irya ọlẹpwụ nyanụ wuu kpa yẹẹyẹẹ ẹ-ẹpwụ nya ịKịrayịsị iJisọsị pyịyọọ lẹlẹ.

⁸Ẹla otuku nyam ri yẹkẹẹ, anụ anyadam ẹ-ẹpwụ nya ịKịrayịsị, ang myị́ ang ọlẹ kọ ri ẹla nya ịlẹhị lee ọlẹ kọ ri ang olihi-ihi lee ọlẹ kọ ri ang ọkpẹẹkpẹẹ lee ọlẹ kọ ri ang olowuru charị-charị lee ọlẹ kọ ri ang ohiigu há lee ang ọlẹ kọ ka kpa ọ-ya dodehe ọnyịịla warị lee ó ri ká ịngịngịhyẹ á juwa ọlẹ kanụ jẹ́ kọ ka jẹ́-ẹ chị abwẹla ọnyịịla ọhọhọ nya ọngịnyị, ehe lẹ lee ó ri ká ịngịngịhyẹ á juwa ọlẹ kanụ jẹ́ kọ ka kpa ogbo ogwogwo kịla Ohe Oluhye lẹ aalẹ, anụ́-ụ juwa me irya ju ang ịlịnyị kem ụbwaa mẹ.

⁹Ẹla nya Ohe Oluhye ịlẹ wuu kanụ jéjé bala oyeye juwa kpa họ ụkụrwọ wuu bala ịlẹ kanụ kaa kpa ụrụ nya ịlọnụ wowo wuu bala ọ-kaa kpẹhị nya ịlọnụ yẹ kam kaa họ wuu lẹ, anụ́-ụ juwa baa jẹ, kpa họ ụkụrwọ jịra mẹ. Aalẹ, Ohe Oluhye Ọngịnyị nya okpunyi ọwẹ ayịdang ka juwa tanụ ụka wuu lẹ!

¹⁰M chị ọkẹkẹnị ọtụka-ọtụka ẹ-ẹpwụ nya ọhịhị nyam bwula Ọngọlahị lụmẹ. Chajị, anụ myịmyị chị ọháha ọlala ọlẹga nyam ahị lẹ. Ịnọ, m jẹ́ kọ nwụnụ imyi nyọka dam ụbwọ bwu ẹkpẹ-ẹkpẹ. Ma, ọchịchị, ọ chịkpẹẹ hanụ ka, a du lẹ.

¹¹Ḿ jam ya ẹla ọlẹ, chajị nyori yẹkẹẹ, m la ọbaba ọhẹ jam lẹ, abwọhẹ koo. Chajị, am ayịdang lẹ, ẹ-ẹpwụ nya iwe-ahụrụ ọnyị myị ọnyị wuu ọlẹ kam ji, m jẹ́ kaa la irya nya ang o-wum ẹpwụ ba ụ-ụwa myị́ lẹ.

¹²Chajị, am ayịdang lẹ, m jẹ́ jaabwọ kam kaa bwu kpa ịlọm ka iwe-ahụrụ ọbẹdẹẹ bala iwe-ahụrụ oluhye ịnyịnyị myị́. Chajị ẹ-ẹpwụ nya iwe-ahụrụ nyam ọnyị myị ọnyị ọlẹga myị́ ẹga wuu lẹ, m la ẹla ọjẹ́jẹ ọlẹ kam jẹ́ kaa kpa jahị da ang oriri o-ye ri lụmẹ lee ang oriri oyeye ri-ka bala ụka nya ang ọlala lụmẹ mwụ aba ba nyam lee ụka nya ịngịngịhyẹ ọlala ka nyam wuu ịnyịnyị lẹ.

¹³Lẹ, am ayịdang kaa jụ ang myị́ ang wuu họ myị́ bwula ụbwọ ọdada nya ịKịrayịsị Ọngọlẹ kọ kaa ya ọngịrị nyamwụ ham.

¹⁴Ma, anụ tị jẹ́ họ hiigu lụmẹ nyọlẹ kanụ dam ụbwọ ẹ-ẹpwụ nya akama nyam tam ịnyịnyị.

¹⁵Anụ ala iFilipayị ayịdang jẹ́ yẹkẹẹ, bwu ọmwụ ọdada nya ọgbanyẹ ọlẹ kam juwa ya ẹrụ ọnyịịla ọlẹ pyẹ, kam rụ bwu ịMẹsịdoniya lẹ, ala ịchọọchị ịkịla ọhẹ-lọhẹ á jum ụbwọ ẹ-ẹpwụ nya ụkụrwọ ọlẹ bwula ịngịngịhyẹ o-hu ha lee oyeye, dala anụ ala iFilipayị kpong-kpong kaka.

¹⁶Chajị, ụka ọlẹ kam dọmwụ juwa ị-ịTẹsalonayịka lẹ, anụ myịmyị ya okpoko du warị kaka dam ụbwọ ụ-ụwa ụka kam ji ẹpwụ nya ọbaba lala ugbabwọ ịmanyị ịmanyị.

¹⁷Aajị nyori yẹkẹẹ, am ayịdang juwa tịtọ nya ang ọgahị bwu ẹga nyanụ lụmẹ lẹ, pyiipyii tị ka. Ma, ang ọlẹ kam tịtọ ri ugbe nya ụkụrwọ ọnyịịla o-bwu ẹga nyanụ ọlẹ ká uri nyamwụ tị tị ka juwa chị anyị da ịlọmwụ hanụ ị-ịlahị nya Ohe Oluhye ịnyị!

¹⁸Ọlẹ ri ọ-họ kanụ ka jẹ́ yẹkẹẹ, ọhaha nyanụ ọlẹ kanụ ya du Epafurodayịtọsị ẹrụ tọm lẹ, ọ wum ọyị lẹ. Ọhaha nyanụ ọọwa dọmwụ lụmẹ chọba-lọba lẹ. Ọ wum ẹpwụ lụmẹ kaka kpoye. Ọ lala iya ọkịlaakịla ochoru kwọkwọ ị-ịlahị nya Ohe Oluhye. Ohe Oluhye ayịdang tị ye lẹ. M tị jẹ́ kọ kpụ Ohe Oluhye ịpyọ lụmẹ ịnyịnyị.

¹⁹Ohe Oluhye nyam ayịdang ka họ ang ị-banụ ba wuu hanụ pyii jaabwọ ká ụdụ ọlẹbyẹbyị ọtụka ọchakụ chakụ nyamwụ la kaka ba bwula ịKịrayịsị iJisọsị lẹ.

²⁰Ká ogbo a juwa ha Ohe Oluhye Adahị gbe oyi myị́ oyi pwụ ụka myị́ ụka mẹ. Amẹn.

²¹Anụ́-ụ da ọnụ chị angị ịgọgọ ọnyị myị ọnyị lẹpwụ nyanụ wuu ham bwula ịKịrayịsị iJisọsị mẹ. Anyadahị ẹ-ẹpwụ nya ịKịrayịsị ịlẹ kị jam tam ya, nyị da ọnụ chịnụ ha ịwa.

²²Angịnyị nya Ohe Oluhye ịlẹgẹlẹ wuu, ya, nyị da ọnụ chịnụ ha ịwa mẹ, ọgụgụ ri alọdọdẹpwa nya adịrahụ iSisa.

²³Ká ọnahị nya Ọngọlahị iJisọsị ịKịrayịsị a juwa ta olegu nyanụ mẹ.