Read idege ALA IkọLOSI 1 Bible Online

ALA IkọLOSI 1 - idege bible

ALA IkọLOSI 1

¹Ụpwụ ọlẹ jam bwu ẹga nyam am ịPọlụ ọlẹrụ ọnyịịla nya iJisọsị ịKịrayịsị bwula irya nya Ohe Oluhye bala ẹga nya iTimoti ọnyadahị ẹ-ẹpwụ nya ịKịrayịsị.

²Ahị jam da ụpwụ ọlẹ du wanụ, anụ anyadahị angịnyị ịgọgọ nya Ohe Oluhye ịlẹ kanụ chịla o-hu ọkịlẹtụ ha ẹ-ẹpwụ nya ịKịrayịsị ịlẹ kanụ juwa ọ-ọpyị nya iKolosi. Ká ọnahị bala okpunyi nya Ohe Oluhye Adahị a juwa tanụ mẹ.

³Ahị kaa raabwọ kpịtịya nyanụ, juwa ji Ohe Oluhye Adịda nya Ọngọlahị iJisọsị ịKịrayịsị obe chajị nyanụ ụka myị́ ụka wuu.

⁴Ahị kaa ji Ohe Oluhye obe ịnyị, chajị nyọlẹ kahị wo oja ọnyịịla nya ọmyịmyị ọlala nyanụ ẹ-ẹpwụ nya ịKịrayịsị iJisọsị bala ọháha ọlala nya ịlẹhị-ịlẹhị nyanụ ẹ-ẹga nya angịnyị nya Ohe Oluhye ịkịla wuu ịnyịnyị.

⁵Ang odudu kanụ juwa họ ịnyị ri, chajị nya ẹhị ọrịrịị-rịrị ọnyịịla nyanụ ọlẹ kanụ juwa la u-uhye nya ahị ọwawa ọlẹ ká Ohe Oluhye juwa nwụlanọ gbenu ụ-ụwa e-epwoohe. Chajị, ịnyị, ẹrụ ọnyịịla nya ịlẹhị ọlẹ kanụ wo lụka nya ọgbanyẹ-ọgbanyẹ a mẹjẹẹnụ lẹ.

⁶Jaabwọ ká ẹrụ ọnyịịla ọlẹ wunu ọyị wẹẹ, ịnyịnyị, ọ juwa pyebile kele ka ẹga myị́ ẹga nya odehe ọlẹ wuu lẹlẹ. Jaabwọ ká ẹrụ ọnyịịla ọọwa ọlẹ kanụ wo du kanụ jẹ́ etu nya ang ọlẹ ká ọgahị ọnahị ọtụka nya Ohe Oluhye ri ịnyịlẹhị, ene ká ẹla ọọwa wẹẹ nwụ́ ugbe ọnyịịla ẹ-ẹpwarịrị nyanụ anụ ayịdang wẹẹ, ịnyịnyị, ẹla ọọwa a tịtị juwa nwụ́ ugbe ẹ-ẹga ọkịla wuu lẹlẹ.

⁷Anụ họ ịnyị jaabwọ kanụ bwu wo ẹrụ ọnyịịla ọọwa bwu ọnụ nya Epafụrasị lụka nya ọgbanyẹ-ọgbanyẹ. Epafụrasị ọọwa ri ọngọlẹ kọ háahị lụmẹ. Ọ ri ọnchẹ nya ịKịrayịsị lala ahị-ahị. Ọ chịla o-hu ọkịlẹtụ ha ẹ-ẹpwụ nya ẹrụ ọnyịịla ọmyịmyị ha ịKịrayịsị ẹ-ẹpwarịrị nyanụ hahị lụmẹ.

⁸Epafụrasị ayịdang a ya jehi ụma nya ọháha ọlala nya ịlẹhị-ịlẹhị ọlẹ ká Olegu nya Ohe Oluhye ya hanụ lẹ.

⁹Ịnyị a du, bwu ẹnụtụrụ ọlẹ kahị wo oja ọnyịịla nyanụ ọọwa lẹ, kaahị ayịdang á hu abwọ la abwọ ọrịrị ha Ohe Oluhye chajị nyanụ ẹnẹnẹhẹ lẹka lẹlẹ. Abwọ ọrịrị nyahị ri ká Ohe Oluhye ayịdang ka họ kanụ ka jẹ́-ẹ jẹ́ ang ọlẹ ká irya nyamwụ ri yẹẹyẹẹ, ká Olegu Ịgọgọ nyamwụ ka ya ẹla ọjẹ́jẹ bala ọ-jẹ́ myịmyị ọlala nya Ohe Oluhye hanụ ẹ-ẹpwụ nya ang myị́ ang nyanụ wuu ịnyịnyị.

¹⁰Ahị jam raabwọ myịmyị chajị kanụ ka jẹ́-ẹ juwa la ụma nya ọhịhị ọchịla-chịla ọlẹ kọ kaa kpụ Ọngọlahị Ohe Oluhye ayịdang ịpyọ yẹẹyẹẹ ụka wuu. Chajị ká ọhịhị ọnyịịla nyanụ ọọwa ka jẹ́-ẹ juwa nwụ́ ugbe bwula ụma nya ụkụrwọ ọnyịịla ọnyị myị ọnyị ọhọhọ nyanụ mẹ. Kanụ ka jẹ́-ẹ juwa nwa ka ịlahị-ịlahị ẹ-ẹpwụ nya Ohe Oluhye ọjẹ́jẹ gụ olene-ene ịnyịnyị mẹ.

¹¹Ahị jam bịlẹ Ohe Oluhye kọ ka kpa ọngịrị ẹbyẹbyị ọtụka nyamwụ junu ọngịrị, chajị kanụ ka jẹ́-ẹ juwa kpa ọkẹkẹnị ọchịchị ọtụka la ugbodu ojuju pwụ ọbaba nya akama ọyẹyẹ nyanụ wuu myị́.

¹²Anụ́-ụ juwa ji Ohe Oluhye Adịda olepwoohe obe ụka myị́ ụka chajị nyọlẹ kọ họ kaahị bala anụ angị myị lọọ wuu ri angị chịla-chịla, nyọka la ebwo ọhẹ nya ang ugu nya ahị ọwawa nya Ohe Oluhye ọlẹ kọ nwụlanọ gbe angị ịgọgọ nyamwụ wuu ịlẹpwụ nya ahịgboo nya Ohe Oluhye mẹ.

¹³Ohe Oluhye ayịdang gbahị kpehe bwu ẹpwụ nya o-ri ọnyọhị nya ọngịrị nya ukpowu lẹ, Ohe Oluhye á kpahị kele kaka ju ka ẹpwụ nya ọhịhị nya ịpyị Adịrahụ nya Ọnyẹwẹ nyamwụ ọlẹ kọ họ́ọ lụmẹ lẹlẹ.

¹⁴Ọnyẹwẹ nya Ohe Oluhye ọọwa ayịdang a ri ọngọlẹ kọ kpa ịwọ nyamwụ ra ihi nya ọchịda nya Ohe Oluhye hahị, du ká Ohe Oluhye hịnyọhi ịhọbịrị ịhọhọ nyahị wuu hahị lẹ.

¹⁵ỊKịrayịsị a ri ụrụrụ nya Ohe Oluhye ayịdang ọlẹ kaahị angịnyị ehe á jẹ́-ẹ yẹ la ẹhị ọlam-ọlam nyahị ọlẹ kaka lẹlẹ. Chajị ịKịrayịsị ọọwa a warị kaka chị, jaabwọ ká Ohe Oluhye la kpangga ehe hahị lẹ. ỊKịrayịsị á ri Ọnyẹwẹ nya Ohe Oluhye bala o-ri ọngọ la uhye gụ ang myị́ ang ịlẹ wuu ká Ohe Oluhye họhọ lẹlẹ.

¹⁶Chajị, bwu ẹpwụtụbwọ nya ịKịrayịsị ọọwa ayịdang, Ohe Oluhye a họ ang myị́ ang wuu ịlẹ kị juwa e-epwoohe bala ịlẹ kị jam odehe ọlẹ wuu tụ ang myị́ ang ịlẹ kị jẹ́-ẹ yẹyẹ ẹ-ẹhị bala ịlẹ kị jẹ́-ẹ yẹyẹ ẹ-ẹhị kaka wuu lẹ. Ó ri ká ang ịịwa á ri ẹchị adịrahụ riri lee o-ri ayịbaba o-ji uhye nya angịkịla wuu wẹwẹ lee o-ri alegbeju ịnyịịngịrị wẹwẹ lee o-ri alegbeju igbeji nya angịnyị ehe lee alegu-ẹrụ wẹwẹ aalẹ, ang myị́ ang ịịwa wuu ịlẹ ká Ohe Oluhye họhọ lẹ, ị bwu ẹpwụtụbwọ nya ịKịrayịsị wuu. ỊKịrayịsị ọọwa ayịdang kpangga, Ohe Oluhye a tị họ ang ịwẹ wuu ha ịnyịnyị lẹlẹ.

¹⁷Ene-ene ká Ohe Oluhye ka họ ang myị́ ang wuu lẹ, ịKịrayịsị ayịdang juwa lẹ. Ẹ-ẹpwụtụbwọ nya ịKịrayịsị ọọwa kpangga, angịnyị wuu bala ang myị́ ang ịkịla wuu, a tị jẹ́ lẹẹ la o-wu kpa myị́ kele ka ịlahị-ịlahị ẹ-ẹpwụ nya iwe-ahụrụ nya ọhịhị nyaa ịnyịnyị lẹlẹ.

¹⁸Jaabwọ ká egbeju nya ọngịnyị ehe á kụ ịlahị nya ẹga nya ugbinyịrọ nyamwụ ịkịla wuu wẹẹ, ịnyịnyị, ịKịrayịsị a tịtị ri olegbeju ọ-kụ ịlahị nya ịchọọchị nya Ohe Oluhye ọlẹ kọ ri ugbinyịrọ nya ịKịrayịsị lẹlẹ. ỊKịrayịsị ayịdang a ri ọmwụ ọdada nya ang myị́ ang wuu lẹ. Ọwa ayịdang a tị ri ọngọlẹ kọ wuleji bwula igu ọhọhẹ-ọhọhẹ wuu juwa hịhị, chajị ká ịKịrayịsị ụbwọọmwụ a ka jẹ́-ẹ ri ẹngịrị ọ-kụ ịlahị nya ang myị́ ang wuu ịnyịnyị lẹlẹ.

¹⁹Chajị, ẹ-ẹpwụ nya ịKịrayịsị ọọwa pyii, Ohe Oluhye ayịdang a chị eje yẹkẹẹ, Ọwa nyị ka ya ụmụmẹ nya abwẹla ọnyịịla nya ịlọọwa myị pwẹẹpwẹẹ jịra lẹlẹ.

²⁰Bwula ịwọ nya ịKịrayịsị, ọlẹ kọ ya yẹ hụrụ u-uhye nya okoji, a du ká Ohe Oluhye a ya ụgbẹyị nya okpunyi ọhọhọ da ha angịnyị ehe wuu bala ang myị́ ang ịkịla ilepwoohe bala odehe ọlẹ, kịịwa bala Ohe Oluhye ka ri ọnyị bala adịda myị́ lẹlẹ.

²¹Ene-ene lẹ, anụ ri angị chị ebwo hi Ohe Oluhye. Anụ ju Ohe Oluhye uji bwula irya inyibyi o-juwa meme nyanụ bala ang inyibyi o-juwa họhọ nyanụ ịnyịnyị.

²²Ma, lẹẹlẹẹ lẹ, Ohe Oluhye tị kpanụ bala Ịlọmwụ kaka ri ọnyị bala Adịda bwula igu nya ugbinyịrọ ọlẹ ká ịKịrayịsị Ọnyẹwẹ nyamwụ gbu u-uhye nya okoji wọnụ nyahị wuu ju lẹ. ỊKịrayịsị gbu igu ọọwa ịnyị, chajị kọ ka jẹ́-ẹ kpanụ kaka godayị rịrị ị-ịlahị nya Ohe Oluhye la ịgọgọ ọlala, la ukpuru ọhẹ-lọhẹ ọdada kaka lee abyị ọhẹ-lọhẹ ọlala kaka nyanụ ịnyịnyị.

²³Ọ tị ka jẹ́-ẹ la ịnyị hanụ kem, ó ri kanụ ka juwa ka ịlahị-ịlahị ẹ-ẹpwụ nya ọmyịmyị ọlala nyanụ ọwẹ la o-juwa pyị giri-giri kaka lee o-juwa ri ka ẹkpẹ-ẹkpẹ ẹ-ẹpwụ nya ẹhị ọrịrịị-rịrị ọnyịịla ọlẹ kanụ la bwula ẹrụ ọnyịịla ọlẹ kanụ wo kpong-kpong kaka ịnyịnyị. Ẹrụ ọnyịịla ọọwa ọlẹ kanụ wo wẹ, kị tị wẹẹ kpa kaka ya je ọng myị́ ọng ám e-ekpeleji nya ẹnụ ọlẹ wuu, Ohe Oluhye a chụm ya, am nyị ri ọlẹrụ ọnyịịla ọọwa ha Ọwa mẹ lẹẹ, ịnyịnyị lẹlẹ.

²⁴Am jam chị ọkẹkẹnị ọtụka-ọtụka ẹ-ẹpwụ nya akama ọlẹ kam lẹẹ yẹ u-uhye nyanụ. Chajị, m jam yẹ akama nya ugbinyịrọ ọlẹ u-uhye nya ịchọọchị ọlẹ kọ ri ugbinyịrọ nya ịKịrayịsị ayịdang, chajị ká akama ọtụka ọlẹ ká ịKịrayịsị yẹ u-uhye nya angịnyị ehe wuu ka jẹ́-ẹ nwụ́ ugbe jịra chị ọnụ myị́.

²⁵Ẹ-ẹpwụ nya ịchọọchị ọọwa, Ohe Oluhye a chụm lẹẹ, ya ụkụrwọ ọlẹ jum ụ-ụbwọ kaam a ka ri ọlẹrụ ọnyịịla nyamwụ ẹ-ẹpwarịrị nyanụ lẹlẹ. Ụkụrwọ ọlẹ ká Ohe Oluhye ya jum ụ-ụbwọ ri kam ka juwa ya ẹrụ ọnyịịla nyamwụ wuu pyẹ jaabwọ kọ la kaka ba je angịnyị ehe.

²⁶Gbalẹ-gbalẹ lẹ, ịnọ, Ohe Oluhye hu ang okpori-kpori nya ẹrụ ọnyịịla nyamwụ ọọwa kpịbaa hi angịnyị ehe wuu iloyi myị́ oyi inyogo wuu. Ma, lẹẹlẹẹ lẹ, Ohe Oluhye tị chọọ ehe mẹjẹẹhị, ahị angịnyị nyamwụ ịlụka ọlẹ lẹ.

²⁷Chajị, angịnyị nya Ohe Oluhye ịịwa a ri angịlẹ ká Ohe Oluhye ayịdang chụ, ene kọọ chị obyi omeme ọkpịbaa nyamwụ ọọwa ehe lẹ. Ịnyị a du ká angịịwa jẹ́ jaabwọ ká ụdụ nya ogbo nya obyi omeme ọkpịbaa nya Ohe Oluhye ọọwa lụmẹ kaka ba ẹ-ẹga nyanụ lẹ. Ẹla ọkpịbaa ọọwa ri yẹkẹẹ, ịKịrayịsị ayịdang kụ ẹpwụ ọkịlẹtụ nyanụ anụ ala iJentayịlị lẹ. ỊKịrayịsị ọọwa a du kanụ wẹẹ la ẹhị ọrịrịị-rịrị ọnyịịla gbe, ogbo nya Ohe Oluhye ọlịlahị myị́ lẹlẹ.

²⁸Ịnyị a du kaahị ayịdang jam ya ẹla nya Ohe Oluhye rụ́ ịKịrayịsị ọọwa je ọng myị́ ọng wuu lẹ. Ọọwa lẹ, ahị jam kpa ẹla ọjẹ́jẹ ọlẹ ká Ohe Oluhye ya hahị wuu, mẹ ang jẹ chajị nya ịKịrayịsị, juwa gbile ọng myị́ ọng ụbwọ ụ-ụrụ ịnyịnyị lẹlẹ. Chajị kahị ka bwula ọọwa họ ká ọng myị́ ọng lẹpwụ nyaa wuu ka jẹ́-ẹ nwa kaka la kpẹẹkpẹẹ jịra myị́ ẹ-ẹpwụ nya ịKịrayịsị lẹlẹ.

²⁹Ọọwa a ri ang odudu kaam ayịdang jam kpa ọngịrị ọtụka ọlẹ ká ịKịrayịsị kaa ya ham wuu, juwa maga nya ịlẹhị-ịlẹhị ẹ-ẹpwụ nya ụkụrwọ ọọwa ọhọhọ lẹlẹ.