Read idege ALA IkọLOSI 2 Bible Online

ALA IkọLOSI 2 - idege bible

ALA IkọLOSI 2

¹Am tịtọ kanụ ka jẹ́ jaabwọ kaam ayịdang jam họ ụkụrwọ la ọngịrị kaka ba, chajị nyanụ anụ ala iKolosi bala ọ-chajị nya ala ịLawodisiya bala ọ-chajị nya angịkịla ịlẹ wuu kị jẹ́m jéjé ẹ-ẹhị ẹnẹnẹhẹ lẹka ịnyịnyị.

²Ang odudu kam jam họ ịnyị ri chajị kaanụ angịịwa wuu ka jẹ́-ẹ la ẹjẹ ọkpụ́kpụ ẹ-ẹpwụ ọkịlẹtụ nyanụ, kaanụ wuu ka yẹ ri ọngọ ookpokpo bwula ọháha ọlala nyanụ nya ịlẹhị-ịlẹhị wuu. Chajị kanụ ka jẹ́-ẹ kpụ ụdụ nya ọ-jẹ́ myịmyị nya ịlẹhị-ịlẹhị ọlala, nya Ohe Oluhye bala ọ-la ẹla ọjẹ́jẹ chajị nya obyi omeme ọkpịbaa nya Ohe Oluhye. Kanụ ka myịmyị jẹ́-ẹ ri angị jẹ́ ịKịrayịsị,

³ọngọlẹ kọọwa ayịdang a ri ẹmwụ-enyi nya ẹla ọjẹ́jẹ bala ang ọjẹ́jẹ chajị nya Ohe Oluhye wuu la ịlọmwụ ịnyịnyị.

⁴M jam ya ala ịlẹ wuu jenu, chajị kanụ ka myị ju ọngọngọhẹ ọkịla ọlẹ kọ ka juwa warị kaka hụnụ ahị, bwula ẹla oyaya la ijẹẹhị ọhẹ-lọhẹ kpong-kpong kaka.

⁵Chajị, ọ ri nya ịlẹhị, am ayịdang lẹ, ḿ juwa tanụ la ugbinyịrọ nyam kokoo. Ma, m tị juwa tanụ ẹ-ẹpwụ nya olegu nyam. Lẹ, m jam chị ọkẹkẹnị ọtụka-ọtụka ju ọhọhọ nyanụ u-uhye nyọlẹ kanụ wẹẹ godayị kpakpakpa ẹ-ẹpwụ nya ọmyịmyị ọlala nyanụ ẹ-ẹga nya ịKịrayịsị lẹ.

⁶Chajị nya ọọwa lẹ, jaabwọ kaanụ ayịdang ye ịKịrayịsị iJisọsị wẹ lala Ọngọlanụ la lẹlẹ, anụ́-ụ juwa la ọhịhị nya ịKịrayịsị ọọwa ayịdang mẹ.

⁷Kanụ cheri kanụ juwa ya, agba wu eji gogo ẹ-ẹpwụ nya ịKịrayịsị, kanụ juwa nwụ́ ọhịhị nyanụ wuu hụrụ ịKịrayịsị, kanụ juwa la giri-giri ẹ-ẹpwụ nya ọmyịmyị ọlala nyanụ wuu jaabwọ kị mẹjẹẹnụ wẹ ene-ene mẹ. Kanụ juwa myị la obe o-ji Ohe Oluhye ji nya ịlẹhị-ịlẹhị ẹ-ẹpwụ nya ang myị́ ang lụka wuu mẹ.

⁸Anụ kpahị ju ịlọnụ ọgwọgụ chajị ká ọngọngọhẹ ka jẹ́-ẹ kpa ijẹẹhị ụhwahị ohideeji bwula abala nya ẹla ọjẹ́jẹ nya angịnyị ehe ọlẹ kị ka juwa kpa yẹẹnụ dada kokoo. Chajị, ụma nya ẹla ọjẹ́jẹ ọlịnyị ri ẹla ọjẹ́jẹ nya angịnyị ehe ọlẹ ká adịda kaa kpa ya je anyị nyaa erike-erike ịnyịnyị pyịyọọ bala ẹla ọjẹ́jẹ ọlẹ kọ kaa bwu ẹpwụtụbwọ nya alegu inyibyi nya odehe ọlẹ. Ẹla ọjẹ́jẹ ọọwa á bwu ẹpwụtụbwọ nya ịKịrayịsị ayịdang kpong-kpong ka.

⁹Chajị, ẹ-ẹpwụ nya ịKịrayịsị ọlẹ kị mama warị wẹ odehe ọlẹ lala ọngịnyị ehe, ụmụmẹ ọlala bala ang myị́ ang nya ọhịhị nya Ohe Oluhye ayịdang wuu a ji chị ọnụ jịra lẹlẹ.

¹⁰Lẹẹlẹẹ lẹ, ọhịhị nya Ohe Oluhye tị tịtị myị ẹpwụ nya ọkịlẹtụ nyanụ pwẹẹpwẹẹ bwula ịKịrayịsị ịnyịnyị lẹ. ỊKịrayịsị ọọwa a ri olegbeju ọgụgụ wuu ọlẹ kọ ji uhye nya ọngịrị nya eji ogbegbe wuu tụ, ọngịrị ọnyị myị ọnyị ọkịla wuu lẹlẹ.

¹¹Bwu ẹpwụtụbwọ nya ịKịrayịsị ọọwa, anụ ye ụwụwụ ọdada nya olegu ọlẹ kọ kaa bwu ẹpwụtụbwọ nya angịnyị ehe kaka lẹlẹ. Chajị ụwụwụ ọdada nya olegu nyanụ ọọwa bwu ẹpwụtụbwọ nya ịKịrayịsị ọlẹ kọ họ kaanụ ayịdang nyẹ ụhụ la ọhịhị onyogo nya ọhọbịrị ọhọhọ nyanụ wuu deeji lẹẹlẹẹ lẹ.

¹²Anụ ayịdang tị jẹ́ yẹkẹẹ, ụka ọlẹ kị hụnụ enyi Ohe lẹ, ọọwa mẹjẹ yẹkẹẹ, anụ gbu bala ịKịrayịsị, du kị junu eji tọọ lẹ. Ọọwa lẹ, anụ wuleji bwula igu ta ịKịrayịsị ịnyịnyị, bwula ọmyịmyị ọlala nyanụ ẹ-ẹga nya ụkụrwọ ọnyọọngịrị ọhọhọ nya Ohe Oluhye Ọngọlẹ kọ wule ịKịrayịsị ọọwa eji bwula igu wẹ lẹlẹ.

¹³Ịnyị lẹ, anụ angịlẹ kanụ ri angị gbugbu ene-ene ẹ-ẹpwụ nya olegu nyanụ bwula ịhọbịrị ịhọhọ nyanụ wuu bala ọlẹ kanụ ri ala iJentayịlị ị-da ụwụwụ-ka bwula ehile nya Ohe Oluhye ọlala ka nyanụ. Ma, lẹẹlẹẹ lẹ, Ohe Oluhye tị hu ọhịhị onyeewe nyamwụ hanụ bwula ịKịrayịsị, chajị nyọlẹ kọ hịnyọhi ịhọbịrị nyahị wuu hahị lẹ.

¹⁴Chajị, akama ọyẹyẹ nya eje owuwu nya ehile ọbịrịị bịrị bwula ịhọbịrị ịhọhọ nyahị ịlẹ wuu kị da ju ụ-ụpwụ tụụhị pyịpyị wuu lẹ, Ohe Oluhye yịlaa hiihi wuu gbanggbang lẹ. Chajị, Ohe Oluhye hu ọngịrị ọlẹ ká ehile ọọwa la wuu kpa kaka gu iloo ba okoji ta ịKịrayịsị ịnyịnyị lẹ.

¹⁵Chajị, ịKịrayịsị ọọwa kpakpakpa a ri ọngọlẹ kọ nu ọngịrị nya alegu inyibyi ịnyịịngịrị wuu bala ịnya alegbeju igbeji ịtụka nyaa wuu ila myị gbanggbang, ẹ-ẹpwụ nya ọkụrụ-kụrụ ọlẹ ká ịKịrayịsị la bwula igu ogbugbu u-uhye nya okoji, du kọ chị oyoyi jwaa ịwa wuu ị-ịlahị nya aluche lẹlẹ.

¹⁶Chajị nya ọọwa lẹ, anụ tụtụm myịmyị juwa ba ehile nya angịnyị ehe jẹ u-uhye nya ụma nya ang oriri lee ang ọnwanwa ọlẹ kị juwa tịtọ kanụ ka nwa bala oriri kaka, tụ ehile nya ang oriri ọtụka nya ẹka-ẹka lee ịnya ọya-ọya lee ịnya epwihi-epwihi, kaka ịnyịnyị.

¹⁷Chajị, ụma nya ang ịwẹ wuu ri ang ịlẹ kị juwa họ ụkụrwọ ene-ene lala ụrụrụ nya ang ọlẹ kọ juwa ka warị ị-ịlahị. ỊKịrayịsị ayịdang la ịlọmwụ a ri ọ-họ jịra nya ụrụrụ nya ang ịịwa wuu lẹlẹ.

¹⁸Chajị nya ọọwa lẹ, anụ myị ju oyaya nya angịwẹ kị wẹẹ kpa ọnụ họnụ ododu koo! Angịịwa ayịdang juwa yẹkẹẹ, ịwa nyị yọyị a-arụrụ lẹ, du kị juwa mẹjẹẹnụ yẹkẹẹ, anụ nyị kpa ịlọnụ keji ha angịnyị ehe ịlam-ịlam ododoodu mẹ bala o-juwa kpụ eteji ha alegu-ẹrụ nya Ohe Oluhye ịnyịnyị mẹ. Chajị, ụma nya angịnyị ịlịnyị ri angịlẹ kị juwa myịrị ịlaa dii ododu bwula irya nya ọngịnyị onyogo nya ọhọbịrị ọhọhọ ọlẹpwụ nyaa kem, kị juwa ba jẹ.

¹⁹Ụma nya angịnyị ịlịnyị ayịdang hụla ịlaa hwọọrịị hi ịKịrayịsị lẹ. ỊKịrayịsị ọọwa a tị ri olegbeju ọgbahị nya ịchọọchị ọlẹ kọ ri ugbinyịrọ nyamwụ lẹ. Ẹ-ẹpwụtụbwọ nya ịKịrayịsị ayịdang, ọng myị́ ọng nya ala ịchọọchị nya Ohe Oluhye wuu a kaa ye ọngịrị ọ-kpa nwanwa jaabwọ ká Ohe Oluhye ayịdang tịtọ lẹ. Chajị, jaabwọ ká ekpiiji bala ahwiiyo a kaa wu ugbinyịrọ nya ọngịnyị ehe ọlam-ọlam kpa wẹẹ, ịnyịnyị, ịKịrayịsị ayịdang a tịtị kaa wu ala ịchọọchị kị ri ugbinyịrọ nyamwụ ọọwa kpa lẹlẹ.

²⁰Anụ tị jẹ́ yẹkẹẹ, jaabwọ kaanụ ayịdang gbugbu ta ịKịrayịsị lẹlẹ, ọngịrị nya alegu inyibyi wuu á ka họnụ abwaabwọhẹ myị́ kaka. Ee lẹ, ịịyẹ a tị́ du kanụ tụtụm myịmyị juwa hịhị lala angịlẹ kanụ ri alodehe ịlẹ kị jẹ́ Ohe Oluhye kaka pyịyọọ wẹ? Ịịyẹ a tị́ du kanụ myịmyị tụtụm juwa ba ehile nya ịgọ nya ang ọchịchị nya angịnyị ehe jẹ myịmyị wẹ?

²¹Jaabwọ kị wẹẹ byinu yẹkẹẹ, “Anụ hu ang ọlẹ kpa ụ-ụbwọ nyanụ ka.” “Anụ kpa ụma nya ang oriri ọlẹ lee ọlaanyị ka ọnụ nyanụ kpong-kpong ka.” “Anụ yụbwọ nyanụ gu ang ọlẹ lee ang ọlaanyị ka” ịnyịnyị.

²²Ehile ịwẹ wuu ri ehile u-uhye nya ụma nya ang ịlẹ kị kaa bịrị-bịrị myị́ hi angịnyị ahyaahị. Angịnyị ehe ayịdang a wẹẹ kpa ẹla ọjẹ́jẹ nya ịlaa da ehile ịlịnyị ene kị wẹẹ maa jẹ angịkịla lẹ.

²³Ụka nya ọgbanyẹ-ọgbanyẹ lẹ, ó ri ká ọngịnyị ehe á chẹhị kaka yẹ jaabwọ ká ehile ịịwa juwa kaa kpa angịwẹ kaka kpụ eteji ha alegu-ẹrụ nya Ohe Oluhye bala jaabwọ kị kaa kpa ịlaa keji lụmẹ-lụmẹ ha angịnyị ehe ịlam-ịlam ododoodu bala jaabwọ kị kaa juwa yẹ ugbinyịrọ nya ịlaa ịwa ayịdang akama wuu, ọngọọwa ka me yẹkẹẹ, ẹla ọjẹ́jẹ nyị juwa ẹ-ẹpwụ nya ehile ịịwa ịnyịlẹhị. Ma, ẹ-ẹpwụ nya ẹla ịlẹhị-ịlẹhị tị lẹ, ehile ịịwa á ju apyobwuna ọhẹ-lọhẹ ka. Chajị, ehile ịịwa á jẹ́ kaa nwụ imyi nya ugbinyịrọ ọlẹpwụ nya ọngịnyị ehe ọhẹ-lọhẹ hyoo myị́ kpong-kpong ka.