Read idege ALA IkọLOSI 3 Bible Online

ALA IkọLOSI 3 - idege bible

ALA IkọLOSI 3

¹Jaabwọ ká Ohe Oluhye wuleenu eji bwula igu ta ịKịrayịsị lẹlẹ, anụ́-ụ juwa kpa irya nyanụ wuu tịtọ nya ang ịlẹ kị juwa e-epwoohe kem, ẹ-ẹga ọlẹ ká ịKịrayịsị ayịdang hụhụ lalẹ u-upwuriri nya Ohe Oluhye mẹ.

²U-uhye nya ang-abwọ ịlẹ kị juwa e-epwoohe kem, anụ ka juwa me imahị nyaa lẹ. Anụ me imahị u-uhye nya ang-abwọ ilodehe ọlẹ kpong-kpong kaka.

³Chajị ọhịhị onyogo nya ọhọbịrị ọhọhọ ọlẹpwụ nyanụ gbugbu lẹlẹ, ọhịhị onyeewe nyanụ kpịbaa ẹ-ẹpwụtụbwọ nya ịKịrayịsị ẹ-ẹga nya Ohe Oluhye ayịdang lẹ.

⁴Ụka ọlẹ ká ịKịrayịsị ọngọlẹ kọ ri ẹmwụ-enyi nya ọhịhị nyahị ọọwa ka chị ịlọmwụ ehe lẹ aalẹ, anụ ayịdang a tịtị ka juwa tọọ la ogbo ẹbyẹbyị nyamwụ ịnyịnyị lẹlẹ.

⁵Chajị nya ọọwa lẹ, anụ́-ụ nwụ irya nya imyi nya ang nya ugbinyịrọ nya ọhịhị nyanụ olodehe ọlẹ mẹ. Kanụ cheji ba ang onyobyi ọhọhọ lala ụya ọhọhọ, owuru ọlala ka a-abwẹla ọhọhọ, uhila nya ụya ọhọhọ, imyi nya ang onyobyi ọhọhọ ọlala, imajẹ ọlala ẹ-ẹga nya ang nya angịkịla. Ang ọlẹ ká ọngọ la imajẹ wẹẹ ya ẹhị rịrị a kaa yẹ ri ohe ojiga ọlẹ kọ kaa juwa gbịgba ha lẹlẹ.

⁶Ọọ-la ang inyibyi ịlịịwẹ ịlẹ ká angịlẹ kị kaa ju ihi nya Ohe Oluhye ka, kaa họ, a du ká agbama nya Ohe Oluhye juwa ka wuru jahị daa lẹlẹ.

⁷Ene-ene lụka ọlẹ kanụ ri anyịhị nya ang inyibyi ịhọhọ ịlịịwẹ wẹẹ lẹ, anụ juwa kaa dawa ẹ-ẹpwụ nya ịhọbịrị ịhọhọ ịịwa ịnyịnyị.

⁸Ma, lẹẹlẹẹ kanụ ri ịnya ịKịrayịsị lẹlẹ, anụ́-ụ juwa cheji ba ang ịwẹ wuu mẹ. Anụ myị ká ang lala agbama ojuju, ikẹjẹ-awụrụ ọlala, irya nya ọkwọ ọlala jahị da angị ịkịla, ẹla onyobyi oyaya kpa bịrị ọngọkịla lee uguru nya oja ojaja wuu, a bwu ọnụ nyanụ kpehe kpong-kpong kaka.

⁹Anụ juwa me ọnọọkịla ju awụlẹ kaka ịnyịnyị. Chajị, anụ pwọ ọngịnyị onyogo nya ọhọbịrị ọhọhọ ọlẹpwụ nyanụ deeji bala abwẹla inyibyi ịhọhọ nyamwụ wuu lẹ.

¹⁰Chajị, ọlẹẹlẹẹ lẹ, anụ hu ọngịnyị onyeewe ọlẹpwụ nya ịKịrayịsị dakụrụ ugbẹnyị lẹ. Ohe Oluhye Ọngọlẹ kọ hu ọhịhị onyeewe ọọwa hanụ, a tị wẹẹ nwụ ọhịhị ọọwa ma onyeewe ẹ-ẹpwụ nya ang ọjẹ́jẹ chajị nya ịlọmwụ, chajị kanụ ka jẹ́-ẹ la abwụma ọkpẹẹkpẹẹ nya Ohe Oluhye nyanụ lẹlẹ.

¹¹Ụka kahị pwụ iwe-ahụrụ ọwẹ lẹ aalẹ, ịngịngịhyẹ á ri ang ọdatị ẹ-ẹga nya ọngọngọhẹ tụtụm kaka. Ó-riri ká ri ala iJuu riri lee o-ri ala iJentayịlị lee o-ri ọngọ da ụwụwụ dada lee o-ri ọngọ da ụwụwụ da ka lee o-ri ọngọ wụrụ ẹhị wụrụ ka lee ó-riri ká kaa họ abwẹla woowoo lala iyo ịlẹpwamẹ wẹwẹ lee o-ri ọnyọhị riri lee ó-riri ká ri ọnyọhị riri ka aalẹ, ahị wuu la ookpokpo ị-ịlahị nya Ohe Oluhye. Chajị, ịKịrayịsị ọngọlẹ kọ ji ẹpwụ ọkịlẹtụ nya ọng myị́ ọng nyahị wuu, a ri Amkpaa nyahị ahị angịnyị nya Ohe Oluhye wuu lẹlẹ.

¹²Lẹẹlẹẹ lẹ, jaabwọ kanụ ri angịlẹ ká Ohe Oluhye chụchụ kanụ ka ri angị ịgọgọ nyamwụ ịlẹ kanụ họ́ọ lụmẹ lẹlẹ, anụ́-ụ juwa da abwẹla ọnyịịla ọhọhọ ịlẹ kụrụ ụka wuu mẹ. Chajị nya ọọwa lẹ, anụ́-ụ juwa yẹ awụlẹ ahyẹẹrwẹrwa bala o-juwa họ awụlẹ ọnahị bala o-juwa la dụmwọ bala o-juwa la wụlẹlẹ bala o-juwa la ugbodu ojuju ẹ-ẹpwụ nya ang myị́ ang wuu mẹ.

¹³Kanụ juwa la ugbodu ojuju onyudiyo ẹ-ẹga nya awụlẹ mẹ. Ó ri ká angịhyẹ lẹpwụ nyanụ á họ ẹla o-hi awụlẹ ọnụ juwa aalẹ, anụ́-ụ juwa la ọhịnyọhi ha awụlẹ mẹ. Chajị jaabwọ ká Ọngọlahị ayịdang hịnyọhi ịhọbịrị ịhọhọ nyanụ hanụ wẹẹ, ịnyịnyị, anụ tịtị ka juwa hịnyọhi ọhọbịrị nya awụlẹ ha awụlẹ pyii lẹlẹ.

¹⁴Ang ọgụgụ wuu ri yẹkẹẹ, anụ́-ụ juwa la ọháha nya ịlẹhị-ịlẹhị ẹ-ẹga nya awụlẹ mẹ. Chajị, ọháha ọlala ọlịịwẹ a ri ochiri ọlẹ kọ kaa wu ang myị́ ang wuu kpa myị́ ẹ-ẹpwụ nya ọtụchawụlẹ ọkpẹẹkpẹẹ lẹlẹ.

¹⁵Anụ́-ụ myị ká okpunyi nya ịKịrayịsị ọlẹ kọ ya hanụ, a juwa kpanụ ẹ-ẹpwụ nya ọkịlẹtụ nyanụ ụka wuu mẹ. Chajị, ajị nya okpunyi ọlịịwẹ ọ-ka lala, a du ká Ohe Oluhye wụrụụnụ kanụ kaka ri ọngịnyị ọngọ ookpokpo ẹ-ẹpwụ nya ugbinyịrọ nya ịKịrayịsị ọlẹ kọ ri ịchọọchị nya Ohe Oluhye lẹ. Lẹ, anụ́-ụ juwa ji Ohe Oluhye obe ụka wuu mẹ.

¹⁶Anụ́-ụ myị ká ẹla nya ịKịrayịsị a myị ẹpwụ ọkịlẹtụ nyanụ pwẹẹpwẹẹ ụka wuu, kanụ juwa kpa ẹla nya Ohe Oluhye mẹ ang jẹ awụlẹ, juwa kpa chị awụlẹ eje obyi ịnyịnyịịnyị ẹ-ẹpwụ nya ẹla ọjẹ́jẹ mẹ. Kanụ juwa mwu eje ịlẹ kị bwu ẹpwụ nya Eje Ọnyịịla ọlụpwụ ịgọgọ lee eje ọlụpwụ lee eje nya ikorọsị ọlẹ ká Olegu Ịgọgọ nya Ohe Oluhye juwa kpanụ mwu gwogbo ha Ohe Oluhye la obe ojiji ẹ-ẹpwụ ọkịlẹtụ nyanụ mẹ.

¹⁷Ẹ-ẹpwụ nya ang myị́ ang ọlẹ wuu kanụ ka họ, ó ri kọ ri ẹla oyaya bwu ọnụ riri lee ẹla myị́ ẹla ọhọhọ wẹwẹ, anụ́-ụ juwa họọ la ọgụ ọlẹ kọ ka kpa ẹnyị ọnyịịla nya Ọngọlahị iJisọsị kele ka uhye, kanụ juwa ji Ohe Oluhye Adịda obe bwula ịKịrayịsị ụka wuu ịnyịnyị mẹ.

¹⁸Anụ anyang ịhụ, anụ́-ụ juwa kpa ịlọnụ kele keji ha ọrụ nyanụ jaabwọ kọ chịla ị-ịlahị nya Ọngọlahị la mẹ.

¹⁹Anụ ịrụ-ịhụ, anụ́-ụ la ọháha ẹ-ẹga nya ịhụ nyanụ yẹẹyẹẹ mẹ. Anụ kpa ịhụ nyanụ la ụbwọ ọnyọọngịrị koo!

²⁰Anụ anyị anjwo, anụ́-ụ juwa ju ihi nya ịnanụ bala adanụ anyị ẹ-ẹpwụ nya ang myị́ ang wuu mẹ. Chajị, ihi ojuju ọlịnyị a kaa kpụ Ọngọlahị ịpyọ lẹ.

²¹Anụ adịda ị-ma anyị, anụ juwa du agbama ju anyị nyanụ ka. Ó ri ịnyị ka aalẹ, ọkịlẹtụ ka kpaa enyi.

²²Anụ anchẹ i-ji ekpeleji nya ayịbaba, anụ́-ụ juwa ju ihi nya angịlẹ kị ri ayịbaba nyanụ odehe ọlẹ yẹẹyẹẹ ẹ-ẹpwụ nya ang myị́ ang wuu mẹ. Anụ juwa ju ihi nya ayịbaba nyanụ anyị i-ijata nyaa chajị kịịwa angịnyị ehe kem ka wahị ọnyịịla hanụ ka. Ma, ọkọkọ nya ọọwa lẹ, anụ́-ụ juwa myị ẹrụ nyanụ ụka wuu la ọkịlẹtụ ookpokpo la uhi nya Ọngọlahị la ojuju mẹ.

²³Ụkụrwọ myị́ ụkụrwọ ọlẹ kị ya, anụ nyị họ mẹ lẹ, anụ́-ụ juwa kpa ọngịrị nyanụ wuu họ ụkụrwọ ọọwa lala anụ nyaa juwa họọ ha Ọngọlahị la ayịdang mẹ. Anụ họọ lala ụkụrwọ nya ọngịnyị ehe ọhẹ-lọhẹ kaka.

²⁴Chajị, anụ ayịdang jẹ́ yẹkẹẹ, ẹ-ẹpwụtụbwọ nya Ọngọlahị la, anụ ka ye ang ugu nya ahị ọwawa lala uri nyanụ lẹlẹ. Chajị, Ọngọlahị ịKịrayịsị ayịdang, anụ wẹẹ myị ẹrụ ha lẹ.

²⁵Ọng myị́ ọng ọlẹ kọ juwa họ ang onyobyi, Ohe Oluhye ka nwọọ uri nya ang onyobyi nyamwụ ọọwa pyii, chajị, Ohe Oluhye á ri Ọngọlẹ kọ kaa chị oku nya ẹla hiigu ha ọngọhẹ datị hi ọngọkịla kpong-kpong ka.