Read idege ALA IkọLOSI 4 Bible Online

ALA IkọLOSI 4 - idege bible

ALA IkọLOSI 4

¹Anụ ayịbaba nya anchẹ anyị, anụ́-ụ juwa kpa anchẹ ilekpeleji nyanụ jaabwọ kọ chịla yẹẹyẹẹ mẹ. Anụ́-ụ kpịtịya mẹ! Anụ ayịdang tịtị juwa e-ekpeleji nya Ayịbaba nyanụ ọlẹ kọ juwa e-epwoohe ịnyịnyị!

²Anụ cheri kanụ godayị kpakpakpa, kanụ juwa gbeji giri-giri kịlahị-ịlahị ẹ-ẹpwụ nya abwọ ọrịrị la obe o-juwa ji Ohe Oluhye ji mẹ.

³Anụ́-ụ juwa raabwọ chajị nyahị, ká Ohe Oluhye ka wụrụ ụgbẹyị da pwọọ hahị kahị ka jẹ́-ẹ juwa kpa ẹla oyaya myị́ da ẹla ịlẹhị ọkpịbaa nya ịKịrayịsị wụlẹ je angịnyị ehe gede-gede mẹ. Ẹrụ ọnyịịla ọọwa oyaya pyẹ a du kị jum agba lẹẹ lẹ.

⁴Anụ́-ụ bịlẹ Ohe Oluhye kọ ka ya ọngịrị ham chajị kam ka jẹ́-ẹ ya ẹla ọọwa dodehe gede-gede myị́ je angịnyị jaabwọ kọ chịla mẹ.

⁵Anụ́-ụ juwa kpa ẹla ọjẹ́jẹ la ọhịhị nyanụ ị-ịlahị nya angịlẹ kị jẹ́ Ohe Oluhye kaka mẹ. Kanụ cheri kanụ juwa kpa ụka myị́ ụka, ọlẹ wuu kanụ la họ ụkụrwọ ọnyịịla ha Ohe Oluhye mẹ.

⁶Anụ́-ụ juwa kpa ẹlẹlẹ ọgẹnẹ-gẹnẹ ya ụma nya ẹla ọlẹ kọ ka ju apyobwuna ha angịkịla ụka wuu mẹ. Chajị kanụ ka jẹ́-ẹ wẹ ẹla ọlẹ kọ pwoku ẹ-ẹga nya ọng myị́ ọng wuu mẹ.

⁷ITikikọsị juwa warị kaka janụ oja chajị nya ọhịhị nyam lẹ. ITikikọsị ọwẹ ayịdang ri ọnyadahị ẹ-ẹpwụ nya ịKịrayịsị ọlẹ kọ háahị lụmẹ. Ọ ri ọlẹrụ ọchịla o-hu ọkịlẹtụ ha bala ọnchẹ ọ-lala ahị-ahị ayịdang ẹpwụ nya Ọngọlahị.

⁸Ang odudu kam lẹẹ du iTikikọsị ẹrụ warị wẹ ẹga nyanụ ri, chajị kọ ka warị kaka ya jenu jaabwọ ká iwe-ahụrụ nyahị la bala kọ warị kaka kpụ́ ọkịlẹtụ nyanụ anụ ayịdang ẹjẹ ịnyịnyị.

⁹Am wẹẹ du Ọnẹsịmọsị ọlẹ kọ ri ọngọhẹ lẹpwarịrị nyanụ ba iTikikọsị warị ịnyịnyị. Ọwa ayịdang ri ọnyadahị ọchịla o-hu ọkịlẹtụ ha bala ọngọlẹ kọ háahị lụmẹ ẹ-ẹpwụ nya ịKịrayịsị. Ịwa angịwẹ a ka ya jenu ang myị́ ang ọlẹ kọ lẹẹ họ ẹ-ẹga nyahị lẹlẹ.

¹⁰Arisitakọsị ọlẹ kọ ri ọlagba lala am-am am nyị da ọnụ chịnụ ha ọwa bala ịMakị ọlẹ kọ ri ọnyị nya ọọnịna nya ịBanabasị ịnyịnyị.

¹¹IJisọsị ọlẹ ká ẹnyị ọkịla nyamwụ ri ịJọsịtọs ya, am nyị da ọnụ chịnụ ịnyịnyị. Ịwa angịnyị angị ịta ịlẹ ụbwaa a ri ala iJuu angịlẹ kị kaa da ụwụwụ ịlẹ kị jam ẹ-ẹpwụ nya ụkụrwọ nya ẹrụ ọnyịịla chajị nya ịpyị Adịrahụ nya Ohe Oluhye oyaya pyẹ ọlẹ tam lẹlẹ. Ọhọhọ nyaa wuu kaa hu ẹjẹ ọkpụ́kpụ ham lụmẹ.

¹²Epafụrasị ọlẹ kọ ri ọngọhẹ lẹpwarịrị nyanụ ya am nyị da ọnụ chịnụ ha ọwa ịnyịnyị. Ọwa ayịdang ri ọnchẹ ọ-myị ẹrụ nya ịKịrayịsị iJisọsị ịnyịnyị. Ọ kaa raabwọ kpịtịya nyanụ nya ịlẹhị-ịlẹhị ụka myị́ ụka. Abwọ ọrịrị nyamwụ ri ká Ohe Oluhye ka danụ ụbwọ, chajị kanụ ka jẹ́-ẹ nwa kaka ri adam ọlẹng ẹ-ẹpwụ nya ẹla nya Ohe Oluhye, kanụ ka jẹ́-ẹ jẹ́ ang ọlẹ kọ ri irya nya Ohe Oluhye ẹ-ẹpwụ nya ang myị́ ang nyanụ wuu myị́ ịnyịnyị.

¹³Am ayịdang ri ibeenu nyamwụ yẹkẹẹ, Epafụrasị ọwẹ ri ọngọlẹ kọ juwa họ ụkụrwọ yẹkpẹ yẹpwụ o-oluhye nyanụ anụ ayịdang bala ala ịLawodisiya bal ala ịHayẹrapọlisi lụmẹ ụka wuu.

¹⁴ILuku ọlẹ kọ ri idongkita ọlẹ kọ hám lụmẹ ya, am nyị da ọnụ chịnụ ha ọwa bala iDimasị ịnyịnyị.

¹⁵Anụ́-ụ da ọnụ chị anyadahị ẹ-ẹpwụ nya ịKịrayịsị ịla ịLawodisiya ham ọgwọgụ mẹ. Anụ́-ụ da ọnụ chị iNimfa bala angịlẹ kị kaa họ ịchọọchị ẹ-ẹpwa nyamwụ wuu ham mẹ.

¹⁶Ụka kanụ wa ileta ọlẹ kpá lẹ, anụ́-ụ ya du kele kịla ala ịchọọchị nya ịLawodisiya kị ka wọọ ụ-ụwa ịnyịnyị pyii mẹ. Kanụ tịtị ye ileta ọkịla bwu ẹpwụtụbwọ nya ala ịLawodisiya kanụ wọọ je ala ịchọọchị nyanụ anụ wuu ịnyịnyị mẹ.

¹⁷Anụ byi Aakipọsị, am nyị yẹkẹẹ, “Ahụ Aakipọsị, ụkụrwọ ọlẹ kị ya jung ụ-ụbwọ ya, ahụ nyị họ ha Ọngọlahị la mẹ lẹ, aa họọ jịra wuu mẹ.”

¹⁸Am ịPọlụ ayịdang a lẹẹ kpa ụbwọ nya ịlọm da ụpwụ ọlẹ kaka da ọnụ chịnụ wuu lẹ. Anụ́-ụ kpịtịya nyam am olube nya agba mẹ. Ká ọnahị nya Ohe Oluhye a juwa tanụ wuu mẹ.