Read idege 1 ALA ỊTẸSALONIKA 1 Bible Online

1 ALA ỊTẸSALONIKA 1 - idege bible

1 ALA ỊTẸSALONIKA 1

¹Ụpwụ ọlẹ jam bwu ẹga nyam am ịPọlụ bala iSilivanọsị bala iTimoti warị wẹ ẹga nyanụ anụ ala ịchọọchị ịlẹ kanụ juwa ọ-ọpyị nya ịTẹsalonika, ịlẹ kanụ ri angịnyị nya Ohe Oluhye Adịda bala angịnyị nya Ọngọlahị iJisọsị ịKịrayịsị. Ká ọnahị bala okpunyi nya Ohe Oluhye a juwa tanụ mẹ.

²Ahị kaa ji Ohe Oluhye obe ụka wuu chajị nyanụ bala ọ-kaa kpịtịya nyanụ ụka myị́ ụka ẹ-ẹpwụ nya abwọ ọrịrị nyahị ịnyịnyị.

³Chajị, ahị kaa kpịtịya nyanụ ị-ịlahị nya Ohe Oluhye ịnyịnyịịnyị, chajị nyọlẹ kanụ juwa kpa ọmyịmyị ọlala nyanụ họ ụkụrwọ ha Ohe Oluhye bala o-juwa nwụ ịlọnụ la ụkụrwọ nya ịlẹhị-ịlẹhị, chajị nya ọháha ọlẹpwụ nyanụ bala ọlẹ kanụ juwa kpẹhị ọrịrịị-rịrị ọnyịịla ọlẹ kanụ la ẹ-ẹga nya Ọngọlahị iJisọsị ịKịrayịsị godayị rịrị kpakpakpa ẹ-ẹpwụ nya ẹla nyamwụ ịnyịnyị.

⁴Chajị, ahị ayịdang jẹ́ myịmyị yẹkẹẹ, anụ ri anyadahị ẹ-ẹpwụ nya ịKịrayịsị ịlẹ kanụ há Ohe Oluhye lụmẹ, du kọ chụnụ ha ịlọmwụ ịnyịlẹhị lẹ.

⁵Ụka ọlẹ kahị kpa ẹrụ ọnyịịla ọlẹ warị kaka ya pyẹ ẹ-ẹpwarịrị nyanụ lẹ, ẹẹlaọlọnụ ọlam-ọlam ọwẹ kem, ahị kpa ya ẹla ọọwa dodehe ka. Ma, ahị kpa ọngịrị nya Ohe Oluhye bala ọngịrị nya Olegu Ịgọgọ da ẹla ọọwa wụlẹ ya jenu, bwu ẹpwụ nya o-jẹ́ myịmyị nya ịlẹhị-ịlẹhị ọlẹ kaahị ayịdang la u-uhye nya ẹla ọọwa ene kahị yoo dodehe jenu la ọngịrị-ọngịrị. Anụ la ịlọnụ tị jẹ́ ụma nya ọhịhị ọlẹ kaahị ayịdang ya chị ehe ẹ-ẹpwarịrị nyanụ chajị nyọka hiigu há hanụ ẹ-ẹpwụ nya ẹla nya Ohe Oluhye ọlẹ, ụka ọọwa ịnyịnyị!

⁶Ọọwa lẹ, anụ juwa gbịla ọhịhị nyahị bala o-juwa gbịla ọhịhị nya Ọngọlahị la ayịdang lụka ọọwa ẹ-ẹpwụ nya ọngịnyị nya Ohe Oluhye oriri lẹlẹ. Chajị, anụ ye ẹla nya Ohe Oluhye ọọwa ọlẹ kahị ya jenu ẹ-ẹpwụ nya ọ-tụ pyịpyị ọtụka-ọtụka la ọkẹkẹnị ọlẹ ká Olegu Ịgọgọ hu hanụ.

⁷Bwula ọhọhọ nyanụ ọọwa lẹ, anụ ri ang o-ju ẹjẹẹ ha angị myịmyị ịkịla wuu ịlọpyị nya ịMẹsịdoniya bala ịla Akaya ịnyịnyị lẹlẹ.

⁸Chajị, ọ́ ba oo-ri yẹkẹẹ, ẹla nya Ọngọlahị juwa gba kpehe bwu ọnụ nyanụ ụ-ụwa ọ-ọpyị nya ịMẹsịdoniya bala Akaya kem kaka. Ma, ọmyịmyị ọlala nyanụ ẹ-ẹga nya Ohe Oluhye ru ọ hi ju ka ẹga myị́ ẹga wuu, du kọ dọmwụ baba hahị nyọka ya ẹlẹlẹhẹ je angịnyị ene kị ka jẹ́ ang chajị nya ọ-họ hiigu nyanụ kaka.

⁹Chajị, iru nya angịnyị lụmẹ-lụmẹ juwa kpa ụma nya oyeye ọlẹ kanụ yehi hiigu-hiigu ja oja ju ka ẹga myị́ ẹga wuu bala jaabwọ kaanụ ayịdang yẹ irya da bwu ẹpwụ nya ijiga ịkpụ́kpụ nyanụ wuu, ene kanụ-ụ myị la Ohe Oluhye bala o-juwa myị ẹrụ ha Ohe Oluhye ọlẹ kọ juwa hịhị bala o-ri Ohe Oluhye nya ịlẹhị-ịlẹhị lẹlẹ.

¹⁰I ya dodehe ịnyịnyị, jaabwọ kaanụ ayịdang juwa kụ ọlọyị gbe ọwẹwẹ nya Ọnyẹwẹ nya Ohe Oluhye bwu epwoohe. Ọnyẹwẹ ọọwa a ri ọngọlẹ ká Ohe Oluhye wuleji bwula igu ọlẹ kọ ri iJisọsị ọngọ gbahị kpehe bwu ẹpwụ nya agbama nya Ohe Oluhye ọlẹ kọ juwa ka warị jahị da alọhọbịrị lẹlẹ.