Read idege 1 ALA ỊTẸSALONIKA 2 Bible Online

1 ALA ỊTẸSALONIKA 2 - idege bible

1 ALA ỊTẸSALONIKA 2

¹Anụ anyadam ẹ-ẹpwụ nya ịKịrayịsị, anụ ayịdang tị́ jẹ́ yẹkẹẹ, ọwẹwẹ nyahị ọlẹ kahị wẹ kaka họ ụkụrwọ nya ẹla nya Ohe Oluhye oyaya junu lẹ, ó ri ang ododu kpong-kpong ka.

²Ịnọ, ọ ri nya ịlẹhị yẹkẹẹ, ị tụụhị pyịpyị bala ọ-chị oyoyi ju hi lụmẹ ụ-ụwa i-iFilipayị ene kahị-ị warị wẹ epweji nyanụ jaabwọ kanụ jéjé ene-ene lẹ. Ma, ụka ọọwa, Ohe Oluhye tị hu ẹjẹ ọbyịbyị hahị, du kahị ya ẹrụ ọnyịịla nyamwụ dodehe jenu ị-ịlahị nya aluji ị-tụụhị pyịpyị ịtụka ịịwa myị́.

³Chajị, ẹrụ ọnyịịla ọlẹ kahị kpa warị kaka junu ọhụ lụka ọọwa lẹ, ahị́ ya ẹla ọọwa bwu ẹpwụ nya irya ụhwahị lee irya ọ-chịrị lee ijẹẹhị ọhẹ-lọhẹ kpong-kpong ka.

⁴Ma, ọkọkọ nya ọọwa lẹ, jaabwọ ká Ohe Oluhye ayịdang a dahịhileehi ene kọọ tụụbwọ hi ụkụrwọ nya ẹrụ ọnyịịla ọ-kpa ya pyẹ nyamwụ ọlẹ juhi ụ-ụbwọ lẹ, ahị́ kaa ya ẹla ọọwa chajị nyọka kpụ angịnyị ehe ịpyọ ka. Ma, jaabwọ kọ ka kpụ Ohe Oluhye ayịdang ịpyọ kem, ahị kaa ya lẹ. Chajị, Ohe Oluhye ayịdang a ri Ọngọ kaa wụla irya ọlẹpwụ ọkịlẹtụ nyahị wuu yẹ jịra myị́ lẹ.

⁵Chajị, ụka ọhẹ-lọhẹ á juwa ọlẹ kaahị ayịdang kaa kpa ẹlẹlẹ ọgẹnẹ-gẹnẹ nyahị juwa mwụụnụ ju kpong-kpong ka. Lee, ọ-kpa ijẹẹhị ọhẹ-lọhẹ chị ang ke ẹhị ọ-chị nyanya nyahị kpong-kpong ka ịnyịnyị, jaabwọ kaanụ la ịlọnụ jéjé ene-ene lẹ. Ohe Oluhye ayịdang ri ibeenu nyahị ẹ-ẹpwụ nya ẹla ọọwa.

⁶Ụka ọọwa lẹ, ahị ayịdang á tị tịtọ nya o-ya dodehe ọnyịịla o-bwu ọnụ nya ọngịnyị ehe ọhẹ-lọhẹ ka, tụụnụ anụ ayịdang lee angịnyị angịkịla wuu ịnyịnyị. Ịnọ, ọ ri nya ịlẹhị yẹkẹẹ, ó ri kọ háahị, ahị ayịdang ka kpa iwe-ahụrụ nya o-ri ọlẹrụ ọnyịịla nya ịKịrayịsị ọlẹ lẹ, juwa me ụma nya ang ọlẹ kanụ ka họ hahị pyii danụ myị́.

⁷Ma, ọkọkọ nya ọọwa lẹ, ahị tụụbwọ hi ịlọhị deeji ẹ-ẹpwarịrị nyanụ, jaabwọ ká ịnịna ọ-ma ọnyị, kaa kpa ịlọmwụ keji, juwa kpẹhị rịrị anyị nyamwụ.

⁸Ịnyị lẹ, jaabwọ ká iwoo nya o-juwa kpẹhị rịrịịnụ yẹẹyẹẹ bwula ọháha ọlọkịlẹtụ nyahị wuu lụmẹ ẹ-ẹpwụ nyahị lẹ, ahị́ nwụlanọ nyọka ya ẹrụ ọnyịịla ọlẹ jenu papịla ịịwẹ kem ka. Ma, ahị nwụlanọ kahị ka kpa ọhịhị nyahị lẹpwụ-lẹpwụ wuu myị ẹrụ hanụ ịnyịnyị. Chajị, anụ ri angị háahị há lụmẹ ka kpoye.

⁹Chajị, anụ anyadahị ẹ-ẹpwụ nya ịKịrayịsị la ịlọnụ ka kpịtịya jaabwọ kaahị ayịdang juwa kaa họ ụkụrwọ bala o-juwa nwụ ịlọhị la ụkụrwọ nya ịlẹhị-ịlẹhị lodu bala alẹnụ nyọka da ịlọhị ụbwọ ịnyịnyịịnyị, chajị kahị ka ri olo ọ-yẹ rịrịịnụ lụka ọlẹ kahị juwa ya ẹrụ ọnyịịla nya Ohe Oluhye ọlẹ pyẹ junu kpong-kpong ka.

¹⁰Anụ la ịlọnụ ri ibeenu nyahị bala Ohe Oluhye ịnyịnyị yẹkẹẹ, ụma nya abwẹla ọlẹ kọ la ịgọgọ bala ọlẹ kọ ri abwẹla ọnyịịla bala abwẹla ọlabyị ọhẹ-lọhẹ kpong-kpong ka kem, ahị nyaa ya chị ehe ị-ịlahị nyanụ anụ angị myịmyị lụka ọọwa lẹ.

¹¹Chajị, anụ jẹ́ yẹkẹẹ, jaabwọ ká adịda ọ-ma ọnyị kaa kpa ọnyị nya ịlọmwụ kpangga, ahị nyaa tịtị kpanụ lụka kahị juwa tanụ lẹ. Ịnyị a du kahị juwa kpa ẹla nya Ohe Oluhye gbile ọng myị́ ọng lẹpwarịrị nyanụ ụbwọ ụ-ụrụ bala o-juwa kpa ẹla ọọwa junu ọhụ bala o-juwa kpa danụ uya nyọka họ ẹla nya ịlẹhị ọlẹ hiigu-hiigu ịnyịnyị ụka ọọwa lẹ.

¹²Chajị ká ọọwa ka jẹ́-ẹ kpanụ kaka la ọhịhị ọchịla-chịla opwoku ị-ịlahị nya Ohe Oluhye lala angịlẹ ká Ohe Oluhye ọọwa be ẹkọ wụrụ, kanụ ka jụ ka ẹpwụ nya ịpyị adịrahụ nyamwụ bala ọ-ka bá ẹbyẹbyị nya ogbo nyamwụ bá la tọọ ịnyịnyị lẹlẹ.

¹³Ang ọkịla ọlẹ kahị kaa ji Ohe Oluhye obe ụka wuu chajị nyanụ myịmyị ri yẹkẹẹ, ụka ọlẹ kaanụ ayịdang ye ẹla nya Ohe Oluhye ọlẹ kanụ wo bwu ọnụ nyahị lẹ, ánụ ye ẹla ọọwa lala ẹla o-bwu ọnụ nyahị ahị angịnyị ehe ka. Ma, anụ ye ẹla ọọwa lala ẹla nya ịlẹhị ọlẹ kọ bwu ọnụ nya Ohe Oluhye la ịlọmwụ jaabwọ kọ la ịnyịlẹhị. Chajị, ẹla nya Ohe Oluhye ọọwa a ri ang ọlẹ kọọ wẹẹ họ ụkụrwọ ẹ-ẹpwụ nya ọhịhị nyanụ anụ angị myị la Ohe Oluhye wuu lẹ.

¹⁴Ọọwa lẹ, anụ anyadam ẹ-ẹpwụ nya ịKịrayịsị a ri angị juwa họ abwẹla ọnyịịla dịrẹ angịnyị nya ịKịrayịsị ịla ịchọọchị nya Ohe Oluhye ịlẹ kị juwa ọ-ọpyị nya iJudiya wuu lẹlẹ. Chajị, anụ ayịdang yẹ akama ọtụka bwula ọ-tụ pyịpyị nya aluji nyanụ ịlụpwọma nyanụ jaabwọ kịịwa la ịlaa yẹ akama ọlẹ ịnyịnyị, bwu ẹpwụtụbwọ nya ala iJuu aanaa.

¹⁵Ala iJuu ịịwa a ri angịlẹ kị nwụ Ọngọlahị iJisọsị bala alọmwụ nya Ohe Oluhye inyogo wuu lẹ. Ịwa a myịmyị tụụhị pyịpyị, nyiihi epepe o-oluhye nya ẹrụ ọnyịịla ọlẹ o-ya pyẹ ịnyịnyị lẹ. Ị́ ri angị họ ẹla kpụ Ohe Oluhye ịpyọ kpong-kpong ka. Ala iJuu ịịwa á myịmyị ri angị myị angịnyị angịkịla kpong-kpong ka.

¹⁶Ịnyị a du kị juwa kaa kuhi iwe ịnyịnyịịnyị chajị kahị ka jẹ́-ẹ kpa ẹrụ ọnyịịla ọlẹ kaka ya je ala iJentayịlị kị ka bwula ọọwa chịda kpong-kpong kaka lẹlẹ. Ọhọhọ nya ala iJuu ịịwa wuu a ri ang ọ-kpa ịhọbịrị ịhọhọ lụmẹ ịnyịnyịịnyị nyaa kaka wu ẹpwụ kpọng-kpọng gu ụka gu ụka lẹlẹ. Ọlịnyị a du ká agbama nya Ohe Oluhye ayịdang tịtị wẹẹ wuru jahị daa ugbẹnyị kwiwa nya ọhọbịrị nyaa ọọwa lẹlẹ.

¹⁷Ma, jaabwọ kaahị bala anụ anyadahị ẹ-ẹpwụ nya ịKịrayịsị chị ebwo hi awụlẹ lụka o-kpii lẹ, ịnyị a du kahị jam charịnya nyanụ nya ịlẹhị-ịlẹhị bala o-jam wu iwoo nyọka yẹnụ yẹ ẹ-ẹhị myịmyị lẹlẹ. Chajị, ahị chị ebwo hi awụlẹ ụ-ugbinyịrọ odu ịnyị, ọkịlẹtụ nyahị bala anụ wuu ji ẹga ookpokpo pyịyọọ.

¹⁸Chajị nya ọọwa lẹ, ahị tịtọ nya ịlẹhị-ịlẹhị nyọka warị kaka yẹnụ. Am ịPọlụ ọlẹ dọmwụ maga ugbabwọ ịmanyị-ịmanyị nyọka warị wẹ. Ma, Ohe Onyobyi a ku hi iwe, a du kọ chịkpẹẹ hahị lụka ọọwa kaka lẹ.

¹⁹Ang odudu nya ọọwa wuu ri yẹkẹẹ, ẹhị ọrịrịị-rịrị nyahị wuu bala ọkẹkẹnị ọchịchị nyahị bala okpo ọkụrụ egbeju ọ-ka kpa ya ụya ju ẹ-ẹpwụ nya ogu ọchịchị ị-ịlahị nya Ọngọlahị iJisọsị lụka ọlẹ kọ ka warị, a ri anụ ayịdang la ịlọnụ lẹlẹ.

²⁰Chajị, anụ la ịlọnụ a tọchị ri ang ọ-kpa yaya ju bala ọkẹkẹnị ọtụka ọchịchị nyahị lẹlẹ.