Read idege 1 ALA ỊTẸSALONIKA 3 Bible Online

1 ALA ỊTẸSALONIKA 3 - idege bible

1 ALA ỊTẸSALONIKA 3

¹Ịnyị, lụka ọlẹ kahị ju ugbodu kịlahị myị́ ẹ-ẹpwụ nya iwoo nyanụ o-wuhi wu kaka lẹ, ahị chị eje yẹkẹẹ, angịhyẹ nyahị a hi hụwa e-epweji nya Atẹnsị ụbwọọhị mẹ lẹlẹ.

²Ọọwa lẹ, ahị du iTimoti ọnyadahị ọng ọ ri ọnchẹ nya Ohe Oluhye ẹ-ẹpwụ nya ẹrụ ọnyịịla o-ya pyẹ nya ịKịrayịsị ọlẹ, ẹrụ warị wẹ ẹga nyanụ kọ ka chịnụ ọmwụ weeji ẹ-ẹpwụ nya ọmyịmyị ọlala nyanụ bala ọ-ka gbileenu ụbwọ ụ-ụrụ ịnyịnyị lẹlẹ.

³Chajị ká ọngọngọhẹ lẹpwụ nyanụ á ka pyị ọmwụ giri-giri ẹ-ẹpwụ nya ọmyịmyị ọlala nyamwụ chajị nya ị-tụ pyịpyị ịtụka ịịwa kpong-kpong kaka. Chajị, anụ ayịdang dọmwụ jéjé ene-ene yẹkẹẹ, ụma nya akama ọyẹyẹ ịlịịwẹ wuu ri irya nya Ohe Oluhye ẹ-ẹga nyahị ahị angịnyị nyamwụ ịnyịnyị.

⁴Chajị, ụka ọlẹ kahị dọmwụ juwa tanụ wẹẹ lẹ, ahị kaa ya jenu nọ u-uhye ịnyịnyịịnyị lụka ọọwa yẹkẹẹ, ụma nya ị-tụ pyịpyị ịlịnyị wuu juwa ka wẹ chịhị ọgụ ị-ịlahị pyii wẹẹ! Ọọwa lẹ, ẹla ọọwa a họ jịra ịnyịlẹhị jaabwọ kaanụ ayịdang jéjé wẹ lẹlẹ.

⁵Chajị nya ọọwa a du lụka ọlẹ kam ju ugbodu myị́ kaka lẹ, kam du iTimoti ẹrụ warị wẹ ẹga nyanụ nyọka jẹ́ iwe-ahụrụ nya ọmyịmyị ọlala nyanụ wẹ lẹlẹ. Chajị, ọ lam uhi-uhi lẹ, m juwa chị uko yẹkẹẹ, ó ri ká ịmayẹ nya Ohe Onyobyi ịlẹ kị wẹẹ wẹ chịnụ ọgụ, á ka họ ká ụkụrwọ ọlẹ kahị họ ẹ-ẹpwarịrị nyanụ wuu á ka ri ang ododu bwula ọọwa lẹ, ḿ jẹ́ datị ka.

⁶Ma, lẹẹlẹẹ lẹ, iTimoti nya bwu ẹga nyanụ, kpa oja ọnyịịla nya ọmyịmyị ọlala nyanụ warị kaka ya jehi bala ọháha ọlala ọlẹ kanụ juwa la ụka wuu, juwa kpịtịya nyahị ẹ-ẹpwụ nya irya nya iwoo owuwu chajị nyahị, jaabwọ kaahị ayịdang kaa wu iwoo nyanụ ịnyịnyị.

⁷Chajị nya ọọwa lẹ, anụ anyadahị ẹ-ẹpwụ nya ịKịrayịsị, ẹ-ẹpwụ nya iwe-ahụrụ nya ang ọjụjụ bala ị-tụ pyịpyị ịlẹ wuu kahị ji ẹpwụ nyaa ụka wuu lẹ, ahị jam la ẹjẹ ọkpụ́kpụ lụmẹ o-oluhye nya ọmyịmyị ọlala nyanụ lẹ.

⁸Chajị, ugbẹnyị kahị wo oja yẹkẹẹ, anụ juwa godayị kpakpakpa ẹ-ẹpwụ nya Ọngọlahị la lẹ, ọọwa, ọhịhị nyahị, ahị ayịdang a jẹ́ lẹẹ kpụhị ịpyọ myị́ wẹẹ lẹ.

⁹Bwula ọọwa lẹ, áhị́ dọmwụ jẹ́ jaabwọ kahị ka bwu jẹ́-ẹ ji Ohe Oluhye obe kaka ba myị́ kaka, ọọ-la ọkẹkẹnị ọtụka ọlẹ kahị la ẹ-ẹpwụ nyahị chajị nyanụ ị-ịlahị nya Ohe Oluhye lẹẹlẹẹ lẹ.

¹⁰Lẹẹlẹẹ lẹ, abwọ ọrịrị nyahị nya ịlẹhị-ịlẹhị chajị nyanụ lodu bala alẹnụ ri yẹkẹẹ, ká Ohe Oluhye ka họ kọ ka chịkpẹẹ hahị, chajị kahị ka jẹ́-ẹ warị kaka yẹnụ ẹ-ẹhị myịmyị bala ọ-ka jẹ́-ẹ kpanụ wule e-ebwo nya ẹga ọlẹ ká ọmyịmyị ọlala nyanụ juwa chụ hi.

¹¹Ahị myịmyị jam bịlẹ lẹẹlẹẹ yẹkẹẹ, ká Ohe Oluhye Adịda ọlẹ kọ ri Adahị ayịdang bala Ọngọlahị iJisọsị a kpahị ụgbẹyị chajị kahị ka warị kaka yẹnụ myị́ mẹ.

¹²Ká Ọngọlahị ayịdang a họ ká ọháha ọlala nyanụ a juwa chị anyị ju ịlọmwụ kịlahị-ịlahị ẹ-ẹpwụ nyanụ, jahị da angịnyị nya Ohe Oluhye aananụ bala angịnyị ehe wuu, jaabwọ kaahị ayịdang jam chị ọháha ọlala nyahị ahị ehe ẹ-ẹga nyanụ ịnyịnyị mẹ.

¹³Chajị ká Ọngọlahị ka họ kanụ ka jẹ́-ẹ ya eji gogo ẹ-ẹpwụ nya ọmyịmyị ọlala ọlọkịlẹtụ nyanụ, gbee kanụ tụtụm ka la abyị ọhẹ-lọhẹ ẹ-ẹpwụ nya ịgọgọ ọlala nyanụ kpong-kpong kaka ị-ịlahị nya Ohe Oluhye Adahị lụka ọlẹ ká Ọngọlahị iJisọsị ka warị bala angị ịgọgọ nyamwụ wuu mẹ.