Read idege 1 ALA ỊTẸSALONIKA 4 Bible Online

1 ALA ỊTẸSALONIKA 4 - idege bible

1 ALA ỊTẸSALONIKA 4

¹Ẹla ohyẹẹkpẹ-ẹkpẹ nyam ri yẹkẹẹ, anụ anyadahị ẹ-ẹpwụ nya ịKịrayịsị, ahị jam bịlẹnụ bala ogbileenu ụbwọ ụ-ụrụ nya ịlẹhị-ịlẹhị bwula Ọngọlahị iJisọsị, kanụ ka juwa kịlahị-ịlahị ẹ-ẹpwụ nya o-juwa la ụma nya ọhịhị ọlẹ kọ ka kpụ Ohe Oluhye ịpyọ, jaabwọ kanụ jẹ́ bwu ẹpwụtụbwọ nyahị ene-ene lẹ mẹ. Jaabwọ kaanụ ayịdang kiji wẹẹ kpa ẹla ọọwa họ ụkụrwọ ene-ene lẹlẹ, anụ́-ụ juwa họ hiigu gụ olene-ene kịlahị-ịlahị mẹ.

²Chajị, anụ la ịlọnụ jẹ́ ụma nya ọna ọdada ọlẹ kahị kpa ọngịrị nya Ọngọlahị iJisọsị juwa danụ bwu ẹpwụ nya ẹla nya Ohe Oluhye ụka ọọwa ịnyịnyị.

³Chajị, ọlẹ a ri irya nya Ohe Oluhye chajị nyanụ lẹ. Ohe Oluhye tịtọ kanụ ka ri angịnyị ịlịgọgọ ị-ịlahị nyamwụ. Kaanụ ayịdang ka ri angị juwa cheji ba hwẹẹẹ hi ụya ọhọhọ.

⁴Ohe Oluhye tịtọ ká ọng myị́ ọng lẹpwụ nyanụ ka jẹ́, jaabwọ kọ ka bwu ye ahụ nya ịlọmwụ la ụgbẹyị ọlẹ kọ ka la ịgọgọ bala olihi-ihi ị-ịlahị nya Ohe Oluhye.

⁵Chajị, Ohe Oluhye á tịtọ ká ụgbẹyị nya ahụ oyeye nyanụ anụ angịnyị nya Ohe Oluhye ka ri ang o-bwu ẹpwụ nya uhila nya ụya ọhọhọ kpong-kpong, lala ịnya angịlẹ kị jẹ́ Ohe Oluhye ka lẹ ka.

⁶Ọngọngọhẹ nyanụ a ri ọngọ kpoye nya ehile, juwa họ ọnyadamwụ ọkịla ọhẹ-lọhẹ ang onyobyi ẹ-ẹga nya ụya ọhọhọ ọwẹ kpong-kpong kaka. Chajị, Ohe Oluhye Ọngọlahị ayịdang a ri Ọngọ kaa yẹ angịnyị ehe akama kwiwa nya ụma nya ịhọbịrị ịlịịwẹ wuu, jaabwọ kahị danụ ọna chajị nyaa wuu ene-ene neeji lẹlẹ.

⁷Chajị, Ohe Oluhye á be ẹkọ wụrụụhị kaka ri angịnyị nyamwụ, chajị kahị ka chị ịlọhị ịrị bwula ụya ọhọhọ ka! Ma, ọ-chajị kahị ka ri angị ịlịgọgọ họọ ịnyị!

⁸Chajị nya ọọwa lẹ, ọng myị́ ọng ọlẹ kọ juwa yẹhị da ẹlẹwẹ bwee lẹ aalẹ, ọọngịnyị ehe, ọngọọwa a wẹẹ yẹhị da bwee kaka. Ma, Ohe Oluhye la ịlọmwụ Ọngọ hu Olegu Ịgọgọ nyamwụ hanụ kpangga, ọngọọwa a wẹẹ yẹhị da bwee lẹlẹ.

⁹U-uhye nya ọháha ọlala ọlẹga nya anyadanụ ịkịla ẹ-ẹpwụ nya ịKịrayịsị lẹ, ọ́ baba ham kam ka da ụpwụ kaka byinu abwaabwọhẹ ẹ-ẹpwụ nya ọọwa kaka. Chajị, Ohe Oluhye la ịlọmwụ mẹjẹẹnụ ene-ene jaabwọ kanụ ka jẹ́-ẹ bwu, la ọháha ẹ-ẹga nya awụlẹ lẹ.

¹⁰Anụ ayịdang tị ye ang ọmẹjẹ ọọwa yẹẹyẹẹ du kanụ wẹẹ la ọháha nya ịlẹhị-ịlẹhị ẹ-ẹga nya anyadanụ ẹ-ẹpwụ nya ịKịrayịsị ịlẹ kị juwa ọ-ọpyị nya ịMẹsịdoniya wuu lẹ. Ma, lẹẹlẹẹ, anụ anyadahị ẹ-ẹpwụ nya ịKịrayịsị, ahị jam junu ọhụ nya ịlẹhị-ịlẹhị yẹkẹẹ, anụ́-ụ cheri kanụ juwa la ọháha ọlịnyị ọgwọgụ kịlahị-ịlahị mẹ.

¹¹Kanụ chị eje nya ọhịhị ọwụlẹlẹ ọ-ka juwa lala bala ọ-ka juwa kpahị ju ụkụrwọ nya ịlọnụ ọ-ka kpa kịlahị mẹ. Kanụ juwa kpa ụbwọ nya ịlọnụ họ ụkụrwọ ịnyịnyị, jaabwọ kahị gbileenu ụbwọ ụ-ụrụ nya ịlẹhị-ịlẹhị ene-ene mẹ!

¹²Chajị, ọlịnyị a ka họ kanụ ka ri angị la ihi-ihi ị-ịlahị nya angịlẹ kị jẹ́ Ohe Oluhye ka lẹlẹ. Ọọwa ka myịmyị-ị̀ danụ ụbwọ kanụ ka juwa ri angị kpụ nịrọ angịkịla ene kanụ ka jụ ọbaba nya ịlọnụ họ myị́ kaka lẹlẹ.

¹³Ma, ahị́ tịtọ kaanụ anyadahị ẹ-ẹpwụ nya ịKịrayịsị ka juwa ẹ-ẹpwụ nya ukpowu chajị nya igu ogbugbu nya angị myị la Ohe Oluhye, du kanụ ka juwa bida u-uhye nya angị gbugbu lala angị la ẹhị ọrịrịị-rịrị ọnyịịla ọhẹ-lọhẹ kaka lẹ ka.

¹⁴Chajị, bwula ọlẹ kahị myị la iJisọsị yẹkẹẹ, ụka kọọwa ayịdang gbu lẹ, ọ wuleji bwula igu, juwa hịhị myịmyị lẹlẹ, ịnyịnyị, Ohe Oluhye a tịtị ka bwula ịKịrayịsị ọọwa wule angịlẹ wuu kị myị lọọ eji bwula igu lẹlẹ.

¹⁵Lẹ, ahị jam kpa ẹla nya Ọngọlahị la da ẹla ọlẹ wụlẹ ya jenu yẹkẹẹ, ahị angịnyị nya Ohe Oluhye ịlẹ kahị ka jam odehe ọlẹ la ọhịhị lụka ọlẹ ká Ọngọlahị ka mwẹẹkpẹ warị lẹ, ahị́ juwa ka rụ ba Ọngọlahị jene nya angịnyị nya Ohe Oluhye ịlẹ wuu kị gbugbu ene nya ụka ọọwa kpong-kpong ka.

¹⁶Chajị, ụka ọọwa lẹ, Ọngọlahị ayịdang ka hireji bwu epwoohe la omyi nya ehile ọdada nyamwụ bala ẹkọ obebe nya olegbeju ọtụka nya alegu-ẹrụ nyamwụ bala omyi nya opyike nya Ohe Oluhye ịnyịnyị. Ụka ọọwa lẹ, angịnyị nya ịKịrayịsị ịlẹ kị gbugbu wuu a ka wuleji bwula igu jene-jene lẹlẹ.

¹⁷Ọọwa lẹ, ị ka huuhi ahị angịnyị nya ịKịrayịsị ịlẹ kahị ka hi jam odehe ọlẹ la ọhịhị lụka ọọwa, hwaa kele ka uhye nya egbamwụ kaka tọ angị wuleji bwula igu ịịwa lẹ, ahị ka kele kaka tọ Ọngọlahị u-uhye ọhụ lawụlẹ lẹ, ahị wuu a ka kele kaka hụwa ta Ọngọlahị pyịyọọ lẹlẹ.

¹⁸Chajị nya ọọwa lẹ, anụ́-ụ juwa kpa ala ịwẹ kpụ́ awụlẹ ẹjẹ ịnyịnyịịnyị mẹ.