Read idege 1 ALA ỊTẸSALONIKA 5 Bible Online

1 ALA ỊTẸSALONIKA 5 - idege bible

1 ALA ỊTẸSALONIKA 5

¹Anụ anyadahị ẹ-ẹpwụ nya ịKịrayịsị, ọ́ baba ham nyọka da ụpwụ kaka ya jenu ịngịngịhyẹ chajị nya ụka ọwẹwẹ lee ụka o-hunọ chajị nya ọwẹwẹ nya Ọngọlahị la kaka.

²Chajị, anụ la ịlọnụ jẹ́ yẹẹyẹẹ yẹkẹẹ, ẹnụtụrụ ọlẹ ká Ọngọlahị la ka kpa warị lẹ, ọ ka bwu alodehe ọlẹ agaga jaabwọ ká oloyi kaa bwu ayịdẹpwa agaga lụka nya ẹpwụ odu.

³Chajị, ụka ọlẹ ká angịnyị ehe á juwa kpa ya dodehe yẹkẹẹ, “Okpunyi ji lẹ, ahị ka hụhụ la o-kem lẹ,” ọọwa lẹ, ayịreji ọtata a ka warị chaa ọgụ lụka ọ-mwaa, jaabwọ ká ang nya ọnyị ọmama kaa wẹ chị ọnyang ọlẹnyị ọgụ lẹlẹ. Chajị, angịịwa á ka jẹ́-ẹ be bwu ẹpwụ nya ayịreji ọtata ọọwa myị́ kpong-kpong kaka.

⁴Ma, anụ anyadam ẹ-ẹpwụ nya ịKịrayịsị lẹ, jaabwọ kanụ juwa ẹ-ẹpwụ nya ukpowu kpong-kpong kaka lẹlẹ, ẹnụtụrụ nya ọwẹwẹ nya Ọngọlahị la ọọwa á tụtụm ka jẹ́-ẹ bwunu anụ agaga jaabwọ ká oloyi kaa bwu ayịdẹpwa agaga kaka.

⁵Chajị, anụ wuu ri anyị nya ahịgboo nya abwẹla ọnyịịla nya Ohe Oluhye bala o-ri anyị nya ahị ọpyẹpyẹ nya Ohe Oluhye ọjẹ́jẹ lẹlẹ, ahị angịnyị nya Ohe Oluhye wuu á tụtụm ri angị ji ẹpwụ nya ukpowu nya ang onyobyi ọhọhọ kpong-kpong kaka.

⁶Bwula ọọwa lẹ, anụ myị kahị juwa nune dodoo lala angịkịla ịlẹ kị jẹ́ Ohe Oluhye kaka lẹ ka. Ma, ọkọkọ nya ọọwa lẹ, anụ cheri kahị juwa kụ lahị giri-giri bala o-juwa họ ang myị́ ang wuu ba o-oyi kem ịnyịnyị mẹ.

⁷Chajị, angịlẹ kị kaa nune lẹ, ị kaa nune ọọwa lụka nya odu ohihi. Angịlẹ kị tị kaa nwa ere juwa ya lẹ, alẹpwụ odu, ị tị kaa nwa ere ọọwa ịnyịnyị lẹ.

⁸Ma, jaabwọ kaahị ayịdang ri angịnyị nya ahịgboo nya ahị ọpyẹpyẹ nya abwẹla ọnyịịla nya Ohe Oluhye lẹlẹ, anụ cheri kahị juwa họ ang myị́ ang nyahị wuu ba o-oyi kem bala o-juwa hu agidi nya ọmyịmyị ọlala bala ọháha nya ịlẹhị-ịlẹhị ọlala ịlẹ kị ku ọmwakpa nya ọkụmada o-ke ọkịlẹtụ nyahị kụrụ mẹ. Kahị juwa hu ẹhị ọrịrịị-rịrị oluhye nya ọchịda ọlala nyahị ọlẹ kọ ku ọmwakpa nya ang o-keehi ke egbeju kụrụ lala okpo o-ke egbeju nya ẹwụ ịnyịnyị mẹ.

⁹Chajị, Ohe Oluhye á chụhị ha ịlọmwụ chajị kahị ka ju ka ẹpwụ nya agbama nyamwụ ka. Ma, ọ-chajị kahị ka ye ọchịda nyamwụ bwula Ọngọlahị iJisọsị ịKịrayịsị ịnyị!

¹⁰Chajị, ịKịrayịsị ọọwa a warị kaka gbu wọnụ nyahị ju, chajị ká ó riri kahị gbugbu kpá lẹ lee o-jam ji la ọhịhị ọlẹ wẹẹ, kọ ka chịkpẹẹ hahị kahị ka jẹ́-ẹ la ọhịhị bala ịKịrayịsị ọọwa pyịyọọ myị́ lụka ọlẹ kọ ka mwẹẹkpẹ warị myịmyị lẹlẹ.

¹¹Chajị nya ọọwa lẹ, anụ cheri kanụ juwa ju awụlẹ ọhụ kịlahị-ịlahị bala o-juwa kpa ọmyịmyị nya awụlẹ wule kịlahị jaabwọ kanụ wẹẹ họ lẹẹlẹẹ mẹ.

¹²Ahị jam bịlẹnụ nya ịlẹhị-ịlẹhị, anụ anyadahị ẹ-ẹpwụ nya ịKịrayịsị yẹkẹẹ, anụ cheri kanụ juwa kpa ị hi ojuju kpẹhị rịrị angịlẹ kị wẹẹ nwụ ịlaa la ụkụrwọ nya Ọngọlahị la ọhọhọ ẹ-ẹpwarịrị nyanụ lala alegbeju ịlẹ ká Ọngọlahị chụ hanụ kị wẹẹ kpa ẹla nya Ohe Oluhye gbileenu ụbwọ ụ-ụrụ ịnyịnyị mẹ.

¹³Anụ́-ụ juwa kpa okini-kini nya ọháha ọlala nya ịlẹhị-ịlẹhị bala ihi ojuju kpẹhị rịraa, chajị nya ụkụrwọ nyaa ọlẹ kị wẹẹ họ ẹ-ẹpwarịrị nyanụ mẹ. Kanụ juwa kpa awụlẹ la okpunyi yẹẹyẹẹ ịnyịnyị mẹ.

¹⁴Lẹẹlẹẹ, anụ anyadahị ẹ-ẹpwụ nya ịKịrayịsị, ahị jam gbileenu ụbwọ ụ-ụrụ nya ịlẹhị-ịlẹhị kanụ ka juwa da angị tụbwọ ịlẹpwụ nyanụ ọna yẹẹyẹẹ bala o-juwa ju angịlẹ ká ọkịlẹtụ juwa kpaa enyi ọhụ, kanụ juwa da angị dẹwụ-dẹwụ ẹ-ẹpwụ nya ọmyịmyị ọlala nyaa ụbwọ bala o-juwa la ugbodu ojuju onyudiyo ẹ-ẹga nya angịnyị wuu mẹ!

¹⁵Anụ myị ká ọngọngọhẹ lẹpwụ nyanụ a juwa họ ang onyobyi kwiwa nya ang onyobyi kpong-kpong ka. Ma, ọkọkọ nya ọọwa lẹ, anụ́-ụ juwa tịtọ nyọka họ ang ọnyịịla kem ẹ-ẹga nya awụlẹ bala ẹga nya angịnyị angịkịla wuu ịnyịnyị mẹ.

¹⁶Anụ́-ụ juwa chị ọkẹkẹnị nya ịlẹhị-ịlẹhị ụka wuu mẹ.

¹⁷Kanụ juwa raabwọ ha Ohe Oluhye ụka myị́ ụka wuu.

¹⁸Kanụ juwa ji Ohe Oluhye obe ẹ-ẹpwụ nya iwe-ahụrụ ọnyị myị ọnyị wuu mẹ. Chajị, ọọwa kpangga a tọchị ri irya nya Ohe Oluhye ẹ-ẹga nyanụ bwula ịKịrayịsị iJisọsị lẹ.

¹⁹Anụ chị́ enyi mịrị ila ọchịchị nya Olegu Ịgọgọ ọlẹpwụ nyanụ la ụgbẹyị ọhẹ-lọhẹ kpong-kpong ka.

²⁰Anụ juwa yẹhị da ọhaha nya ọmwụ ọyẹyẹ juwa ya ẹla dodehe bwula ọngịrị nya Olegu Ịgọgọ bwee kpong-kpong ka.

²¹Ma, anụ́-ụ juwa wụla ang myị́ ang wuu yẹ myịmyị ene kanụ ka jẹ́-ẹ yụbwọ chị ang ọlẹ kọ ri ọnyịịla kpa ụ-ụwa gogo mẹ.

²²Anụ́-ụ juwa cheji ba hwẹẹẹ hi ang myị́ ang wuu ọlẹ kọ ju abwụma nya ang onyobyi mẹ.

²³Ká Ohe Oluhye Ọngọlẹ kọ ri Ẹmwụ-enyi nya okpunyi ayịdang a họ ká ọng myị́ ọng lẹpwarịrị nyanụ wuu a la ịgọgọ gbanggbang ị-ịlahị nya ịlọmwụ mẹ. Ká Ohe Oluhye a myịmyị juwa ke ugbinyịrọ nyanụ bala ugbodu okpukpuru bala olegu nyanụ wuu yẹẹyẹẹ mẹ. Chajị kanụ tụtụm ka la abyị ọhẹ-lọhẹ ị-ịlahị nya Ohe Oluhye kaka, gbee pwụ ẹnụtụrụ nya ọwẹwẹ nya Ọngọlahị iJisọsị ịKịrayịsị mẹ.

²⁴Chajị, Ọwa Ohe Oluhye Ọngọlẹ kọ be ẹkọ wụrụụnụ chị ịlọmwụ ọgụ lẹ, Ọ ri Ọngọ chị la o-hu ọkịlẹtụ ha lụmẹ lẹ, Ọwa ayịdang ka họ ịnyị hanụ pyii lẹ.

²⁵Anụ anyadahị ẹ-ẹpwụ nya ịKịrayịsị, anụ́-ụ juwa raabwọ ha Ohe Oluhye kpịtịya nyahị mẹ.

²⁶Anụ́-ụ da ọnụ chị anyadahị ịlịnyanụ wuu hahị, kanụ juwa ju awụlẹ ọnụ nya angị ịgọgọ hahị mẹ.

²⁷M jam kpa ẹnyị nya Ọngọlahị la danụ ehile nya ịlẹhị-ịlẹhị, kanụ ka wa ileta ọlẹ ju anyadahị ịkịla ẹ-ẹpwụ nya ịKịrayịsị wuu ịnyịnyị pyii.

²⁸Ká ọnahị nya Ọngọlahị iJisọsị ịKịrayịsị a juwa tanụ mẹ.