Read idege IJOCHUWA 10 Bible Online

IJOCHUWA 10 - idege bible

IJOCHUWA 10

¹Ụka ọọwa, Adonisẹdẹkị Adịrahụ nya iJerusalẹm[6] wo jaabwọ ká iJochuwa kụrụ epweji nya Ayị, kọ tọọ ayịreji gbanggbang bala ọ-nwụ adịrahụ nyaa jaabwọ kọ họ epweji nya iJeriko bala adịrahụ nya alụwa. Ọ wo ịnyịnyị jaabwọ ká ala iGibyọn họ okpunyi ta ala Isirẹlụ kpụ ị juwa kụ taa lẹ.

²Ẹlẹwẹ chị uhi ju Adonisẹdẹkị bala angịnyị nyamwụ lụmẹ. Ị jẹ ká iGibyọn ri ọtụka lala epweji ịkịla ịlẹ kị la ịdịrịhụ. Ọ tị gụ epweji nya Ayị. Alẹng ịlụwa wuu tị ri angịdẹwụ ịtụka.

³Ọọwa, Adonisẹdẹkị Adịrahụ nya IJerusalẹm a du ẹrụ to iHoham Adịrahụ nya ala iHebirọn bala iPiram Adịrahụ nya ala ịJaamutu bala ịJafiya Adịrahụ nya ala ịLakichi bala ịDẹbi Adịrahụ nya ala Egilọn yẹkẹẹ,

⁴“Anụ kẹwẹ ka dam ụbwọ kahị mwẹla ta ala iGibyọn mẹ chajị ị họ okpunyi ta iJochuwa bala ala Isirẹlụ lẹ.”

⁵Ọọwa, adịrahụ nya ala iJerusalẹm bala ịnya ala iHebirọn bala ịnya ala iJaamutu bala ịnya ala ịLakichi bala ịnya ala Egilọn ịla Amọ angị ịrụ ịwẹ a dụgba wule awụlẹ la angịdẹwụ nyaa wuu lẹlẹ. Ị wuleji ka dagaga ju iGibyọn lẹ, ị mwẹla ta alụwa lẹlẹ.

⁶Ụka ọọwa, ala iGibyọn du ẹrụ ba iJochuwa ka ịkampụ nya ala Isirẹlụ i-iGiligalụ kaka byoo yẹkẹẹ, “A nyẹẹkpẹ dahị ahị anchẹ nyang koo. Kẹwẹ ahyaahị ká gbahị kpehe mẹ! Ịdịrịhụ nya ala Amọ ilikiti wuu dụgba wule awụlẹ, warị jam mwẹla tahị lẹ-ẹ.”

⁷Ọọwa, iJochuwa bala angịdẹwụ nyamwụ wuu tụ angị jẹ ẹwụ gụgụ a wuleji ẹdịyẹ bwu iGiligalụ lẹlẹ.

⁸Amkpaa byi iJochuwa yẹkẹẹ, “A ju uhi nyaa ka. M yaa jung ụ-ụbwọ lẹ. Ọngọngọhẹ nyaa-á ka godayị bá ẹla tang myị ka.”

⁹Ị chẹwụ lodu-odu ọwẹ bwu iGiligalụ lalaala ka ju ka iGibyọn. Ọọwa, ị gba mịla ala Amọ nmoo lọmwaaa lẹlẹ.

¹⁰Amkpaa chị uhi ju ala Amọ ụka kị yẹ ala Isirẹlụ. Ala Isirẹlụ nwaa i-iGibyọn bala o-kwaa ka ju ka ẹga owulee-wulẹ nya ikiti ị-ịBẹtị-ịhọrọn. Ị kịnyaa juwa kwaa yahị da ka edii lalaala ka pwụ Asẹka bala ịMakẹda.

¹¹Ụka ká ala Amọ wẹẹ rụnyẹ hireji bwu ikiti hi ala Isirẹlụ, Amkpaa do ajwọ bwu uhye-ọgba kaka mịlaa ụ-ụgbẹyị nya Asẹka ọwẹ. Angịlẹ ká ajwọ nwụ wuu ju iru gụ angịlẹ ká ala Isirẹlụ kpa ụbwọ nya ịlaa nwụ.

¹²Ẹnụtụrụ ọlẹ ká Amkpaa họ ká ala Isirẹlụ kụrụ ala Amọ, iJochuwa ya ẹla tọọ ị-ịlahị nya ala Isirẹlụ wuu. Ọ yẹkẹẹ, “Ẹnụ, aa godayị kpọọ i-iGibyọn. Ahụ ọya, aa godayị ọ-ọkpọọ nya Ayịjalọn.”

¹³Ẹnụ godayị kpọọ. Ọya-á jẹdịyẹ ka gbee kị kụrụ aluji nyaa. Ị da ẹlẹwẹ ụ-ụpwụ nya ịJachaa. Ẹnụ godayị kpọọ ẹ-ẹpwayịrẹtẹ. Ó byi ka gbee ẹ-ẹpwụ nya ahị ọpyẹpyẹ lẹpwụ-lẹpwụ.

¹⁴Ẹnụtụrụ ọhẹ-ẹ́ me ọwẹ ene lee ku ẹkpẹ nya ẹnẹwẹ ká Amkpaa wẹ ọbịlẹ-bịlẹ nya omyi nya ọngịnyị ehe kaka. Amkpaa ma uya ha ala Isirẹlụ ẹnẹwẹ.

¹⁵Ụka ká ẹwụ ọwẹ myị kpa lẹ, iJochuwa bala angịdẹwụ nyamwụ a nyà tịrẹkpẹ wẹ ịkampụ nyaa i-Giligalụ lẹlẹ.

¹⁶Ịdịrịhụ ịrụ nya ala Amọ ịwẹ be rụ ka kpịbaa ụgbụ ọla ịMakeda.

¹⁷Ọọwa, ọngọhẹ à ya ẹhị waa oyi lẹ, ọ kele ka ya je iJochuwa ẹga kị kpịbaa lẹlẹ.

¹⁸Lẹ, iJochuwa a yẹkẹẹ, “Anụ rị ajwọ ịtụka ịhyẹ tụ ọnụ nya ụgbụ ọọwa ku, kanụ chụ angịhyẹ gboo mẹ.

¹⁹Anụ lịlọnụ ā tị hụ ụ-ụwa ka. Anụ kịnyaa juwa ku aluji nyanụ, kanụ gba mịlaa bwu ẹkpẹ. Anụ myị kị yẹtẹ chị epweji nyaa ka. Amkpaa Ohe Oluhye nyanụ ya ọkụrụ-kụrụ hanụ lẹ.”

²⁰Lẹẹlẹ, iJochuwa bala ala Isirẹlụ nwụ iru nya ala Amọ ịwẹ. Angị ịmanyị-ịmanyị nyaa à be rụ pwụ epweji nyaa ọlẹ kị me ugulọ dagaga ju kẹnẹ-kẹnẹ lẹlẹ.

²¹Ọọwa, angịdẹwụ nya ala Isirẹlụ wuu a nyà lokpunyi tịrẹkpẹ wẹ ẹga nya iJochuwa ị-ịkampụ nyaa ị-ịMakeda lẹlẹ. Ọngọngọhẹ ọ-ọpyị ọwẹ á tụtụm byẹjẹ hu ọnụ da ala Isirẹlụ kaka.

²²Ọọwa, iJochuwa a byi angịnyị nyamwụ yẹkẹẹ, “Anụ wụrụ ọnụ nya ụgbụ kanụ gba ịdịrịhụ iru ịwẹ kpehe ham mẹ.”

²³Ọọwa, ị wụrụ ụgbụ ọọwa lẹ, ị gba adịrahụ nya ala iJerusalẹm bala ịnya ala iHebirọn bala ịnya ala ịJaamutu bala ịnya ala ịLakichi bala ịnya ala Egilọn kpehe

²⁴ha iJochuwa lẹlẹ. Ọọwa, iJochuwa a wụrụ ala Isirẹlụ wuu kaka jịra lẹ, ọ byi alegbeju nya angịdẹwụ nyamwụ yẹkẹẹ, “Anụ ya apatẹ ba ịdịrịhụ ịwẹ i-igbiido beji mẹ.” Ọọwa, ị họ ịnyị lẹlẹ.

²⁵Ọọwa, iJochuwa a byi alegbeju nya angịdẹwụ nyamwụ yẹkẹẹ, “Anụ ju uhi ka. Ọkịlẹtụ a tị kpụnụ enyi ka. Anụ ju ugbodu, kanụ godayị giri-giri mẹ, chajị ịịwẹ Amkpaa a ka họ aluji nyanụ wuu lẹlẹ.”

²⁶Ọọwa, iJochuwa a nwụ ịdịrịhụ ịwẹ lẹ, ọ go egu nyaa chọpịla e-ekeji ịrụ ịhyẹ lẹlẹ. Ị pịlẹ ụ-ụwa gbee da ka alobyi.

²⁷Lụka nya ẹnụ ọ-ya ẹtẹ dụrụ ugba ẹnụ ọọwa, iJochuwa a ya lẹ, ị go egu nyaa kpa ka da ju ka ụgbụ ọlẹ kị tụ ịlaa kpịbaa ene lẹlẹ. Ị rị ajwọ ịtụka-ịtụka tụ ọnụ nyamwụ ku. Ajwọ ịịwa juwa ụ-ụwa pyịyọọ.

²⁸Ẹnụ ọọwa kpangga, iJochuwa anyị dẹwụ kụrụ epweji nya ịMakeda bala ọ-nwụ adịrahụ nyaa. Ị nwụ ọng myị ọng nya alụwa wuu. Jaabwọ ká iJochuwa họ adịrahụ nya ala iJeriko, ịnyịnyị ọ họ adịrahụ nya ala ịMakeda lẹ.

²⁹Ọọwa, iJochuwa bala angịdẹwụ nyamwụ a yegiri bwu ịMakeda kele ka dẹwụ ta ala iLibina lẹlẹ.

³⁰Amkpaa myịmyị họ ala Isirẹlụ kụrụ epweji nya iLibina bala adịrahụ nya alụwa. Ị nwụ ọng myị ọng nya alụwa wuu. Jaabwọ kị họ adịrahụ nya ala iJeriko, ịnyịnyị ị họ adịrahụ nya ala iLibina lẹ.

³¹Ọọwa lẹ, iJochuwa bala angịdẹwụ nyamwụ a yegiri bwu iLibina kele ka epweji nya ịLakichi lẹlẹ. Ị dagaga jwoo lẹ, ị dẹwụ tọọ lẹlẹ.

³²Ẹnụtụrụ oheeye nya ẹwụ ọwẹ Amkpaa-à họ ala Isirẹlụ kụrụ ịLakichi lẹ. Ị nwụ ọng myị ọng nya alụwa wuu jaabwọ kị họ ala iLibina.

³³IHoram Adịrahụ nya ala ịGẹsẹ wẹ kaka da ala ịLakichi ụbwọ. IJochuwa anyị tị kụrwọọ bala angịdẹwụ nyamwụ. Ọngọngọhẹ nyaa-á hi hị ka ẹpwa ka.

³⁴IJochuwa bala angịdẹwụ nyamwụ rụ bwu ịLakichi kele ka Egilọn. Ị dagaga jwoo, dẹwụ tọọ ịnyịnyị.

³⁵Ị kụrụ epweji ọwẹ ẹnụ alẹ-alẹ. Ị nwụ ọng myị ọng ụ-ụwa jaabwọ kị họ ị-ịLakichi.

³⁶Ọọwa, iJochuwa bala angịdẹwụ nyamwụ a wule bwu Egilọn kele ka iHebirọn i-ikiti lẹ, ị dẹwụ ta alụwa lẹlẹ.

³⁷Ị kụrụ epweji nya iHebirọn. Ị nwụ adịrahụ nya alụwa bala ọng myị ọng ụ-ụwa wuu tụ alepweji ịkịla ị-ba ụwa ba. IJochuwa anyị ta epweji ọwẹ ayịreji gbanggbang jaabwọ kị họ epweji nya Egilọn. Ị́ pẹhi ọngọngọhẹ lahị-lahị ụ-ụwa ka.

³⁸Ọọwa, iJochuwa bala angịdẹwụ nyamwụ a jahị kpata lẹ, ị kele ka dẹwụ ta epweji nya ịDẹbi lẹlẹ.

³⁹Ị kụrụ alụwa. Ị nwụ adịrahụ nyaa bala ọng myị ọng ụ-ụwa wuu tụ alepweji ịkịla ị-ba ụwa ba. Ọọwa, ị ta ịDẹbi bala adịrahụ ọlụwa ayịreji jaabwọ kị họ iHebirọn bala iLibina lẹlẹ.

⁴⁰Ịịwẹ iJochuwa anyị a kụrụ alọpyị ọwẹ wuu lẹlẹ. Ị kụrụ ịdịrịhụ bala angịnyị nyaa ịlọpyị ilikiti bala angị kụ ọpwọpwọ nya ikiti ịlọmwẹnụ-ụtụrụ bala alọpyị ịlụteeji koye nya ọmwẹnụ-obyi bala angị kụ ọpyị ọkanggba oledii. Ị ta angịnyị ịlụwa wuu ayịreji gbanggbang jaabwọ ká Amkpaa Ohe Oluhye nya ala Isirẹlụ ya.

⁴¹IJochuwa anyị kụrụ ẹwụ ịlẹ kị da bwu ịKadẹchị-ịbaniya kele ka pwụ ịGasa bala oye nya iGochin[7] lalaala ka ju ka iGibyọn.

⁴²IJochuwa anyị kụrụ ịdịrịhụ ịwẹ lọpyị-lọpyị nyaa wuu ẹ-ẹpwụ nya ẹwụ ịlẹ kị da wuu ụka ọwẹ chajị Amkpaa Ohe Oluhye nya ala Isirẹlụ ma uya ha ala Isirẹlụ.

⁴³Ọọwa, iJochuwa bala angịdẹwụ nyamwụ wuu a nyà tịrẹkpẹ ka ịkampụ nyaa ị-ịGiligalụ lẹlẹ.