Read idege IJOCHUWA 11 Bible Online

IJOCHUWA 11 - idege bible

IJOCHUWA 11

¹Ụka ká ịJabin Adịrahụ nya ala ịHasọ wo oja jaabwọ ká ala Isirẹlụ kụrụ bwu ẹpwụ nya ẹwụ ịlẹ kị da, ọ du ẹrụ tọ iJobabụ Adịrahụ nya ala ịMadọn bala adịrahụ nya ala iChimron bala adịrahụ nya ala Akịchafụ.

²Ọ du ịnyịnyị tọ ịdịrịhụ ịlẹ kị kụ ikiti iloye nya ẹtẹ bala ịlọkpọọ nya ịJọdan ọlẹ kọ ji edii nya Ihu ọkịlọlọ nya ịGalili bala ịlụteeji bala ịlọnụ enyi ju epweji nya ịDọọ chwẹẹ.

³Ọ du ẹrụ ọọwa tọ ala iKenan ịlẹ kị kụ oyiye-oyiye nya ịJọdan, tụ ala Amọ bala ala iHiiti bala ala iPerisi i-ikiti bala ala iJebusi ba ala iHivi ịlẹ kị kụ ọmwụ nya Ọgbọdọ nya ịHẹẹmọn ọ-ọpyị nya iMisipa.

⁴Ọọwa, ị wẹ la angịdẹwụ nyaa tuuu kaka jịra lẹlẹ. Ị ju iru lala apwụ bala amẹ. Ị la iru nya anyịrẹ bala ang ịrụnyẹ ịlẹ ká anyịrẹ kaa gbile.

⁵Ịdịrịhụ ịwẹ dọkọ wule awụlẹ lẹ, ị wẹ jịra ọ-ọnụ nya ọ̀bá nya ịMẹrọm kị ka mwẹla ta ala Isirẹlụ lẹlẹ.

⁶Ọọwa, Amkpaa a byi iJochuwa yẹkẹẹ, “A ju uhi nyaa ka. Ijuju amachanyị m ka nwaa wuu ha Isirẹlụ. Ụka ọọwa lẹ, ánụ-ụ̀ chị anyịrẹ nyaa ekpiiji ịlẹkpẹẹta eku, kanụ chị ang ịrụnyẹ nya anyịrẹ nyaa ila mẹ.”

⁷Ọọwa lẹ, iJochuwa bala angịdẹwụ nyamwụ a gba mịla aluji lọmwaaa ọ-ọ̀bá nya ịMẹrọm lẹlẹ.

⁸Amkpaa họ ala Isirẹlụ kụrwaa. Ala Isirẹlụ mwẹla taa, kwaa yahị da ka ẹtẹ lalaala ka pwụ epweji nya iMisirefọtụ-ụmayim bala epweji nya ịSayịdọn. Ị ku angịkịla yahị da ka ọmwẹnụ-ụtụrụ lalaala ka pwụ ọkpọọ nya iMisipa. Ị dẹwụ ọwẹ gbee kị nwụ aluji nyaa wuu gbanggbang.

⁹IJochuwa haa jaabwọ ká Amkpaa ya nyị họ. Ọ chị anyịrẹ nyaa ekpiiji ịlẹkpẹẹta eku lẹ, ọ chị ang ịrụnyẹ nya anyịrẹ nyaa ila lẹlẹ.

¹⁰Ọọwa, iJochuwa anyị a wẹ epweji nya ịHasọ lẹ, ị kụrwọọ bala ọ-nwụ adịrahụ nya alụwa lẹlẹ. Ụka ọwẹ, ịpyị ịkịla ịwẹ wuu ji ekpeleji nya ọngịrị nya ala ịHasọ.

¹¹Ị nwụ angịnyị ịlụwa wuu lẹ, ị jụ epweji ila lẹlẹ.

¹²IJochuwa kụrụ epweji ịwẹ wuu bala ịdịrịhụ nyaa lẹ, ọ nwụ ọng myị ọng nyaa jaabwọ ká iMosisi ọnchẹ nya Amkpaa da ehile.

¹³Ala Isirẹlụ-ụ́ tị jụ epweji ịlẹ kị nwụ rịrị ẹ-ẹga ogedee ila ka, kẹnẹ-kẹnẹ ịHasọ mẹ ịnyị.

¹⁴Ala Isirẹlụ go ang i-ju apyobwuna bala iyo ịlẹpwa bwu epweji kpa rụ kaka la. Ma, ị tị nwụ angịnyị ịlụwa wuu gbanggbang.

¹⁵Amkpaa ya ehile nyamwụ ha iMosisi ọnchẹ nyamwụ. IMosisi ya ehile ịịwa ha iJochuwa. IJochuwa ju ihi nya ehile ịịwa kpẹẹkpẹẹ. Ọ họ ang myị ang ịlẹ ká Amkpaa da iMosisi ehile wuu.

¹⁶IJochuwa kụrụ ọpyị ọọwa wuu. Oye ọọwa ri ọpyị olikiti bala ọlụtẹẹji ọlẹtẹ bala oledii tụ oye nya iGochin wuu bala ọpyị ọkanggba oledii nya ụwa bala ọkpọọ nya Ihu ịJọdan.

¹⁷Ọpyị ọlẹ kị ye ji bwu Ọgbọdọ nya ịHalakị e-edii ju ọpyị nya Ẹdọm chwẹẹ lalaala ka pwụ ịBaalụgadị ẹ-ẹtẹ ụ-ụwa ọ-ọkpọọ nya iLibanọn ọlẹ kọ ji ka ẹtẹ nya Ọgbọdọ nya ịHẹẹmọn. IJochuwa anyị mwẹla ta ịdịrịhụ ịlẹgẹwẹ lụka ọtata. Ọọwa, ị kụrwaa lẹ, ị nwụ ịdịrịhụ ịịwa wuu lẹlẹ.

¹⁹Epweji ọhẹ-lọhẹ á họ okpunyi bala ala Isirẹlụ ka, kẹnẹ-kẹnẹ epweji nya iGibyọn ẹga ká angịhyẹ nya ala iHivi kụ mẹ ịnyị. Ala Isirẹlụ kụrụ epweji ịkịla wuu ẹ-ẹwụ.

²⁰Amkpaa jaa ahị da ala Isirẹlụ chajị ká ala Isirẹlụ ka taa ayịreji wuu gbanggbang la ọ-jẹ ujwo ka. Ịịwẹ Amkpaa a da iMosisi ehile lẹ.

²¹Ụka ọwẹ-ọwẹ iJochuwa anyị a nwụ ịmaga ịlẹ kị ri anyị ịtụma nya Anakị ịlẹ kị kụ ikiti nya iHebirọn bala ịDẹbi bala Anabụ bala ọpyị olikiti nya iJuda bala Isirẹlụ wuu lẹ. IJochuwa anyị taa ayịreji wuu la epweji-epweji nyaa.

²²Ọngọngọhẹ nya ala Anakị ịwẹ á hi ọ-ọpyị nya ala Isirẹlụ ka. Ị-ịGasa bala ịGaatị bala Achịdọdụ angịhyẹ nya à hi ji lẹ.

²³Ịịwẹ iJochuwa a bwu ye ọpyị ọwẹ wuu jaabwọ ká Amkpaa da iMosisi ehile lẹlẹ. IJochuwa ya ọpyị ọwẹ wuu ha ala Isirẹlụ nya ọpyị nya ụbwọ nya ịlaa. Ị ga ebwo ookpokpo nyamwụ ha imwawụ ọnyọnyọọnyị. Ọọwa, ọpyị a kpunyi lẹlẹ.