Read idege IJOCHUWA 13 Bible Online

IJOCHUWA 13 - idege bible

IJOCHUWA 13

¹Ụka ọọwa, iJochuwa chokwirichi lụmẹ lẹ. Ọọwa, Amkpaa a byoo yẹkẹẹ, “A wẹẹ chokwirichi lẹ, ịpyị ịlẹ ká kà nu tị hi lụmẹ wẹẹ.

²Ịpyị ịịwa ri nya ala iFilisitiya bala ịnya ala iGechu

³tụ ịnya ala Avim. Ọpyị ọlẹ kọ bwu ọ̀bá nya iChihọ ọ-ọbaba nya Ijipiti yahị da ka ẹtẹ gbee ka pwụ ọbaba nya Ẹkịrọn ri nya ala iKenan. Ịdịrịhụ ịrụ nya ala iFilisitiya kụ epweji nya ịGasa bala Achịdọdụ bala Achịkẹlọn bala ịGaatị bala Ẹkịrọn.

⁴Ọpyị nya ala iKenan wuu bala iMiyẹra ọlẹ kọ ri nya ala ịSayịdọn kele ka pwụ Afẹkị nya ala Amọ hi wẹẹ.

⁵Ọpyị ọkịla ri ịnya ịGẹba bala iLibanọn wuu kpoye nya ọmwẹnụ-ụtụrụ bwu ịBaalụ-ịgadị e-edii nya Ọgbọdọ nya ịHẹẹmọn kele ka ẹga Ọchịpwụrụ bwu ọla ịHamatị.

⁶Ịpyị ịkịla ri ọpyị nya ala ịSayịdọn wuu lẹpwụ-lẹpwụ. Ị kụ apewa nya ikiti nya iLibanọn bala iMisirefotu-mayim. Am lịlọm ka kwaa hi ẹga ha ala Isirẹlụ. Aa ga ọpyị ọwẹ ha ala Isirẹlụ kpẹẹkpẹẹ jaabwọ kam dang ehile mẹ.

⁷Lẹẹlẹ, aa ga ọpyị ọwẹ ha imwawụ ịhịkịchụ bala ẹhya nya imwawụ nya ịManasẹ nya ọpyị nya ụbwọ nya ịlaa mẹ.”

⁸Alimwawụ nya iRubẹn bala alimwawụ nya ịGadị bala ẹhya nya imwawụ nya ịManasẹ ye ọpyị ọlẹ ka iMosisi ọnchẹ nya Amkpaa ya haa ene-ene lẹ. Ọpyị ọọwa ji ọmwẹnụ-ụtụrụ nya Ihu ịJọdan.

⁹Ọpyị nyaa dọmwụ bwu Aroyẹẹ ọ-ọnụ nya Ọkpọọ nya Anọn tụ epweji ọlẹpwarịrị nya ọkpọọ ọwẹ bala ọpẹẹpẹẹ nya ọpyị ogedee nya iMedeba gbee ka pwụ iDibọn.

¹⁰Epweji ịlẹ wuu ká adịrahụ iSihọn nya ala Amọ kpẹhị rịrị ụka kọ kụ ị-ịHẹchịbọn ji ẹpwụ nya ọpyị ọwẹ ịnyịnyị. Ọpyị nyaa ọwẹ jẹ gbee ka pwụ oyi nya Amọn.

¹¹IGiliyadị bala ọpyị nya iGechu bala ịMaaka bala Ọgbọdọ nya ịHẹẹmọn wuu bala ịBachan wuu lalaala ka ju ka ịSalẹka ji ẹpwụ nya ọpyị nyaa ọwẹ.

¹²Ọpyị nya adịrahụ Ọọgụ o-ku nya ala iRefa wuu ọlẹ kọ hụ Achịtarọtụ bala Edireyii ri adịrahụ ji ẹpwụ nya ọpyị nyaa ọwẹ ịnyịnyị. IMosisi lẹẹ kụrụ angịwẹ kpụ ọ kwaa rụ wuu.

¹³Ala Isirẹlụ-ụ́ tị ku ala iGechu bala ala ịMaaka rụ ka. Lẹẹlẹ, ị hi kụ ụ-ụwa Isirẹlụ daalẹ.

¹⁴IMosisi á ga ọpyị ọhẹ ha alimwawụ nya iLivayị ka. Ang odudu ri Amkpaa byi iMosisi ene ya ebwo ọhẹ nya ang ịlẹ kị nyị kpa kaka kịla iya ogidi ha Amkpaa Ohe Oluhye nya ala Isirẹlụ nyị ka ri nya ala iLivayị.

¹⁵IMosisi ga ọpyị ha ugbiyegu ọnyọnyọọnyị nya alimwawụ nya iRubẹn.

¹⁶Ọpyị nyaa ọwẹ jẹ bwu Aroyẹẹ ọ-ọnụ nya ọkpọọ nya Anọn bala epweji ọlẹpwarịrị nya ọkpọọ ọwẹ lalaala ka pwụ ọpyị ọpẹẹpẹẹ nya ogedee ịdagaga ju iMedeba wuu.

¹⁷Ẹga ịkịla ịlẹ kị ji ẹpwụ nya ọpyị nya ọọwa ri ịHẹchịbọn bala epweji ịlẹ wuu kị kụ ụtẹẹji ká ẹnyị nyaa ri iDibọn bala ịBamotu-baalụ bala ịBẹtị-ịbaalụmyọn

¹⁸bala ịJahasị bala iKedemotu bala ịMẹfaatị

¹⁹bala iKiriyatayịm bala iSibuma bala ịSẹrẹtị-chaha ọlẹ kọ kụ i-ikiti ka uhye nya ọkpọọ ọwẹ

²⁰bala ịBẹtị-ịpẹyọ bala ọpwọpwọ nya Ọgbọdọ nya iPisiga bala ịBẹtị-ijechimotu.

²¹Ẹga ịkịla ịlẹ ji ẹpwụ nya ọpyị nya imwawụ nya iRubẹn ịnyịnyị. Epweji ị-kụ ọpẹẹpẹẹ nya ogedee wuu bala ọpyị nya iSihọn adịrahụ nya ala Amọ ọlẹ kọ hụ ị-ịHẹchịbọn. IMosisi kụrụ adịrahụ ọwẹ bala alegbeju nya iMidiyan ịkpẹhị rịrị họọ ịlẹ ká ẹnyị nyaa ri Evi bala iRekem bala iSu bala iHu bala iReba.

²²Ala Isirẹlụ nwụ ịBẹlam olugono ọnyị nya ịBẹyọọ ịnyịnyị.

²³Ihu ịJọdan a ri oyi ọlọmwẹnụ-obyi nya ọpyị nya imwawụ nya iRubẹn lẹ. Epweji ịwẹ a ri ịlẹ kị ya ha ugbiyegu ilimwawụ nyaa nya ọpyị nya ịlaa lẹlẹ.

²⁴IMosisi ga ọpyị ha ugbiyegu ọnyọnyọọnyị nya alimwawụ nya ịGadị ịnyịnyị.

²⁵Ọpyị nyaa ịwa ri ịJasẹẹ bala epweji ịla iGiliyadị wuu bala ẹhya nya ọpyị nya Amọn kele ka pwụ Aroyẹẹ ọ-ọmwẹnụ-ụtụrụ nya ịRaba.

²⁶Ọpyị nya imwawụ nya ịGadị ọwẹ bwu ịHẹchịbọn e-edii kele ka ịRamatị-ịMisipe bala ịBẹtọnim lalaala ka pwụ ịMahanayim ọ-ọnụ nya iLodẹba[10].

²⁷Ọpyị nya ịGadị ọlẹ kọ ji ọkpọọ nya ịJọdan ri ịBẹtị-ịharam bala ịBẹtị-ịnimrah bala iSukotu bala ịSafọọn tụ ohihi nya ọpyị nya iSihọn Adịrahụ nya ala ịHẹchịbọn. Ọbaba ọlọmwẹnụ-obyi nya ọpyị nyaa ri ịJọdan. Ọbaba ọlẹtẹ jẹ pwụ Ihu ọkịlọlọ nya ịGalili.

²⁸Epweji ịwẹ a ri ịlẹ kị ya ha ugbiyegu ilimwawụ nya ịGadị nya ọpyị nya ịlaa lẹlẹ.

²⁹IMosisi ga ọpyị ha ugbiyegu ọnyọnyọọnyị ọlẹhya nya imwawụ nya ịManasẹ.

³⁰Ọpyị nyaa dọmwụ bwu ịMahanayim. ỊBachan wuu tụ ọpyị ọlẹ ká Ọọgụ Adịrahụ nya ala ịBachan kpẹhị rịrị wuu ji ẹpwụ nya ọpyị nyaa. Epweji iwọ ịrwọnyẹ (60) nya ịJayii ọ-ọpyị nya ịBachan ri ọpyị nyaa ịnyịnyị.

³¹Ẹga ịkịla ịlẹ kị ri ọpyị nyaa ri ẹhya nya iGiliyadị tụ Achịtarọtụ bala Edireyii ịlẹ kị ri ẹpwa-ụtụrụ nya Ọọgụ Adịrahụ nya ala ịBachan. Ị ya epweji ịwẹ wuu ha ẹhya nya ugbiyegu ọnyọnyọọnyị ịlẹ kị ri anyị ịtụma nya ịMakii ọnyị nya ịManasẹ.

³²Ịịwẹ iMosisi a ga ọpyị ọlọmwẹnụ-ụtụrụ nya iJeriko bala ịJọdan ha imwawụ nya ala Isirẹlụ ụka kọ juwa ọ-ọkpọọ nya iMowabụ lẹlẹ.

³³IMosisi-í tị ga ọpyị ọhẹ-lọhẹ ha imwawụ nya iLivayị ka. Ọ byaa ya jaabwọ ká Amkpaa nyị myị ọnụ haa lẹ, ang ọlala nyaa ịwa nyị ka ri ebwo ọhẹ nya ang ịlẹ kịị nyị ya kịla iya ha Amkpaa Ohe Oluhye nya Isirẹlụ.