Read idege IJOCHUWA 14 Bible Online

IJOCHUWA 14 - idege bible

IJOCHUWA 14

¹Ọlẹ ri jaabwọ ká iJochuwa ọnyị nya iNun bala Eliyesa ọngọkiliya bala alegbeju nya ugbiyegu nya ala Isirẹlụ bwu ga ọpyị nya iKenan ọlọmwẹnụ-obyi nya ịJọdan. Ị ga ọpyị ọọwa kpẹẹkpẹẹ gịla ala Isirẹlụ.

²Ị ga ọpyị nya alimwawụ ihikichu ba ẹhya nya ala Isirẹlụ haa bwula iwo ọdada jaabwọ ká Amkpaa da iMosisi ehile neeji ene.

³IMosisi lẹẹ ya ọpyị ọlọmwẹnụ-ụtụrụ nya ịJọdan ha imwawụ imiiye ba ẹhya ene lẹ. Anyị ịtụma nya iJosẹfụ ayịdang lẹẹ gu ene ri imwawụ nya ịManasẹ bala imwawụ nya Ifurem. Ọ́ tị ga ọpyị ọhẹ-lọhẹ ha imwawụ nya iLivayị ka. Ẹga kị ga haa kẹnẹ-kẹnẹ ri epweji ịlẹ kị kụ bala ẹga kị ka kpa ịkpịlọ bala ịna nyaa ri.

⁵Ala Isirẹlụ ga ọpyị ọwẹ kpẹẹkpẹẹ jaabwọ ká Amkpaa da iMosisi ehile.

⁶Ẹnẹhẹ lẹ, angịhyẹ nya ala iJuda a wẹ ẹga nya iJochuwa lẹ, ịKalẹbụ ọnyị nya iJefune ologang nya ịKẹnẹsị a byoo yẹkẹẹ, “À tị́ kpịtịya nya ẹla ọlẹ ká Amkpaa ya ị-ịKadẹchị-ịbaniya ta iMosisi ọngịnyị nya Ohe Oluhye chajị nyam bala ahụ wẹ́ẹ̀.

⁷M̀ gu ẹka iwo ine (40) ụka ká iMosisi ọnchẹ nya Amkpaa dum ẹrụ bwu ịKadẹchị-ịbaniya kaka wụla ọpyị nya iKenan ọlẹ yẹ. M̀ kpa ẹla nya ịlẹhị nyà kaka ya joo kpẹẹkpẹẹ.

⁸Ma, alẹdịyẹ nyam ịkịla tị kpa ẹla ọ-kpụ ọkịlẹtụ enyi kaka ya je alịnyahị du ká ọhụ-ụ́ baa e-eji ka. Am tị ju Amkpaa Ohe Oluhye nyam ihi lọkịlẹtụ nyam wuu.

⁹Ẹnẹwẹ iMosisi myị ọnụ ham yẹkẹẹ, ‘Ajị nyọlẹ ká ju ihi nya Amkpaa Ohe Oluhye nyam kpẹẹkpẹẹ ịịwẹ lẹ, ọpyị ọlẹ ká jẹ tụda-à wẹ ka ri nyang bala anyị ịtụma nyang pyịyọọ.’

¹⁰À tị́ yẹ-ẹ̀ wẹ lẹ. Ọ gu ẹka iwo ine kụrụ ịrụ (45) nyọlẹ ká Amkpaa ya ẹlẹwẹ ta iMosisi lẹ. Bwu ụka ọwẹ wuu ká alịnyahị wẹẹ ga tụ ugbileji da, Amkpaa chị ọhịhị nyam da gbee daalẹ. M̀ gu ẹka iwo ineku kụrụ ịrụ (85) lẹ!

¹¹M̀ tị la kpịra-kpịra jaabwọ kam la lụka ká iMosisi dum ẹrụ ọọwa wẹ́ẹ̀. Ó-ri ẹwụ ri, m̀ ka da myị wẹ́ẹ̀.

¹²Lẹẹlẹ, ya ọpyị olikiti ọlẹ ká Amkpaa myị ọnụ ẹnụ ọọwa lẹẹ ham mẹ. À tị́ kpịtịya jaabwọ kahị tịrọnụ ya jeng lẹẹ ya ịmaga ịlẹ kị wụrụ ala Anakị kụ ẹgẹwẹ. Epweji nyaa ri ịtụka ri, ị me egwalọ dagaga jwaa ịnyịnyị. Ọ́ tị ri ká Amkpaa-á dam ụbwọ, m̀ ka kwaa rụ hi ọpyị ọwẹ myị jaabwọ kọ ya.”

¹³Ọọwa, iJochuwa-à họpyẹẹ kụrụ ịKalẹbụ lẹ, ọ ya epweji nya iHebirọn ha ịKalẹbụ nya ọpyị nya ịlọmwụ lẹlẹ.

¹⁴IHebirọn ọwẹ ri ọpyị nya anyị ịtụma nya ịKalẹbụ ọnyị nya iJefune ọla iKenasị bwu ụka-ụka ọwẹ chajị ịKalẹbụ ju ihi nya Amkpaa Ohe Oluhye nya ala Isirẹlụ lọkịlẹtụ nyamwụ wuu.

¹⁵Ene nya ụka ọwẹ lẹ, ẹnyị nya iHebirọn ọwẹ ri epweji nya Aba. Aba ọlẹ kị ya epweji ọwẹ wụrụ à ri ọmaga ọgụgụ wuu lẹpwụ nya ala Anakị lẹlẹ. Ọọwa, ọpyị a kpunyi lẹlẹ.