Read idege IJOCHUWA 16 Bible Online

IJOCHUWA 16 - idege bible

IJOCHUWA 16

¹Oyi nya ọpyị ọlẹ kị ga ha anyị ịtụma nya iJosẹfụ dọmwụ bwu Ihu ịJọdan ba iJeriko ba ka ọmwẹnụ-ụtụrụ nya ẹmwụ-enyi ịlụwa. Ọ bwu ẹgẹwẹ kpoye nya ugbileji kele ka pwụ ọpyị olikiti nya ịBẹtẹlụ.

²Ọ bwu ịBẹtẹlụ kele ka iLusi ẹga ọlẹ kọ bwu kpoye ka Atarọtụ-ada ẹ-ẹga ka alogang nya Aki kụ lẹlẹ.

³Ọ yahị da dàa ka ọmwẹnụ-obyi ka pwụ ọpyị nya alogang nya ịJafụlẹtị lalaala ka ju ka ịBẹtị-ịhọrọn oleji bala ịGẹsẹẹ kaka ba Ihu nya ịMeditireniya.

⁴Ọpyị ọlẹ ká ala Ifurem bala ala ịManasẹ anyị ịtụma nya ịJosẹfụ ye nya ọpyị nya ụbwọ nya ịlaa à wẹ lẹlẹ.

⁵Ịịlẹ ọpyị nya ala Ifurem à la jaabwọ kị ya haa ogang-ogang lẹ. Oyi oledii nyaa jẹ bwu ọmwẹnụ-ụtụrụ nya Atarọtụ-ada lalaala ka ju ka ịBẹtị-ịhọrọn Oluhye.

⁶Ọ bwu ẹgwẹ kaka pwụ Ihu nya iMeditareniya. Epweji nya iMikimẹtatị ji ẹtẹ nya ẹgẹwẹ. Oyi ọwẹ yẹ kịnọbọ yahị da ka ịTaanatị-ichilo ọ-ọmwẹnụ-ụtụrụ lẹ, ọ kpoye kaka pwụ ịJanowa ọ-ọmwẹnụ-ụtụrụ lẹlẹ.

⁷Ọ yẹ dàa bwu ịJanowa kele ka Atarọtụ bala ịNaara, kpa ịnyịrọ ka hị́ iJeriko kaka cheji ị-ịJọdan.

⁸Oyi ọwẹ bwu ịTapụwa yahị da ka ọmwẹnụ-obyi kele ka ọ̀bá nya ịKana lalaala ka ba Ihu nya iMeditareniya. Ọwẹ à rị ọpyị ọlẹ kị ya ha ala Ifurem ogang-ogang nya ọpyị nya ụbwọ nya ịlaa lẹlẹ.

⁹Ala Ifurem la epweji ịtụka bala ichiche ịhyẹ ịkịla ịlẹ kị kụ ọ-ọpyị nya ala ịManasẹ kị tị waa haa ịwa ala Ifurem ịnyịnyị.

¹⁰Ị́ tị ku ala iKenan ịlẹ kị ku ị-ịGẹsẹẹ rụ ka. Lẹẹlẹ, ala ịKenan hi kụ ụ-ụwa ta ala Ifurem kịlahị-ịlahị. Ị tị yẹ ala iKenan ịwẹ la anyịhị nya ịlaa kaa kpaa họ ụkụrwọ nya igwabwọ ọnyọọngịrị ọnyị myị ọnyị kọ háa.