Read idege IJOCHUWA 17 Bible Online

IJOCHUWA 17 - idege bible

IJOCHUWA 17

¹Ị ga ụpa nya ọpyị ọlọmwẹnụ-obyi ha alogang ịhyẹ ilimwawụ nya ịManasẹ ọnyị ọgbahị nya iJosẹfụ. ỊMaki adịda nya iGiliyadị à ri ọnyị ọgbahị nya ịManasẹ lẹ. ỊMaki ọọwa ayịdang ri ọgẹwụ. Lẹẹlẹ, iJochuwa ya epweji nya iGiliyadị bala ịBachan ịlọmwẹnụ-ụtụrụ nya ịJọdan họọ.

²Ị ya ọpyị ọlọmwẹnụ-obyi ha alogang ihihi nya imwawụ nya ịManasẹ. Alogang ịịwa ri Abiyesẹẹ bala ịHẹlẹkị bala Asirẹlụ bala iChekem bala ịHẹfa bala iChemida. Angịwẹ wuu à ri anyị ịtụma alẹng ịkịla nya ịManasẹ ọnyị nya iJosẹfụ jaabwọ kị la ogang-ogang nyaa lẹlẹ.

³ỊMakii ọnyị nya ịManasẹ ma ọnyị ọlẹ kị wụrụ iGiliyadị, kọ ri adịda nya ịHẹfẹẹ. ỊHẹfẹẹ ma iSelofẹhadị. ISelofẹhadị ọlẹ-ẹ́ tị ma ọnyị ọlẹng ọhẹ-lọhẹ ka. Anyị anyang angị ịrụ kem ọ ma lẹ. Ẹnyị nyaa ri ịMala bala iNuwa bala ịHọgịla bala iMilika bala iTiisa.

⁴Anyang ịwẹ kele ka ẹga nya Eliyesa ọngọkiliya bala iJochuwa bala ịgabwọ kaka byaa yẹkẹẹ, “Amkpaa byi iMosisi ya nyị ga ọpyị hahị lala aanahị alẹng.” Ọọwa, ị ga ọpyị haa lala aanaa alẹng jaabwọ ká Amkpaa da ehile neeji lẹlẹ.

⁵Lẹẹlẹ, imwawụ nya ịManasẹ la ọpyị ebwo iwo datị hi iGiliyadị bala ịBachan kị ji ọmwẹnụ-ụtụrụ nya ịJọdan,

⁶chajị ị ga ọpyị ha anyị ịtụma anyang bala alẹng nyaa. Ị ya ọpyị nya iGiliyadị ha anyị ịtụma ihihi nya ịManasẹ.

⁷Ọpyị nya ịManasẹ bwu Achẹẹ ka pwụ iMikimẹtatị ọ-ọmwẹnụ-ụtụrụ nya iChekem. Oyi nyaa yahị da ka edii ka dọgịlẹ ju angịlẹ kị kụ ịTapụwa.

⁸Ọpyị o-bwu ịTapụwa ri nya ịManasẹ ma, epweji nya ịTapụwa mịlẹ-mịlẹ ọlẹ kọ ji ọbaba nya ịManasẹ tị ri nya imwawụ nya Ifurem.

⁹Oyi jẹ bwu ẹgẹwẹ yahị da ka edii ka ọ̀bá nya ịKana. Epweji iledii nya ọ̀bá ọwẹ ịhyẹ juwa kị ri nya ala Ifurem, kị tị kụ ọ-ọpyị nya ịManasẹ. Oyi nya ọpyị nya ịManasẹ jẹ tụ oye ọlẹtẹ nya ọ̀ba da gbee ka cheju Ihu nya iMeditareniya.

¹⁰Ifurem kụ ka edii. ỊManasẹ kụ ka ẹtẹ. Ihu ọtụka nya iMeditareniya à ri oyi ọlọmwẹnụ-obyi nyaa lẹ. Achẹẹ kụ ịkpịla ọlapewa nya ẹtẹ bala ọmwẹnụ-obyi. Isakaa tị kụ ịkpịla ọlapewa nya ẹtẹ bala ọmwẹnụ-ụtụrụ.

¹¹Ịnọ imwawụ nya ịManasẹ la epweji ịhyẹ ẹ-ẹpwụ nya ọpyị nya Isakaa bala Achẹẹ. Epweji ịịwa ri ịBẹtị-ịchan bala Ibiliyam tụ epweji ichiche ịdagaga jwaa bala ịDọọ ọlọnụ enyi bala Ẹndọọ bala ịTaanakị bala iMegido bala epweji ịdagaga jwaa.

¹²Ala ịManasẹ-ẹ́ tị ku angị kụ epweji ịwẹ rụ myị ka. Lẹẹlẹ ala iKenan ịlụwa kịnyaa la ọ-kụ ụwa kịlahị-ịlahị.

¹³Ụka ká ala Isirẹlụ lọngịrị la lụmẹ lẹ, ị́ kwaa rụ ka. Ọkẹnẹ-kẹnẹ ri ị kpa ala iKenan ịwẹ họ ụkụrwọ nya igwabwọ ha ịlaa.

¹⁴Anyị ịtụma nya ịJosẹfụ tọ iJochuwa wo ẹnẹhẹ yẹkẹẹ, “Ịyẹ tị́ du ka ya ebwo nya ọpyị ookpokpo kẹnẹ-kẹnẹ hahị nya ọpyị nya ụbwọ nya ịlọhị-ị̀? Yẹ-ẹ̀ wẹ wẹẹ̀, Ahị ju iru lụmẹ, chajị Amkpaa wahị kụrụụhị lụmẹ-lụmẹ lẹ.”

¹⁵Ọọwa, iJochuwa à wẹ byaa yẹkẹẹ, “Ó-ri kanụ ju iru lụmẹ du ká ikiti ịlọpyị nya Ifurem á nwanụ kaka lẹ aalẹ, anụ tị tị kele ka ipyinu kanụ nwụla eji ha ịlọnụ ọ-ọpyị nya ala iPerisi bala ala iRefa mẹ.”

¹⁶Ọọwa, ị wẹ yẹkẹẹ, “Ọpyị olikiti-í nwahị kaka. Ala iKenan ịlẹ kị kụ ụtẹẹji dagaga ju ịBẹtị-ịchan bala alọkpọọ nya iJesiryẹlụ wuu tị la ang ịrụnyẹ iloje-oje ị-kpa dẹwụ.”

¹⁷Ọọwa, iJochuwa à wẹ byi alimwawụ nya Ifurem bala ịManasẹ ịlọmwẹnụ-obyi yẹkẹẹ, “Anụ ju iru lụmẹ ịlẹhị, anụ tị lọngịrị lụmẹ ịnyịnyị. Ánụ ka la ebwo nya ọpyị ookpokpo kem ka.

¹⁸Anụ ya ipyinu olikiti wuu la bọọ mẹ. Anụ nwụla eji nyamwụ ha ịlọnụ gu ọka gu ọka mẹ. Ala iKenan ịwẹ tị lẹ, ị la ang ịrụnyẹ iloje-oje ị-kpa dẹwụ kpá odu ịnyị, anụ ka kwaa rụ hi ẹga ha ịlọnụ myị ịnyịnyị.”