Read idege IJOCHUWA 18 Bible Online

IJOCHUWA 18 - idege bible

IJOCHUWA 18

¹Ụka ká ala Isirẹlụ ye ọpyị ohihi kpá, ị kele ka tụguru i-iChilo. Ọọwa, ị ya Ọdụ nya Amkpaa yeji ụ-ụwa lẹlẹ.

²Ụka ọwẹ, imwawụ irwiye nya ala Isirẹlụ hi kị ga ọpyị ha lẹka.

³Ọọwa, iJochuwa à tọ alimwawụ ịwẹ wo yẹkẹẹ, “Anụ tị́ juwa dayị gbe ụka oyina ene kanụ ka kele ka nu ọpyị ọlẹ ká Amkpaa Ohe Oluhye nya adanụ igogo ya hanụ-ụ̀?

⁴Anụ chụ alẹng angị ịtịtịịta ham bwu imwawụ ọnyị myị ọnyị mẹ. M̀ ka daa kpehe kaka wụla ọpyị ọlẹ wuu yẹ. Ị ka yẹ oyi nya ọpyị ọlẹ kọ ka ri nya imwawụ ọnyọnyọọnyị nyaa bala ọ-daa ju lẹlẹ. Ọọwa, ị ka nyà tịrẹkpẹ lẹlẹ.

⁵Ị ka ga ọpyị ọọwa ebwo irwiye. Ala ịJuda ka kpa ọpyị oledii nyaa ụ-ụwa. Ala iJosẹfụ tịtị ka kpa ọpyị ọlẹtẹ nyaa ụ-ụwa.

⁶Ụka kanụ da ju kpẹẹkpẹẹ jaabwọ ká ọnyọnyọọnyị nya ebwo irwiye nya ọpyị ọwẹ ka la lẹ, anụ kpa wam mẹ. Ọọwa, m̄ ka da iwo hanụ nyọka jẹ irya nya Amkpaa Ohe Oluhye nyahị lẹlẹ.

⁷Ala iLivayị lẹ, ịwa-á ka la ebwo nya ọpyị ọhẹ kpịlọ kaka, chajị ang ọlẹ kị la ri iwe-ahụrụ ọlẹ ká Amkpaa ya haa nyọka ri angịkiliya họọ. Alimwawụ nya ịGadị bala iRubẹn bala ẹhya nya imwawụ nya ịManasẹ anyị la ọpyị nyaa ịwa ọ-ọmwẹnụ-ụtụrụ nya Ihu ịJọdan lẹ. IMosisi ọnchẹ nya Amkpaa-à ya ọpyị ọọwa haa lẹ.”

⁸Ene ká alẹng ịwẹ ka yegiri, iJochuwa byaa yẹkẹẹ, “Anụ ju ọpyị ọwẹ ata wuu, kanụ yẹ oyi nyamwụ wuu kanụ dọọ ju ene kanụ ka nyà wẹ ẹga nyam mẹ. Ọọwa lẹ, m̄ ka da iwo hanụ ám̀ i-iChilo nyọka jẹ irya nya Amkpaa lẹlẹ.”

⁹Ọọwa lẹ, alẹng ịwẹ à ju ọpyị ọọwa ata lẹ, ị da ju jaabwọ ká epweji ọnyọnyọọnyị la e-ebwo irwiye ịlẹ kị ga ọpyị ọwẹ lẹlẹ. Ọọwa, ị nyà ka ẹga nya iJochuwa i-iChilo lẹlẹ.

¹⁰IJochuwa da iwo haa nyọka jẹ jaabwọ ká Amkpaa tịtọ kị ka bwu ga ọpyị ọwẹ. Lẹ, ọ ga ọpyị ọọwa ha imwawụ ihihi nya ala Isirẹlụ lẹlẹ.

¹¹Ị ga ebwo ọhọhẹ-họhẹ nya ọpyị ọwẹ ha ogang datị-datị ilimwawụ nya iBenjamịn. Ọpyị nyaa ji apewa nya ọpyị nya imwawụ nya iJuda bala imwawụ nya iJosẹfụ.

¹²Oyi ọlẹtẹ nya ọpyị nyaa dọmwụ bwu Ihu ịJọdan yahị da ka ikiti ọlẹtẹ nya iJeriko. Ọ yahị da ka ọmwẹnụ-obyi tụ ọpyị olikiti da lalaala ka ju ka ugbileji nya ịBẹtavịn.

¹³Ọ kpoye bwu ẹgẹwẹ koye oledii nya epweji nya iLusi ọlẹ ká ẹnyị ọkịla nyamwụ ri ịBẹtẹlụ. Ọ jẹ yahị da weji wẹ Atarọtụ-ada ọ-ọgbọdọ oledii nya ịBẹtị-ịhọrọn Oleji.

¹⁴Oyi nya ọpyị nyaa yẹ hyàa bwu ịkịka ọlọmwẹnụ-obyi nya ọgbọdọ oledii nya ịBẹtị-ịhọrọn ọwẹ yahị da ka edii gbee ka pwụ epweji nya alimwawụ nya iJuda ọlẹ kị wụrụ iKiriyatị-ịBaalụ ọlẹ ká ẹnyị ọkịla nyamwụ ri iKiriyatị-ịJarim. Ẹgẹwẹ à ri oyi ọ-ka ọmwẹnụ-obyi nyaa lẹlẹ.

¹⁵Oyi oledii nya ọpyị nyaa dọmwụ bwu ọnụ nya epweji nya iKiriyatị-ịJarim kele[12] ka pwụ ụgbụ nya enyi nya iNefutowa.

¹⁶Oyi ọwẹ yahị da dàaa bwu ọmwụ nya ọgbọdọ ọlẹ kọ jahị da Ọkpọọ nya iHinọm o-oye ọlẹtẹ nya Ọkpọọ nya ala iRefa. Ọ bwu ẹgẹwẹ tụ Ọkpọọ nya iHinọm da ka edii nya ikiti ọlẹ ka ala iJebusi kụ. Ọọwa, ọ kịnyaa lalaala ka ju ka Ẹnrogẹlụ lẹlẹ.

¹⁷Ọọwa, oyi ọwẹ à yẹ kị̀nọbọ yahị da ka ẹtẹ kele ka ju ka Ẹnchẹmẹchị lẹ, ọ kpoye bwu ụwa kele ka iGelilotu ọlẹ kọ jahị da ẹga Ọchịpwụrụ bwu ọla Adumim lẹlẹ. Ọ yẹ dàaa ka pwụ Ẹjwọ nya iBohan ọnyị nya iRubẹn.

¹⁸Oyi ọwẹ bwu ẹgẹwẹ kele yahị da ka ẹtẹ nya ikiti ọlẹ kọ jahị da Ọkpọọ nya ịJọdan. Ọọwa, ọ yẹ dàaa ka ju ka ọkpọọ ayịdang lẹlẹ.

¹⁹Ọ bwu ẹgẹwẹ ka ẹtẹ nya ikiti nya ịBẹtị-ịhọgịla lẹ, ọ hyehe ẹ-ẹga ká Ihu iJọdan behụrụ Ihu Ọlịma-ịma koye nya ẹtẹ lẹlẹ. Ọwẹ à ri oyi oledii lẹlẹ.

²⁰Ihu ịJọdan à ri oyi ọlọmwẹnụ-ụtụrụ nya ọpyị nyaa lẹ. Ịwẹ à ri oyi nya ọpyị ọlẹ kị ga ha ogang datị-datị ilimwawụ nya iBenjamịn lẹlẹ.

²¹Epweji ịlẹ kị ri nya imwawụ nya iBenjamịn ri iJeriko bala ịBẹtị-ịhọgịla bala Ẹmẹkị-ịkẹsisi bala

²²ịBẹtị-araba bala ịSẹmarayịm bala ịBẹtẹlụ bala

²³Avim bala ịPara bala Ọfụra bala

²⁴ịKẹfaramoni bala Ofini bala ịGẹba. Ebwo ọhọhẹ ọwẹ la epweji iwo kụrụ imiiye gbẹgbịlẹ tụ epweji ichiche ịdagaga jwaa.

²⁵Ebwo nya epweji nyaa ịkịla ri iGibyọn bala ịRama bala iBiyerotu bala

²⁶iMisipe bala iKefira bala iMosa.

²⁷Epweji ịkịla ri iRekem bala Irepyiilu bala ịTarala bala

²⁸iSela bala ịHalẹfụ bala iJebusi ọlẹ kị wụrụ iJerusalẹm bala iGibiya bala iKiriyatị-ịjarim. Ebwo ọlẹ wuu la epweji iwo kụrụ ine tụ epweji ichiche ịdagaga jwaa. Ọpyị ọlẹ kị ga ha ogang datị-datị ilimwawụ nya iBenjamịn à wẹ lẹlẹ.